Te Mwaaka n Tokanikai iaon Teuare e Buakaka

Iroun Unimwaane Peter M. Johnson

Man te Itingaun

Ti na kanga ni kunea te rau, uringnga bwa antai ngaira, ao n tokanikai iaon ana mwakuri aika teniua teuare e buakaka?

Tariu ao mwaaneu, kam rabwa ni bwaai ni kabane ake kam karaoi n riki, ao ni buokiia tabeman n riki, bwa ana reirei ni koaua Iesu Kristo ao ni kukurei n taian kakabwaia man te tembora. Kam rabwa ibukin tamaroami. Kam kakateke; kam tikiraoi.

Bon au tataro bwa ti na kinaa kamatoaan ana kairiiri te Tamnei ae Raoiroi ngkai e bwanin ara atatai bwa ngaira natin te Atua. “Te Utu: Te Katanoata nakon te Aonaaba e taekinna: “Ni kabane aomata—mwaane ao aine—a karikaki ni katotongan te Atua. Ni kabane bon naati mwaane ao aine aika tamnei irouia ara karo ake i karawa, ao, n aron anne, iai aroia n te aro n atua ao tokin kawaia.”¹ Ngaira “tamnei aika a tau aika a rineaki ake a kawakinaki bwa a na roko ni koron bong bwa a na ira te mwakuri ni kawenea aan te mwakuri ae korakora ni boong aika kaitira.”² E taku Beretitenti Russell M. Nelson: “Ko reireinaki n te aonaaba n tamnei ni katauraoiko ibukin bwaai ni kabane aika ko na kaitaraaki ma ngaai ni mwakoron taai aikai ni boong aika kaitira.(taraa R&B 138:56). Reirei akanne a reitinaki n tiku inanom.”³

Ngkami natin te Atua mwaane ao aine aika a rineaki. Iai korakorami n tokanikai iaon teuare e buakaka. E ngae n anne, teuare e buakaka, e ataiko bwa antai ngkoe. E ataa rikim ae mai iroun te Atua ao e ukora kakekerikakan am konabwai iaon te aba ao mai karawa man kabonganaakin mwakuri aika teniua aikai:

• Kamwamwane

• Katabetabe

• Bwarannano

Kamwamwane

Teuare e buakaka e kabonganai waaki ni kamwanemwane n ana bong Mote. E taetae te Uea nakon Mote:

Ao, nooria, bon natiu ngkoe. …

“Iai te mwakuri ae N na anganiko, … ao ti te arona ngkoe ma au Rikitemanna.”⁴

Teutana te tai imwiin te mii ni burabeti aei, e kataia Tatan ni kamwanea Mote. Taeka ake e kabonganai a kamimi: “Mote, ae natin te aomata, taromauriai.”⁵ Te aro ni kamwamwane tiaki tii te kakao n taromauria Tatan ma te kamwane anne bon te kawai naba are e kabwarabwara Mote bwa natin te aomata. Uringnga, e a bon tibwa tia te Uea n tuanga Mote ae ngaia natin te Atua, ni karikaki n ti te arona ma ana Rikitemanna.

Te tia kamwamwane e reitinako ni keiakina kamwanean Mote, ma e tukia Mote, man taku, “Nako mai irou, Tatan, bwa ti aio te Atua ae N na taromauria, are bon Atuan te mimitong.”⁶ E uringnga Mote bwa antai ngaia—natin te Atua.

Ana taeka te Uea nakon Mote e kaineti nakoimi ao nakoiu. Ti karikaki ni katotongan te Atua, ao iai ana mwakuri ibukira ae ti na karaoia. Tatan e kataia ni kamwaneira bwa ti na mwaninga bwa antai raoi ngaira. Ngkana ti aki ataia bwa antai ngaira, ngkanne e boni kaangaanga ataakina bwa antai ae ti na riki n ai arona.

Katabetabe

Tatan e kataia naba ni kararoaira mai iroun Kristo ao kawain Ana berita. Unimwaane Ronald A Rasband e tibwaa te rongorongo aio: “Ana babaire te tia kakaitara bwa e na kakeai ara iango man kakoaua n tamnei, ma nanon te Uea e na kaotaira ao ni kabaeira n Ana mwakuri.”⁷

N ara bong, iai katabetabe aika a rangi ni mwaiti, n raonaki ma te Twitter, Facebook, Instagram, takakaro aika a taraa ni koaua aika maiu n te kombiuta, ao a mwaiti riki. Rabakau aika a rikirake aikai a bon kamiimi, ma ngkana ti aki taratara raoi, a kona ni katabetabeira man kakoroan nanon ara konabwai mai ieta. Kabonganakiia raoi n ae riai e kona n uota mwaakan karawa ao ni kariaira ni kakoauai kakai ngkai ti ukoukora ikotakin Iteraera ae uamaenako n itera te roki aika uoua.

