Ma E na Katia Raoi Ana Mwakuri te Nanomwaaka, ao ni Kabatiai Ami Kimwareirei!
Ngkana ti kamwakura te taotaonnano, ara onimaki e rikirake. Ngkai e rikirake ara onimaki, ao aiaron naba kimwareireira.
Uoua te ririki n nako, tariu ae karimwiu, Chad, e a motirawa man te maiu aei. Mwaingina nakon te itera are teuana e karika uruakin nanon butikau, ae Stephanie; uoman natiia aika uarereke, Brayden ao Bella; n aiaroia naba nikiraia kain te utu. Ti kunea te raunnano n ana taeka Unimwaane Neil L. Andersen n te maungatabu ni kabuta teuana te wiiki imwaain maten Chad: “N te bong ni kataaki iaon te aba, mwaakan te Tia Kamaiu ni kamaiu e uota te ota, te atatai, te rau ao te kantaninga” (“Wounded,” Liahona, Nov. 2018, 85).
Iai ara onimaki iroun Iesu Kristo, ti ataia bwa ti na manga bon kaitibo ma Chad, ma e bon kammaraki ngkai e aki mena irarikira! Bon angiina ae a bua aia koraki ae a tangiriia. E bon kangaanga te taotaonaki n nano ao ni manga tataninga te tai are ti na raoniia iai.
Teuana te ririki imwiin matena, ti namakinna kanga ti taonaki n nuun te rotongitong. Ti ukera te nne ni katantan ni kamatebwaian koroboki aika tabu, n tataro riki ma nanora ni koaua, ao ni kamwaita riki te nanako n te tembora. Taekan te kuna n taromauri aei e katika ara namakin n te tai naba anne: “Te bong ae aiota, e a uti te aonaaba, naang n te tairiki ae rotongitong a mauna nako” (“Te Bong ae Aiota,” Anene n Taromauri, nambwa. 52).
A baireia ara utu bwa n 2020 bon te ririki ni manga kabooui nanora! Ti kamatebwaia Nakomai, Iriirai ara reirei n te Nu Tetemanti n ana boki Iakobo ni kabanean Nobembwa 2019 ngke e kaotaki nakoira te botoniango. Iakobo, mwakoro 1, kibuna 2 e warekaki, “Tariu, e warekia kabatiaan te kimwareirei ni bwai ni kariri nako” (Ana Rairairi Iotebwa Timiti, Iakobo 1:2 [n Iakobo 1:2, bwaai aika a na taraaki mai inano a]). Nanora are e tangiria ni kauka te ririki ae boou, tebwi n ririki ae boou, ma te kimwareirei, ti baireia bwa n 2020 ti taraia bwa “kabatiaan ami kimwareirei.” E korakora ara namakin ibukina bwa n te Kiritimati ae nako ti bwaintangiraia mwaanera ma tarira n taian karinnano are e koreaki iaona, “Kabatiaa ami Kimwareirei.” Te ririki 2020 ni koauana bon te ririki ae kakimwareirei man kakukurei.
Eng, aikai ngaira—2020 e uota butin te aoraki ae COVID-19, aki raun te tautaeka, ao kangaanga riki n angibuakan te aba, ao kanganga ni kaubwain te aba. Tamara are i Karawa e na bon anganiira ara tai bwa ti na tarai ao n iangoi ara atatai ibukin ara babaire n rinea te kimwareirei.
Ana boki Iakobo man te tai aei e kaota te bwai ae iai bonganana ibukira. Iakobo, mwakoro 1, kiibu 3 ao 4 e reitia:
“Kam ata kataan ami onimaki bwa e karika te nanomwaaka.
“Ma e na katia raoi ana mwakuri te nanomwaaka, bwa kam aonga ni moanba n raoiroi, ma ni koro raoi n aki kai nanomi n te bwai teuana.”
Inanon ara kona ni kunea te kimwareirei ribuakon ara kangaanga, ti a mwanuokina are reken te nanomwaaka bon te kiing ni kamwakuri kangaanga akanne ni karika te raoiroi.
E reirei te Uea ae Beniamina ni kanakoa te anua n aomata ao n riki “bwa te aomata ae itiaki rinanon ana mwakuri ni kamaiu Kristo te Uea, ao n [riki] n aiaron te ataei, n ongeaba, n nimamannei, n nanoanga, n taotaonakinano, n onrake n te tangira, ao n tauraoi ni butimwaei bwaai ni kabane” (Motiaea 3:19).
