Kunea Rinanon Mwaakan ana Boki Moomon
A riai aomata ni bane n rinanona ao ni kuneaki man mwaakan taian koaua ake inanon ana Boki Moomon.
Ngke I kawariia koraki ake a rairaki ni mwengaia, teuana au titiraki ae I aki toki n titirakiniia naake a rairaki bwa e kanga ngaiia ao aia utu n reiakina te Ekaretia ao a kanga ni bwabetitoaki. E aki kakawaki ngkana tao te aomata n te tai anne te membwa ae kakaonimaki ke e bon tuai n roroko n taromauri inanon ririki aika a mwaiti. Bon titebo te kaeka n taainako: ma moangareia ao moamoaia ae tokatoka, a moanna ni karakina rongorongoia bwa a kanga ni kuneaki. Ni koauana, e tara n ae karakinan te rairaki n tainako bon rongorongon arora ni kuneaki.
Iesu Kristo Ngaia bon Uean bwaai aika a bua. E tabeaianga ibukin baika a bua. Anne raoi koauan are E reirei kaikonaki ake teniua ake ti kunei n te ka 15 ni mwakoro n Ruka: te kaikonaki n te tibu are e bua, te tiring are e bua, ao, n te kabanea, te nati are bakatae. Karaki aikai ni kabane iai te bwai ae a boboto iaona: E aki kakawaki bwa bukin tera ngkai a bua. E aki kakawaki e ngae ngkana arona bwa a ataia bwa a bua. Ikanne e uea te namakin ae kakimwareirei are e takaruaea, “Kam na kimareirei ma ngai, ba e a reke i rou au tibu [are] bua.”1 N tokina, akea raoi aika a bua mai Irouna.2
Kariaia bwa N na tibwaia ma ngkoe teuana te bwai ae moan te kakawaki irou—te karaki are I kanga ni kuneaki.
Bon imwain ae e koro au ririki 15, I kaoaki iroun ai tamau, Manuel Bustos bwa N na kabanea au tai ma ngaia ao ana utu n te United States. Aio bon te tibwanga ae moan te tamaroa irou n reiakin tabeua taetae n Imatang. E a tia n rairaki ai tamau nakon te Ekaretia ririki mai imwaina, ao iai te tamnei ae korakora irouna n te mwakuri ni mitinare. Tao anne bukina ngkai tinau, n akean au atatai, e taetae nakoina man taku bwa e na butimwaea te kakao tii ngkana: e aki kataia ni kairai bwa n na riki bwa kain ana Ekaretia. Ngaira Katorika mai imwaina, ao anne inanon rooro, ao akea bukina ae tina bitaki iai. Ai tamau e kabwanina ana boraraoi ao e kawakin ana taeka ao e bon aki naba tangiria ni kaeka teutana te titiraki iaon te Ekaretia.
N te koaua, ai tamau ma buuna ae tangiraki, Marjorie, a aki kona n totokoia bwa antai ngaiia.3
I anganaki te ruu bwa n na tiku iai ae bubura ae kanoana booki n raiburari. I kona n nooria n te raiburari aei bwa bon iai tao 200 katoto n Ana Boki Moomon n taetae aika a kakaokoro, ao 20 mai iai n te taetae n Tibein.
N te bong teuana, man kan ataakina, I ana teuana ana Boki Moomon n te taetae n Tibein.
Bon teuana man katoto ake a buruu ma ni beebete karan tinanikuna, ma tamnein te anera Moronaai iaona. Ngke I kaukia, iaon te moan iteraniba bon berita aika a koreaki: “Ao ngkana a reke bwaai aikai iroumi, kaungai nanomi bwa kam na butiia te Atua, te Tama ae akea Tokina, n aran Kristo, ngkana arona bwa a koaua bwaai aikai; ao ngkana arona bwa kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi.”
Ao imwiina e reitia: “Ao ma ni mwaakan te Tamnei are e Raoiroi ao kam na kona n atai koauan bwaai ni kabane.”4
E bong kangaanga kabwarabwaraan bitaki ake koroboki aika a tabu aikai ea karikii n au iango ao inanou. Ni koauana, I bon aki kakaea “te koaua.” Bon tii te tebwitabu n ririki, kukurei ni maiuna, kimwareirei n te katei ae boou.
E ngae n anne, iangoan te berita anne, I waaki ni karabaai ni wareka te boki. Ngke I wareware riki, I ataia bwa ngkana e mwaiti ae I tangiria ni kan karekea mai iai, I riai ni moana au tataro. Ao ti bane n ataia bwa terana ae riki ngkana ko baireia bwa ko na aki tii wareware ma ko na tataroakina naba taekan ana Boki Moomon. Eng, bon anne te bwai ae e riki nakoiu. Bon te bwai ae rang okoro man onoti—eng, bon aekakin are e riki nakoia nga ma nga tabeman ni katobibia te aonaaba. I a ataia man mwaakan te Tamnei ae Raoiroi bwa ana Boki Moomon e bon koaua.
Imwiina I nakon ai tamau ni kabwarabwara te bwai are e riki ao I a tauraoi ni bwabetitoaki. Ai tamau e a bon aki kona ni karaba mimiina. E rinnako n ana kaa, buti nakon te marae ni wanikiba, ao e oki ma au tiketi ni kiba n oki, ma te koroboki nakon tinau ni kabwarabwara, “Akea te bwai ae I rekereke iai n aei!”