Tii na taratara raoi ao n aki manikangare ni kabonganaakin rabakau aika boou.⁸ N reitinako n ukori kawai bwa rabakau aika a boou a na kona ni kaanira nakon te Tia Kamaiu ao ni kariaira bwa ti na kakoroa bukin Ana mwakuri ngkai ti katauraoi ibukin Kauaokina.

Te bwarannano

Te kabane, teuare e buakaka e tangiria bwa a na bwarananora. A na bae ni bwara nanora ngkana ti kabootauira ma tabeman ke n namakinna ae ti aki maiu n aron ae kantaningaaki, n ikotaki ma oin maiura.

Ngke I moana au burokuraem ibukin karekean au beeba, I namakina te bwarannano. Te burokuraem aei e tii butimwaeiia aman ataei n te ririki anne, ao ataei ake tabeman a rangi ni wanawana. E bubura aia bwi n tain te ukeuke ao e mwaiti ae atia n rinanona n te mwakuri ae a maan n te nakoa n tararua, ao a kaotia ae a onimakiniia n aia konabwai. Imwiin au kauoua ni wiiki inanon te burokuraem, namakinan te bwarannano ao te nanououa I a rootaki iai, e kuri ni karawawataai.

I baireia bwa ngkana arona bwa N na kabanea te burokuraem ae aua ririkina, I riai ni kabanea warekan ana Boki Moomon ni katoa tiemetita. Ni katoa bong ngkana I wareware, I kinaa ana kabwarabwara te Tia Kamaiu bwa te Tamnei ae Raoiroi e na reireinai bwaai ni kabane ao e na kauringai bwaai ni kabane.⁹ E manga kamatoaaki bwa antai ngai ngkai bon natin te Atua te mwaane, ni kauringai n aki kabootauai ma tabeman, ao n anganai te onimaki n tabeu mai eta bwa N na tokanikai.¹⁰

Raoraou aika a tangiraki, taiaoka tai kariaia temanna bwa e na iraea kukureim. Tai kabootauko ma tabeman. Taiaoka uring ana taeka n tangira te Tia Kamaiu: “Te rau I anganingkami au rau I aki anganingkami: n ai aron te aba, ngkana e anga. A na tai rawawata nanomi, ao a na tai maku.”¹¹

Ngaia are ti na kanga ni karaoia? Ti na kanga ni kunea te rau aei, uringnga bwa antai ngaira, ao n tokanikai iaon ana mwakuri aika teniua teuare e buakaka?

Te moan, uringnga bwa te moan ao ni kabanea ni korakora n tua bon tangiran te Atua ma nanora, marurungira, ara iango, ao korakorara.¹² Bwaai ake ti karaoi a riai ni kaungaaki man ara tangira Ibukina ao ibukin Natina. Ngkai ti karikirakea ara tangira Ibukiia man kawakinan Aia tua, ara konabwai ni bon tangiriira ao n tangiriia tabeman a na rikirake. Ti na moanna ni beku ibukiia utu, raoraora, kaain rarikira ibukina bwa ti na taraiia n aron ana taratara te Tia Kamaiu—ngkai natin te Atua mwaane ao aine.¹³

Te kauoua, tataro nakon te Tama n aran Iesu Kristo ni katoa bong, ni katoa bong, ni katoa bong.¹⁴ Bon rinanon te tataro are ti kona iai n namakina ana tangira te Atua ao ni kaota ara tangira Ibukina. Rinanon te tataro ti kaota ara kakaitau ao ni bubutia ibukin te korakora ao te ninikoria n anga nanora nakon te Atua ao ni kawakinaki ao ni kairaki ni bwaai ni kabane.

I kaungai ngkami bwa kam na “tataro nakon te Tama ma korakoran nanomi, bwa kam na kaonaki n te tangira aio, …bwa kam aonga n riki bwa natin te Atua mwaane ao [aine]; bwa ngkana e kaoti ao ti na riki n arona.”¹⁴

Te kateniua, wareka ao kamatebwaia ana Boki Moomon ni katoa bong, ni katoa bong, ni katoa bong.¹⁶ Au kamatebwai n ana Boki Moomon e nakoraoi ngkana I wareware ma titiraki aika a onoti. Ngkana ti wareware ma iai te titiraki, ti kona ni karekea te kaotioti ao n ataia bwa te Burabeti Iotebwa Timiti e taekina te koaua ngke e kabwarabwara, “Ana Boki Moomon [bon] te boki ae te kabanea n eti mai buakon boki nako i aon te aonaba, … ao te mwaane [ke te aine e na] kaania riki te Atua te aomata man irirakin nanon reirei ake i nanona, nakon taian boki riki tabeua.”¹⁷ Ana Boki Moomon iai ana taeka Kristo inanona ao e buokiira n uringnga bwa antai ngaira.

