Maria e kaota ana kakoaua ae korakora iaon ana mition te Tia Kamaiu (tara Ruka 1:46–55). Kaineti ma Am Taeka, iroun Elspeth Young

Tianuare 8

N na kanga n Kakabwaiaia Aomata n au Kakoaua iroun Iesu Kristo?

Mataio 1; Ruka 1

Te Uaia ni Marooro

E kairaki iroun te membwa n te kiraati ke te beretitentii n te kooram, e na kabanea 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao te karietataaki ni kabongana teuana ke e raka riki man taian titiraki aika inano ke aika bon oin am kario (taraa Aeniboki ni Kabuta: Te Beku n Ana Ekaretia Iesu Kristo Ibukiia Aika Itiaki ni Boong Aika Kaitira, 10.2, 11.2, ChurchofJesusChrist.org). Babaire ao mwakuria te bwai ae maroroakinaki_.

• Maiuakina te euangkerio. Tera ae ti maroroakiinna n te tai ae nako, ao tera kakao ke mwakuri ake a karaoaki? Tera ae ti a tia ni karaoia ni mwakuri iaon kakao akanne ke katabeakira?

• Tararuakiia naake iai kainnanoia. Tera ae ti kona ni karaoia ke n taekinna n anga te ibuobuoki nakoia ake a namakina te maroa ke n raroa mairoun Tamara are i Karawa?

• Kaoiia ni kabane bwa a na karekea te euangkerio. Tera kawai tabeua are ti kona ni buokiia tabeman n namakina ana tangira Iesu Kristo?

• Katiteuanakiia utu ibukin te maiu ae akea tokina. Tera iango ake ti na kona n tibwaia imarenara ae e na buoka kakorakoraan ara utu?

N tokin te reirei, ngkana e riai, karaoi waaki aikai:

• Kaoti koauan reirei ake a reiakinaki.

• Kauringiia kaain te kiraati ke membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

N aroia Iutaia aika kakaonimaki n ana tai, Maria e a kaman kakariaria rokon te Meetia. Imwin kaongoana iroun te anera ae iaon kawaina n toki ana tataninga—ao e na reke bwa tinan te Tia Kabooi Maiura are e kantaningaaki—Maria e kaota ana koaua ae tamaroa iaon te “Atua au Tia Kamaiu.” Te kakoua aio e koreaki n Ruka 1:46-55, ao e tatangiraki irouia Kiritian n kabutaa te aonaaba. Ngkana ko wareki kiibu aikai, iangoia aomata n am kiraati ke te kooram. Ngaiia, n aron Maria, a kakatauraoi imwain rokon Iesu Kristo—n te tai aio, ibukin Mimitongin Kauaokina. Ao n ai aron naba Maria, aia kakoaua e korakora ana kairoro nakon aia onimaki ake i rarikiia.

Tera aia namakin aomata ake ko reireiniia ibukin Iesu Kristo? A na kanga aia kakoaua Ibukina ni kakabwaiaia tabeman? Ngkai ko kakatauraoi n anga reirei, ko kona naba ni kamatebwaia 2 Nibwaai 25:23-26 ao ana marooro Unimwaane Neil L. Andersen “Ti Taetaekina Kristo” (Riaona, Nob. 2020, 88–91).

Te Uaia n Reirei

Te kawai ae tamaroa ae kona ni buokiia kairake n iangoi aia kakoaua iroun Iesu Kristo bon rinanoan ana kakoaua Maria n ikotaki are n Ruka 1:46-55. Tao a kona n tibwauaia imarenaia kibuntaeka ake a kabwarabwara bwa tera ae kakoauaa man namakinna Maria ibukin te Tia Kamaiu. Engaa man kibuntaeka aikai ae kabwarabwara ara namakin Ibukina? N aron te katooto, tera ae karika tamneira bwa e na ‘[kimwareirei] iroun te Atua”? (kibu 47). Tera “bwaai aika korakora” ae E a tia ni karaoia ibukira?? (kibu 49). E kanga ni kaota Korakorana inanon maiura? (taraa kibu 51). Iango aika inano aikai a kona n kairira nakon marooro bwa a kanga ara kakoaua iroun Kristo n kakabwaiaia tabeman.