Ni bon arona e bon eti. I a tia ni kuneaki rinanon mwaakan ana Boki Moomon.
A na bae ni mwaiti ake a tia ni kuneaki rinanoia mitinare aika a kakateke ni katobibia te aonaaba, tera nako are e riki rinanon kawai aika a kamimi. Ke tao e na bae n iai aika a tia kuneaki rinanoia rao ake e a tia ni kamenaia te Atua inanon kawaia. E kona naba n ae a tia ni kuneaki iroun temanna man te roro aei ke rinanon temanna mairouia aia bakatibu.5 Tera nako are e riki, n te aro bwa ko na rikirake nakon te rairaki ibon iroum ni koaua, n te tai ae waekoa, a na bane n rinanona ao ni kuneaki ni mwaakan te koaua are n Ana Boki Moomon. N te tai naba anne, a bae ni bon baireia ibon irouia kabaeakiia ae nene nakon te Atua ao a na kataia ni kawakin Ana tua.
N okiu nako Buenos Aires, tinau e a ataia bwa I bon tangiria ni bwabetitoaki. Bwa bukina ngkai iai te tamnei irou ni kakaitara, n oneamwiin are n na bon kaitarai, e bon tetei n au itera. Ao ngkai akea au atatai iai, e bon karaoa au intawiu ibukin te bwabetitio. Ni koauana, I kakoaua riki ana intawiu bwa e nano riki nakon are a kakaraoia ara mitinare. E tuangai, “Ngkana ko tangiria ni bwabetitoaki, N na boutokaiko. Ma te moan N na anganiko tabeua titiraki, ao I tangiria bwa ko na iangoia raoi ao ni kaekaai ma te koaua. Ko motinnanoia bwa ko na bon tataromauri ni katoa Tabati?”
I tuangnga, “Eng, e koaua, N na bon karaoa anne.”
“Ko ataia bwa mannra te taromauri?”
“Eng, I ataia,” I kaeka.
E kaeka, “Ngaia, ngkana ko bwabetitoaki, N na kakoaua bwa ko iriria.” Ngkanne e titirakinai ngkana I tauraoi n aki manga nimate mangin ke ni moko.
I kaeka, “Eng, I koaua N na bon ira naba nanon anne.”
N anne are e a reitia, “Ngkana ko bwabetitoaki, N na bon kakoaua raoi bwa anne te bwai ae riki.” Ao e waaki nako iaon anne ma tua ni kabane.
Ai tamau e tareboniia tinau n tuangnga bwa e na aki raraoma, bwa N na kona ni mwaninga aikai ni kabane. Aua te ririki imwiina, ngke I a karekea au wewete n nako ni beku i Uruguay Montevideo Mission, tinau e tareboniia ai tamau n titirakinna bwa nningai raoi ae N na mwaninga iai taekan aikai ni kabane. Te koaua bwa man te tai are I bwabetitoaki iai, e a bon riki bwa te tina ae e a rang kukurei riki.
I a ataia bwa ana Boki Moomon e kakaawaki ni karaoan te rairaki man rinanoan berita are “ao e na kaania riki te Atua te aomata man irirakin nanon reirei ake i nanona.”6
Nibwaai e kabwarabwara te kantaninga are e boboto iaona ana Boki Moomon n te aro aei:
“Bwa ti kakorakoraira ni koroboki, n anai nanoia natira, ao tarira naba, bwa a na kakoaua Kristo, ao bwa aonga ni manga tangiraki iroun te Atua. …
“Ao [ngaia are] ti kakarabakauakina Kristo, ao ti kimwareirei iroun Kristo, ti kabwarabwara Kristo, [ao] ti taetae ni burabetiia Kristo … ao ti koroi kanoan ara taeka ni burabeti bwa natira a na ataia bwa antai ae a na kawaria ibukin kamaunanaia bure.”7
Ni kabane ana Boki Moomon e kaonaki n oin te kantaninga naba anne ae tabu.
Ni bukina aei, te tia wareware are e motinnanoia bwa e na kamatebwaia ma nanona ni koaua, ma tamnein te tataro, e na aki tii reiakina taekan Kristo ma e na reiakina mairoun Kristo—ai moarara riki ngkana a karaoa aia babaire bwa a na “kata tamaroan te taeka”8 ao n aki totokoia ni kaeti ma te inanonano n aki kakoaua9 man bwaai ake a taekinna tabeman are aki warekia.
Beretitenti Russell M. Nelson uringnga: “Ngkana I iangoa ana Boki Moomon, I iangoa te taeka ae te mwaaka. Koauan ana Boki Moomon iai mwaakana ni kamarurung, ni karaunano, ni kaoka, ni buoka, ni kakorakora, ni kabebete, ao ni kakukurei tamneira.”10
Au kakao n te bwakantaai aei nakoira n tatabemaniira, n aki taraia bwa manra kainakin te Ekaretia, bon ti kariaia te mwaaka ni koauan ana Boki Moomon bwa e na kuneira ao ni kamauriira teuana riki te tai, ao te bong teuana imwiin teuana ngkai ti kakorakoraira ni ukoukora oin ara kaotioti. E na bon riki ngkana ti kariaia.
I kakoaua bwa ana Boki Moomon iai inanona bwaninin ana euangkerio Iesu Kristo ao te Tamnei ae Raoiroi e na kamatoa koauana n te tai teuana ma teuana nakon temanna are, ma nanona ni kabane, ukoukori atatai ibukin kamaiun tamneia.11 N aran Iesu Kristo, amen.