Ti Tataekina Kristo

Iroun Unimwaane Neil L. Andersen

Man te Kooram n Abotoro n te Tengaun ma Uoman

Ngkai e a karako tataekinan Iesu Kristo n te aonnaba, ti a kabatia riki Taekinana.

I kaota au tangira ibukimi, raora aika tangiraki ao raao aika a kakoaua. I karinea ami onimaki ao nanomi n namwakaina aika nako, ngkai te buti n aoraki e a tia ni kanakobuaka maiura ao n anai maiuia ara utu aika moan te tangiraki ao raraora aika tangiraki.

Inanon te tai n nanououa, I a tia n namakina te tai ni kakaitau ae kaokoro ibukin au koaua ao au ataibwai ae eti bwa Iesu bon te Kristo. Kam a tia n namakina anne? Iai taian kanganga aika toka iaora n tatabemaniira, ma n taainako imwaira bon Ngaia are E nanorinano n taekinna.“Bon Ngai te kawai, te koaua, ao te maiu.”¹ Ngkana ti teimatoa n rabwatara ni kararoaira mairouia tabeman, ti na teimatoa n aki kainanoa te tai n te maiu n tamnei ni kararoaira mai Irouna are e weteira ma te tangira, “Bane mai nako Iu.”²

Ai aron te itoi ni kairi inanon itiakin, rotongitongin karawa, Iesu Kristo e kaota kawaira. E roko nako aonnaba ni nneia maan n amwarake ae mangori. E maiuakina te maiu ae kororaoi. E kamaiua te aoraki ao e kauta te mate. Bon te rao nakoia aika aki tabeakinaki. E reireiniira bwa ti na karaoa ae raoiroi, n ongeaba ao n tangiria raora. E tauraki iaon te kaibangaki, e uti n tokanikai imwiin teniua te bong, ni karekea nakoira ao ake ti tangiriia bwa ti na maiu imwiin te mate. N ana akoi ae akea kabotauana ao n ana nanoanga, E katoka Iaona ara bure ao korakaira, e karokoa te kabwarabure ngkana ti rairi nanora ao te rau n tain kangangan te maiu. Ti tangiria. Ti taromauria. Ti Ririmwina. Boni Ngaia atinroon tamneira.

Te kamimi, ngkai e rikirake te atatai n tamnei aei inanora, a rangi ni mwaiti iaon te aonnaba aika a rangi ni uarereke ataakin Iesu Kristo irouia, ao n taabo tabeua n te aonnaba are Arana e a kaman katanoataaki inanon tienture aika bati, te onimaki inanon Iesu Kristo e karako. Kaain te aro aika kakaonimaki i Eurobe aika ninikoria a tia n noora kerikakin te koaua n abaia rinanon ririki.³ Te kananokawaki, ikai inanon te United States te onimaki e kerikaki naba. Te kamatebwai n taai aika nako e kaotia bwa inanon te 10 te ririki 30 te mirion aomata n te United State a tia n nako man kakoauan rikin Iesu Kristo n Atua.⁴ Taraakin te aonaaba, n te kamatebwai are karaoaki bwa n ririki aika imwaira, e raka riki nakon uoua te tai aika a na kitana te aro ni Kristian nakoia ake a na taua.⁵

Ngaira, ti bon, karinea inaomataia tabeman n rinerine, ma Tamara are i Karawa e taekinna, “Natiu ae tangiraki Teuaei Kam na ongo Irouna.”⁶ I kakoaua bwa e na roko te bong are a na bane bubuaniwae ni katorobubua ao a na bane neewe n atonga bwa Iesu bon te Kristo.⁷

E kanga arora ni kaeka nakon bitakin ara aonnaba? Ngkai tabeman a kitana aia onimaki, tabeman a tabe ni kakaea te koaua. Ti a tia ni katoka iaora aran te Tia Kamaiu. Tera riki are tina kona ni karaoia?