Te kabane, tataromwaaka ni butimwaea te toa ni katoa wiiki, ni katoa wiiki, ni katoa wiiki. Bon man rinanon otenanti n te nakoanibonga, n raonaki ma te toa, bwa te mwaaka n atua e bon kaotaki ni maiura.¹⁸ E reirei Unimwaane David A. Bednar: “Te otenanti n te toa bon te kakao ae tabu ao n okioki bwa ko na raira nanom ma te koaua ao ni kabouaki n te tamnei. Te waaki ni butimwaean te toa, inanona ao mai iai, e aki katoka te bure. Ma ngkana ti katauraoi ma te iango ao n ibuobuoki n te otenanti ae tabu aei ma ake a uruaki nanoia man raraoma tamneia, te berita e kangai bwa e aonga ni memena Tamnein te Uea iaora n tainako.”¹⁹

Ngkai ti kana te toa ma te nanorinano, ti uringa korakain Iesu inanon te onaroka ae tabu are arana Ketetemwane ao Ana anga karea iaon te kaibangaki. Ti kaota ara kakaitau nakon Tamara ibukin kanakomaian Ana Rikitemanna, ara Tia Kabooira, ao ni kaoti nanora ni kawakin Ana tua ao n aki toki n ururingnga.²⁰ Iai te kaotaaki n te tamnei n irekereke ma te toa—e bon onoti, e korakora, ao e kainnanoaki.

Raou, I berita bwa ngkana ti kataia n tangira te Atua ma nanora ni kabane, n tataro n aran Iesu Kristo, ni kamatebwaia ana Boki Moomon, n tataromwaaka ni kana te toa, ti na karekea te konaa, ni korakoran te Uea, n tokanikai n ana kamwane teuare e buakaka, ni kamemerea katabetabeara are e tianii ara konabwai mai eta, ao ni katoka te bwarannano are e kamemeerea ara konabwai n namakina ana tangira Tamara are i Karawa ao Natina. Ti na karekea bwaninin ataakina bwa ngaira naati mwaane ao aine iroun te Atua.

Tariu ao mwaaneu, I tibwaua au tangira nakoimi ao ni kaota au koaua bwa I ataia bwa e maiu Tamara are i Karawa ao Iesu Kristo. I Tangiriia. Ana Ekaretia Iesu Kristo Ibukiia Aika Itiaki ni Boong Aika Kaitira bon abanuean te Atua iaon te aba. Iai ara boraraoi mai eta bwa ti na katauraoa te aonaaba ibukin Kauaokin te Mesia. N aran Iesu Kristo, amen.

Bwaai aika a na taraaki

1. Te Utu: Te Katanoata nakon te Aonaaba,” Riaona, Meei 2017, 145.

2. Reirei ao Berita aika Tabu 138:53; taraa naba Reirei ao Berita aika Tabu 138:54–56.

3. Russell M. Nelson, “Stand as True Millennials,” Riaona, Okitobwa. 2016, 48.

4. Mote 1:4, 6.

5. Mote 1:12.

6. Mote 1:20; taraa naba Mote 1:16–19, 21.

7. Ronald A. Rasband, “Lest Thou Forget,” Riaona, Nob. 2016, 115.

8. Taraa Becky Craven, “Careful versus Casual,” Riaona, Meei 2019, 9–11.

9. Taraa Ioane 14:26.

10. Tabera mairoun te Atua n tokanikai bon karekean te maiu ae akea tokina n aki tabe ngkana tao arona bwa temanna e karekea n ana taratara te aonaaba bwa te nakoraoi ni kakatai n te aonaaba. Te Tamnei ae Raoiroi e kauringiira tabera mairoun te Atua bwa ti na kona n riki n arora ngkai ti teimatoa ni kawain te berita ao n tokanikai, ni korakoran te Uea, ana kairiiri teuare e buakaka.

11. Ioane14:27; e kairaki ma katuruturuana.

12. Taraa Mataio 22:37–38.

13. Taraa Ioane 3:16; 1 Ioane 4:19; Motiaea 2:17.

14. Taraa 3 Nibwaai18:18–21.

15. Moronaai 7:48: e kairaki ma katuruturuana.

16. Taraa Kevin W. Pearson, “Stay by the Tree; Riaona, Meei 2015, 114–16.

17. Kabwarabwara nakon ana Boki Moomon.

18. Taraa Reirei ao Berita aika Tabu 84:20–21.

19. David A. Bednar, “Always Retain a Remission of Your Sins; Riaona, Meei 2016, 61–62.

20. Taraa Moronaai 4:2–3; 5:1–2; Reirei ao Berita aika Tabu 20:76–79. Taiaoka ataia bwa ti maiu inanon te tai are ti rangi ni kainnanoa iai Tamneina bwa e na raoniira n taainako.