Aine Inanon te Berita a Uaia ni Ikarekebai ma te Atua
N riki bwa ainen te berita n ibuokanbwai ma te Atua e bon kakukurei ao natin te Atua aine aika tamaroa aki toki n tararua, ni kairiiri, ao n ibuobuoki.
I kakaitau ibukin te kakabwaia bwa n a taetae nakoimi, natin te Atua aika aine inanon te berita. N te tairiki aei, oin au kantaninga bwa n a kaungako inanon te mwakuri ae e korakora are ko weteaki iai. Eng, ni kabane natin te Atua aika aine ake a ongora ni bwanaau a tia ni karekea te wewete mai iroun te Uea.
E moanaki weteam ngke ko karikaki nakon te maiu aei, n te tabo ao te tai are e rineaki ibukim iroun te Atua are e ataiko ni koaua ao n tangiriko ngkai Natina te aine ngkoe. N te aonaaba n tamnei, E ataiko ao e reireiniko ao ni katikuko n te tabo ae e na reke iai am tai, n onoti inanon rongorongon te aonaaba, ni kaoaki nakon te tabo ni bwabetito. Ikanne, ko na bae n tia n ongo taeka aikai ake a taekinaki iroun ana toro ae e weteaki Iesu Kristo: “N reken te kariaiakaki mai iroun Iesu Kristo, I bwabetitoiko n aran te Tama, ao te Nati, ao te Tamnei ae Raoiroi. Amen.”1
Ngke ko aerake man te ran, ko a tia n butimwaea te wewete teuana ni beku. Ngkai natin te Atua te aine inanon te berita, ko karaoa te berita ao karekean tibwangam n Ana Ekaretia Iesu Kristo ibukiia Aika Itiaki ni Boong aika Kaitira, are ko a tia ngkai ni kamatoaki bwa kaina. Ko a tia ni berita ma te Atua ni katoka iaom aran Iesu Kristo, ni kawakin Ana tua, ao ni beku Ibukina.
Ibukiia ake a karaoi berita aikai, te beku are e weteaki iai teuanne ke neiene iroun te Uea bwa ana karaoia e na bon katauaki nakon te aomata anne. Natin te Atua ni berita aika mmwaane ao aine, e ngae n anne tao a bon, bane n tibwaa teuana te wewete ae e kakawaki ao ni kakukurei. Bon te beku ibukiia tabeman Ibukina.
Ngke e taetae nakoia aine, Beretitenti Russell M. Nelson e anga ana kabwarabwara ae tamaroa iaon ana wewete te Uea nakoim n reitaki ma Ngaia n Ana mwakuri. E kabwarabwara Beretitenti Nelson n te anga aei, “E taku te Uea, ‘Au mwakuri ao mimitongiu [bwa] n na karekea te aki mamate ao te maiu ae akea tokina ibukin te aomata.’ (Mote 1:39.) Ngaia are Natina aine aika a kakaonimaki ake taan iriiria a na kona raoi ni kangai, ‘Au mwakuri ao mimitongiu bwa n a buokiia ake I tangiriia n roko n te kouru are mai karawa.’
“Ni buoka temana te aomata n roko n aron rikina mai karawa bon teuana mwakoron ana mition te aine ae e rietaata. Ngkai te tina, tia reirei, ke te tia tararuaia aika itiaki, e ibuobuoki ni kanakoraoa maiuia tabeman. Ni ikarekebai ma te Atua, ana mition ae mai karawa bwa e na buokiia tamnei bwa a na maiu ao tamnein te aomata bwa e na karietataaki. Aio bon oin bukin karikana. E anga te karineaki, te kamataata, ao te karieataaki.”2
Ko aki kona n ataia bwa ningai, ke maanra taina, oin am mition bwa e na boboto iaon te beku ni weteam n aron te tina, te tia kairiiri, ke te titita n te mwakuri n ibuobuoki. Te Uea, n ana tangira, e aki anganiira bwa ti na bairea te tai, maana, ke mwakoron nako ara beku. Ma ko ataia man koroboki aika tabu ao burabeti aika maiu bwa ni kabane beeku aikai a na roko, tao n te maiu aei ke n ae e na roko, nakoia natin te Atua aine. Ao aikai ni kabane bon bwaai ni katauraoi ibukin te maiu are akea tokina inanon te utu n tangira—ana bwai n tangira te Atua ae moan te korakora.“3
Ko na rangi ni wanawana ngkana ko anga korakoram ni kabane ni katauraoiko ngkai ma te baire nakon tokin am kouru. Te mwakuri e riki n rangi ni bebete ibukina bwa taian beku aikai a kainanoa te katauraoi ae ti tearona.
