Uaanikai
Kateimatoai matami ao nanomi ni kabotoa iaon te Tia Kamaiu, Iesu Kristo ao te kimwareirei ae akea tokina are e roko mai Irouna.
I ataa te bwai ae kam iangoia! Ai tii teuana riki te marooro ao ti a ongora naba iroun Beretitenti Russell M. Nelson. N te kantaninga bwa kam na teimatoa n ongora inanon tabeua te miniti ngkai ti kakantaninga ara burabeti ae tangiraki, I rinea atuun te marooro ae katekenano: au reirei bon iaon te uaanikai.
Ma karan, namakinan, ao karawen te beeri, bwanana, te meron, ao te mangko, ke te uaanikai ae koro kamimiina n aron te kiwano ke te pomegranate, e a tia n riki te uaanikai bwa te bwai ae korakora tangirana.
N Ana tai ni mwakuri iaon te aba, te Tia Kamaiu e kabootaua te uaanikai ae raoiroi nakon bwaai aika iai bonganaia n aki toki. E taku, “Ane kam na kinaia n uaia.”1 “Ai aron kai ni kabane aika raraoi, a kariki ua aika raraoi.”2 E kauringiira bwa ti na botii “uaa nakon te maiu are aki toki.”3
Inanon te mii ae mataata ae ti ataia raoi inanon ana Boki Moomon, te burabeti ae Riaai e kunea bwa e mena inanon “te rereua ae rootongitong ma ni kananokawaki.” Iai te ran ae bareka, te bubu n nang ae roo, kawai aika a kamimi, kawai aika katabuaki, n ai aron naba te kai te biti4 irarikin te kawai ae eti man irariki nakon te aroka ae tamaroa ma te “kai ae kangkang uaana [ae na] kakukureia te aomata.” Ni kabwarabwaraan te mii, e taku Riaai: “I a waaki … ni katoonga uaana; …e riaon karewen bwaai nako ake I [a] tia ni … katoong. … [Ao] e onrake tamneiu ma te kimwareirei ae moan te bati.” Te uaanikai aei e “[riao] kangkangina [nakon] kangkangin nako uaanikai ni kabane.”5
Nanon te Kai ao Uaana
Tera ae e tei ibukin te kai ma uaana ae moan te onoti? E tei ibukin “ana tangira te Atua “6 ao e katanoata ana babaire ni kaboomwi Tamara are i Karawa. “Ba E tangiria aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”7
Te uaanikai ae onoti aei bon kanikinaean ana kakabwaia te Tia Kamaiu aika kamimi man ana Mwakuri ni Kamaiu ae akea kabotauana. Ti aki n ae ti na tii manga maiu riki imwiin maiura ae mamate, ma rinanon ara onimaki iroun Iesu Kristo, ara rairannano ao kawakinan tuua iroura, a kona ni kabwaraaki ara bure ao n te bong teuana ti na tei n aki bareka ao n itiaki imatan Tamara ao Natina.
Kanakin uaan te kai e kabootauaki naba bwa ti na butimwaai otenanti ao berita n te euangkerio ae e a tia ni kaokaki ma nanora ni koaua—ni bwabetitoaki, ni karekea ana bwaintituaraoi te Tamnei ae Raoiroi, ao n rin ana auti te Uea bwa a na anganaki te mwaaka mai eta. Rinanon ana akoi Iesu Kristo ao man karinean ara berita, ti karekea te berita ae akea kabotauana ni maiu ma ara utu ae raoiroi n te maiu ae akea tokina.8
Maroaka ae te anera e kabwarabwara te uaanikai bwa “te bwai ae moan baan te kakukurei nakon te tamnei.”9 E bon koaua!
Te Kaangaanga n Tiku ni Koaua
Ngkai ti boni bane n reiakinaki, e ngae n are imwiin katoongan uaan te euangkerio, n teimatoa ni koaua ao ni kakaonimaki e aki bebete karaoana. N aron ae taekinaki n angin te tai n te maungatabu aei, ti reitinako ni kaitara ma katabetabe ao te kamwane, te aki oota ao te mangaongao, kabwakabwaka ao kariiri are a kataia ni kararoai nanora mai iroun te Tia Kamaiu ao te kimwareirei ao te tamaroa are ti a tia n rinanona n Iriiria.
Ibukin te kakaitara aei, ni miin Riaai ao e kairaki naba bwa te kauring! N iteran te karaanga are te iterana bon te kateitei ae moan te bubura ao ni mwawawa ma aomata n rooro nako ake a kotokoto ni baiia, ni bwainingare, ao ni ngareakiniia taan iriira Iesu Kristo aika raoiroi.