• Ana marooro Unimwaane Neil L. Andersen “Ti Taetaekina Kristo” e ibuobuoki ni kabwarabwara bwa e aera ti riai n taetaekina riki te Tia Kamaiu—ao arora ni karaoia. Kam kona n ikotaki ni warekii mwakoron ana marooro Unimwaane Andersen. A kona kaain te kiraati ke te kooram ni marooroakin bukina ake e anga ibukin tibwauaan ara kakoaua iroun Iesu Kristo ao ana taeka n ibuobuoki ibukin karaoana. Tera bwaai aika riai ae ti kona n karaoi n taetaekina riki iai Iesu Kristo?

• Ngkai ngaira kaain Ana Ekaretia Iesu Kristo ibukiia Aika Itiaki ni Boong aika Kaitira, ti atai koaua aika kakawaki ibukin Iesu Kristo aika ti kona n tibwauai. Ko na kanga ni buokiia kairake n iangoi koaua aikai? Ko kona n tuangiia bwa a na kamatebwaia “The Living Christ: The Testimony of the Apostles” n tatabemaniia nako ke n te kurubu, ni kakaea reken te titiraki ae “Tera koaua ibukin te Tia Kamaiu aika iai nanoia aika kakawaki iroum?” Tuangiia bwa a na tibwauai koaua ake a kunei ao ni kabwarabwara bwa e aera koaua aikanne a kakawaki nakoia. A kona n tibwauai kiibu man koroboki aika tabu ao bon oin aia taneiai. A kona naba ni marooroakin bwa a ngaa koaua ibukin te Tia Kamaiu ae a kona n tibwauaia iaon bwaai n reitaki n te intanete, ma raoraoia ae kekeiaki ma ana kakoaua, ke temanna ae tiaki kaain te Ekaretia.

• Irarikin are n Ruka 1:46-55, a mwaiti kibukintaeka riki tabeua inanon koroboki aika a tabu aika a kona n kaungaira bwa ti na tibwauai bwaai aika ti atai ibukin Iesu Kristo. Tabeua katooto a kona n reke n “Reitan Bwaai ni Mwakuri.” Iangoia n ikotaki ni wareki koroboki aika a tabu aikai. Tera ae a reireiniira ibukin aron tibwauaan ara kakoaua iroun Iesu Kristo ma aomata? Tera ae ti reiakinna man kiibu aikai? A kona naba kaain te kiraati ke te kooram n tibwauai bwaai ake a reiakin mai irouia aomata ake a kinaia ae aki totoki n tibwauai aia koaua iroun Iesu Kristo.

Inanon reiakinan kinaakin ao tangiran te Tia Kamaiu, ti kunei kawai n tibwauai ara kakoaua Ibukina.

Mwakuri inanon te Onimaki

Kaungaia kaain te kiraati ke kaain te kooram bwa a na iangoi man korei baike a na karaoi ni mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa bwa e kanga mwakurian aia namakina ni kakorakora reitakiia ma Tamara are i Karawa ao Iesu Kristo.

Reitan Bwaai n Mwakuri

• Mataio 5:14-16; 1 Betero 3:15; 2 Nibwaai 25:26; Aramwa 5:43-50; Reirei ao Berita aika Tabu 100:5-8

• Russell M. Nelson, “Ko na Kaota Am Onimaki” (Riaona, Meei 2014, 29–31)

• Cristina B. Franco, “Kunean te Kimwareirei n Tibwaan te Euangkerio,” (Riaona,, Nobembwa. 2019, 83–86)

Reirei n ana Kawai te Tia Kamaiu

Titiraki aika a kaungaia taan reiakinaki bwa a na kaota aia kakoaua e kona n riki bwa te kawai ae korakora ni kaoan te Tamnei. Ko kona n katei titiraki n aron ae “Ko kanga n ataia ae Iesu Kristo e karaoa te mwakuri ni kamaiu ibukin am bure?” ke “Ko kanga n tia n butimwaea ana mwakuri te Tia Kamaiu ibukira i Keketemwane?”