Mwakoro 6 n Taetaekina Au Euangkerio e reirei oin anuan Kristo are ti kona ni katotongi: “Te taotaonakinnano bon te kona ni keiakina ae wenenako ni maan, kangaanga, kaaitara, ke karawawata n akea te un, te kua, ke kakain te nano. Bon te kona ni karaoa ana kantaninga te Atua ao ni butimwaea Ana tai. Ngkana ko taotaonannano, ko teimatoa ni korakora iaan baika a karawawata ao ni kona ni kaitarai kangaanga ma te rau ao te kantaninga” (Preach My Gospel: A Guide to Missionary Service, rev. ed. [2019], 126).
Te nanomwaaka e kakororaoa te mwakuri e kaotaki naba ni maiun temanna ana reirei Kristo, Timon te i Kanaan. Terote bon kurubu n aomata aika Iutaia are a rangi ni kakaitara tuan Rom. Kurubu n aomata aika Terote a kaunga te mwakuri ni kakeru ni kaitaraia tenaan i Rom, taan tei mai Iutaia, ao Tarukaio a eweka te aba ni kuribwaia ibukin aia tianaki ao ni karekei tabeua bwaai ni kakukurei ni buoka aron aia mwakuri (taraa Encyclopedia Britannica, “Zealot,” britannica.com). Timon tei Kanaan bon te Terote (taraa Ruka 6:15). Iangoia aongkoa Timon e kataia ni kaumaka te Tia Kamaiu bwa e katauraoia ma bwai ni buaka, e kaira te taanga ni buaka, ke e karaoa te kamangaongao i Ierutarem. E reirei Iesu:
“A a kabwaia akana nimamanei, bwa a na abana te aba. …
“Ao a kabwaia akana nanoanga bwa a na nanoangaaki. …
“A a kabwaia tan raoi, bwa a na atongaki bwa natin te Atua” (Mataio 5:5, 7, 9).
E a bae n tia Timon ni mwanea ao ni kaunga oin wanawanana ma te ingainga n nano ma are e tangiria, ma e kaotaki ni koroboki aika tab bwa rinanon ana kairoro ma ana katooto te Tia Kamaiu, e bitaki ana taratara. N riki bwa ana reirei Kristo e riki bwa boton ana taratara n ana konabwai inanon maiuna.
Ngkai ti karaoi ao ni kawakin ara berita ma te Atua, e kona ni buokiira te Tia Kamaiu ni “manga bungiaki; eng, manga bungiaki inanon te Atua, ni bitaki man [aia] bwai n rabwata ma aroia ni bwaka, nakon te aro n raoiroi, ao ni kabooaki iroun te Atua, n riki bwa natina mwaane ma aine” (Motiaea 27:25).
Ibuakon ingainga n nano n te reitaki, n taekan te aro, ao n te tautaeka n ara kekeiaki ake ti karaoi inanon ara bong, kariaia ana reirei Iesu Kristo n riki bwa ara reitaki ae teretere man barongaaki. “Bwa ike a mena iai ami bwai ao a mena naba iai nanomi” (Mataio 6:21). Ti riai naba n aki mwaninga e ngae ngke imwiin are a tia ni karaoia reirei aika kakaonimaki “n toua mwin ana taeka te Atua,” e “[riai] bwa kam na nanomwaka” (Ebera 10:36).
N aron naba kataakin ara onimaki e kamwakura te nanomwaaka inanora, ngkana ti kamwakura te taotaonakinnano, e rikirake ara onimaki. Ngkai e rikirake ara onimaki, ao aiaron naba kimwareireira.
Ni Maati ae nako aei, natira te aine ae te kauoman, Emma, n aroia mitinare n te Ekaretia, a tiku iaan te tua n akea te otinako. Angiina mitinare a oki nakon mweengaia. Angiina mitinare a tataningaa manga anganakiia te mwioko. Angiina aki reke aia kakabwaia man te tembora imwaain kitanan te tabo ni mitinare. Kam rabwa, mitinare mwaane ao aine. Ti tangirii ngkami.
Emma ma toana i Netherlands e korakora katakiia inanon tabeua te wiiki ni moan rokoia—a rinanon te kangaanga ao a tang ni bwaai aika mwaiti. Ma n tii uarereken tibwanga n te reitaki ao ni kaitibo ma aomata ao karakon te otinako nako tinaniku, e rikirake onimakinan te Atua iroun Emma. Ti tataro mangaia i aonraain ao n titrakinna ngkana ti kona ni buokia. E tuangiira bwa ti na reitaki ma raoraona ake e reireiniia i aonraain!
