Jesus and His Disciples [Si Jesus ug ang Iyang mga Disipulo], © Balage Balogh/Art Resource, NY

Hulyo 23

Unsa ang Kahulogan nga Mahimong usa ka Disipulo ni Jesukristo?

Mga Buhat 10–15

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Giunsa nato pagkakita sa kamot sa Ginoo diha sa atong mga kinabuhi?

• Mag-atiman alang niadtong nanginahanglan. Unsaon nato sa pagsuporta ang matag usa diha sa mga butang nga atong gisagubang?

• Magdapit sa tanan sa pagdawat sa ebanghelyo. Sa unsa nga paagi kita mas makagamit sa teknolohiya isip usa ka himan sa pagpakigbahin sa ebanghelyo?

• Maghiusa sa mga pamilya alang sa kahangtoran. Unsa ang atong gibuhat sa pagtabang sa atong mga pamilya nga moduol ngadto ni Kristo?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang Kapitulo 11 sa Mga Buhat nagtimaan nga sa unang higayon “ang mga disipulo gitawag og mga Kristiyanos” (bersikulo 26). Kini usa ka sagradong pribilehiyo ug responsibilidad nga mailhan isip usa sa mga disipulo ni Kristo ug pagatawagon pinaagi sa Iyang ngalan. Sama sa gisulti ni Presidente M. Russell Ballard: “Kita ba nakaamgo kon unsa kita ka bulahan nga makadala ngari kanato sa ngalan sa Pinalangga ug Bugtong nga Anak sa Dios? Atoa bang nasabtan kon unsa ka importante kana? Ang ngalan sa Manluluwas mao lamang ang ngalan ubos sa langit diin ang tawo maluwas (“Ang Importansya sa Pangalan,” Liahona, Nob. 2011, 79).

Unsa ang kahulogan niini nganha kanimo nga mahimong usa ka Kristiyano––disipulo ni Jesukristo? Unsa ang kahulogan niini ngadto sa mga sakop sa imong klase o korum? Sa unsa nga paagi nga ang pagdala sa Iyang ngalan diha sa imong kaugalingon mag-impluwensya kanimo? Mahimo usab ikaw nga maghunahuna og mga panahon nga ikaw nadasig pinaagi sa ehemplo sa usa ka tawo kinsa milihok isip usa ka tinuod nga disipulo ni Kristo.

Samtang ikaw nangandam sa pagtudlo, agi og dugang sa pagbasa sa Mga Buhat 10–15, hunahunaa ang pagbasa og usa o dugang pa nga mga mensahe sa kinatibuk-ang komperensiya nga makaplagan diha sa “Suporta nga mga Kapanguhaan.”

Pagkat-on og Dungan

Sa pagtabang sa mga sakop sa imong klase o sa korum sa pagsabot kon unsa ang kahulogan nga mahimong usa ka disipulo ni Jesukristo, makadapit ka kanila sa paghuman sa mosunod nga pahayag: “Ang usa ka disipulo ni Jesukristo mao ang usa ka tawo kinsa …” Sila makarebyo sa Mga Buhat 11:19–26, mangita alang sa mga panabot diha sa mga bersikulo 21, 23–24, 26 mahitungod kon giunsa sa mga sakop niini nga Simbahan pagpakita nga sila mga disipulo. Sa unsang paagi nga ang pagkasumusunod ni Jesukristo mag-impluwensya sa atong mga hunahuna ug mga batasan? Mga kalihokan nga sama niini makadugang ngadto niini nga panaghisgotan.

• Kini makatabang sa paghisgot kon unsa ang usa ka disipulo ni Jesukristo (tan-awa ang pahayag ni Elder Robert D. Hales diha sa “Suporta nga mga Kapanguhaan”). Mahimong ikaw mangutana sa kabatan-onan sa pagpakigbahin og pipila ka mga pagtulon-an ni Jesukristo nga nagdasig kanila ug pipila ka mga butang nga ilang nakat-onan gikan sa Iyang ehemplo. Makasiksik sila og pipila ka mga kasulatan diha sa “Suporta nga mga Kapanguhaan,” o uban nga ilang nahibaloan, alang sa mga ideya. Makalista sila diha sa pisara kon unsa ang ilang nakat-onan mahtingod sa Manluluwas gikan sa mga tudling. Dayon sila makasulti mahitungod og mga paagi nga sila sinserong makasunod sa mga pagtulon-an ug mga ehemplo nga gilista diha sa pisara.