Katauraoan Beretitenti Russell M. Nelson

Mwakoron ara kaeka a na roko ngkana ti uringa aron te Uea n reireina Beretitenti Russell M. Nelson n namwakaina imwain weteana bwa te Beretitenti n te Ekaretia. Ngke e taetae teuana te ririki imwain weteana, Beretitenti Nelson e kaoira bwa ti na kaamatebwaia 2,200 bwai ni ibuobuoki aika a kaota aran Iesu Kristohrist aika a koreaki n te Topical Guide.⁸

Teniua namwakaina imwiina, n te maungatabu ni kabuta n Eberi, e taekina arona, inanon ririki n ana tai ngke e riki bwa te abotoro ae kakaonimaki, te kamatebwai aei i aon Iesu Kristo e a tia n rotaki iai. Titita Wendy Nelson, e titirakinna n aron mwiina. E kaeka, “Te mwaane ngai ae kaokoro” Bon te mwaane ae kaokoro? Ngke e koro 92, te mwaane ae kaokoro? E kabwarabwara Beretitenti Nelson:

“Ngkai ti kabanea ara tai n reiakina aron te Tia Kamaiu ao Ana mwakuri ni kamaiu, ti a katikaki nako [Ina]. …

“… Ara iango [a riki] n nim nakon te Tia Kamaiu ao Ana euangkerio.”⁹

E taku te Tia Kamaiu, “Tanimai nakoiu n ami iango.”¹⁰

Inanon te aonnaba ni mwakuri, tabeaianga, ao waaki aika boongana, ti kaawakin nanora, ara iango, ao ara kantaninga Irouna are ara kariaria ao kamaiuara.

INgkana te kamatebwai ae e a manga kabouaki ibukin te Tia Kamaiu e buoka katauraoan Beretitenti Nelson, e aki kona ni katauraoira naba?

Ni katuruturuan aran te Ekaretia, Beretitenti Nelson e reirei bwa, “Ngkana ti … kan karekea mwaakan Ana Mwakuri ni Kamaiu Iesu Kristo—ni kaitiakira ao ni kamaiuira, ni kakorakoraira ao ni kamatoaira, ao n tokina ni karietataira—ti na riai n ataia raoi bwa Ngaia bon oin te mwaaka arei.”¹¹ E reireiniira Beretitenti Nelson teimatoan kamanenaan aran te Ekaretia ae eti n taainako, te bwai teuana are na taraa n aron e uarereke, e aki uarereke naba teutana ao e na karaoa tein rabwatan te aonnaba n te tai ae na roko.

Te Berita Ibukin Am Katauraoi

I berita nakoim bwa ngkana ko katauraoiko, n aron are karaoia Beretitenti Nelson, ngkoe naba ko na kaokoro, ni iangoa riki aron te Tia Kamaiu, Tataekinna n taainako ao ni karauraua te ienikuri. Ngkai ko ataia ao n Tangiria riki n ae korakora, a na nakoraoi rki am taeka, n aron ae e na riki ngkana ko taetae iaon temanna am ataei ke temanna raoraom ae tangiraki. Naake a kakauongo nakoim ana namakinna ae akea nanoia n tibwatibwa ke ni kakeako ma a tangiria riki ni kan reirei mai iroum.

Ngkoe ao Ngai ti taetae iaon Iesu Kristo, ma tao tina kona ni karaoa ae tamaroa riki. Ngkana te aonnaba e uarereke aron Taekinana, antai ae a na taekinna riki ni kabatia Taekinana? Ngaira! N airi ma Kristian ake a kakaonimaki!

Taekinakin Kristo Inanon Mwengara

Iai tamnein te Tia Kamaiu inanon mweengara? Kam tataetae nakoia natira n taekan ana kaikonaki Iesu? “Karakin Iesu [bon] aekan te ang are e biri iaon taamrurun te onimaki inanoia ara ataei.”¹² Ngkana a titirakiniko natim te titiraki, karaua ni iangoa te reireia are e reirei iaona te Tia Kamaiu. Te katooto, ngkana e titiraki am ataei, “Tamau, bukin tera ngkai ti tataro?” Tao ko na kaeka, “Te Titiraki anne e tamaroa. Ko uringa ngke E tataro Iesu? Ti na taekinna bwa bukin tera bwa E tataro ao E kangaa n tataro.”

