Ana Reirei ni Koaua te Tia Kamaiu
Ti kona n namakina te kimwareirei ae reitinako ngkana ti kateitei iaon ara tia Kamaiu ao Ana euangkerio bwa aan maiura.
Nakon tabeua nakoa ake a raba n ana boki Akai n te O Tetemanti bon kabwarabwaraia kurubu n aomata ake a kona ni kabonganai ana reirei Unimwaane Holland. A bon kaairua n aki katuka Kristo ni boboto inanon maiuiia aia onimaki ao aia mwakuri. Akai e koroi tabeua iango-kauntabaea te taeka n tamnei n aron are e kauringiia aomata aikai te Uea ibukin tikuia ni mweeraoi n aia auti nakon are a na katea ana tembora te Uea:
“Bon ami tai aei, O ngkami, ni maeka i nanon ami auti, aika rainaki ngkae e kamaroa n uruaki?
“Ma ngaia ae E kangai ana taeka Iehova Taobaota; kam n iangoi aroaromi.
“Kam ununiki uita aika batini kamae, ao kam tai teutana; kam amamarake, ma kam aki rauaki; kam momoi, ma kam aki ngangae ni momoi; kam kunnikaingkami, ma akea ae aang; ao ane kareke bon ana makuri ao e karekea bon ana makuri ni nnei i nanon te bua ae bangabanga.
“Aikai ana taeka aia Uea taanga ni buaka; Iangoi aroaromi.”1
Ko tangiri riki bwai aika a rang tamaroa kabwaraana man aki moanibwaiaki bwaai ake aki karekea uaaia ae akea tokina iaon ana bwai te Atua?
N te bootaki n toa ae I kaea, te mitinare ae tiba oki e taekina tamana are karioa te iango ae nakoraoi ngke e taku nakoia natina, “Tera ae ti rangi ni kainanoia riki tangiran te Wi Fi ke taekan Nibwaai”
I a tia ni maeka i Aberika Maeao inanon nimaua te ririki, I noori tabeua katooto irouia aomata ake a moanibwaia te euangkerio n aron ae kantaningaki ao n akea mamaaia. N aron teuana te katooto bon aran te bitineti ae e karaoi raaba ao kabarantan wiira i Ghana. Te tia bwaibwai e aranna “Te Kaetaki nakon Ana Kantaninga.”
Ti kona n namakina te kimwareirei ae reitinako2 ngkana ti kateitei iaon ara tia Kamaiu ao Ana euangkerio bwa aan maiura. E ngae n anne, e bon bebete bitakin te kateitei anne nakon bwain te aonaaba, ike te euangkerio e a riki bwa ai te kauoua ni bwai, ke n ti kaeakin te taromauri ibukin uoua te aoa n te Tabati. Ngkana aio bon taekana, ti te arona n aron karinan ara bwakabwai n te bua ae “bangabanga.”
Akai e bon tuangiira bwa ti na taua ma nanora—n riki, ngkai ti atongnga n te taetae n Aotiteria, “kokoaua” taekan maiuakinan te euangkerio. Aomata a bon kokoaua ngkana a bon taku bwa a bon karaoia.
I reiakinna teutana taekan te kokoaua ao n riki n taua ma nanou ngke I takakaro n te urakibii. I reakinna anne ngke I kabanea korakorau, ngke I karaoai bwaai ni kabane are I konaa, kukureiu man te takakaro e bon korakora.
Au tai n takakaro ae matennanou n te urakibii bon te ririki imwin te reirei n te moan rinan. Te tiim are I kaaina a bon kaai n tarena ao tauannano. Ngaira tiambion n te tiim n te ririki anne. E ngae n anne, te bong teuana ti aitara ni boo ma tiim aika aki rangi ni bwaati, ao imwin te takakaro ti bane ni karekei raora ni kairiia nakon te bong ae bubura, ana taenti te kuura n te ririki. I taekina anne ibukina bwa te takakaro aio e na bon bebete, I riai ni kataia ni kamanoai man te ikoaki n te aro are N na konaa ni kukurei ni kabwanina te taenti. N tain te takakaro, ti bon aki tauannano inanon taai ngkana ti kaauntaba ma tabeman taan takakaro n aron are ti bon riai, ao ti konaaki. Ao teuana riki ae moan te aki nakoraoi, I a kabanea te takakaro ma tibutauan riau are e na aki kanakoraoa aron teiu nakon raou. Tao I kainanoa ae n a reiakina te bwai teuana.
