N riki n ai Arona

Iroun Unimwaane Scott D. Whiting

Man te Itingaun

Bon tii man Ana buoka mai ieta te Tia Kamaiu ae ti kona iai ni bane n rikirake ao n riki n ai Arona.

Nakon temanna are e kabanea ana tai ni kamatebwaia maiun ao ana mwakuri Iesu Kristo, ana kauring te Tia Kamaiu are “kam na riki n ai arou”¹ e kangaanga ao n taraa n aki kona n reke. Tao bon titebo ngkami ma ngai—ti rangi n atai kairuara ao kabwakara, ngaia are ko na bae ni kunea bwa kanga ko tangiria riki ni maiu n te aro ae e aki kainnanoa te rikirake. “Ni koauana, te reirei aio kanga bon tii te iango ae rangi ni karakaaki,” ti kataia ni kamaiua te iango aei ngkai ti rineia ma te mweraoi te kawai are e uarereke te totoko nako iai, n te aro are e na karako te mwakuri ae kainanoaki ibukin te bitaki.

Ao ngkana tao “te riki n [Ai Arona]” tiaki te bwai ae na aki riki, inanon ara tai n te maiu ae mamate aei? Ao ngkana tao, n aanga tabeua, e kona n reke n te maiu aei ao, bon ngaia, te bwa ae e na moan riki bwa ti aonga ni manga maeka ma Ngaia? Tera ngkana “kam na riki n ai arou” e bon eti ao ngaia raoi are e nanonna te Tia Kamaiu? Ao tera imwiina? Te karinan raa n ara kekeiaki are ti na kukurei n anga ni kaoa Mwaakana ae kamimi inanon maiura bwa ti aonga ni kona ni bita ae bon oin aroarora?

E reirei Unimwaane Neal A. Maxwell: “Ngkai ti iangoia ae ti a tia n tuangaki iroun Iesu bwa ti na riki n Aiarona, ti noria bwa maiura n tamnei ae ti mena iai ngkai e bon aki buakaka, ma, kanga bon, teuana te nano are e taoitera ao e memere te unganano ibukin Ana mwakuri—are bon ara mwakuri naba! Ti anga neboakina ma ti tabetai ae ti katotonga Arona.”² Te minita ae kairake, Charles M Sheldon, e taekina ana iango ae ti te arona ni kangai: “Arora ni Kiritian ti tangira karaoan bwai aika bebete ao ni kamwengaraoi ao tiaki ae rawawata ma ni kangaanga ibukin te euangkerio.”³

Ni bon teina, aikai bon mai iaan te kaetieti nakoira bwa ti na riki n Ai Arona, n aron Iesu Kristo ae e riki n aron te Tama.⁴ Inanon rikirakera, ti rikirake ni bobonga, roko n te toki, ao ni kororaoi.⁵ Te reirei aei e aki boboto iaon ana reirei te aro teuana ma bon mai iroun te Mataniwi. Bon rinanon aei ae temanna e na kaineta maiuna nakon tuua, arorna ma tabeman, ao ni karikirakea reitakina ma tabeman. Ni koauana, bon akea te kawai teuana ni kamaoa te ikuaki n te reitaki ae uruaki ke te botanaomata ae uamaenako nakon riki ae ngaira ti na kataia ni katotonga Uean te Rau.⁶

Ti a taraia bwa e na kanga moanakin ae ti na iangoia raoi, ni karaoia ni bon oin nanora, ao n ukoria ma nanora ni kan riki n Ai Arona man karekean raoi anuan maiun Iesu Kristo.

Katokia ao Nanomatoa

Tabeua ririki n nako, ngai ao kainnabau ti tei ni moan te kawai n rianna ni maungan Tiaban ae rietata, Mount Fuji. Ngke tia moana mwanangara ni waerake ti tararake n taraa te toki are e rangi n raroa ao ti iango ngkana ti kona n roko ikekei.

Inanon waewaerakera, ti a moana n rotaki n te kua, a maraki ara matireti, ao n namakina maitoron te tabo ae rietaata. N ara iango, e a rangi ni kakawaki iroura bwa ti na kabotoa ara iango iaon ti te mwaneka are imwiina. Ti na kangai, “N na bon bae n aki roko ieta, ma I kona n toua te mwaneka are imwiina ngkai.” Inanon te tai ae maan te mwakuri are e taraa ni kangaanga e a kona n reke n tokin te tai—te mwaneka teuana imwin teuana.

