Taan Kakoaua, Kooram n te Nakoanibonga ae te Aaron, ao aia Kiraati Ataeinnaine
Bitaki ake ti katanoatai ngkai te kantaninga iai bwa a na buokiia kairake n ataeinimwaane ao ataeinnanine ni karikirakea aia konabwai ae tabu.
Tariu ao mwaneu aika tangiraki, e tamaroa manga te kaitiboaki ma ngkami n te maungatabu ni kabuta. Ni moan te wiiki aei, a karaoaki katanoata nakoia membwa n te Ekaretia iaon bitaki n te tua ni kaineti nakoia ake a riki bwa taan kakoaua n te bwabetito ao otenanti ni kabaebae. I tangiria ni katuruturi iango aika teniua akanne.
-
Te bwabetito n onomwi ibukin te aomata ae mate e kona ni kakoauaki iroun temanna are iia ana rekomente n te tembora, n ikotaki ma te rekomente are e tianaki kabonganaakina.
-
Te membwa are e ntaute ma te rekomente n te tembora e kona n riki bwa te tia kakoaua n te otenanti ni kakoaua, maiu ao onomwi.
-
Te membwa are e bwabetitoaki n te Ekaretia e kona n riki bwa te tia kakoaua ni bwabetitoan te aomata ae maiu. Te bitaki aei e bwainaki ni bwabetito ni kabane i tinanikun et tembora.
Bitaki nakon tua aikai a irekereke ma karaoakiia. Reirei ao tua aika aki rangi n nonoraki aki bibitaki. Bon titebo korakoraia n taian otenanti ni kabane. Bitaki aikai a riai ni kanakoraoa irakina irouia utu ni karaoan otenanti aikai.
I tangiria naba ni kan taetae nakoimi n te tai aei ni kaota te bitaki are e kaineti nakoia ara roronrikirake ao aia taan kairiiri.
Kam na uringnga bwa I a tia ni kaoia te roronrikirake n Ana Ekaretia Iesu Kristo ibukiia Aika Itiaki ni Boong aika Kaitira bwa a na karin n ana taanga ana roronrikirake te Uea n ira te mwakuri ae korakora iaon te aba ni boong aikai—ikotakiia kain Iteraera.1 I kanakoa te kakao aei nakoia te roronrikirake ibukina bwa a bon rangi n tarena n reitaki ma tabeman ao n tibwa te bwai are e a kakoaua n te aro ae anainano. Te mwakuri n ikotakiia kain Iteraera bon te mwakoro ae rang ni kakaawaki ni katauraoan te aonaaba ao ana aomata ibukin Kauaokin te Uea.
Ni uoote nako, ana taanga te Uea n te roronrikirake e kairaki iroun te bitiobi, ana toro te Atua ae motinnano. Tibwangana ae te moan ae moan te kakaawaki bwa e na tararuaia ataeinimwaane ao ataeinnaine n ana uoote. Te bitiobi ao ana kauntira a kaira te mwakukri n te kooram n Nakoanibonga ae te Aaron ao aia kiraati Ataeinnaine n te uoote.
Bitaki ake ti katanoatai ngkai te kantaninga iai bwa a na buokiia kairake n ataeinimwaane ao ataeinnanine ni karikirakea aia konabwai ae tabu. Ti tangiria naba ni kakorakora te kooram n te Nakoanibonga ae te Aaron ao aia kiraati Ataeinnaine ao ni katauraoa te boutoka nakoia bitiobi ao taan kairiiri ake a ikawai ngkai a beku ibukiia te roron ae rikirake.
Unimwaane Quentin L. Cook e na maroroakina te bitaki are e irekereke nakoia ataeinimwaane. Ao n te tairiki aei, n aia tetere aine ni kabuta, Titita Bonnie H. Cordon, Beretitenti ni Kabuta ibukiia Aine, e na maroroakinii bitaki ake a irekereke nakoia ataeinnaine.
Te Moan Beretitentii ao te Tengaun ma Uoman a katiteuanaaki ni karaoan mwakuri aikai ni kakorakoraia ara roronrikirake. O, ti rang n tangiriia ao ti tataro ibukiia! Bon ngaiia “Kantaninga mai Iteraera, ana taanga ni buaka Tion, ataein te bong ni berita.”2 Ti kaota ara onimaki ae bwanin irouia ara roronrikirake ao ara kakaitau ibukiia. N aran Iesu Kristo ae tabu, amen.