Am Mwananga ae Korakora
E kaoira te Tia Kamaiu, ni katoa te bong, ni katikui mwengaraoira ao n Raonna n te mwananga n riki bwa ana reirei.
Taekaia Hobbits
Mamaten nanoia ataei te karaki ae koreaki ririki aika mwaiti n nako e moanaki man te taeka ae kangai “Inanon te bwangabwanga i aontano ike e maeka iai te hobbit. ”1
Te karaki ibukin Bilbo Baggins bon te hobbit naba ni kangai ae akea rakan arona ae e reke nakoina te bwai ae moan te kamimi—te tai ibukin te mwamwananga, ao te berita ibukin te bwaintangira ae kakawaki.
Te kanganga bwa taian hobbit ake a rangi ni karineaki akea te bwai ae a kani karaoia ma te mwamwananga. Aron maeuia ni kabane bon ti te kan mwengaraoi. A rangi n tatangira te amwamwarake ae onoua taina n te bongina ngkana a kona ni karekei ao ni kabanea aia tai n aia nne n aroka, ni mamaroro ma naake a roko, anene, ni katangi bwaai ni katangitang, ao ni kakukureia ni maiuia.
E ngae n anne, ngke e a katauaki Bilbo bwa e na mwananga, e waetata ni kukurei man anaaki nanona. E ataia mai moana bwa te mwananga bon te kakawenako. E ngae ngke e kanganga. E ataia naba bwa e na kona n aki oki.
Ma, tangiran te kan mwananga e roota nanona. Ngaia are, te hobbit aei e kitana mwengaraoina ao n toua te kawai nakon te mwananga ae korakora are na kairia nako “ikekei ao ni manga oki.”2
Am Mwananga
Tao teuana bukina ae te karaki aio e kauekeia aika mwaiti i bon i bukina bwa bon ara karaki naba.
Ngkoa, ngkoa imwain bungiakira, inanon te tai ae moan te maan ao n raba man te ururing, ti kaoaki naba bwa ti na ira te mwaananga. E bon baireaki iroun te Atua, are Tamara are i Karawa. Butimwaean te mwananga aio e nanonaki bwa ti kitana te mwengaraoi ao te kamanoaki ngke ti mena Irouna. E na nanonaki bwa te roko nakon te aonnaba ibukin te mwananga ae kaonaki ni kanganga aika a aki ataaki.
Ti a tia n ataia bwa e aki bebete.
Ma ti ataia naba bwa ti na karekei kaubwai aika kakawaki, n airi ma rabwatara ao namakinan te kukurei ae bati ao kananokawakin te maiu ae mamate. Ti na reiakinna ni kakatai, ni ukoukora, ao ni kekeiaki. Ti na kakaei koaua ibukin te Atua ao ngaiira.
Eng e koaua bwaa ti na kona ni karaoi kairua inanon te maiu ae mamate. Ma iai naba iroura te berita: bwa bukin ana karea ae kakawaki Iesu Kristo, ti kona ni kaitiakaki man ara bure, ni kaitiakaki ao ni katamaroaki n tamneira, ao n te bong teuana ti na kautaki ao ni manga ikotaki ma ake ti tangiriia.
Ti a tia n reiakinna bwa mwaitira tangirara iroun te Atua. E anganiira te maiu, ao E tangiriira bwa ti na tokanikai. Ma ngaia are, E katauraoa te Tia Kamaiu ibukira. “Ngke a tuai karikaki bwaai,” E taku Tamara are i Karawa, “ko kona ni rinerine i bon bukimi bwa ko bon anganaki.”3l
A na iai mwakoron te mwananga n te maiu ae mamate are kararaoma ao ni kakamakuia Natin te Atua, ngke e mwaiti tamneia tarira ao mwanera aika a baireia bwa a na kaitaraa.4
Man te bwaintangira ao mwaakan karaoakin te riai, ti kakoaua raoi bwa tera konabwai ake ti kona n reiakinna ao ni maiu n akea tokina e bon materaoi.5
Ao ngkanne, n onimakinan taian berita ao mwaakan te Atua ao Natina te Mwaane ae tangiraki, ti butimwaea te kanganga.
I butimwaia.