“Ti kaakarabakauakina Kristo, ti kimwareirei iroun Kristo, … bwa natira a na ataia bwa antai ae a na kawaria ibukin kamaunan aia bure.”¹³

Taekinakin Kristo n te Ekaretia

Te kibu naba aei e raonna bwa ti na “tataekina Kristo.”¹⁴ Inanon ara taromauri, ti na kabanei nanora iaon te Tia Kamaiu Iesu Kristo ao te bwaintangira n Ana karea ni kabwara bure. Tiaki nanona bwa ti aki kona n taekina ara ataibwai man oin maiura ke n tibwai taian iango mairouia tabeman. Ngkana ara reirei tao ibukiia utu ke ibuobuoki ke tembora ke am mition ngkoa, bwaai ni kabane n ara taromauri ana kotea te Uea ae Iesu Kristo.

Tenibwi ririki n nako, Beretitenti Dallin H. Oaks e taekina te reta ae karekea “mairoun te mwaane are taku bwa e ira te [botaki n toa] ao ni kakauongo nakon tebwi ma itiua koaua ake a kaotaki ao e aki ongo taekan te Tia Kamaiu.”¹⁵ Beretitenti Oaks e ataia, “Tao anne te kabwarabwara ae e riao taekinana [ma] I rineia bwa bukina ae e karekea te kauring ae mataata nakoira ni kabane.”¹⁶ E a kauringira bwa ti na tataekina riki Iesu Kristo n ara taetae ao ara marooro n te kiraati. I a tia ni kakoaua bwa ti na kabanei nanora riki iroun Kristo inanon ara Bootaki n taromauri. Ti a reitinako ni iangoi mwakuri aika raraoi aikiai.

Taekinakin Kristo ma Tabeman

Ngaira ma raora nako, ti a kataia n kakaraoia, n tangiria n taekina Kristo. E taku Beretitenti Nelson: “Ana reirei ni koaua Iesu Kristo iai nanoia ni kan kaotiia bwa a kaokokoro, a taetae ma te koaua, ao ni kaokoro mairouia aomata n te aonaaba.¹⁷

N tabetai ti taku bwa te marooro ma temanna e na reke iai ae a na roko nakon te taromauri ke n nooria mitinare. Kariaia bwa E na kairiia te Uea ngkana a kariaia, ngkai ti iangoa riki tabera n riki bwa Bwanana, iangoraoi ao n tauraoi n tataekin ara onimaki. Unimwane Dieter F. Uchtdorf e reireiniira bwa ngkana a titirakiniira tabeman arora ni banen te wiiki, ti riai ni kukurei ao ni kaeka bwa ti kukurei n ongo aia anene ataein te Buraimwari “I kataia ni katotonga Iesu.”¹⁸ Ti na kakoaua ma te akoi ara onimaki iroun Kristo. Ngkana temanna e tibwaua ana kanganga teuanne ke neienne ni maiuia, ti na kangai, “John, Mary, kam ataia bwa I kakoaua Iesu Kristo. I a tia ni iangoa taekan te bwai teuana are E taekina bwa e na buokiko.”

Tangiria n tataekinna iaon bwaai ni kaongora rongorongon am onimaki iroun Kristo. E mwaiti aika a karinea am onimaki, ma ngkana iai ae a kakeaa kakawakin taekinan te Tia Kamaiu, kakorakorako n Ana berita: Kam a kabwaia ngkana a taetaebuakai ngkami … ibukiu. … Bwa a bati ami bwai i karawa.”¹⁹ Ti tabeakina riki te riki bwa taan Ririmwina nakon te “tangiraki” irouia taan ririmwiira. E reirei Betero, “Tauraoi n tainako ni kaeka [ibukin] te kantaninga ae mena inanomi.”²⁰ Ti a taekina Kristo.

Ana Boki Moomon bon te bwai ni kakoaua ibukin Iesu Kristo. E koaua bwa iteran baana a kakoaua te Tia Kamaiu ao Ana mwakuri ae mai iroun te Atua.²¹ Ataakin Ana mwakuri ni Kamaiu ao ana raoiroi e kaoni baana ni kabane. Ngkai raon te Nu Tetamenti, Ana Boki Moomon e buokira ni kaotaa riki bukin rokon te Tia Kamaiu ni kamaiura ao arora ni kakorakoraira n roko Nakoina.

