Kunean te Kimwareirei n Tibwauaakin te Euangkerio
Iai Tamara are i Karawa ae tangiriira, are e kakantaninga manga okira Nakoina bwa e na kakabwaiai maiura ao naake irarikira.
Teuana mai buakon kunan te Moanrinan ae mamaten nanou e moanaki man taeka aikai:
Ngai Kaain Ana Ekaretia Iesu Kristo Ibukiia Aika Itiaki ni Boong aika Kaitira.
I ataia bwa antai Ngai.
I ataa ana baire te Atua.
N na toua mwiina n te onimaki.
I kakoaua te Tia Kamaiu, Iesu Kristo.1
Aei bon taekan koaua aika beebete man tamaroa ake ti kakoauai!
Ngkai kaain Ana Ekaretia Iesu Kristo ibukiia Aika Itiaki ni Boong aika Kaitira, ti ataia bwa antai ngaira. Ti ataia bwa “te Atua bon Taman tamneira. Boni Ngaira …Natina, ao E tangiriira. Ti maeka … [ma Ngaia i Karawa] imwaain [rokora] n te aonaaba.”
Ti ata ana babaire te Atua. Ti maeka ikekei ma Ngaia ngke E kaotia. Oin ana kantaninga te Atua ae bwanin—Ana mwakuri ao Mimitongina—e anganiira n tatabemaniira nako te konaa ni karekei Ana kakabwaia ni kabane. E …katauraoa te babaire ae kororaoi ni kakoroa bukin Ana kantaninga. Ti ataia ao ti butimwaea te babaire … ae kakukurei, … te kaboomwi, ao te … kamaiu” imwaain rokora n te aonaaba.
“Iesu Kristo e kakawaki n ana babaire te Atua. Rinanon Ana Mwakuri ni Kamaiu, Iesu Kristo e kakoroa bukin Ana kantaninga Tamana ao n anganiira n tatabemaniira nako te konaa ni karekea te aki mamate ao te karietataaki. Tatan, ke te riaboro, bon te tia kaitara nakon ana babaire te Atua” ao e a kaman riki man moan karikan bwaai.
“Te rinerine, ke te kona n rinerine, bon teuana mai ibuakon ana bwaintituaraoi ae korakora te Atua nakoia Natina. … Ti riai n rineia bwa ti na ira Iesu Kristo ke n ira Tatan.”2
Aikai koaua aika bebete aika ti kona n tibwauaia ma tabeman.
N na tuangko te tai are ngke e tibwauai koaua aika bebete tinau man ana boboibuako ni marooro ao n ataa tibwangana.
N ririki aika a bwakanako, e oki tinau nako Argentina bwa e na kawara mwaaneu. Tinau e aki rang tatangiria te kibakiba n te wanikiba, ngaia are e butiia temanna natiu bwa e na kakabwaia ibukin te karaunano ao te kamanoaki. E namakina kairana bwa e na kakabwaia tibuna te unaine n ana kairi ao ana kaetieti te Tamnei ae Raoiroi ni kakorakora ao n riingi nanoia ake a tangiria n reiakina te euangkerio!
N te marae ni wanikiba i Salt Lake, tinau ma mwaaneu a kaitibo ma te ataeinnaine ae itiua ana ririki are e okira mweengana n okina n tikii ma ana utu. A nooria ana karo bwa e a rangi ni maan ni marooro ma tinau ao mwaaneu a baireia bwa a na raona natiia te aine. A kabwarabwaraiia ao natia te aine bwa Eduardo, ao Maria Susana, ao Giada Pol. Iai te reitaki ae koaua ao ae rau nakon te utu ae kakateke aei.
Utu aikai a kukurei ni kaai ni mwananga ni kibaia ae titebo nako Buenos Aires, Argentina. Ngkai e reitinako aia marooro, e kunea tinau bwa ni karokoa te tai anne, a bon tuai man ongo taekan ana Ekaretia Iesu Kristo ae e a tia ni kaokaki.
Teuana ana moan titiraki Susan e kangai “Ko kona n tuangai rongorongon te miutiem are e tamaroa anne ma te boua ae koora ane itaubukina?”