Ao ngkami naba.
Ti kariaia ni kitana te mweengraoi n ara moan maeka ao n toka iaon ara mwananga ae moan te korakora n “nako ikekei ao ni manga oki.”
Te Wewete Nakon te Mwananga
Ma, te maiu ae maamate iai ana kawai ni kairira nako, ke akea? N tabetai ti mwaninga kakawakin manangara, n tabeakina te mweengaraoi ao te rau iaon riki te korakora ao te rikirake.
Ngkai, iai te bwai ae tiaki kona ni kakewea, ae mena inanora , are tangirakin te kantaninga are rietata ao ni mimitong. Te anai nano aei bon teuana bukina are aomata a katikaki nakon Ana Ekaretia Iesu Kristo. Te euangkerio ae kaokaki bon, kanga, manga kabouan te wewete nakon te mwananga are ti butimwaia n te tai ae maan ngkoa. E kaoira te Tia Kamaiu, ni katoa te bong, ni katikui mwengaraoira ao n Raonna n te mwananga n abotoro.
A mwaiti kiribaobao n te kawai aei. A mwaiti tabuki, mwanono, ao kawai aika bitaki. Iai ae kanga aekain taian takareau, n aiuaa, ao temanna te raakon ke uoman. Ma ngkana kam tei n te kawai ao n onimakina te Atua, kam na kunea te kawai nakon tokin kawaimi ae mimitong ao n oki nakon mweengami i karawa.
Ngaia are kam na kanga ni moanna?
E bon bebete.
Kamwaeea Nanom nakon te Atua
Te moan, ko na kainanoa kamwaeean nanom nakon te Atua. Kekeiaki ni katoa bong ni Kakaea. Reiakinna bwa ko na Tangiria. Ao ngkanne karika te tangira anne bwa e na kairiko n reiakinna, ataia, ao n reiakinna ni kawakin ana tua te Atua. Ana euangkerio Iesu Kristo ae kaokaki ti anganaki n te aro ae maataata ao n te kawai ae bebete ae e kona n oota iai te ataei. Ma, ana euangkerio Iesu Kristo iai kaekaan iai titiraki aika a kakaokoro n te maiu ao aika a rangi n nano man kangaanga ae tao inanon am tai ni kamatebwai ni maium ao ni iangoia, ti bon aki kona n rangi ni mataata ni bwaai aika a uarereke.
Ngkana ko iremwe inanon te mwananga aio ibukina bwa ko nanououa n am konabwai, uringa bwa te riki bwa temanna ana reirei Iesu bon tiaki karaoan bwaai n te aro ae kororaoi; bon karaoakin bwaai ma te nano ni koaua. Bon am rinerine are bon kaotiko bwa antai ngkoe, nakon riki are am konabwai.6
E bon ngae ngkana ko kabwaka, ko kona n rinea ae ko na aki bwaranano, ma ko na karekea korakoram, ao teimatoa, ao teirake. Anne bon te kataaki ae korakora n te mwananga.
E ataiko te Atua bwa ko aki kororaoi, bwa ko na bwaka n taai tabetai. E tangiriko te Atua ngke akea am kona nakon are ko tokanikai.
N aekaia kaaro aika tatangira, E tangiriko bwa ko na kataia raoi ma nanom. Te riki bwa te reirei bon aekan reiakinan katangan te piano. Tao ae ko kona ni katanga moa bon are kanga titebo ma katangakin te “Wareti” Ma ngkana ko reitinako ni kakataneiai, ao te tuun are ko kona ni katanga ngkai e na riki bwa n te bong teuana bwa te tionatati, te rabitiote, ao te kontioteti.
Ngkai, e na bon aki roko te bong anne inanon te maiu aio, ma e na roko. Te bwai are e tua te Atua bwa ko na ataia bwa ko na teimatoa ni keiaki.
Karoko ma te Nanoanga nakoia Tabeman
Iai te bwai ae kamimi, e kuri ni kaitara, aron te kawai aei ae kam a tia n rineia: tii te kawai ibukim bwa ko na rikirake ni mwanangam n te euangkerio bon buokaia tabeman bwa a na rikirake naba.
