Taeka ni Kainiin
Taun temanna ma temanna e kainnanoa rairakin te iango ma te nano ni katootonga riki te Uea
Tariu ao mwaneu aika kam tangiraki, ngkai ti a roko ni banen te maungatabu ae ururingaki aei, ti karabwa te Uea n rongorongo ake e anga ao katangitang ake a kakorakoraira. Ti a tia ni kanuaaki raoi n ana taeka Kristo.
Ti ataia ana euangkerio Iesu Kristo ae kaokaki e na karekea te kantaninga ao te kimwareirei nakoia aomata ake a na ongora man maiuakin Ana reirei. Ti ataia naba bwa mweenga nako a kona n riki bwa tabo ni katantan n koaua n te onimaki, ike e na maeka iai Tamnein te Uea.
Eang, ae moan te kakaawaki ni Kaokan Bwai bon te tembora are tabu. Otenanti ao berita aika tabu a rang kakaawaki n katauraoaia aomata ake a na tauraoi ni butimwaea te Tia Kamaiu n Manga Okina. N te tai aei, iai 166 tembora aika a mwakuri, ao e mwaiti riki aika a na kaoti.
Te neweaba e na karaoaki imwain katabuan taian tembora aika a boou ao ake a onobwaiakaki. A mwaiti raao ake tiaki kaain ara aro ake a na ira neweaban tembora aikai ao man reiakina te bwai ae boou iaon taekan kakabwaia n te tembora. Tabeman taan roko akanne a na kan ataa riki ae bati. A na titiraki ma nanoia bwa a na kanga ni kona ni karekei kakabwaia n te tembora.
Ngkai kaain te Ekaretia, ti kainnanoa te tatauraoi n kaekai aia titiraki. Ti kona n kabwarabwaraa bwa kakabwaia n te tembora a tauraoi nakoia aomata nako ao naake a katauraoi nanoia. Ma imwain ae a rin n te tembora ae katabuaki, a riai n tau. Te Uea e tangiriia natina ni kabane ni karekei kakabwaia aika akea tokiia ake a tauraoi n Ana tembora. E a tia n kaotia bwa tera ae riai n karaoia temanna bwa e na tau n rin n Ana auti ae tabu.
Te katooto n karaoan te aeka n reirei aio bon kairan te iango nakon taeka ake a koreaki i tinanikun te tembora: “E tabu bwa ana Bwai Iehova; Ana Auti te Uea.” Ana reirei Beretitenti Henry B. Eyring n te bong aio ao tabeman riki a tia n kakorakoraira bwa ti na itiaki riki. Tembora nako bon taabo aika tabu; ni kabane taan mwakuri n te tembora a kataia n itiaki riki.
Ni kabane baike a kainnanoaki ibukin te rin n te tembora a kaineti ma kororaoin temanna ma temann. Karekean te katauraoi anne, aomata ake a tangiria n karekei kakabwaia n te tembora a na rinanon uoua intawiu: te moan ma aia bitiobi, kauntira n te bitiobiriki, ke beretitenti n te mwaanga; te kauoua ma te beretitenti n te titeiki ao te beretitenti n te mition ke temanna ana kauntira. N te intawiu akanne, iai tabeua taian titiraki.
Tabeua titiraki akanne a tia n manga bitaki ibukin te kamataata. I tangiria n wareki nakoimi ngkai:
-
Iai am onimaki ao am koaua iroun te Atua te Tama ae akea Tokina; Natina, Iesu Kristo; ao te Tamnei ae Raoiroi?
-
Iai am koaua ibukin Ana Mwakuri ni Kamaiu Iesu Kristo ao tibwangana ae am Tia Kamaiu ao te Tia Kabooira?
-
Iai am koaua ibukin Kaokan ana euangkerio Iesu Kristo?
-
Ko kamatoa te Beretitenti n ana Ekaretia Iesu Kristo ibukiia Aika Itiaki ni Boong aika Kaitira bwa te burabeti, te tia mamata, te tia karekei kaotioti ao bon tii ngaia te aomata i aon te aonaaba ae e kariaiakaki ni kamwakuri kiingin te nakoanibonga ni kabane?
Ko kamatoaia kaain te Moan Beretitentii ao te Kooram n Abotoro n te Tengaun ma Uoman bwa burabeti, taan mamata, ao taan karekei kaotioti?