Ti a moana man te beku bwa te titita ngkoe ibukin te mwakuri n ibuobuoki. Ngkana tao e reke te beku anne ngkai te nati te aine ae 10 ana ririki inanon te utu are e a tia ni mate te karo iai, ke ngkai te beretitenti n te Bootaki n Aine are e rotaki ana kawa n te urarake, ke ngkana ko mena n te onaoraki ni kamarurungko mai imwiin te korokoro—iai am tai ni kakoroa nanon weteam mai iroun te Uea n riki bwa Natina te aine n te mwakuri n ibuobuoki.
A tara ni kaokoro beeku akane n te mwakuri n ibuobuoki. Ma a bane ni kainnanoa te katauraoi ma te nano ae tangira, ae e korakora, te onimaki ae e aki mamaku bwa e aki anga te kaetieti te Uea ma e na katauraoa te kawai, ao te nano n nako ao ni karaoia Ibukina.4
Ibukina bwa e tauraoi, te nati te aine are 10 ana ririki e rabwata tinana are e mate buuna ao n tataro ni kan ataia bwa e na kanga ni buoka ana utu. Ao e reitinako n tatataro.
E a tia te Beretitenti n te Bootaki n Aine ni katauraoi ni ibuobuoki imwaain te ura ae e aki kantaningaki n ana aono. E a rangi ni kinaiia ao n tangiiriia aomata. Ana onimaki iroun Iesu Kristo e a tia n rikirake i nanon ririki man karekean kaekaan ana tataro bwa te Uea e na buokia ni mwakuri aika a uarereke Ibukina. Ibukin ana katauraoi ae e maan, e tauraoi ao ni ingainga ni bobotiia aine ni ibuobuoki nakoia aomata ao utu ake a rootaki.
Te titita ae e kamarurungaki n te onaoraki imwiin ana korokoro e tauraoi ni ibuobuoki nakoia raona n aoraki. E a tia ni kabanea inanon maiuna n karaoa te mwakuri n ibuobuoki ibukin te Uea nakoia ake e aki kinaiia bwa kanga teuanne ke neienne bon kain rarikina ao raoraona. Ngke e namakinna i nanona te wewete bwa e na karaoa te ibuobuoki n te onaoraki, e a buokiia tabeman n te aro n ninikoria ao n te tangira ngaia are tabeman aoraki a moana n iangoia bwa e bia aki marurung n te tai ae e waekoa.
N te aro naba anne ngkai ko katauraoi ni ibuobuoki, ko kona ao n riai ni katauraoi ibukin weteam n riki bwa te tia kairiiri ibukin te Uea ngkana e roko taina. E kainnanoa te onimaki iroun Iesu Kristo ae e boto n am tangira ae e nano nakon koroboki aika tabu ni kairiia aomata ao n reirei Ana taeka n akea te maaku. Ngkanne ko na tauraoi ni karekea te Tamnei ae e Raoiroi bwa toam ni katoa tai. Ko na bon ingainga n taekina, “N na karaoia” ngkana am kauntira n te beretitentii n te Bootaki n Ataeinaine e kangai, ma te raraoma ni bwanaana, “E aoraki Titita Alvarez n te bong aei. Antai ae e na anga reirei n ana kiraati?”