Aomata ake inanon te kateitei a kamaemaeiia ao ni ngareakiniia naake a kawakini tuua, n te kantaninga are a na aki karineia ao ni kabwairangiia n aia onimaki iroun Iesu Kristo ao Ana euangkerio. Ao ibukin taeka aika a kabwainrang ngaia ae e karika te nanououa are a taekinaki nakoia taan kakoaua, tabeman ibuakoia ake a tia ni katoonga te uaanikai a namakina te maama ngkai a tia ni mwanea te euangkerio. Ana kariiri te aonaaba aika kewe a kamwaneaki iai; a kararoaia man te uaanikai; ao n ana taeka te Uea, “[a bwaka] nako nanon kawai aika katabuaki ao [a] bua.”10
N ara aonaaba ngkai, teuare e buakaka iai ana toro are aki momotirawa ni karikirakea te nonori ni bwain te maiu aei, are e tei ibukin te auti ae bubura ma ni mawawa. Te reitinako aei e kabotauaki ma aanga aika aki riai , ae a roko ni mweengara, ma aia waaki ni bwaningareia aomata iaon te intanete.11
E kabwarabwara Nelson, “Teuare e buakaka e rikirake ni kakorakora ana mwakuri n uruani koaua ao ni kawaeremwea ana mwakuri te Uea.”12 Ti na uringa ana taeka Riaai: “Ti aki mutiakinia.”13
E ngae ngke ti riai n aki maaku, ti riai n taratara raoi. N taai tabetai, a kona bwaai aika a uarereke ni bita ara baeranti ni maiura n tamnei. Taiaoka n aki kariaia am titiraki, aia taeka ni kamaraki tabeman, rao aika aki kakaonimaki, ke kairua ke karawawata ni kararoako man kakabwaia aika kakukurei, itiaki, a kakukureia te tamnei are e roko man uaan te kai ae onoti. Kateimatoai matami ao nanomi ni kabotoa iaon te Tia Kamaiu Iesu Kristo ao te kimwareirei ae akea tokina are e roko mai Irouna.
Ana Onimaki Jason Hall
N Tuun kainnabau ae Kathy, ao Ngai ti kaea te taunimate ibukin Jason Hall. N ana tai ni motirawa, bon 48 ana ririki ao e beku bwa te beretitenti n te kooram n unimwaane.
Aikai ana taeka Jason n te bwai are e bita maiuna:
“[Ngke 15] au ririki I [bon] kabuanibwai inanon au tai n tebo. … E [mwaoto] roroau ao e mate rabwatau mai bwabwaau rikaaki. E bua au konaa ni kamwakura rangau ao teutana au konaa ni kamwakura baiu. I a bon aki kona n nakonako n ae abwabwaki, n tei, … ke n amwarake i bon irou. I kuri aki kona n ikeike ke n taetae.”14
“‘Tamau ae tangiraki [are i Karawa],’ I bubuti, ‘ngkana arona bwa a bon tii kona n raoiroi baiu, I ataia bwa I kona ni karaoia. Taiaoka, Tamau, taiaoka. …
“… ‘Kawakini rangau, Tamau, I tii [tataro ibukin] kabonganan baiu.’”15
E bon aki te roko ni bongana bain Jason. Kam kona n n ongo bwa tera ae a na taekina aomata ae kaain te aonaaba? “Jason Hall, e aki ongo am tataro te Atua! Ngkana arona bwa bon te Atua n tangira, E kanga ni katikuko n arom aei? Bukin tera ngkai iai am onimaki iroun Kristo?” E ongo bwanaaia Jason Hall, ma e aki mutiakin. N oneanmwiina e katoonga uaan te kai. Ana onimaki iroun Iesu Kristo e aki kona ni kamwaingaki. E bane ana reirei man te iuniwetiri ao e mare ma Kolette Coleman n te tembora, are e kabwarabwara “akea riki ae I tangiiria irarikina.”16 Imwiin 16 te ririki ni mare, teuana riki te kakai ae riki, natiia te mwaane ae onoti, ae Coleman, e a bungiaki.
A kanga ni karikirakea aia onimaki? E kabwarabwara Kolette: “Ti onimakina ana babaire te Atua. Ao e anganiira te kantaninga. Ti ataia bwa [n te bong teuana] ao e na bon kamaiuaki Jason. … Ti ataia bwa e a tia te Atua ni katauraoa nakoira te Tia Kamaiu, are ana angakarea ni kamaiu e anganiira te konaa bwa ti na teimatoa ni waaki nako ngkana a bwarananora.”17
Ngke e taetae iaon taunimaten Jasonl, Coleman ngkane ai 10 ana ririki e taku bwa e reireinaki iroun tamana “Tamara are i Karawa [iai] ana babaire ibukira, te maiu iaon te aba e tikiraoi, ao ti na maeka inanon ara utu. … Ma … ti na rinanon bwaai aika a kaangaanga ao ti na bae ni karaoa te kairua.”
E reitia Coleman: “Tamara are i Karawa e kanakomaia Natina, Iesu, nako aon te aba. Ana mwakuri e kororaoi. E kamaiuiia aomata. E tangiriia. Ao imwiina e korakai ibukin marakira, rawawatara, ao ara bure. Imwiina E mate ibukira.” Ngkanne e reitia Coleman, “Ibukina ngkai E karaoa aei, Iesu e ataia aron au namakin ngkai.
