Veiyalayalati Vou 2023
Vakayagataki ni “Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa”


“Vakayagataki ni Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa,” Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa: Ulutaga Vakaivunau ni 2023 (2022)

“Vakayagataki ni Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa,” Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa: Ulutaga Vakaivunau ni 2023

iVakatakilakila
era wili ivolanikalou tiko na cauravou

Vakayagataki ni Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa

Na Cava na iNaki Eso ni Noda Soqoni ni Kalasi kei na Kuoramu?

Na Turaga e solia vei iko na veivakabauti tabu: E kacivi iko mo veiqaravi vaka mataveiliutaki ni kalasi ni Goneyalewa se na mataveiliutaki ni kuoramu ni Matabete i Eroni. E tiki ni nomu itavi mo liutaka ka qarava na nomu soqoni ni kalasi se kuoramu ena Sigatabu. Me caka oqo, ena veivuke ni kilaimatata na vuna eda sota kina ena veisoqoni oqo.

Na soqoni ni kalasi ni Goneyalewa kei na kuoramu ni Matabete i Eroni e duidui mai vei ira na kalasi ni Lotu me vaka na Wilivola ni Sigatabu se semineri. Ena soqoni ni kalasi se kuoramu eda vulica me baleta na cakacaka sa solia vei keda na Kalou, ka da cokonaki ira na lewe ni noda kalasi se kuoramu mera na cakava na cakacaka o ya ena noda veivale, ena Lotu, kei na noda itikotiko raraba. Ena veisoqoni oqo, eda sega walega ni veivosakitaka na cakacaka—eda tuvatuva me da vakayacora na noda itavi vaka tiki ni mataivalu ni itabagone ni Turaga, oka kina na veivuke me vakasoqoni o Isireli.

iVakatakilakila
ira na goneyalewa ena kalasi

Ena soqoni ni kalasi kei na kuoramu, eda tuvatuva meda vakayacora na noda itavi vaka tiki ni mataivalu ni itabagone ni Turaga.

Ia na vakabibitaki oqo ni cakacaka e sega ni kena ibalebale me qai caka ga na veivosaki vakaivunau ena Matawilivola ni Sigatabu. E dina sara, ni sa ka bibi na vulici ni ivunau ena kalasi ni Goneyalewa kei na soqoni ni kuoramu ni Matabete i Eroni—e vukea me vaqaqacotaka na noda veimaliwai kei Jisu Karisito, kila vinaka na ituvatuva nei Tamada Vakalomalagi, ka vakaitavi ena Nodrau cakacaka. Nida vulica vata na kosipeli, na dina eda vulica e rawa ni veisautaka na yaloda ka vukei keda meda kila na ivakarau me da cakacaka kina ena sala va-Karisito vakalevu cake. E rawa nida ciqoma na sala veivakauqeti eso meda tubu ena “vuku kei na yagoda talega, a sa vinakati keda vakalevu cake tikoga na Kalou kei ira na tamata” (Luke 2:52). Nida saumaki vakalevu cake vei Jisu Karisito kei na Nona kosipeli, eda na kunea na reki ka vakila na gagadre me da vukei ira na tani ena salatu ni veiyalayalati.

O Cei e Liutaka na Veisoqoni Oqo?

Sa kacivi iko na Kalou mo lewe ni mataveiliutaki ni kalasi kei na kuoramu ka solia vei iko na lewa mo veiliutaki. Oqori na vuna ena veisoqoni yadua ni nomu kalasi se kuoramu e dodonu me na liutaka e dua na lewe ni mataveiliutaki ni nomu kalasi se kuoramu. O ira na iliuliu qasecake e dodonu mera solia na veituberi kei na veitokoni, ia mera kakua ni taura mai vei iko. Raica na wase ka kena ulutaga na “Veivosaki Vata” ena itekivu ni ituvatuva yadua ena ivola oqo me baleta na vakasama eso ena vukei iko mo kila kina na sala me liutaki kina e dua na soqoni ka vakayacori rawa kina na kena inaki dina. Vakayagataka na bose ni mataveiliutaki mo tuvana kina na sala ko na liutaka kina na veisoqoni vaka oqo ena Sigatabu.

