Te Atatai, Te Tangira, ao Te Rikirake
Ti bia bane n roko ni mataata ni mwakoron tabera inanon te mwakuri n ibuobuoki ae korakora aei n te aro are ti na riki n ai Arona.
N 2016 Te Taebanako Kuaea n Tembora Tikuea e roko ni kawara te Netherlands ao Belgium. Ao ibukina bwa I irekereke n te waaki ae e kakukurei anne, e reke au tai ni mataku n aia kamataku uoua te tai.
N tain aia kamataku I iango bwa bon te mwakuri ae moan te korakora ibukin kamwaingaia kain te kuaea ae te aeka ni mwaiti anne. E nako au iango nakon buburan te turaam ni katangitang, ae e rangi ni kangaanga ao tao n rangi ni bobuaka uotakina ni kabotauaki ma te violin, te trumpet, ke tabeua bwai ni katangitang are ko kona n uotia iaan baim. Ma n noran aron kabonganakin te turaam ni katangitang aei, I a tiba ataia ae e bon ti oreaki inanon ti tabeua te miniti, ni kabotauaki ma bwaai ni katangitang ake a uarereke ae e korakora riki kabonganaia n tain te kamataku. I iangoia bwa n akean tangin te turaam ni katangitang aio, te kamataku e na bon aki roko n arona raoi angaia are e na riai ni kataaki ni uotaki te baai ni katangitang ae e bubura aio rinanon marawa ae e ababaki.
N tabetai ti na namakina ae ngaira, kanga ai aron te turaam ni katangitang, ae e uarereke te bwai ae ti karaoia n tain te kamataku. Ma na tuangko bwa te bwanaa are ko kanakoa e rangi ni kakawaki.
Ti bane ni kainanoi bwaai ni katangitang ni kabane. Tabeman mai ibuakora a waetata n reiakin bwaai ao e tamaroa aron aia reirei, ao tabeman iai aia tarena n te korotamnei. Tabeman a korobanna ao a katei bwaai ke nneti ibukiia tabeman, kamanomano, ke reireia tabeman. Ti bon bane ni kainanoaki ni uoti bwaai aika a kakaokoro ao nanoia nakon te aonaba.
Nakoia naake a namakina bwa akea te bwai ae a na anga ke a kakoaua bwa bon akea bonganaia ke ae a na karekea nakoia tabeman, nakoia tabeman are a na namakina bwa a bura ieta ni maeuia, ao ake a mena i nuka, aio te rongorongo ibukimii.
Tao ko mena iia ni kawain te maiu, tabeman mai ibuakomi a na namakina ae kam aikoa kona uotami ao ko aki ataia ae ko mena n te kawai anne. I tangiria ni kaoko n otinako man te roo nakon te oota. Otan te euangkerio e atia ni katauraoa te rau ao te kamaiuaki ao ni buokiko n ataia bwa antai ngkoe ao tera te kantaninga ibukim n te maiu aei.
Tabeman mai ibuakora a atia n towii kawai aika a kaitara ana reirei te euangkerio ni kataia ni kakaea te kukurei ikekei.
Ti kaoaki iroun Tamare are i Karawa ae tangira bwa tina nakonako ni kawain ana reirei te tia Kamaiu ao n oki Nakoina. E tangiriira ma te tangira ae e kororaoi.1
Tera te Kawai? Te kawai bon ngaia ae e buokira n tatabemanira n ataia bwa antai ngaira man te mwakuri n ibuobuoki i marenara.
Irou, te mwakuri n ibuobuoki bon kamwakuran te tangira ae akea tiana.2 N te kawai anne ti na uaia ni katea te tabo ike te aomata are e anga ao te aomata are e karekea a uaia ni karekea te nano ni kan rairanano. N taekana teuana, ti bita te kawai ao ni kaan nakon ao n riki n ai aron te Tia Kamaiu, Iesu Kristo.
N aron te katooto, akea kainanoan ae ti na aki toki n tuanga kainabara ke natira ni katoa tai bwa tera ae ana katamaroaa, a kaman tia n ataa anne. Bon man katean te tabo n tangira aei ae ana kakorakoraki iai ni karaoa te bitaki ae e riai inanon maeuia ao n riki bwa aomata aika tamaroa.
N te kawai aei te rairanano e riki bwa te waaki ni kaitiakira ni katoa bong, ni ikotaki ma te kabwara bure ibukin te anua ae e aki raoiroi. I uringa ao n teimatoa n rinanon taai ngkoa ngke I a tia n rangi ni waekoa ni motikitaeka ma e rangi ni waeremwe au kakauongo. Ao n tokin te bong, inanon au tai n tataro, I namakinii reirei n tangira mai i karawa bwa na rairananou ao n riki n tamaroa. Te tabo ae iai te tangira iai are a moan kateia au karo, tariu, ao mwaneu ao imwina iroun kainabau, natiu, n aroia naba raorau a tia ni buokai ni karikai bwa te aomata ae e nakoraoi.
Ti bane n ataia bwa iia ae ti na kona ni katamaroaa. Ti aki kainanoa kaokiokan kauringakira, ma iai kainanoan te tangira ao te ibuobuoki i manenara ao, ni karaoan anne, e katauraoa te tabo ae ti tangiria ni kan bitaki.
