bunyag

Agosto 13

Unsaon Pagtabang ni Jesukristo Kanako nga Mausab?

Mga Taga-Roma 1–6

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita nagkaplag og hingpit nga kalipay pinaagi sa pagsunod ni Jesukristo?

• Mag-atiman alang niadtong nanginahanglan. Kinsa sa atong ward o komunidad ang nagkinahanglan sa atong tabang? Sa unsang paagi kita makatabang kanila?

• Magdapit sa tanan sa pagdawat sa ebanghelyo. Sa unsang paagi kita makatabang sa usag usa nga maandam alang sa misyonaryo nga pagserbisyo?

• Maghiusa sa mga pamilya alang sa kahangtoran. Sa unsang paagi kita makatampo sa mga paningkamot sa ward sa paghimo sa buhat sa family history ug sa templo?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

“Ang ebanghelyo ni Jesukristo usa ka ebanghelyo sa kausaban!” Nag-ingon si Presidente Russell M. Nelson (“Mga Desisyon alang sa Kahangtoran,” Liahona, Nob. 2013, 108). Sa samang paagi, gipasabot ni Apostol Pablo nga kon kita bunyagan, kita “managgawi diha sa kabag-o sa kinabuhi” (Mga Taga-Roma 6:4). Tungod ni Jesukristo, matag adlaw––dili lamang sa adlaw nga kita gibunyagan––makadala og “kabag-o sa kinabuhi” o usa ka higayon sa paglakaw og mas layo gikan sa sala ug mas mapaduol ngadto sa Dios. Ang pagpuyo diha sa ebanghelyo ni Jesukristo nagpasabot sa paghinulsol ug pagtubo nga mas mapaduol ngadto sa Dios––sa kanunay, usahay sa inanay––nahibalo nga ang atong mga paningkamot modala kanato ngadto sa usa ka hingpit nga kalipay.

Pamalandonga kon giunsa sa Manluluwas pag-usab kanimo ug sa mga tawo nga imong gitudloan. Unsaon nimo sa pagdawat og hingpit sa gahom sa Manluluwas sa pag-usab kanimo? Paghunahuna mahitungod niini samtang ikaw nagbasa sa Mga Taga-Roma 1–6 ug samtang ikaw nangandam sa pagtudlo. Mahimo usab nga imong rebyohon ang mensahe ni Presidente Russell M. Nelson nga “Kita Makabuhat og Mas Maayo ug Mahimong Mas Maayo” (Liahona, Mayo 2019, 67–69) o ang mensahe ni Sister Becky Craven nga “Imo na ang Sukli” (Liahona, Nob. 2020, 58–60).

Pagkat-on og Dungan

Alang sa pipila kanato, ang “managgawi diha sa kabag-o sa kinabuhi” nga si Kristo nagtanyag (Mga Taga-Roma 6:4) malisod nga mailhan tungod kay kini mahitabo sa hinay-hinay, samtang alang sa uban, kini nga kausaban mas dali nga mahitabo. Mahimo nimong dapiton ang mga sakop sa klase o sa korum sa pagpakigbahin kon unsa ang kahulogan sa “managgawi diha sa kabag-o sa kinabuhi” nganha kanila. Unsa ang pipila ka mga pulong ug mga hugpong sa mga pulong gikan sa Mga Taga-Roma 6 nga naghulagway sa atong mga kinabuhi nga aduna ug walay impluwensya sa Manluluwas? (Kon ang kabatan-onan magkinahanglan og tabang, sila makatan-aw diha sa mga bersikulo 6, 11, 22–23.) Unsay ubang mga pulong ug mga hugpong sa mga pulong nga kita makahunahuna? Unsaon sa Manluluwas pagtanyag kanato og tabang sa pag-usab? Ang mga kalihokan sama sa mosunod makadala kanato ngadto sa usa ka mas lawom nga panaghisgotan kabahin niini nga hilisgotan.

• Sa pagtabang sa klase o sa korum sa paghunahuna mahitungod sa kausaban nga ang Manluluwas makatabang kanila sa paghimo, dapita sila sa pagbasa sa katin-awan ubos sa “Hinulsol, Paghinulsol” diha sa Giya ngadto sa mga Kasulatan (scriptures.ChurchofJesusChrist.org). Makahimo usab sila sa paghisgot sa katin-awan ni Presidente Russell M. Nelson sa paghinulsol diha sa unang pito ka mga parapo sa iyang mensahe “Kita Makabuhat og Mas Maayo Pa ug Mahimong Mas Maayo.” Unsang importante nga mga kamatuoran ang atong makat-onan mahitungod sa paghinulsol gikan niini nga mga katin-awan? Mahimo usab nga imong hatagan ang klase o ang korum og panahon sa pagpamalandong sa lista ni Presidente Nelson sa mga butang nga gihangyo ni Jesus kanato nga usbon (diha sa ikalimang parapo sa iyang mensahe). Awhaga sila sa pagsulat og usa ka piho nga butang nga sila giaghat sa pag-usab. Pagpamatuod mahitungod sa gahom sa Manluluwas sa pagtabang kanato sa paghinulsol ug pag-usab.