Te moan mwaneka n te kawai aio n riki n ai aron Iesu Kristo bon karekean te nano ni kan karaoia. Te mataata n te tua bwa ti na riki n Ai Arona e bon tamaroa, ma te atatai anne e riai n raonaki ma tangiran onikan arora, teutana imwiin teutana, ae riaon riki te aro n aomata.⁷ Ni karikirakea te nano aei, ti riai n ataia bwa antai Iesu Kristo. Ti riai n atai tabeua Aroarona,⁸ ao ti riai n tarai Anuan maiuna ni booki aika tabu, taabo n taromauri, ao taabo aika tabu riki ake tabeua. Ngkai tia moana ni kinaa bwa antai raoi Ngaia, ti na norii aekan Anuana irouia aomata tabeman. Aio e na kaungaira n tain ara ukeuke, ibukina bwa e reke irouia tabeman Anuana n aanga tabeua, ngaira naba ti kona.

Ngkana ti kokoaua i bon iroura, Otan te Kristo⁹ are inanora e na tuangiira bwa a tuai reke anuan te Tia Kamaiu iroura ao ti riai ni mwakuri korakora.¹⁰ Te aeka ni kokoaua anne e kakawaki ngkana ti na rikirake n riki n ai Arona. Eng, te kokoaua bon teuana mai ibuakon Anuana.

Ngaira, ake ti ninikoria tao ti na bae ni iangoia n titirakiniia kaain ara utu ake ti onimakiniia, kainnabara, raraora, ke taan kairiiri n te aro bwa teraa anuan Iesu Kristo ae ti kainnanoia—ao ti na tauraoi ni butimwaei kaeka ae tao ti aki kukurei iai! N tabetai ti noriira rinanon taian tirotaam aika kaburea aron tein rabwatara bwa tia rangi ni bubura ke ni bakitaia n aron are bon teira raoi.

Raraora ao ara utu ake ti onimakiniia a kona ni buokiira n nora raoi are bon ngaira, ma ngaiia naba, inanon aia tangira ao ibuobuoki n aron are a kan kaotia, a kona n nori bwaai aika a aki tamaroa. Ao n tokina, e rangi ni kakawaki bwa ti na titirakina naba Tamara ae i Karawa bwa teraa ae ti rangi ni kainnanoia ao iia te tabo ae ti riai ni kabanea ara tai iaona. E bon noriira ao e na kaota nakoira mamarara.¹¹ Tao ko na tangiria n reiakina ae ko kainnanoa te taotaonakinnano ae korakora, nanorinano, tangira ae kororaoi, tangira, kantaninga, nanomatoa, ke te ongeaba mai ibuakon ae bati.¹²

N aki maan n nako, I rinanon te tai ae karikirakeaki iai maiun tamneiu ngke temanna te tia kairiiri n te Ekaretia e tuangai bwa I kainanoia ni karikirakea teuana te anua. E kaotia n aki karaba te koaua ma te tangira. N te tairiki anne, I tibwa te bwai ae I rinanona aio ma kainnabau. Neiei e kakoauaa are e taekina te tia kairiiri ma te nano n tangira. E kamatoa te Tamnei ae Raoiroi nakoiu bwa aia reirei bon mai iroun Tamara are i Karawa ae tatangira.

E na ibuobuoki naba ngkana ko kabwanina raoi anuan Kristo iaon bwaai ake a na karaoaki ni mwakoro 6 n Tataekin Au Euangkerio .¹³

Ngkana ko a tia n rinanoa arom ao ni motikia bwa ko na moana n riki n ai aron Kristo, ko riai n rairananom. E reirei Beretitenti Russell M. Nelson: “Ngkana ti rineia bwa ti na rairi nanora, ti rineia bwa ti na bitaki! Ti kariaia te Tia Kamaiu bwa e na bitiira nakon te kabanea n tamaroa. Ti rineia bwa tina rikirake n te maiu n tamnei ao ni karekea te kimwareirei—ni kimwareirei ibukin te kamaiuaki Irouna. Ngkana ti rineia bwa tina rairi nanora, ti rineia bwa tina riki n ai aron raoi Iesu Kristo.”¹⁴

Te riki n ai aron Iesu Kristo e kantaningaaki iai te bitaki n te nano ao te iango, eng, kateira ao anuara, ao e na riki aei bon rinanon ana akoi ni kamaiu Iesu Kristo.¹⁵

Kinaa ao Karaoa Nanona

Ngkai ko a tia ni motikia bwa ko na bitaki ao n raira nanom ao n tia n ukora ana kairiiri rinanon te tataro, iango ma te koaua, ao tao ni marooro ma tabeman, ko kainanoiariai ngkai n rinea te anua are ko nano iai bwa boton am waaki. Ko na riai ni motikia ni kabanea korakoram n am mwakuri aika a uaana. Anua aika aki bebete ao ni waekoa rekeia, ma rinanon Ana akoi a na roko teutana imwiin teutana ngkai ko kataia n tokanikai iai.