A moanna ara utu n reitaki i aonraain, temanna imwiin temanna, ma raoraon Emma i Netherlands. Ti kaoiia bwa a na raoniira ni katoa wiiki, i aonraain, ma ara utu ni kamatebwaia Nakomai, Iriirai. Floor, Laura, Renske, Freek, Benjamin, Stal, ao Muhammad a bane n riki bwa raoraora. Tabeman raoraora mai Netherlands a tia n rinnako “man te mataroa ae eti” (3 Nibwaai 14:13). Tabeman a kaotaki nakoia “etirurun te kawai, ma warikin te mataroa, are a riai n rin iai” (2 Nibwaai 31:9). Ngaiia bon tarira ao mwaanera inanon Kristo. Ni katoa wiiki ti “kabatiai ara kimwareirei” ngkai ti kaai ni mwakuri inanon rikirakera ni kawain te berita.
Ti “katia raoi ana mwakuri te nanomwaka” (Iakobo 1:4) inanon ara aki kona ni kaitibo n itaramata n aroia utu ni uoote ibukin te tai. Ma ti warekia bwa te kimwareirei ngkai aia onimaki ara utu e rikirake rinanon reitaki iaon bwai n rabakau aika boou ao Nakomai, Iriirai kamatebwaian Ana Boki Moomon.
E berita Beretitenti Russell M. Nelson, “Ami mwakuri ae teimatoa n te waaki aei—ao inanon naba taai ake kam namakinna bwa akea te nakoraoi ae reke—e na bitii maiumi, ami utu, ao te aonaaba.” (“Go Forward in Faith,” Liahona, May 2020, 114).
Ike ti karaoi iai ara berita ma te Atua—te tembora—e kainaki n te tai ae aki maan. Te tabo are ti kaawakin ara berita ma te Atua—te mweenga—e uki! Iai tibwangara ni mweengara ni kamatebwai ao n iangoi tamaroan ara berita aika tabu n te tembora. E ngae ngke aki reke rokora n te tabo ane e tabu anne, “nanora … a na kimwareirei korakora ibukin kakabwaia ake a na bwaronako” (Reirei ao Berita aika Tabu 110:9).
Angiina a bua aia mwakuri; tabeman a bua tibwangaia. Ti kimwareirei, e ngae n anne, irarikin Beretitenti Nelson, are e kamatataata n ae nako:“Anganano ibukin angabwai n aki mamata mairouia membwa e tabe n rikirake, n aiaron naba anganano n te angamwane ibukiia ara botanaomata. … Ti na uaia n tokanikai iaon te tai ae kangaanga aei. E na kakabwaiako te Uea ngkai ko reitinako ni kakabwaiaiia aomata” (ana iteraniba Russell M. Nelson iaon te Facebook, e toka man Aokati. 16, 2020, facebook.com/russell.m.nelson).
“Kabebetei nanomi” bon ana tua te Uea, tai maaku (Mataio 14:27).
N tabetai akea ara taotaonaki n nano ngkana ti taku bwa a “bane n eti bwaai aika ti karaoi” ao a aki reke iroura kakabwaia ake ti tangiri. Enoka e nakonako ma te Atua inanon 365 te ririki imwaain ae ngaia ma ana aomata a anaaki mai iaon te aba nako karawa. Tenibubua onobwi ma nimaua te ririki n te kekeiaki bwa a na eti bwaai ni kabane aika ti karaoi, ao e bon riki! (Taraa Reirei ao Berita aika Tabu 107:49.)
Motirawan tariu ae Chad e riki tabeua te namwakaina imwiin kamotirawaara man tararuaan Utah Ogden Mition. E bon kamiimi bwa inanon maekara i Southern California, mai buakon 417 taian mition ti na kaman katabeaki ni mwakuri iai n te ririki 2015, ti katabeaki bwa ti na nako northern Utah. Ana tabo te mition bon 30-te miniti kaeana nakon mweengan Chad. E kuneaki bwa e kaentia Chad imwiin reken mwiokora ibukin nakora ni mitinare. E ngae ngke inanon taai ni kangaanga n te kakataaki, ti ataia bwa Tamara are i Karawa e tabeaianga ibukira ao ni buokiira ni kunea te kimwareirei.
I kakoaua mwaakan te Tia Kamaiu Iesu Kristo ni kabooi maiura, ni kaitiakiraa, ni kanorinanoira, ao ni kakukureira. I kakoaua bwa ngkana ti tataro nakon Tamara are i Karawa n aran Iesu Kristo, E na bon kaekaira. I kakoaua bwa ngkana ti ongo, kakauongo, ao ni mwannanoa bwanaan te Uea ao Ana burabeti ae maiu, Beretitenti Russell M. Nelson, ti “katia raoi ana mwakuri te nanomwaka” ao ni kabatiai ami kimwareirei.” N aran Iesu Kristo, amen.