Te tabo ae ai aron aei ti reiakinna bwa antai raoi ngaira ao tera tabera inanon taai aikai n te kabanea ni bong n rongorongon te aonaba imwain Manga Okin te Tia Kamaiu.
Ngkana ko bae ni iangoia bwa tera katabeam, I tangiria ni kaoko bwa ko na kakaea te tabo ae ti ngkoe iai ao tuanga Tamam are i Karawa bwa e na kaota nakoim bwa tera tabem ae ko na karaoia. Te kaeka e na roko teutana imwiin teutana ao e na rangi ni mataata ngkana ti tiku n teimatoa ni kanene iaon te berita ao te kawai n ibuobuoki.
Ti rinanon tabeua kangaanga aika titebo ma are e kaitarai Iotebwa Timiti ngke e mena “ribuakon te buaka n [te] taeka ao te mangaongao n taian iango.” Ngkai ti warekia ni bon oin ana taeka, e aki toki n taku i bon irouna: “Tera ae e riai ni nikaraoaki? Antai mai buakoia botaki aikai aika eti; ke a bane ni kairua ni kabane? Ngkana iai temanna mai buakoia ae eti, enga [iai], ao N na kanga n ataia?”3
Te atatai are e kunea n ana Reta Iakobo, are e taekina bwa “ngkana akea ana rabakau temanna ibuakomi, ao e na butia te Atua, ae tituaraoi n angania aomata ni kabaneia, n aki ngurengureakiniia, ao e na bon anganaki,”4 Iotebwa “n te tai ae maan e a baireia bwa e na “bubutia te Atua.’”5
Ti warekia riki bwa ai bon tibwa te moan tai i nanon maiu[na] ae [e] kataia ni karaoa aei, mai i buakon tabeaia[ngana] nako [e] bon tuai, ni karokoa te tai aei, ni kataia n tataro ni kabaibaiti.”6
Ao ai arona naba ibukira n te moan tai are ti taetae ma ara tia Karikibwai n te kawai are ti tuai man kakaraoia mai imwaina.
Ibukin ana kakatai Iotebwa, Tamara are i Karawa ao Natina, Iesu Kristo, a kaoti nakoina, a weteia n arana, ao mai imwiin anne a reke mataatara ae e itiaki bwa antai ngaira ao ti bane ni bongana.
Ti warekia riki bwa inanon rikirakena ngke e kairake e bwainikirinaki irouia nake a na bon riki bwa raorao[na] ao [a riai] n rangi n ako[ia].”7 Ngaia are ti na bon kantaningai taian kakaitara ngkai ti maiuakina te maiu n riki bwa ana reirei Kristo.
Ngkana ko namakina ngkai bwa ko aki irekereke bwa kain te bootaki ni katangitang ao te kawai n rairanano e tara ni kangaanga nakoim, taiaoka ataia bwa ngkana ko reitinako ni kataia e na nako te kangaanga mai iaon angara ao e na manga reke te oota. Tamara are i Karawa e na aki kitaniira ngkana ti reitaki Nakoina. Ti kona ni bwaka ao ni manga teirake ao E na buokiira ni kaoi bareka mai bubuani waera.
Tabeman mai ibuakora a ikoaki, ma ana bwai ni kamaoi maneka te Uea e tau buburana ni kamanoa ikoakira ni kabane.
Ngaia are bon anne te tangira, “te tangira ae akea tiana are ti atonga bwa ana tangira Kristo ke ana tangira Kristo ae e itiaki,”6 are e kainanoaki inanon mweengara bwa kaaro a buokiia natiia ao ataei a buokiia aia karo. Rinanon te tangira anne, a na bitaki naano ao a bungiaki iango ni karaoan Ana kantaninga.
Bon anne te tangira are e kainanoaki inanon ara reitaki n tatabemaniira nako ngkai natin Tamara are i Karawa ao membwa n Ana Ekaretia ao are e na anganiira te kona ni kaairii bwai ni katangitang ni kabane n ara kurubu ni katangitang bwa ti aonga ni karaoa te kamataku ae tamaroa ma aia kuaea anera mai karawa ngkana e a manga oki te Tia Kamaiu.
Bon te tangira anne, te oota are e kainanoaki bwa e na otanako ao ni kaotaa rarikira ngkai ti karaoi tabera inanon maiura ni katoa bong. Ana nora te oota aomata ao ana waaki nako iai. Anne bon aron aia mwakuri mitinare are a na kairiia tabeman nakon “nakomai ao nooria, nakomai buokia, ao nakomai ao tiiku.”9 Taiaoka, ngkana kama tia ni kakoaua taekan te mwakuri ae korakora aei ao ara itera inanona, ti na kukurei n reitaki ma ara burabeti ae tangiraki Burabeti Iotebwa Tiimiti, are e katanoata, “Ibukina I a tia n noora te kaotioti; I ataia, ao I ataia bwa te Atua e ataia, I aki kona ni kaakea.”10
I kakoaua nakoimi bwa I ataia bwa antai ngai ao I ataia bwa antai ngkoe. Ngaira ni kabane bon natin Tamara are i Karawa are E tangiriira. Ao E aki kanakoira nako ikai bwa ti na bua ma ti na Okiria ma te kukurei. Bwa ti na bane n roko n ataakin ara beku n te mwakuri ni ibuobuoki aei bwa ti aonga n riki n ai Arona ngkana te Tia Kamaiu e a manga roko bon au tataro n aran Iesu Kristo, amen.