Tabeman raora ni Kristian, n tabetai, a aki koaua n aron ara onimaki ao a ara mwakuri. Ti na kukurei ni koaua ma ngaiia n ara onimaki ae ti reitaki inanona iroun Iesu Kristo ao n te boki ae te Nu Tetamenti ae ti tangiria. Inanon boong aika imwaira, te koraki ake a kakoaua inanon Iesu Kristo a na kainanoa te iraorao ao te boutoka imarenaia.²²

Ngkai e a karako tataekinan Iesu Kristo irouia aomata, ti a kabatia riki Taekinana. Ngkai anuara ni koaua bwa Ana reirei a kaotaki, e mwaiti irarikira aika tauraoi n ongora. Ngkai ti tibwaa te oota are ti karekea mai Irouna, Otana ao Mwaakana ni kamaiu ae korakora e na kaotaia ake a tauraoi ni kauki nanoia. E taku Iesu, “I roko i aon te aba [bwa] te oota.”²³

Karikirakean Nanora n Tataekina Kristo

Akea te bwai ae tabeka nanou n taekina Kristo riki nakon iangoan Okina. Ngkai ti aki ataia bwa E na oki ningai, taekan Okina e na bon rang kamimi! E na roko n nangin karawa n rietata ao ni mimitong ma Ana anera aika tabu. Tiaki tii tabeman anera, ma ni kabane Ana anera aika tabu. Aikai tiaki anera aika uraura tabaia are koreaki tamneia iroun Raphael are ti nonoria iaon taian Valentine cards. Aikai anera inanon taian tienture, a kanakoaki anera ni kainii wiia taian raian,²⁴ ni kauki mataroan umwa ni kaikain,²⁵ ni katanoata Bungiana ae maan taina,²⁶ ni karaua Nanona i Ketetemwane,²⁷ ni karaui nanoia Ana reirei n Rierakena,²⁸ ao ni kauka mimitongin Kaokakin te euangkerio.²⁹

Ko kona ni iangoia ni waerake ni kaitibo ma Ngaia, tao ikai ke ni iteran te roki are teuana?³⁰ Aio bon Ana berita nakoia ake a raoiroi. Te taneiai ae kamimi aei e na kakukurei nanora n aki toki.

Ai kukureira ngaira ibukin ara burabeti, Beretitenti Russell M. Nelson, are tabeki nanora n tangira te Tia Kamaiu ao ni katanoataa Arona n Atua. Ngai te tia kakoaua nakon bain te Uea iaona ao te bwaintangira are te kaotioti are kairia. Beretitenti Nelson, ti a ingainga n tataninga am reirei.

Raoraou aika kam tangiraki ni katobibia te aonnaba, tina tataekina Kristo, n iira Ana berita ae kakukurei, “Ma ngaia …ane kaota tauan bukiu imataia aomata, ao Ngai I a manga kaota tauan bukina i matan Tamau.”³¹ I kakoaua bwa Ngaia Natin te Atua. N aran Iesu Kristo, amen.

Bwaai aika a na taraaki

1. Ioane 14:6.

2. Mataio 11:28.

3. Taraa Niztan Peri-Rotem, “Religion and Fertility in Western Europe: Trends across Cohorts in Britain, France and the Netherlands,” European Journal of Population, Meei 2016, 231–65; ncbi.nlm.nih.gov/pmc/articles/PMC4875064.

4. “[Onobwi ma nimaua te betiente] taian ikawai i America ake a kabwarabwarai aroia bwa Kiritian ngkana a titirakinaki taekan aia aro, e bwaka te 12 te betiente te koto n riaon tebwii n ririki n nako. Ngkai moa, te aro e aki irekereke n tibwauan mwaitiia te botannaomata, n aroia aomata ake a kabwarabwarai kinakin aia aro n aroia ake aki kakoaua te Atua, aomata ake aki kona ni kabwarabwara moan rikin te aonaaba ke ‘akea n taekana,’ ngkai e tei 26%, e waerake man 17% inanon 2009” (Pew Research Center, “In U.S., Totokoaia Kiritian e Reitinako n Raababa Nako,” Okitobwa 17, 2019, pewforum.org).