E bon anaa te katauraoi ae ai aron anne n te bong are e kakukurei ngkana te Uea e weteiko nakon te beku ae te tina. Ma e na bon anaa riki te tangira man te nano ae moan te mwaiti n aron are ko kainanoia mai imwaina. E na kainanoa te onimaki iroun Iesu Kristo ae e riaon riki are e a tia n reke inanom mai imwaina. Ao e na anaa mwaitin te tai n tataro ibukin kairan te nano, kaotan te kawai, ao ana karaunano te Tamnei ae e Raoiroi n ae e riaon are ko a tia n namakina e kona n reke.
Tao ko na bon bae n titiraki bwa e kanga te mwaane inanon ririki n ataa te bwai ae a kainanoia tiina. Bon te titiraki ae e eti. Mwaane aki atai bwai ni kabane, ma ti kona n reiakin tabeua reirei man te kaotioti mai iroun te Atua. Ao ti kona naba n reiakin aika mwaiti man ara taratara, ngkana ti anaa te tai n ukora te Tamnei ni buokiira ni mataata n te bwai are ti noria.
I a tia ni matakuakina Kathleen Johnson Eyring inanon 57 te ririki ngke ti a tia ni mare. Bon te tina irouia aman mwaane ao uoman aine. Ni karokoa te tai aio, e a tia ni butimwaea te wewete n riki bwa te tina ae ana kakairi e namakinaki irouia aika bubua kain te utu ao bubua riki ake e tabekiia inanon nanona n tina.
Ko uringa ana kabwarabwara ae tamaroa Beretitenti Nelson iaon ana mition te aine—ni ikotaki ma ana mition n riki n tina: “Ngkai te tina, tia reirei, ke te tia tararuaia aika itiaki, e ibuobuoki ni kanakoraoa maiuia tabeman. N ikarekebai ma te Atua, ana mition ae mai karawa bwa e na buokiia tamnei bwa a na maiu ao aomata bwa a na karietataaki. Aio bon oin bukin karikana.”5
N aron ae I ataia, kainabau, Kathleen, e a tia n ira te babaire anne, are anganaki natin Tamara aika aine. Te bwai ae e kakawaki ae e kaoti nakoiu bon te taeka “e ibuobuoki ni kanakoraoa maiuia tabeman … ni ikarekebai ma te Atua.” E aki kairoro. E nabeia raoi. Ao iai ana baeten ae e bebete ibukin ana kantaninga, are e kataia n nabeia te koraki ake e tangiriia ao ni kawakiniia. Ana baeten ae e bebete bon ana euangkerio Iesu Kristo—are I kona n noria rinanon te tataromwaka n taratarakina inanon ririki.
Te riki bwa te aine inanon te berita ni ikarekebai ma te Atua bon aroia ae korakora ao n tamaroa natin te Atua aika aine n tararua, ni kairi, ao ni ibuobuoki, ni beku n te kawai ao te tabo are E katauraoia ibukiia. I berita bwa ko na kunea te kimwareirei inanon am borau nakon abam are i karawa ngkai ko oki Nakoina bwa natin te Atua te aine ae e kakawakina te berita.
I kakoaua bwa te Atua te Tama e maiu ao e tangiri ngkami. E na ongo ao ni kaekaa am tataro. Natina ae E tangiraki e kairiiri, n ana waaki ni kabane, Ana Ekaretia Iesu Kristo ibukiia Aika Itiaki ni Boong aika Kaitira. Beretitenti Russell M. Nelson bon Ana burabeti ae maiu. Ao Iotebwa Timiti e nora ao n taetae ma te Atua te Tama ao Iesu Kristo n te buakonikai i Palmyra, New York. I ataia e koaua aei. I kakoaua naba bwa Iesu Kristo bon ami Tia Kamaiu, E tangiri ngkami. Ao rinanon Ana Mwakuri ni Kamaiu, kam kona ni kaitiakaki ao n tabekakirake nakon nakoa aika rietaata man tabu ake a na roko nakoim. I kakoaua n aran Iesu Kristo ae tabu, amen.