Kabongana Nakomai, Iriirai—Ibukin te Kooram n te Nakoanibonga ae te Aaron ao Aia Kiraati Ataeinnaine

Tera te kaantaninga ni Bootakin Ara Kiraati ao te Kooram?

E a tia n anganiko te Uea te onimakinaki ae tabu: E a tia ni weteiko bwa ko na beku n te beretitentii n te Kiraati n Ataeinnaine ke beretitentii n te kooram n te Nakoanibonga ae te Aaron. Mwakoron tabem bwa ko na kairiiri ao ni waakina am bootaki n te kiraati ke kooram n te Tabati. Ni karaoa aei, e ibuobuoki ni kamataata bwa bukin tera ngkai iai bootaki n aekan aikai.

Aia kiraati Ataeinnaine ao Bootaki n te kooram n te Nakoanibonga ae te Aaron a kaokoro ma kiraati n aron te Reirei n Tabati ke te tieminari. Ti reiakinii aron mwakuri ake e anganiira te Atua, ao ti baireia kaain ara kiraati ke kooram ni karaoi mwakuri aikane n mweengara, n te Ekaretia, ao n ara komiuniti. Inanon bootaki aikai, ti aki tii taekina taekan te mwakuri—ti karaoi babaire ni kakoroi nanon katabeara ngkai ngaira mwakoron ana taanga ni buaka te Uea aika kairake ni kaairaki ma ara ibuobuoki ni ikotakiia Iteraera.

Inanon te kiraati ke bootaki n koroom ti karaoi babaire ni kakoroi nanon katabeara ngkai ngaira mwakoron ana taanga ni buaka te Uea aika kairake.

Ma kabotoan ara waaki iaon te mwakuri e aki nanonaki n ae ti a katikui maroroakinan reirei aika kakawaki tii ibukin te Reirei n Tabati. Ni koauana, reiakinan te reirei n aia kiraati Ataeinnaine ao Kooram n te Nakoanibonga ae te Aaron e bon riai—e buokiira ni kakorakorai ara reitaki ma Iesu Kristo, n oota n Ana baire Tamara are i Karawa ao ira mwakoron Aia mwakuri. Ngkai ti uaia ni kamatebwaia te euangkerio, te koaua are ti reiakinna e kona ni bitii nanora ao ni buokiira n ataia bwa ti na kanga ni beku riki n ana kawai te Uea. Ti kona ni karekei kairiiri mai ieta iaon arora n “rikirake n rabakau ma n ikawai, ma n akoaki iroun te Atua ma aomata” (Ruka 2:52). Ngkai ti riki n rairaki nakon Iesu Kristo ao Ana euangkeio, ti na kunea te kimwareirei ao namakin te nano ni buokiia tabeman iaon kawain te berita.

Antai ae E Kairii Bootaki Aikai?

E a tia ni weteiko te Atua bwa kaain te beretitentii n te kiraati ao te kooram ao n anganiko te kariaiakaki ni kairiiri. Anne bukina ae ni katoa bootaki n am kiraati ke te kooram e riai ni kairaki iroun te membwa n te beretitentii n te kiraati ke beretitentii n te kooram. Taan kairiiri ake a ikawai a na tii anga te ibuobuoki ao te boutoka ma a na bon aki anaa te kairiiri mai iroum. Taraa te tiekition ae atuunaki n “Uaia ni Marooro” ni moanakin ni kabane te kabwarabwara inanon te wiiki n te boki aei ibukin iango ni buokiko n ataa aron kairan te bootaki ao ni kakoroa nanon te kantaninga iai. Kabonganai taai ni bowi n te beretitentii ni baireia bwa ko na kanga ni kairii bootaki n te Tabati.

Antai Ae E na Anga te Reirei?

Taan kairiiri aika a ikawai, membwa n te kiraati ke beretitentii n te kooram, ke membwa ake tabeman n te kiraati ke n te kooram ae a kona n anga te reirei. Ngkami kaain te kiraati ke te beretitentii n te kooram, reitaki ma ami taan kairiiri ake a ikawai bwa antai ae e na rineaki bwa e na anga te reirei. Uringnga bwa ami taan kairiiri ake a ikawai e mwaiti ae a kona n anga. Ukoukoria n reiakinaki man aron are a tia n rinanona ao aia koaua. Aikai naba taai aika a tamaroa n tuangiia kairake bwa a na anga reirei—te anga reirei e kona ni kamatoa rairakiia ao buokiia ni karika te reitaki ae matoatoa ma kaain te kiraati ke te kooram. Ngaia are anganiia te tai ae e tau n anga te reirei ae e bwanin ke iteran te reirei, taua n ami iango kainnanoia ao aia konabwai naake n am kiraati ke n am kooram. Te katooto, taan kairiiri ake a ikawai a kona n angiin te tai n anga reirei n te kiraati ke n te kooram ma kairake ake a uarereke ke ma kairake ake aki rangi n rabakau n anga te reirei n te euangkerio. Ngkana a kaoaki kairake bwa a na anga reirei, te karo ke te aetuwaitia ae e ikawai e na buokiia ni katauraoia ngkana e kainnanoaki.

Naake a bukinaki bwa a na anga reirei a kona ni kabongana te tiekition ae atunaki n “Reirei te Reirei” inanon ni kabane kabwarabwara n te wiiki n te boki aio ni buokiia ni katauraoi. Te tiekition aio iai inanona iango n ibuobuoki ibukin te anga reirei ao marooro iaon reirei n te wiiki anne, ma taan reirei a na aki kabaeaki ni kabonganai tii iango aikai n tii ngaia. Man ana kairi te Tamnei, taan reirei a kona ni katai iango aikai ke ni kabonganai ake irouia n reirei ni kaitarai kainnanoia kaain te kiraati ke te kooram ao ni buokiia ni kaotaia n reirei aika a kakaawaki.

Tera Atuun Reirei Aika Ti na Maroroakin n Ara Bootaki?

Atuun reirei ake n te kabwarabwara inanon te wiiki bon reirei aika kakaawaki ae a kaman tia n rineaki ni katiteboaki ma te wareware are e katauaki ma te Nu Tetemanti ibukin te wiiki anne, are e kuneaki n Nakomai, Iriirai—Ibukiia Aomata n Tatabemaniia ao Utu. N te anga aei, reirei aika a kakaawaki ake a maroroakinaki n te kiraati ke kooram a na boutoka are a reiakinna kairake ni mweengaia.

E ngae ngke taian kabwarabwara a na reiakinaki n Tabati tabeua, ko bon konaa n marooro iaon atuun reirei aika kakaawaki ni kaineti ma kainnanoia kaain am kiraati ke am kooram.

Te boki aei iai inanona kabwarabwara ibukin wiiki nako n aia tai ni bootaki te kiraati n Ataeinnaine ao te kooram n te Nakoanibonga ae te Aaron. N tabetai, ao ko na kainnanoia n riaoa teuana te reirei ibukin te maungatabu n te titeiki ke ni bukina riki tabeua.

Tera Tabeia Ara Taan Kairiiri aika Ikawai?

Am taan kairiiri aika a ikawai iai tabeia ae e kakaawaki n te kiraati n Ataeinnaine ao te kooram n te Nakoanibonga ae te Aaron. A na tararua ao n anganiko reirei inanon weteam ni kairiiri. A na boutokaiko ao ni kakorakorako ngkai ko karaoi mwakuri n am kiraati ke am kooram. A na reireiniko reirei aika kakaawaki, ao a na kakabwaiako rinanon aia katooto, taneiai, ao aia koaua.