Buokaia tabeman bon te kawai n te anua n riki bwa Ana reirei. Te Onimaki, kantaninga, tangira, nanoanga, ao te mwakuri e kaitiakira bwa reirei.
Rinanon arom ni buokiia kainano ao aika kananoanga, ao n roko irouia aika taonaki n te kangaanga, oin aroarom e kaitiakaki ao ni karaoaki, e kabuburaaki tamneim, ko rikirake n tamaroa.
Ma te tangira aei e aki kona n roko ma kantaningaan kaboani mwiina. Tiaaki te aeka ni mwakuri are kantaninga te kinaaki n tamaroana, ke tangirakina riki nakoia tabeman.
Ana reirei ni koaua Iesu Kristo a tangira te Atua ao natina n akea kantaningan kaboan mwiina. Ti tangiriia naake a kaunira, ao ake a aki tangirira. Ao ake a tiribureira, a taetaebuakaira, ao a kakaea kamarakara.
Ngkana ko kaona nanom n ana tangira Kristo ae itiaki, ko aki kaerekea nen te kairiribai, motikitaeka, ao te kamamaa. Kam kawakin ana tua te Atua bukina bwa kam Tangiria. Inanon te waaki, ko riki ni karaurau ni katotonga Kristo n ami iango ao n te mwakuri7 Ao te mwaananga raa ae na kona ni korakora riki nakon aei?
Tibwaua Am Karaki
Te kateniua ni bwai ae ti na reiakina n te mwananga aei bon katokaan aran Iesu Kristo iaora ao n aki mamaa bwa ngaira membwa n Ana Ekaretia Iesu Kristo.
Ti aki karaba ara onimaki.
Tiaki taunna.
Ni kaitara, ti taekina aron ara mwananga ma tabeman ao ni bon kawai aika rikiara. Anne are a karaoia raao—a taekin aron bwaai ake a bongana nakoia. Bwaai ake a kaan nakon nanoia ao ni karika te kaokoro nakoia.
Anne te bwai ae ko karaoia. Ko taekin am karaki ao am namakin ngkai te membwa ngkoe n Ana Ekaretia Iesu Kristo ibukiia aika Itiaki ni Boong aika Kaitira.
N tabetai am karaki e karika ngareia aomata. Tabetai a na taonako ranimataia. Tabetai e buokiia aomata bwa a na reitinako n taotaona n nano, ni kai marurung, ao n ninikoria ni kaitaraa teuana riki te aoa, teuana riki te bong, ao ni kaan riki nakon te Atua.
Tibwa am namakin n rabwatam, ni bwaai ni kaongora, inanon kurubu, n taabo nako.
Te kabanea ni iango ni bwaai are Iesu e tuangiia Ana reirei bwa a na nako rinanon te aonnaba ao n taekina karakin Kristo ae uti.8 N te bong aei ti rang kukurei ni butimwaea te tibwanga ae korakora.
Ai mimitongira te rongorongo ae ti na taekinna: ibukin Iesu Kristo, ngkami mwaane, aine ao ataei bwa kam kona n oki ma te kamanoaki nakon mweengaia i karawa ao, ikekei, ni maeka inanon te mimitong ao te raoiroi!
Iai riki rongorongo aika raraoi ae a na taekinaki.
Te Atua E a tia ni kaoti nakon te aomata nibong aika! Iai ara burabeti ae maiu.
I kan kauringi ngkami bwa te Atua e aki kainnanoiko bwa ko na “kaboa nako” Ana Ekaretia Iesu Kristo ae kaokaki.
E bon ti kantaningaia bwa ko na aki karabaa iaan te bwaketi.
Ao ngkana a motikia aomata bwa te Ekaretia tiaki ibukiia, bon anne aia motinano.
Tiaki nanona bwa ko konaaki. Ko na teimatoa n tabeakiniia ma te akoi. Ao n aki karaoa are ko nang aki manga kaoia riki.
Te kaokoro imarenan te tataneiai ni itoman ao kakorakoraan te mwakuri n nanoanga bon—te kakao!
Ti tangiriia ao ni karineia Natin te Atua ni kabane, n aki tarai aron maeuia, aron aia reeti ke aia aro, ke aia babaire ni maiuia.