E kabwarabwara tinau bwa te kateitei are e tamaroa arei bon tiaki te miutiem ma bon ana tembora te Uea are ti karaoi iai berita ma te Atua bwa ti aonga n okiria ni maeka ma Ngaia n te taina. Susana e kaotia nakon tinau bwa imwaain mwanangaia nako Salt Lake, e a tia n tataro ibukin te bwai ae e na kakorakora iai tamneina.
N tain te kiba, e kaota ana koaua tinau ae matoatoa ibukin te euangkerio ao e kaoa Susan bwa e na kakaeiia mitinare inanon ana kaawa. Susana e titirakina tinau “N na kanga ni kuneiia?”
E kaeka tinau, “E aki kaangaanga rekeia; iai uoman ataeinimwaane ae a bwainiia n te mainaina ma aia neketai, ke uoman ataeinaine aika a kumumuniia, a aki toki ni katokaa araia iaoia ao ‘Ana Ekaretia Iesu Kristo ibukiia Aika Itiaki ni Boong aika Kaitira.’”
Utu aikai a uaia n anai nambwan aia tareboon ao ni kaboo n te marae ni wanikiba i Buenos Aires. Susana, are e a riki ngkanne bwa raoraou, e tuangai bwa e namakina te nanokawaki ngke e kitana tinau n te marae ni wanikiba. E taku, “E taraa ni kukurei tinam. I aki kona ni kabwarabwara, ma iai taraakina ae raoiroi are I aki kan mwaninga taekana.”
N te tai are e okira iai mweengana Susan, ngaia ma natina te aine, ae Giada, a nakon n tibwauai baike a rinanona ma tinan Susan, are e maeka tabeua te kawai n aki raroa ma mweengaia. Ngke a buti, e a karina naba Susan n nooria uoman ataeinimwaane aika a nakonako iaon te kawai ae a bwainiia n aron are e kabwarabwara tinau. E tiringa ana kaa inuukan te kawai, e otinako, ao n titirakiniia ataeinimwaane aika uoman aikai, “Bon ngkami kaain ana Ekaretia Iesu Kristo?”
A taku, “Eng.”
“Mitinare?” e titiraki.
A uaia ni kaeka, “Eng, boni ngaira!”
Ngkanne e taku, “Riin n au kaa; irai nakon mweengau bwa kam na reireinai.”
Uoua namwakaina imwiina, e a bwabetitoaki Maria Susana. Natina te aine, ae Giada, e bwabetitoaki naba ngke e koro ruaiwa ana ririki. Ti bon tabe naba ni mwakuri iaon Eduardo, are ti tangiria n aki tabe bwa tera ae e na riki.
Man te tai anne, e a riki Susan bwa temanna te mitinare ae rangi n tamaroa are I kaitibo ma ngaia. Titebo ma natin Motiaea ake mwaane, a kairiia aomata aika mwaiti nakon Kristo.
Inanon teuana ara marooro, I titirakinna, “Tera rabakaum ae ko kakaraba? Ko kanga n tibwaua te euangkerio ma tabeman?”
E tuangai, “E rangi ni bebete. Ni katoa bong imwaain ae I kitana au auti, I tataro nakon Tamara are i Karawa ni bubutiia bwa e na kairai nakon temanna are e kainnanoa te euangkerio inanon maiuia. N tabetai I uota ana Boki Moomon n tibwauaia nakoia ke kaati ake mairouia mitinare are a mwakoro taekan te Ekaretia iaona—ao ngkana I moana au marooro ma temanna, I titirakiniia ngkana a tia n ongoongo taekan te Ekaretia.”
E taku naba Susana, “N tabetai I bon tii moangare ngkana I tataninga te turein. Te bong teuana e taraai te mwaane ao e taku, ‘Tera ae ko a bon moangare iai?’ Kanga I kubanako irouna.
“I kaeka, ‘I moangare ibukina bwa I kukurei!’
“Imwiina e taku, ‘Ao tera ae ko a bon kukurei iai?’
“I kaeka, Ngai kaain Ana Ekaretia Iesu Kristo ibukiia Aika Itiaki ni Boong aika Kaitira, ao anne e anganai te kukurei. Ko a tia n ongoongo rongorongona?’”