Te taneiai ae rang kaokoro e riki n te takakaro are imwina n te aro are I bon tauannano iai. N te taina ao I biri ma nanou ni koaua ni kaaunton ma temanna te tia takakaro, ni waekoa I namakina teutana te maraki i moamoau. N reiakinau iroun tamau bwa N na aki riai ni kaotia nakon te tiim are aitarara n ataia bwa I koaki, I waaki n reitanako te takakaro. Te tairiki anne, ngke I kataia n amwarake, I kunea bwa I aki kona n tena. N te ingabong are imwina, I nakon te o n aoraki, ike te X-reei e kamatoa bwa ngaia e maoto mangaiu. Wiuu a kabaeaki ni kainaki ma te uaea ibukin onoua te wiiki.
Reirei a reiakinaki man taeka ni kaikonaki aei man te ria ae tibutaua ao te mwangai ae maoto. N aki ongea ururingan aki rauakiu n tangiran amwarake aika a matoa inanon onoua te wiiki ike I tii kona n anaa ae ranran, I aki namakina te nanokawaki ibukin mwangaiu ae maoto kioina e bon riki man karaoan te kabanea n tamaroa are I konaa. Ma I karekea te nanokawaki n taekan te ria ae tibutaua ibukina e kanikinaea kerikakiu.
Te anga ara kabanea ni konaa tiaki nanona are ti na rinanon kakabwaia ke n totokanikai n aki toki. Ma e nanonaki are ti na karekea te kimwareirei. Te kimwareirei e aki kaumaka te kukurei ke kukurei aika aaki teimaan. Te kimwareirei e bon teimatoa ao e roko ngkana te Uea e kariaia ara mwakuri korakora.3
Te katooto man te mwakuri ae e kariaiakaki bon man rongorongon Oliver Granger. E taku Berretitenti Boyd K. Packer: “Ngke Aomata aika Itiaki a kakioakinako mai Kirtland, … Oliver e tiku imwiia ni kabonakoi aia bwai bwa tao mwaitira are e konaa. Ikanne e bon aki bati n tau te tai are e kona n tokanikai. Ao, koauana, e bon aki tokanikai!”4 E a tia ni mwiokoaki iroun te Moan Beretitentii ni karaoa te mwakuri ae kaangaanga, ae e bon matoatoa karaoana. Ma te Uea e kamoamoa ibukin kakoauan ana mwakuri korakora ae aki tokanikai n taeka aikai:
“I uringa au tia mwakuri ae Oliver Granger; nooria, e koaua ae I tuangnga bwa arana e na uringaki n ae tabu man te roro teuana nakon te roro teuana, n aki tootoki, e taku te Uea.
Mangaia are, e riai ni mwakuri ma nanona ae korakora ibukin kaboan te Moan Beretitentii n au Ekaretia, … ao ngkana e bwaka e na manga teirake, bwa ana karea e na rang tabu riki nakoiu nakon rikirakena, e taku te Uea.”5
E koaua koroboki aika tabu are e taekinaki ni kaineti nakoira ni kabane—ti aki ara tokanikai, ma nakon ara anganano ao mwakuri korakora are e taraaki iroun te Uea.
Te katooto teuana n ana reirei Iesu Kristo bon te rao ae tangiraki iroura i Côte d’Ivoire i Aberika Mainiku. Te titita ae tamaroa, kakaonimaki e taonaki n te rawawata n ana namakin, ao riki tabeua bwain rabwatana, bainikirnana mairoun buuna inanon te tai ae maan, ao n tokina a buuraure. E aki tionako man ana onimaki ao raoiroina, ma ibukin buakakan teuarei nakoina, e bon rang maraki inanon te tai ae maan. N oin ana taeka, e kabwarabwara bwa tera ae riki:
“E ngae ngke I taku bwa I kabwara ana bure, I aki toki n namakina te namakin ae maraki bwa tera ae e tia n riki, I aki toki n namakina te maraki anne. Bon ti tebo ma te buee inanou. Mwaitin te tai I tataro nakon te Uea n anaia mairou, ma e korakora marakina are I matoa ni kakoaua bwa N na bon kabanea au bong ni maiu ma ngaia. E rang maraki riki nakon ngke e mate tinau inanon matoana, e korakora te maraki riki nakon are ngke tamau ao natiu temwaane a kaai ni mate. Te maraki e raababanako ao n roota nanou, are e anganai te namakin bwa N na bon mate n te tai teuana.