• Miingon si Sister Becky Craven nga ang mga higala gikan sa iyang kagahapon usahay nag-ingon, “Wala gayod ikaw mausab!” Mahimo kang makigbahin sa mga komentaryo ni Sister Craven mahitungod niini (tan-awa sa “Imo na ang Sukli,” 59–60). Hangyoa ang mga sakop sa klase o sa korum sa paghanduraw nga sulod sa lima o napulo ka tuig, sila makasugat sa ilang mga higala kaniadto. Unsa nga mga kausaban ang mahimong klaro ngadto sa atong mga higala? Sa unsang mga paagi kita naglaom nga kita adunay kausaban? Unsaon sa hugot nga pagtuo diha ni Jesukristo makatabang kanato nga mausab? (tan-awa sa Mosiah 5:2–5, 7; Alma 5:11–13; Ether 12:27, o ang “nagpadayong sumbanan sa kausaban” nga gihulagway ni Sister Craven diha sa upat ka parapo sa iyang mensahe nagsugod sa “Sa bata-bata pa ako”). Mahimo nimong hangyoon ang kabatan-onan sa pagpakigbahin og bisan unsa nga mga kasinatian sa dihang gitabangan sila ni Jesukristo nga mausab.

• Usahay kita mahimong maghunahuna nga kita gipaabot sa paghimo og mga kausaban o kalamboan sa atong mga kinabuhi nga sa ato rang kaugalingon. Sa unsang paagi kini lahi gikan sa tinuod nga paghinulsol? Sa pagtabang sa imong klase o sa korum sa paghisgot niini nga pangutana, makarebyo ka uban sa mga pahayag diha sa “Suporta nga mga Kapanguhaan.” Unsa ang atong mabuhat karon sa pagpaningkamot sa tabang ug gahom sa Manluluwas aron nga ang atong mga kausaban mahimong permanente ug makalipay? Kini makahimo og maayong oportunidad alang sa kabatan-onan sa paghunahuna sa ilang personal nga mga tumong sa paglambo. Unsaon nato pag-apil sa Manluluwas sa atong mga tumong?

batan-ong mga babaye nga naglakaw

Ang hugot nga pagtuo diha ni Jesukristo nagtabang kanato sa paghinulsol ug paghimo nga mas mahisama Kaniya sa kada adlaw.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Si Presidente Russell M. Nelson mipasabot: “Makausab kita sa atong kinaiya. Ang atong mga tinguha mismo mausab. Unsaon? Adunay usa lang ka paagi. Ang tinuod nga kausaban—permanente nga kausaban—moabut lamang pinaagi sa makaayo, makalimpyo, ug makatubos nga gahom sa Pag-ula ni Jesukristo. Nahigugma Siya kaninyo—matag usa kaninyo! Nagtugot siya kaninyo nga makakuha og tabang sa Iyang gahom samtang kamo nagsunod sa Iyang mga sugo, sa madasigon, matinguhaon ug sa tukma nga paagi” (“Mga Desisyon alang sa Kahangtoran,” 108).

• Si Elder Dale G. Renlund mitudlo: “Ang gahom nga nagpahimo sa paghinulsol nga posible [mao] ang maulaong sakripisyo sa atong Manluluwas. Ang tinud-anay nga paghinulsol kinahanglang maglakip og hugot nga pagtuo diha ni Ginoong Jesukristo, hugot nga pagtuo nga makapausab Siya kanato, hugot nga pagtuo nga makapasaylo Siya kanato, ug hugot nga pagtuo nga tabangan kita Niya nga makalikay sa dugang pang mga sayop. Kini nga matang sa hugot nga pagtuo maghimo sa Iyang Pag-ula nga epektibo sa atong mga kinabuhi. Kon kita … ‘nakasabot pagkahuman’ [hinulsol] ug uban sa tabang sa Manluluwas, makabati kita og paglaom diha sa Iyang mga saad ug kalipay sa kapasayloan. Kon wala ang Manunubos, ang paglaom ug kalipay mawala, ug ang paghinulsol mahimo lang nga miserable nga pag-usab sa kinaiya. Apan pinaagi sa pagpakita og hugot nga pagtuo diha Kaniya, makabig kita sa Iyang abilidad ug kaandam nga mopasaylo og sala” (Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 122).

Pagtudlo sumala sa Pamaagi sa Manluluwas

Ang mga kalihokan dinhi niini nga latid nagsugyot og posible nga mga paagi sa pagtabang sa imong klase o sa korum sa pagkat-on og dungan mahitungod sa Manluluwas ug sa Iyang gahom sa pagtabang kanato nga mausab. Mahimong adunay ubang mga pamaagi nga mas moangay alang niadtong imong gitudloan. Sa mainampoong paagi tinguhaa ang giya sa Espiritu samtang ikaw magplano og mga paagi sa pagtukod og hugot nga pagtuo diha ni Jesukristo.