Ko kamatoaia Mataniwi ni Kabuta ake tabeman ao mataniwi n aono n te Ekaretia?
-
E a tia te Uea n taekinna bwa bwaai ni kabane a na “karaoaki n te itiaki” i Matana (Reirei ao Berita aika Tabu 42:41).
Ko botumwaaka n ukora te itiaki n am iango ao n anuam?
Ko maiuakina tuan te itiaki?
-
Ko iriira ana reirei ana Ekaretia Iesu Kristo n anuam aika aki noraki ao n ana tabo te botanaomata ma kaain am utu ao tabeman?
-
Ko boutokai ao ni kaungai taian reirei, mwakuri, ke koaua aika a kaitara ma ake n ana Ekaretia Iesu Kristo ibukiia Aika Itiaki ni Boong aika Kaitira?
-
Ko kekeiaki ni kawakina te bong ae te Tabati n tabuia, ni mweengam ao n te taromauri, ni kakaea am bootaki, ni katauraoiko nakon ao ni kororaoi n anaa te toa, ao ni maiuakina maium ni kabooraoia ma taian moti ao tuan te euangkerio?
-
Ko kekeiaki bwa ko na kokoaua ni bwaai ni kabane aika ko karaoi?
-
Ko kabwaka te kabwianibwai ae bwanin?
-
Ko mataata ao n ongotaeka nakon Tuan te Mauri?
-
Iai katabeam n te mwane ke bwaai riki tabeua nakon kainabam mai mwaina ke nakoia natim?
Ngkana iai, ko teimatoa ni kakoroi nanon katabeam akanne?
-
Ko kawakina te berita are ko karaoia n te tembora, ni ikotaki ma kabonganaan te kamenti n te tembora n aron are e taekinaki n te entaumente?
-
Iai bure aika a kakaiaki inanon maium ae ko riai n raoiakin ma mataniwi n te nakoanibonga bwa mwakoron kawaim n rairannano?
-
N am iango ko tau n rin n ana auti te Uea ao ni karaoi otenanti n te tembora?
Ningabong, titiraki aika a tia ni manga rinanoaki aikai ibukin karekean rekomente n rin n te tembora aikai a na tibwatibwaaki nakoia taan kairiiri n te Ekaretia n kabuta te aonaaba.
N ikotaki ma kaekan titiraki akanne ma te koaua, e bon ataaki bwa ni kabane taan mwakuri n tembora a na kabongana te kamente n te nakoanibonga ae tabu iaan kunnikaia. Aio bon kanikinaean te motiinano n tamnei n kekeiaki n katoa bong n katootonga riki te Uea. E kauringiira naba bwa ti na teimatoa n kakaonimaki nakoni berita aika a tabu ake ti karaoi n katoa bong ao n nakonako iaon kawain te berita n katoa bong n te kawai ae rietata man tabu riki.
Ngkai, n te tai aei, I tangiria n taetae nakoia te roronrikirake. Ti kaungai ngkami bwa kam na katauraoi ibukin rekomente nakon te tembora ae tianaki taina. Kam na bon ti anganaki titiraki ake a tau ibukimi n ami katauraoi ibukin otenanti n te bwabetito ao te kamatoa n tei ibukiia tabeman. Ti rang kakaitau ibukin taumi ao nanomi n ira te mwakuri n te tembora are tabu anne. Ti karabwai ngkami!
Taum ibon iroum n rin n ana auti te Uea e kainnanoa oin am katauroi n te tamnei. Man ana ibuobuoki te Uea, akea te bwai ae aki kona n karaoaki. N bwaai tabeua, e bebete riki katean te tembora nakon katean te botanaomata ae tauraoi nakon te tembora. Taun temanna ma temanna e kainnanoa rairakin te iango ma te nano ni katootonga riki te Uea, n riki bwa kaain te aba ae kokoaua, n riki bwa te banna ae tamaroa riki, ao n riki bwa te aomata ae tabu riki.