5. Taraa Pew Research Center, “The Future of World Religions: Population Growth Projections, 2010–2050,”Eberi. 2, 2015, pewforum.org.

6. Mareko 9:7; Ruke 9:35; taraa naba Mataio 3:17; Iotebwa Timiti—Rongorongo 1:17.

7. Taraa I-Biribi 2:9–11.

8. Taraa Russell M. Nelson, “Prophets, Leadership, and Divine Law” (worldwide devotional for young adults, Jan. 8, 2017), broadcasts.ChurchofJesusChrist.org.

9. Russell M. Nelson, “Drawing the Power of Jesus Christ into Our Lives,” Liahona, Meei 2017, 40–41.

10. Reirei ao Berita aika Tabu 6:36.

11. Russell M. Nelson, “The Correct Name of the Church,” Liahona, Nobembwa. 2018, 88.

12. Neil L. Andersen, “Tell Me the Stories of Jesus,” Liahona, Meei 2010, 108.

13. 2 Nibwaai 25:26.

14. 2 Nibwaai 25:26.

15. Dallin H. Oaks, “Another Testament of Jesus Christ” (Brigham Young University fireside, Tuun 6, 1993), 7, speeches.byu.edu.

16. Dallin H. Oaks, “Witnesses of Christ,” Ensign, Nobembwa. 1990, 30.

17. Russell M. Nelson, “Drawing the Power of Jesus Christ into Our Lives,” 40.

18. Taraa Dieter F. Uchtdorf, “Missionary Work: Sharing What Is in Your Heart,” Liahona, Meei 2019, 17; “I’m Trying to Be like Jesus,” Aia Boki n Anene Ataei, 78.

19. Mataio 5:11–12.

20. 1 Betero 3:15.

21. “N aron [aia boki burabeti n ana Boki Moomon] a korei aia kakoaua n ana berita te Metia, a mwanewei tabeua taekan arana iaon mwaitina ni katoa 1.7 kiibu. [A] kaeinetia nakon Iesu Kristo man, taeka nakon taeka, 101 aika a kaokoro. … Ngkana ti ataia bwa n tainako ao te kibu e na iai inanona teuana te tienteinti, e tara n ae tiaki kona, n te awereti, wareki uoua tiententi n Ana Boki Moomon n aki noori tabeua aran Kristo” (Susan Easton Black, Finding Christ through the Book of Mormon [1987], 5, 15).

    “Ngkai taeka kamaiu ke mwakuri ni kamaiu, inanon aroia ni koreaki, e kaoti ti teuana inanon te rairairi n te King James Nu Tetamenti, a kaoti 35 te tai inanon ana Boki Moomom. N aron kauouan taekan Iesu Kristo, e kawaanakoa kakawakin te oota iaon Ana Mwakuri ni Kamaiu” (Russell M. Nelson, “The Atonement,” Ensign, Nobembwa. 1996.35).

22. Koraki ake a kitana aroia ni Kiritian n te United States a rang kairake. “E raka nakon waniman-n-tengaun membwa n te Silent Generation (koraki ake a bungiaki imarenan 1928 ao 1945) a kabwarabwaraiia ngaiia Kiritian (84%), n aron ae tenua-ni kuata man te Baby Boomers (76%). Ni bebeten kabotauana, ti man iteran te Millennials (49%) a kabwarabwaraiia ngaiia Kiritian; aman-inanon-tengaun a taua te aro ‘ake aki,’ ao temanna-inanon-tengaun Millennials kinakiia ma akean te onimaki ni Kiritian” (“In U.S., Totokoaia Kiritian e Reitinako,” pewforum.org).

23. Ioane 12:46.

24. Taraa Taniera 6:22.

25. Taraa Makuri 5:19.

26. Taraa Ruka 2:2–14.

27. Taraa Ruka 22:42–43.

28. Taraa Makuri 1:9–11.

29. Taraa Reirei ao Berita aika Tabu 13; 27:12–13; 110:11–16; Iotebwa Timiti—Rongorongo 1:27–54.

30. Taraa 1 Tetaronike 4:16-17; Reirei ao Berita aika Tabu 88:96–98.

31. Mataio 10:32.