Ibukin katabeara, ti na kangai, “Mai noria! Kakaea ibon iroum bwa e kanga aron te nakonako bwa ana reirei e na bon kakabwaiako ao ni karietaatako.”
Ti kaoia aomata n roko ao ni buobuoki, ngkai ti kataia ni karaoa katamaroan te aonnaba bwa te tabo ae tamaroa riki.”
Ao ti na kangai, “Nakomai ao tiku! Ngaira bon tarimi ao mwanemi. Ti aki kororaoi. Ti kakoaua te Atua ao ti kawakin Ana tua.
“Raonira bwa ti aonga n tamaroa riki. Ao inanon karaoakina, kam na riki naba n tamaroa. Ti na uaia ni karaoa te mwananga aio.”
N na Waaki Ningai?
Ngke e namakina te wewete raraora ae Bilbo Baggins nakon te mwananga are e na nako iai, e baireia bwa e na motirawa raoi n te tairiki anne, e amwarake n te ingabong ma te kukurei, ao imwina e a waaki nako naba ni moantaai.
Ngke e uti Bilbo, e noora ana auti bwa e mangaongao ao e kuri ni bua ana iango man ana baire ae kakanato.
Ma ngkanne raraona ae Gandalf e roko ao e titiraki, “Ningai are kam na mwananga iai? ”9 N te aro bwa e na iriia raona, Bilbo e iangoia irouna bwa tera ae na karaoia.
Ao ngkanne, te hobbit are bon kangi naba n akea rakan arona e a kunea ni ienikuri n otinako man ana mataroa mai moa nakon kawain te mwananga ni kawaetata ao e a mwaninga bwarana, okona, ao ana kawere. E mwaninga naba ana kauatai ni kaingabong ae tuai ni kaana.
Tao e na iai te reirei ikai ibukira naba.
Ngkana ngkoe ao ngai ti namakina ni kan ira te mwananga ae korakora ni maiu ao n tibwaa are e a tia Tamara are i Karawa ni katauraoia ibukira n te tai ae bwakanako, I kakoaua nakoimi, te bong aio bon te bong ni ira Natin te Atua ao ara Tia Kamaiu iaon kawaina ni iboubuoki ao n riki bwa ana reirei.
Ti kona ni kabanea maiura n tataninga ibukin te tai anne ngkana a bane n nakoraoi bwaai ni kabane. Ngkai bon te tai ni kamatoa raoi ni kakaean te Atua, ni buokiia tabeman, ao n tibwaa ara namakin ma tabeman.
Kitana bwaram, okom n nakonako, am kawere ao am auti ae mangaongao.10
Nakoia ake a tia n toua te kawai anne, karina korakoram, nanoanga, karekea te onimaki, ao reitinako!
Nakoia ake a kitana te kawai, taiaoka n oki, manga raonira riki, karikira bwa ti na korakora.
Ao, nakoia ake a tuai ni waaki, tera bukin te baenikai? Ngkana ko kan namakina kamimin te mwanaga n tamnei ae korakora aei, moana am mwanaga ae korakora! Maroro ma mitinare. Taetae ma raraom aika kaain te Aro. Taetae nakoia iaon te mwakuri ae tamaroa man kamimi.11
Aio ngkai te tai ni waaki!
Nakomai, Raoniira!
Ngkana ko ataia bwa maium iai riki bonganana, nakon te kantaninga ae rietata, reitakin te utu ae korakora, ao te itoman ae kaan ma te Atua, taiaoka, nakomai raoniira.
Ngkana ko ukoukoriia botanaoamta ake a mwakuri n riki bwa te kabanea n tamaroa ngaiia, buokiia akea kainano, ao karaoa te aonnaba bwa te tabo ae tamaroa riki, nakomai raonira!
Nakomai nooria bwa tera te tamaroa, kamimi, ao aron te mwananga ae korakora.
Inanon te waaki ko na kunea arom.
Ko na kakaea nanona.
Ko na kakaea te Atua.
Ko na kakaea te mwananga ae korakora ao ae mimitong ni maium.
I kakoaua aei n aran te Tia Kaboira ao te Tia Kamaiu Iesu Kristo, amen.