• Hangyoa ang mga sakop sa klase o sa korum sa paghunahuna kon unsa ang kahulogan niini nga mahimong usa ka Kristiyano. Makahimo sila og lista sa mga kalidad nga ilang gipaabot nga makaplagan diha sa kinabuhi sa usa ka tawo kinsa nagsunod ni Jessukristo (tan-awa, sama pananglit, sa Juan 13:34–35). Makabahin ka sa kabatan-onan ngadto sa duha ka grupo ug hangyoa ang kada grupo sa pagbasa sa mosunod nga mga mensahe nga mangita alang sa dugang nga mga kalidad nga ilang idugang sa ilang lista: Elder Terence M. Vinson, “Tinuod nga mga Disipulo sa Manluluwas” (Liahona, Nob. 2019, 9–11) ug Elder Massimo De Feo, “Tiunay nga Gugma: Ang Tinuod nga Timaan sa Matag Tinuod nga Disipulo ni Jesukristo” (Liahona, Mayo 2018, 81–83). Dapita ang kabatan-onan sa pagpamalandong og usa ka butang diha sa lista nga sila gusto nga ipalambo.

• Mahimo nimong pangutan-on ang mga sakop sa klase o sa korum kon unsa ang kahulogan ngadto kanila nga pagatawagon pinaagi sa ngalan ni Jesukristo. Tingali makahimo sila sa pagpakigbahin og mga kasinatian nga sila aduna sa dihang usa ka tawo nakahibalo nga mga miyembro sila sa Ang Simbahan ni Jesukristo sa mga Santos sa Ulahing mga Adlaw. Unsa ang atong bation mahitungod sa pagkanailhan isip mga sumusunod ni Jesukristo ug mga sakop sa Iyang Simbahan? Ang kabatan-onan makasuhid usab og pipila ka mga kasulatan o usa sa mga mensahe diha sa “Suporta nga mga Kapanguhaan,” mangita alang sa mga panabot nga nagdasig kanila sa pagpuyo sumala sa ngalan ni Jesukristo, diin sila midala diha sa ilang mga kaugalingon. Sa unsang paagi nga ang pagkatinawag pinaagi sa ngalan ni Jesukristo nakaapekto sa mga pagpili nga atong himoon?

Isip mga miyembro sa Simbahan ni Kristo, kita Iyang mga disipulo ug gitawag pinaagi sa Iyang ngalan.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mateo 5:38–47; 6:19–21; 7:1–5; 25:31–40; Lucas 10:25–37; Juan 13:34–35; 14:15 (Mga pagtulon-an ni Jesukristo)

• Mateo 4:1–11; Marcos 6:35–44; Lucas 4:16–19; 22:39–42; 23:33–34; Mga Buhat 10:38 (Ehemplo ni Jesukristo)

• Jeremias 15:16; Mosiah 5:7–15; Alma 46:12–15; 3 Nephi 27:3–8 (Pagdala sa ngalan sa Manluluwas diha sa atong mga kaugalingon)

• Lisa L. Harkness, “Pagtahod sa Iyang Ngalan,” Liahona, Nob. 2019, 60–62

• Paul B. Pieper, “Tanan Kinahanglan Gayod Modala diha Kanila sa Ngalan nga Gihatag sa Amahan,” Liahona, Nob. 2018, 43–45

• Mitudlo si Elder Robert D. Hales: “Unsa man ang buot ipasabot nga mahimong usa ka disipulo sa atong Ginoong Jesukristo? Ang usa ka disipulo mao ang usa ka tawo nga nabunyagan ug andam modala diha kaniya sa ngalan sa Manluluwas ug mosunod Kaniya. Ang usa ka disipulo naningkamot nga mahisama Kaniya pinaagi sa pagsunod sa Iyang mga sugo dinhi sa mortalidad, sama sa usa ka apprentice nga naninguha nga mahisama sa iyang agalon.

  “Daghang tawo ang nakadungog sa pulong nga disipulo ug naghunahuna nga nagpasabot lamang kini og ‘sumusunod.’ Apan ang tinuod nga pagkadisipulo usa ka kahimtang sa pagkatawo. Nagsugyot kini og labaw pa sa pagtuon ug paggamit sa usa ka lista sa indibidwal nga mga hiyas. Ang mga disipulo nagpakabuhi aron ang mga kinaiya ni Kristo mamahimong lig-on nga bahin sa ilang pagkatawo, sama sa usa ka espirituhanon nga kalig-on” (“Pagkahimong usa ka Disipulo sa Atong Ginoong Jesukristo,” Liahona, May 2017, 46).

Pagtudlo sumala sa Pamaagi sa Manluluwas

Isip usa ka magtutudlo, makaawhag ka og makadasig nga mga panaghisgotan nga gipalambo sa mga kasinatian ug mga pagpamatuod sa mga tigkat-on.