Ngke e kangai I tuai, e anganna kaati ake a mwakoro taekan te Ekaretia iaona ao ni kaoa bwa e na irii bootaki n taromauri ake imwiina. Te Tabati are imwiina, e kamaura teuanne imatan te mataroa.
E reirei Beretitenti Dallin H. Oaks:
“Iai teniua bwaai ake a kona membwa ni karaoi ni ibuobuoki n tibwaua te euangkerio. …
Te moan, ti kona n tataro ni kabane ibukin kukurein te nano n ibuobuoki ma kakawakin mwakoron te mwakuri ni kamaiu. …
Te kauoua, ti kona ni kawakin tuua. … Membwa aika a kakaonimaki a na karekea Tamnein te Tia Kamaiu … ma ngaiia ni kairiia ngkai a ukeuke ni ira te mwakuri ae korakora n tibwauaakin ana euangkerio Iesu Kristo ae kaokaki.
Te kateniua,ti kona n tataro ibukin te kairi iaon baika tikona ni karaoi … n tibwaua te euangkerio ma tabeman … [ao] n tataro ma te motinnano ni mwakuria te kairi are [ti] karekea.”3
Mwaaneu ao tariu, ataei, ao te roronrikirake, ti kona n riki n aron raoraou ae Susana ao n tibwaua te euangkerio ma tabeman? Ti kona ni kaoa raoraora are tiaki kaain ara aro n iriira n taromauri n te Tabati? Ke ti kona n tibwaua katootongan ana Boki Moomon ma ara utu ke raoraora? Ti kona ni buokiia tabeman ni kuneiia aia bakatibu iaon te FamilySearch ke n tibwauaia nakoia tabeman ni bwaai ake ti reiakin n tain te toa ngkai ti tabe ni kamatebwaia Nakomai, Iriirai? Ti kona n riki n ai aron te Tia Kamaiu, Iesu Kristo, ao n tibwauaia ma tabeman bwaai ake a na uota nakoira te kimwareirei inanon maiura? Kaekaan titiraki aikai ni kabane bon eng! Ti kona ni karaoia!
Ti warekia ni booki aika tabu bwa “kaain Ana Ekaretia Iesu Kristo a kanakoaki bwa a na rimoa “ni mwakuri n ana nne ni kurebe ibukin kamaiuan tamneia aomata.” (Reirei ao Berita aika Tabu 138:56). Te mwakuri ni kamaiu aio ni ikotaki ma ana mwakuri ni mitinare te membwa, tauakiia aika tibwa rairaki, te mwakuri ni kamarurung ibukiia membwa aika aki roroko, te mwakuri n te tembora ao rongorongon te utu, ao reiakinan te euangkerio.’”4
Raou aika tangiraki, e kainnaoira te Uea ni bobota Iteraera. N Reirei ao Berita aika Tabu, E taku, “Ma ngaia are kona iango imwain ae kona taekinna; ma kawakinii n am iango n tainako taeka ni kamaiu, ao are kona anganaki ni katoa aoa bwa te mwakoro anne a na bane n reke irouia aomata.”5
N reitia, E berita nakoira:
“Ao ngkana ngaia bwa kam na mwakuri n ami bong ni kabane n takaruaea te rairannano nakoia aomata aikai, ao ni kaira nakoiu, ngkana tii temanna te aomata nakoiu, ai korakora ra kimwareireimi ma ngaia n abanuean Tamau!
“Ao ngkai, ngkana kimwareireimi e korakora ma temanna te aomata are kam kairia nakoiu n uean Tamau, ai korakora ra riki kimwareireimi ngkana kam kairiia aomata aika mwaiti nakoiu!”6
Anenen te Moanrinan are I waaki mai iai I kainna ma te taeka ae nano aei:
I kakoaua te Tia Kamaiu, Iesu Kristo.
N na karinea arana.
N na karaoa ae raoiroi;
N na iriira ootana.
N na taetaekina Ana koaua.7
I kaota au koaua bwa a koaua taeka aikai ao iai Tamara are i Karawa ae tangiriira, are e kakantaninga manga okira Nakoina bwa e na kakabwaiai maiura ao maiuia naake irarikira. E bia reke i nanora ni kan kairiia tarira ma mwaanera nakon Kristo bon au tataro n aran Iesu Kristo, amen.