Anua ae ai aron te Kristo bon bwaintangira mai iroun Tamara are i Karawa ni kakabwaiaira ao naake irarikira. Ni kaineti ma anne, ara kekeiaki ni karekei anua aikai e kainannoa te bubuti ma nanom ni koaua ibukin Ana ibuobuoki mai ieta. Ngkana ti ukorii bwaintangira aikai ibukin buokaia tabeman, E na kakabwaiaira inanon ara kekeiaki. Ukoukoran te bwaintangira mai iroun te Atua bon ti ibukim e na reke ae n tokina te aki kukurei ao te bwarannano.

Ni kabotoa am iango iaon teuana te anua ae ko kainnanoia, ngkai ko kekerake ni karekea te anua anne, anua ake tabeua a na manga rikirake. E kona te aomata are e kabotoa ana iango iaon te tangira ae kororaoi n aki rikirake inanon te tangira ao te nanorinano? E kona te aomata are e kabotoa ana iango iaon te ongotaeka n karekea te wanawana ae korakora ao te kantaninga? Am kekeiaki ae korakora ni karekea teuana te anua e riki bwa te nao ae e uotiia rake booti ni kabane inanon te uaabu.

Taua Mwiia ao Kateimatoai

E kakawaki irou ngkai I keiaki n riki n ai Arona bwa N a taua mwiin te bwai are I rinanona ao are I reiakina. Ngkai I kamatebwai ma Anuana teuana ae e nene n au iango, e riki ni boou kanoan koroboki aika tabu ngkai I nora aekan te anua aei n Ana taeka n reirei, Ana mwakuri, ao irouia ana Reirei. Matau naba a kona n norii ao ni kinai anua aikai irouia tabeman. I a tia n noria aomata aika tamaroa n tatabemaniia nako inanon te Ekaretia ao ake tiaki ae iai anua aikai irouia ni katotoonga Anuana. Bon banna ni katooto aika korakora bwa a kanga anua akanne ni kona n reke irouia aomata n te maiu ae mamate aei rinanon Ana tangira n akoi.

N taraia bwa e na reke te rikirake ae koaua, ko riai n rang n rianako n am kekeiaki ae reitinako. N ai aron tamwarakean te maunga e kainnanoa te katauraoi mai imwaiina ao te teimatoa ao te nanomatoa inanon tain te tamwarake, ao arona naba bwa te mwananga aio e kainnanoa te kekeiaki ni koaua ao te anganano. Te Kiritian ni koaua, are ngaia ae ti keiaki n riki n ai aron ara Mataniwi, e aki toki ni kainanoaki iai ara kekeiaki ae te kabanea n tamaroa.¹⁶

Aio tabeua taeka ni kauring. Te tua bwa ko na riki n ai Arona e aki kananonaaki bwa ko na namakina te kairua, n aki tau, ke n aki tangiraki. Bwaai ake ti rinanoi ni bongin nako maeura bon ibukin rikirakera, te kakatai, te bwaka, ao te tokanikai. E ngae ngke ngai ao kainnabau ti kan iangoia bwa ti kona n tii kainii matara ao tia kuba naba ni karokoaki i taubukin te maunga, aio bon tiaki aron te maiu aei.

E tau arom, ko tangiraki, ma tiaki nanona ae e a reke iroum bwaai ni kabane. Iai te mwakuri ae riai ni karaoaki n te maiu aei ao are imwiina. Bon tii man Ana buoka mai ieta ae ti kona iai ni bane n rikirake ao n riki n ai Arona.

N taai aikai ngkai, “bwai ni kabane [a taraa] ni mangaongao; ao … te maaku [e roko] i aoia aomata ni kabane,”¹⁷ ao bwain aorakiana, aron katokana, bon te kekeiaki ni riki n ai aron te Tia Kamaiu,¹⁸ te Tia Kabooi Maiuiia¹⁹ aomata nako, Ootan te Aonaaba,²⁰ ao te ukoukora Teuare e kangai, “Bon Ngai te kawai.”²¹

I ataia bwa te riki n ai Arona rinanon Ana ibuobuoki ao te korakora mai ieta e bon kona n reke n touakin te mwaneka teuana imwiin teuana. Ngke arona bwa e aki, E na bon aki anganiira te tua aei.²² I ataa teutana aio—ibukina bwa I norii Anuana iaomi. I kakoauai koaua aikai n aran Iesu Kristo, amen.

