Kam na Kamarurungingkami n tai nako, ao Kam na Tataro
N te bong aei I karababa au kakao bwa a na tataro aomata ni kabane n aban nako te aonaaba.
Tariu ao mwaaneu, i nanon rabanen wiikin Ana mwakuri i aon te aba, E reirei Iesu nakoia Ana reirei bwa a na “kamarurungiia, ao n tataro n tai nako, bwa a aonga n tokanikai mani baika nangi roko, ma n tei i matan Natin te Aomata.”1
Ibuakon “bwaai ake a nangi roko” Imwain Ana kauaoki bon “bubuaka ao taekan buaka[,] … te rongo, ao te buti n aoraki, ao mwaeiei, n te aba teuana ma teuana.”2
Inanon Reirei ao Berita aika Tabu e taku te Tia Kamaiu, “Ao bwaai ni kabane a na mangaongao; … bwa e na roko te maaku iaoia aomata ni kabane.”3
Eng, ti maeka i nanon te tai are bwaai a mangaongao. A mwaiti aomata aika a maaka taai aika a na roko, ao a mwaiti nano aika a birinako man aia onimaki i roun te Atua ao Natina, Iesu Kristo.
Rongorongo a kaonaki n rongorongon taian iowaawa. Baika a buakaka e a bati riki i aon te intanete. Ruanimate, taabo n taromauri, taabo n nebonebo, tinakaoke, ao tabo aika tabu a uruakaki.
Te buti n aoraki n te aonaaba e rootii ni bon koauana koonan nako te aonaaba: mirion aomata a tia n ituuaki, e raka i aon te mirion ae a tia ni mate. Angabeba n reirei, botakin taromauri, maare, mwakuri ni mitinare, ao e bati riki bwaai aika kakaawaki a tia n taonaki. Riki, e aki kona ni warekaki mwaitia aomata ake a tiku tii ngaiia ao ake a kaokoroaki.
Te bwaka n te kaubwai e a uota te kakaewenako nakoia aika mwaiti, riki nakoia ake a kai rootaki mai ibuakoia natin Tamara arei Karawa.
Ti a tia nooria aomata ni kammwakura inaomataia ni karaon te kaotinano ae rau, ao ti a tia n nooria taan iowaawa ni kakiriwe.
N reita anne, ti teimatoa n noori itabaraara ni kabutaa te aonaaba.
I aki toki ni iangoia naake a rawaawata, raraoma, maaku, ke a maroa. I kakoaua nakoimi n tatabemani ngkami bwa e kinai ngkami te Uea, ao E rang ataa ami raraoma ao korakaimi, ao E tangiri ngkami—ni kaan, n ae koaua ao n aki totoki.
Ni katoa tairiki n au tataro, I butiia te Uea bwa e na kakabwaiaia naake a karawaawataki n te rawaawata, te nanokawaki, te maraki, te maroa, ao te nanokawaki. I ataia bwa taan kairiiri n te Ekaretia ake tabeman a kakaraoa naba aei. Nanora, n tatabemaniira ao n te bwanin, a rairaki nakoimi, ao ti tataro nakon te Atua ibukimi.
I kabanea tabeua te bong n te ririki ae nako ni mwakoron Amerika ae te itera meangmainiku ni kawarii tabo aika kakaawaki n te aba ao n te Ekaretia, ni kaei bootaki ma ara mitinare ao ara membwa, ao ni kawariia taan kairiiri n te tautaeka ao ni bitineti.
N te Tabati, Okitobwa 20, I marooro nakoia te koraki ae tira i rarikin Boston, Massachusetts. Ngke I taetae, I namakinna bwa N na kangai, “I bubuti ngkami … bwa kam na tataro ibukin te aba aei, ibukiia ara taan kairiiri, ibukin ara botanaomata, ao ibukiia utu ake a maeka n te aba ae korakora aei are kateaki iroun te Atua.”4
I taekinna naba bwa Amerika ao aaba aika bati n te aonaaba, n aron are ngkoa, a mena inanon te kakaewenako ae matoa ao a kainnanoa ara tataro.5
Au bubuti bon tiaki kanoan au marooro are I katauraoia. Taeka akanne a roko irou ngke I namakinna bwa e tuangai te Tamnei bwa n na kaoia naake a ongora bwa a na tataro ibukin abaia ao aia taan kairiiri.