O Cei E Dodonu Me Vakavulica na Lesoni?

Na iliuliu qasecake, e dua na lewe ni mataveiliutaki ni kalasi se kuoramu, se dua ga na lewe ni kalasi se kuoramu e rawa ni vakavulica na lesoni. Vaka mataveiliutaki ni kalasi se kuoramu, veitalanoa vata kei ira na nomu iliuliu qasecake me baleta o cei e dodonu me lesi me vakavulica na lesoni. Nanuma tiko ni levu na ka era rawa ni cau kina na nomu iliuliu qasecake. Saga mo vuli mai na nodra kilaka kei na ivakadinadina. E tu talega na kena yaga nira kerei na itabagone mera veivakavulici—na veivakavulici ena rawa ni vakatitobutaka na nodra saumaki ka tara cake na veimaliwai vata kei ira na lewe ni kalasi se kuoramu tale eso. Okoya gona solia vei ira na madigi veiganiti mera vakavulica e dua taucoko se dua ga na tiki ni lesoni, ia mo nanuma tiko na nodra gagadre kei na rawa-ka na lewe ni nomu kalasi se kuoramu. Me kena ivakaraitaki, e rawa ni veivakavulici wasoma cake na iliuliu qasecake ena kalasi se kuoramu ka ra tiko kina na itabagone gone sobu se o ira na itabagone ka lailai nodra kila ena kena vakavulici na kosipeli. Nira sureti na itabagone mera veivakavulici, e dua na itubutubu se daunivakasala qasecake me na vukei ira mera vakavakarau me vaka e gadrevi.

O ira era lesi mera veivakavulici e rawa ni ra vakayagataka na wase ka kena ulutaga na “Vakatavulica na iVunau” ena ituvatuva yadua ni vurevure oqo me vukei ira me vakavakarau. Na wase oqo e tu kina na vakatutu eso ni veivakavulici kei na veivosakitaki ni ivunau ni macawa o ya, ia mera kakua ni yalani na qasenivuli ki na veivakatutu ga oqo. Ena veituberi ni Yalo, e rawa vei ira na qasenivuli me moica na veivakasama oqo se vakayagataka ga na nodra me veivakavulici ena sala ka na sotavi vakavinaka cake kina na nodra gagadre na lewe ni kalasi se kuoramu ka na vukei ira mera kila ka bulataka na ivunau.

Na Ulutaga Vakaivunau Cava Meda na Veivosakitaka ena Noda Veisoqoni?

Na ulutaga ni ituvatuva ni macawa yadua e ivakavuvuli vakaivunau ka sa digitaki oti me salavata kei na wiliwili ni Veiyalayalati Vou ni macawa oya, ka kunei ena Lako Mai, Mo Muri Au—Me Baleta na Tamata Yadua kei na Matavuvale. Ena sala oqo, na veivosaki vakaivunau ena kalasi se kuoramu ena tokona na veika era sa vulica tiko na itabagone mai vale.

Dina ga ni tiko na ituvatuva me vakavulici ena vei-Sigatabu vakatabakidua eso, e tiko vei iko na madigi mo veivosakitaka eso tale na iulutaga vakaivunau ka yavutaki ena nodra gagadre na nomu kalasi se kuoramu.

Na ivurevure oqo e oka kina na ituvatuva ni veimacawa ena gauna e vakayacori kina na soqoni ni kalasi ni Goneyalewa kei na kuoramu ni Matabete i Eroni. Ena so na gauna, o na gadreva beka mo levea e dua na lesoni me baleta na koniferedi ni iteki se dua tale na vuna.

Na Cava na Nodra iTavi na Noda iLiuliu Qasecake?

O ira na nomuni iliuliu qasecake era qarava e dua na itavi bibi ena kalasi ni Goneyalewa kei na kuoramu ni Matabete i Eroni. Era na tuberi ka vakasalataki iko ena nomu veikacivi eso ni veiliutaki. Era na tokona ka vakayaloqaqataki iko nio qarava na cakacaka ni nomu kalasi se kuoramu. Era na vakavulici iko ena ivunau, ka ra na vakalougatataki iko ena nodra ivakaraitaki, kilaka, kei na ivakadinadina.

Tabaka