“Teniua te bong imwiin maten Iesu, E … a manga oki ao ni maiu ma rabwatana ae kororaoi. E kakawaki aei nakoiu ibukina ngkai I ataia bwa … rabwatan [tamau] e na kororaoi ao ti na bootaki ni maeka n ara utu. …
N ana kainiin Coleman,” Ni katoa tairiki ngke te ataei Ngai, e taetae nakoiu tamau, ‘e tangiriko Tamam, e tangiriko Tamam are i Karawa, ao te ataeinimwaane ngkoe ae ko raoiroi.’”18
E Roko te Kimwareirei mairoun Iesu Kristo
E kabwarabwara Beretitenti Russell M. Nelson bukin tera ngkai ana utu Hall a karekea te kimwareirei ao te kantaninga. E taku:
“Te kimwareirei ae ti namakinna e uarereke nakon karaoana ma aroaron maiura ao bwaai ni kabane are e na karaoaki ma tarakin raoi maiura.
“Ngkana e kaineti maiura iaon ana babaire ni kamaiu te Atua … ao Iesu Kristo ao Ana Euangkerio, ti kona n namakina te kimwareirei n aki tabe ma bwai aika a na riki—ke akea ae riki—inanon maiura. Te kimwareirei e roko mai Irouna ao ibukina ngkai bon Ngaia. Bon Ngaia oin ni kabane te kimwareirei. …
“Ngkana ti taraa te aonaaba … , ti na aki ataa te kimwareirei. … [Te kimwareirei] bon te bwai n tangira are e roko mai nanom raoi ni kataakin maiuakinan te etieti, are e reireiaki mairoun Iesu Kristo.”19
Te Berita ngkana Ko Oki
Ngkana ko a tia ni maiu n aki katoonga uaan te kai tabeua te tai, taiaoka ataia bwa e arora baina te Tia Kamaiu nakoimi n taainako. E anoanoira ma te tangira, “Rairinanomi man roko nakoiu.”20 E mwaiti ana uaanikai ao a tai n taainako. E aki kona ni kabooaki n te mwane, ao akea temanna ae tangira te uaanikai ni koaua ae na totokoaki.21
Ibukin temanna are e tangiria ni kan okira te kai ao ni katoonga riki uaana, moanna am tataromwaaka ni kaota nanom nakon Tamam are i Karawa. Kakoaua Iesu Kristo ao mwaakan Ana angakarea ni kamaiu. I berita nakoimi bwa ngkana kam tanimai nakon te Tia Kamaiu “n ami iango,”22 e na riki uaan te kai bwa ami bwai, e na kangkang kanakina iroumi, e kakukure nakon tamneimi “te kabanea ni korakora mai buakon ana bwai n tangira nako te Atua.”23
Uoua te wiiki n nako n te bong aei, I noora kakimwareirein ana uaanikai te Tia Kamaiu ae kona n nooraki ngkai Ngai ma Kathy ti kaea katabuan te Lisbon Portugal Tembora. Koaua n te euangkerio ae e a ti a ni kaokaki e uki nako Portugal n 1975 ngke e reke te inaomata ibukiia aaro. Ngkai angiia Aomata aika Itiaki man rine bon moan aomata ake a katoonga uaan te kai ngke akea kaain te taromauri, akea te umwantabu, akea te tembora ae kaan nakon 1,000 te maaire (1,600 kiromita) ni kukurei ma ngaira bwa uaan te kai ae onoti e kuneaki inanon ana auti te Uea i Lisbon, Portugal. I kariniea ao I kamoamoaia Aomata aika Itiaki ake a kateimatoai maiuia iroun te Tia Kamaiu.
E taku te Tia Kamaiu, “Ane maeka i nanou, ao Ngai i nanona, ao e kariki ua aika bati: ba aki kona te bai teuana ngkana kam a raure ma ngai.”24
N taetae n te ingabong aei nakoia kaain te Ekaretia ni kabuta te aonaaba, e taku Beretitenti Nelson, “Tariu ao mwaane aika tangiraki, kam maiu bwa taian katooto ni uaan te kai are e roko man iriiran ana reirei Iesu Kristo.” Ngkanne e reitia: “I karabwai ngkami! I tangiriki ngkami!”25
Ti tangiriko, Beretitenti Nelson.
Ngai te tia kakoaua nakon mwaakan te kaotioti are iroun ara Beretienti ae tangiraki. Bon ana burabeti te Atua. N aron Riaai are ngkoa, Beretitenti Russell M. Nelson e anoanoira ao ana utu te Atua, n roko ao ni katoonga uaan te aroka. Au kantaninga bwa ti na karekea te nanorinano ao te korakora n tou mwiin ana reirei.
I kakoaua ma te nanorinano bwa Iesu Kristo bon Natin te Atua. Ana tangira, mwaakan, ma ana akoi e uoti bwaai ni kabane bwa a na teimaan ni bongana. I kakoaua n aran Iesu Kristo, amen.