N te bong aei I karababa au kakao bwa a na tataro aomata ni kabane n aban nako te aonaaba. Bwa tera aron am tataro ao ko tataro nakon antai, taiaoka kammwakura am onimaki—n am aro are ko mena iai—ao tataro ibukin abam ao ibukiia am taan kairiiri i abam. N aron are I taekinna n Okitobwa ae nako i Massachusetts, ti mena ngkai n te kakaewenako ae rianako n rongorongon te aonaaba, ao aban nako te aonaaba ae rang kainnanoa te kairaki ao te bweenaki. Aio bon tiaki taekan te waaki n tautaeka ke te ointua. Aio bon taekan te rau ao te kamarurungaki are e kona n angania aomata n tatabeman ao ai uana naba ma te aba—aia abamwakoro, kaawa, ao kaembwa—rinanon Uean te Rau ao te Oi are nako mai iai te kamarurungaki, are bon Iesu Kristo.
Inanon namwakaina aika nako, I a tia ni karekea te namakin irou bwa te kabanea n tamaroa ni kawai ni buoka ana kangaanga te aonaaba bon kabotoan riki aia onimaki aomata ni kabane iroun te Atua ao rairakin Nanoia nako Ina rinanon te tataro ae koaua. Ara nanorinano ao ukoukoran te kairi mai i karawa n teimatoa ao n tokanikai iaon ae ti rinanona ngkai bon te kawai ae mano man eti ibukin te waaki rake ma te aki nanokokoraki i nanon taai ni kangaanga aikai.
Koroboki aika a tabu a katerea ana tataro Iesu ai uana ma Ana reirei iaon te tataro i nanon Ana bong ni mwakuri i aon te aba. Kam na uringa ana Tataro te Uea:
“Tamara are i Karawa, E na tabuaki aram.
“E na roko ueam. E na tauaki am taeka i aonaaba, n ai aron tauana i karawa.
“Anganira n te bong aei kanara ae ti tau iai.
“Ao kabwarai ara bure, ngkai ti kabwarai aia bure akana a bure nakoira.
“Ao tai kairira nakon te kaririaki, ma kamaura man te buakaka: Bwa am bwai te Uea, ao te mwaaka, ao te neboaki n aki toki. Amen.”6
Te tataro ae tamaroa, man turuturu aei, are e okioki i nanon Aaro ni Kiritian, e kamataaata bwa e bon riai te bubuti nakon “Tamara are i Karawa” ibukin kaekaan ara tabeaianga. Ngaia are, ti a tataro ibukin te kairi mai i eta.
I kaoi ngkami bwa kam na tataro n tai nako.7 Tataro ibukin am utu. Tataro ibukiia taan kairiiri n te aba. Tataro ibukiia aomata aika ninikoria ake a mena i moan te kangaanga n taian buaka ake ngkai ni kaitarai aorakin te reitaki, enwaromenta, waaki n tautaeka, ao manaoraki are e rootiia aomata ni kabane ni kabutaa te aonaaba: aika kaubwai ao aika rarikin, aika ataei ao aika kara.
E reireiniira te Tia Kamaiu bwa ti na aki tiania aomata ake ti tataro ibukiia. E taku, “Kam na tangiriia ami kairiribai, kakabwaiaia akana kamaraiai ngkami, karaoa ae raoiroi nakoia akana ribai ngkami, ao tataro ibukiia akana a kammaraki ao a bainikirini ngkami”8
Iaon te kaibangaki i Korokota, are e mate iai Iesu ibukin ara bure, E karaoa nanon ana reirei ngke E tataro, “Tamau, Ko na kabarai aia bure; ba a aki ata ae a karaoia.”9
Te tataro ae koaua ibukiia naake ti taraiia bwa ara kairiribai e kaota ara koaua bwa e kona te Atua ni bita nanora ao nanoia tabemwang. Tataro n aron aikai a riai ni kakorakora ara motinnano ni karaoi bitaki aika riai i nano maiura, ara utu, ao ara kaawa.
Bwa ko mena ia, tera am taetae ae ko kabongana, ke kakaewenako aika ko kaitarai, E ongo te Atua ao e kaekako n oin Ana kawai ao n oin Ana tai. Ibukina bwa ngaira natina, ti kona n nako Ina n ukora te ibuobuoki, te karaunano, te nano ae boou ni karaoa ae tamaroa n te aonaaba.
Te tataro ibukin te motiraoi, te rau, rarikin, ao aoraki e bon aki tau n angiin te tai. Imwiin ara katorobubua n tataro, ti riai n tei iaon waera ao ni karaoa are ti kona n ibuobuoki—ni bon buokiira ao tabeman.10
Koroboki aika a tabu a onrake ni bannaia aomata n onimaki are e ikota te tataro ao te mwakuri ni karaoa ae tamaroa i nanon oin maiuia ao maiuia tabeman. I nanon Ana Boki Moomon, n aron te katooto, ti wareka rongorongon Enoti. E a tia n noraki bwa “uoua te katenimwakoro man ana boki ae kimototo e kabwarabwara te tataro ke tataro aika reireiti, ao ake nikirana e kaoti mwakurian kaeka ake e karekei.”11
E mwaiti katotoon aron te tataro ni karaoa ae tamaroa i nanon oin ara Ekaretia, ni moanaki man ana moan tataro Iotebwa Timiti n te buakonikai i rarikin aia auti te kai ana karo n te tiburing 1820. Ukoukoran kabwaraan ana bure ao te kairi mai ieta, E kauka karawa ana tataro Iotebwa. N te bong aei ti kakabwaiaaki man aia mwakuri Iotebwa te Burabeti ao tabeman mwaane ao aine Aika Itiaki ake a tataro ao a mwakuri ni buoka katean Ana Ekaretia Iesu Kristo ibukiia Aika Itiaki ni Boong aika Kaitira.