I kakoaua bwa te mwakuri n katauraoi aei e uoti kakabwaia aika bati n te maiu aei ao kakabwaia ake aki kona n reke n te maiu ae na roko, n ikotaki ma kawakinan am utu n aki toki n te aro n “kukurei ae aki totoki.”1
Ngkai I tangiria n marooroakina te bwai teuana: babaire ibukin te ririki ae na roko. Imwin tain te kamwaitoro n te ririki 2020, e kakoroa raoi 200 te ririki imwin are Iotebwa Timiti e nora te Atua are ti ataia bwa Te Moan Kaotioti. Te Atua te Tama ao Natina ae Tangiraki, Iesu Kristo, e kaoti nakon Iotebwa, te kairake ae 14 ana ririki. Te bwai anne e mwaakena moanan Kaokan ana euangkerio Iesu Kristo n ae bwanin, n aron are e a tia n taekinaki n te Baibara ae Tabu.2
Imwina e kaoti te roko ae reireiti mairouia taan uarongorongo mai ikarawa, aika Moronaai, Ioane te Tia Bwabetio, ao Abotoro ngkoa aika Betero, Iakobo, ao Ioane. Ao n rimwiiaki riki irouia tabeman, n ikotaki ma Mote, Eritai, ao Eria. Nakai ni kabane a uota te kariaia ae tabu n kakabwaiaia natin te Atua i aon te aba teuana riki te tai.
N te kakai, ti a tia naba n karekea ana Boki Moomon: Kakoauan Taekan Iesu Kristo, te koroboki ae tabu are na raona te Baibara ae Tabu. Kaotioti ake a boretiaki n Reirei ao Berita aika Tabu ao Bwaeao aika Bobuaka a tia n rang mataata n ana tua nako te Atua ao koaua aika akea tokiia.
Kiing ao ana aobiti nako te nakoanibong a tia n kaokaki, n ikotaki ma aobiti aika te Abotoro, Itingaun, tamanuea, ibonga ae rietata, unimwaane, bitiobi, ibonga, tia reirei, ao te riikan. Ao aine aika a tangira te Uea a beku korakora n te Bootaki n Aine, Moanrinan, Kairake n Ataeinnaine, Reirei n Tabati, ao n nakoa n te Ekaretia ake tabeua—aikai ni kabane mwakoro aika kaakawaki ni Kaokan ana euangkerio Iesu Kristo n ae bwanin.
Ngaia are, te ririki 2020 e na riki bwa te ririki n rungaa te kauabubua n ririki. Maungatabu n kabuta n Eberi ae na roko e na kaokoro man maungatabu ake mai mwaina. Onoua te namwakaina mangkai, au kantaninga bwa ni kabane membwa ao utu nako a na katauraoi nakon te maungatabu ae onoti are e na waakina aan raoi te euangkerio ae kaokaki.
Ko kona n waakina am katauraoi man manga warekan rongorongon Iotebwa Timiti n te Moan Kaotioti n aron are koreaki n Bwaeao aika Bobuaka. Ara kamatebwai ibukin te ririki ae na roko n Nakomai, Iriirai bon ana Boki Moomon. Ko na kona n iangoi titiraki aika kakaawaki n aron, “E na kanga n riki bitakin maiu ngkana au ataibwai ake a reke man ana Boki Moomon a bon tii anaaki naba?” ke E kanga te tai are e iriira te Moan Kaotioti ni kaokoro karaoana ibukiu ao ibukiia ake tangiraki irou?” Ao, ngkai a tauraoi witeon ana Boki Moomon, ko kona n karinii n am kamatebwai ibon iroum ao n te utu.
Rinei oin am titiraki. Karaoa oin am babaire. Reitiko ma ootan Kaokan Bwai ae mimitong. Ngkai ko karaoa anne, te maungatabu n Eberi ae na roko e na aki ti ururingaki, ma e na aki kona ni mwamwanuokinaki.
Ngkai n kainiin, I katuka iroumi au tangira ao au kakabwaia bwa ngkami nako kam na kukurei man tabu riki n te bong koraki. N te tai aei, taiaoka ataia bwa kaotioti a reitinako inanon te Ekaretia ao a na reitinako iaan ana kaetieti te Uea ni karokoa “ana mwakuri te Atua a na kakoroaki bukiia, ao Iehova ae Mwaaka e na kangai e a tia te mwakuri.”3
I kakabwaiai ngkami, n kamatoaa au tangira ibukimi, ao ni kaota au kakoaua bwa e maiu te Atua! Iesu bon te Kristo! Aio Ana Ekaretia ao ngaira bon Ana aomata. N aran Iesu Kristo ae tabu, amen.