Bwaai aika a na taraaki

1. 3 Nibwaai 27:27. Ibukin kauring ae aekakin aikai mai iroun te Tia Kamaiu, taraa Mataio 5:48 (“Ma ngaia ae kam na moaniban te raoiroi n ai aron Tamami are i karawa ngkai moaniban te raoiroi”); 1 Ioane 2:6 (“Ane taku bwa e maeka i nanona ao e riai ba e na nakonako n te aro are E nakonako iai Teuarei”); Motiaea 3:19 (“Bon ana kairiribai te Atua te aro n aomata, man moan bwakan Atam, ao e na teimatoa n aki toki, ni karokoa ae e kakauongo nakon ana wirikiriki te Tamnei ae Tabu, ao n tokanikai i aon te aro n aomata ao n riki bwa te aomata ae itiaki rinanon ana mwakuri ni kamaiu Kristo ae te Uea, ao n riki n aiaron te ataei, n ongeaba, n nimamannei, n nanorinano, n taotaonakinnano, n onrake n te tangira, ao n tauraoi ni butimwaei bwaai ni kabane ake e tangiria te Uea bwa e na karaoi, n aiaron te teei are tauraoi ni karaoi bwaai ake e tuangaki iroun tamana”); Aramwa 5:14 (“Ao ngkai nooria, I titirakiningkami, tariu n te ekaretia, kam a tia ni bungiaki n te tamnei mai iroun te Atua? Kam a tia ni karekea tein tarakina i moami?”); 3 Nibwaai 12:48 (“Mangaia are I tangiria bwa kam na kororaoi n arou, ke Tamami are i karawa ngkai e kororaoi”).

2. Neal A. Maxwell, Even As I Am (1982), 16.

3. Charles M. Sheldon, In His Steps (1979), 185.

4. Taraa Reirei ao Berita aika Tabu 93:12–17.

5. Taraa Mataio 5:48, bwaai aika a na taraaki mai inano b.

6. Taraa Itaia 9:6; 2 Nibwaai 19:6.

7. Taraa 1 I-Korinto 2:14; Motiaea 3:19.

8. Taraa Mataio 7:23; 25:12; Motiaea 26:24; taraai naba bwaai aika a na taraaki mai inano n taian kibu nako; David A. Bednar, “If Ye Had Known Me,” Riaona, Nobembwa 2016, 102–5.

9. Taraa Reirei ao Berita aika Tabu 93:2.

10. Taraa Moronaai 7:12–19.

11. Taraa Ita 12:27.

12. Taraa Preach My Gospel: A Guide to Missionary Service, rev. ed. (2019), chapter 6, “How Do I Develop Christlike Attributes?” Bwai ni ibuobuoki nakon anuan te Tia Kamaiu ake tabeua a kuneaki inanon nako koroboki aika a tabu. Tabeua katooto n aron Motiaea 3:19; Aramwa 7:23; Taekan te Onimaki 1:13.

13. Taraa Preach My Gospel, 132.

14. Russell M. Nelson, “We Can Do Better and Be Better,” Liahona, Meei 2019, 67.

15. Taraa Rikitinare n te Baibwara, “Akoi”, Bwai ni Kairi nakon Koroboki aika Tabu, “Akoi” scriptures.ChurchofJesusChrist.org.

16. Taraa Sheldon, In His Steps, 246: “Ngkana nanon te riki ni Kiritian iroura bwa kanga ti te kukurei ni kona n nebonebo, n akoakoi ngkana akea te bwai ae e na riki nakoira, ni karekea te tai ae raoiroi, waekoan te tai ni bootaki ma raraora ao bwaai aika kamwengaraoi, ni maiu raoi ao n te tai naba anne ni katibanakoa te raraoma n te aonaaba n te bure ao te kangaanga ibukina bwa e a rang rawawata uotakina—ngkana aio nanon te riki ni Kiritian iroura, n etina ti bon raroanako man touan mwanekan Teuare e toua te kawai ma te ngirangira ao te tang ao te maikeike ni maraki ibukin te botanaomata ae bua; are e maono, kanga ai aron, timtimin te rara, are e tang mai iaon te kai are e tauraki iai, ‘Atuau, Atuau, e aera ngkai ko kitanai.?’”

17. Reirei ao Berita aika Tabu 88:91.

18. Taraae Itaia 43:3.

19. Taraa Iobi 19:25.

20. Taraa Ioane 8:12.

21. Ioane 14:6.

22. Taraa 1 Nibwaai 3:7.