N angin te tai I iangoi aia tataro aine aika kakaonimaki n aron Mary Fielding Smith are, n ana ibuobuoki te Atua, e kaira ana utu ma te ninkoria man rikiraken te bwainikirinaki i Illinois nakon te kamanoaki n te mwarua aei, are a kabwaia iai ana utu n te maiu n tamnei ao n rabwata. Imwiin ana tataro ma nanona iaon bubuanwaena, e mwakuri korakora n tokanikai iaon kakaewenakoana ao e kakabwaiaa ana utu.
Te tataro e na tabekiira ao e na bootira bwa aomata n tatabeman, n te utu, te ekaretia, ao te aonaaba. Te tataro e na buokiia taan rabakau ao e na angania kukune ni bwainnaorakian te manaoraki ao katokana are e na katoka te buti n aoraki aei. Te tataro e na kabebeteia naake a bua kaain aia utu. E na buokiira n atai bwaai aika ti na karaoi ibukin oin kamanoara.
Tariu ao mwaaneu, I kaumaki ngkami bwa kam na kataboroa ami motinnano nakon te tataro. I kaumaki ngkami bwa kam na tataro n ami ruu, n ami waaki n bong koraki, ni mweengami, n ami uoote, ao n tai nako i nanomi.12
I a tei ibukiia taan kairiiri n Ana Ekaretia Iesu Kristo ibukiia Aika Itiaki ni Boong aika Kaitira, I karabwai ngkami ibukin ami tataro ibukira. I kaumaki ngkami bwa kam na reitinako n tataro bwa ti aonga ni karekei kairi ao kaotioti ni kaira te Ekaretia inanon taai ni kangaanga aikai.
Te tataro e kona ni bita maiura. Kaungaakira man te tataro ae koaua, ti kona n tamaroa riki ao ni buokiia tabeman ni karekea naba anne.
I ataa mwaakan te tataro man oin maiu. N tai ae tibwa nako I mena tii ngai n au aobiti. E a bon tibwa tia te korokoro nakon baiu. E bon bwata, e tibu, ao e rang kammaraki. Ngke I tekateka n au taibora, I aki kona ni kabotoa au iango iaon bwaai aika kakaawaki ibukina bwa I katabetabeaki n te maraki aei.
I katorobubua n tataro ni butiia te Uea bwa e na buokai ni kabotoa au iango bwa I aonga ni katiaa au mwakuri. I teirake ao I okirii bwabwati ni beeba ake iaon au taibora. N te tai ae waekoa, te oota ao te rau e roko n au iango, ao I a kona ni katiai bwaai aika kakaawaki ake i matau.
Te bwai ae riki n te aonaaba ngkai e taraa ni kakamaaku ngkana ti tarai kangaanga ao kakaewenako aika bati. Ma, bon au koaua ae korakora bwa ngkana ti tataro ao ti butiia Tamara i Karawa ibukin kakabwaia ao kairiri aika kainnanoaki, ti na ataa arora ni kakabwaiaia ara utu, kaain rarikira, ara kaawa, ao bon abara ake ti maeka iai.
E tataro te Tia Kamaiu ao imwina E “nakonako ni karaoa ae raoiroi”13 man kamwarakeaia rarikin, kaungakiia ao boutokakiia naake a kainnano, ao te mwamwannano n te tangira, te kabwarabure, te rau, te motirawa nakoia ni kabane ake a nako Ina. E teimatoa ni mwannanoira.
I kaoia ni kabane kaain te Ekaretia ao bon kaain rarikira ao raoraora n aaro ake tabeua n te aonaaba, bwa a na karaoa are e reirei te Tia Kamaiu nakoia Ana reirei: “Kam na kamarurungingkami n tai nako, ao kam na Tataro”14 ibukin te rau, te mwengaraoi, te mauri, ao taai n ibuobuoki imarenami.
Ai batira mwaakan te tataro, ao ai batira kainnanoan ara tataro n onimaki iroun te Atua ao Natina ae Tatangiraki n te aonaaba ni bong aikai! Ke ti uringnga ao ni karabwarabwa ibukin mwaakan te tataro. N aran Iesu Kristo, amen.