“Tabeua taai I titirakinai bwa tera ae e na karaoia te Tia Kamaiu n te bwai are I rinanona, ao I kona n taku, ‘E a bon riao aei, te Uea.’
“Ngkanne teuana te ingabong I kakaea te maraki are e roko man baikai ni kabane inanou ao n nako naano, ni kakaea inanon rabwatau. I aaki namakina te maraki. Au iango e waekoa n rinanoi ni kabane bwaai ake I [tia] n rinanoi bwa na namakina te maraki, ma I aki namakina te maraki. I tiku ni kabongnga n taraia ngkana N na namakina te maraki inanou, I aki namakinna. Ngkanne I katororobua ao ni karabwa te Atua ibukin karaoan te mwakuri ni kamaiu man ana mwakuri te Uea ibukiu.”6
Te titita aio ngkai e a tia ni kabaeaki nakon temwaane ae tamaroa, kakaonimaki are e rang tangiria.
Ngaia are tera ae nanonaki n riki bwa te tia kakoaua ibukin Kristo? Ao tera kakawakin te euangkerio ibukira ngkana ti “iangoi [arora],” are taekinna Akai?
I tangira te katooto man kaetan te aroaro are e kaotaki iroun taman te Uea ae Ramoni. Te karaki aio e taekina taekan unun te Uea ni kunea natina temwaane n toana Amon, te Nibwaite—aomata ake a riribaaki irouia Remwanaite. E anaa ana kabaang ni kauntaeka ma Amon ao ni waekoa e kunea bwa ana kabaang Amon e nim i roroana. “Ao ngkanne te uea, ibukin maakuna bwa mwiina e bua maiuna, e taku: Ngkana ko kamaiuai, ao N na anganiko te bwai are ko tuatua, e aoria ngkana iteran ueau.”7
Nora ana anganano—iteran ueana ibukin maiuna.
Ma imwina, imwin ootana n te euangkerio, e karaoa teuana te anganano. E taku te uea: Teraa ae N na karaoia bwa e aonga n reke irou te maiu ae akea tokina are ko a tia n taekinna? Eng, teraa ae N na karaoia bwa I aonga ni manga bungiaki iroun te Atua, bwa e na koutaki nako te Tamnei ae buakaka aei inanou, ao ma ni butimwaea Tamneina, bwa I aonga n onrake n te kimwareirei, bwa I aonga n aki teweaki nako n te kabanea ni bong? Nooria, e taku, N na anganako au bwai ni kabane, eng, N na mwanuokina ueau, bwa I aonga ni karekea te kimwareirei ae korakora aio.”8
Te tai aei, e tauraoi n anga ni kabane abanueana, ibukin te euangkerio ae e kakawaki riki nakon bwaai ni kabane ake irouna! I tangiria ni kokoaua n te euangkerio.
Ngaia are, te titiraki ibukira n tatabemaniira bon, ti bon kokoaua naba n taekan te euangkerio? Ibukina bwa a riki n tii motinnano-mwakoroiia aki rang kokoaua raoi! Ao te Atua e aki kinaia koraki ake a aki bwanin aia motinnano aki neboaki iroun te Uea.9
Bon akea te kaubwai, ke mamaten te nano, ke aroaro nako, ke bwaai ni kareke rongorongo, ke takakaro n te witeo, ke takakaro nako, ke irekereke ni bukamaru, ke bwaai ni kabane iaon te aba are e rang kakawaki riki nakon te maiu ae akea tokina. Ngaia are te Uea e reirei nakoia aomata bon “iangoi aroaromi.”
Au namakin a kabwarabwaraki raoi inanon ana taeka Nibwaai: “I kimwareirei n te oota; I kimwareirei n te koaua; I kimwareirei iroun au Iesu, bwa e a tia ni kabooa tamneiu mai moone.”10
Bon ngaira taan Iriiria ni koaua are E anga ngaia ibukira? Bon Ngaia ara Tia Kabooira ao ara Tia Tei iroun te Tama? Ngaia are bon Ngaia, motinnano ni koaua n Ana mwakuri ni kamaiu ao ngkai n aron Ana tangira, Ana nanoanga, ao Ana tangira ibukira ni karekea te maiu ni kimwareirei akea tokina? I bubuti nakoimi ni kabane ake kam ongo ao ni wareki taeka aikai: Taiaoka, taiaoka tai kanakoi ami motinnano ni karokoa ko na roko iai n ae aki koaua, taai aika ana roko. Karekea te kokoaua ngkai ao namakina te kimwareirei! N aran Iesu Kristo, amen.