Tataningaa te Uea
Te onimaki nanona onimakinan te Atua n tai aika raraoi ao aika a bubuaka, riki ngkana e raonaki ma teutana te korakai ni karokoa ti noora Baina ni kaoti ibukira.
Tariu ao mwaneu aika kam tangiraki, ti bane n ingainga—akea temanna ae ingainga riki nakoiu—ni kan ongora ana maroro ni kainiin ara burabeti ae tangiraki, Beretitenti Russell M. Nelson. Aio e a tia n riki bwa te kabanea n tamaroa ni maungatabu, ma bon te kauatai n te butinaoraki ae te COVID-19 are e a tia ni biti kateira ake ti waaki iai. Tia rang kua n te aoraki ae rang ewewe, aei n te aro are kaanga tia kan buritii irara ni kouti. Ao taraakina, tabeman irouia Taari a kaman tia ni karaoa te mwakuri anne. Taiaoka ataia bwa ti teimatoa n tataro ibukiia naake a tia n rootaki n aro nako, riki irouia ake iai aika a tia ni bua naake a tangiriia. Ni kabane a kakoauaa bwa aio e a rang, n reianau.
Maanra ara tai n tataninga ibukin te ibuobuoki man te kangaanga are e a tia n taoniira? Tera ae tina karaoia n teimatoa inanon kataakira ngkai ti tataninga man tataninga, ao te ibuobuoki e tara n rang n iremwe n roko? Bukin tera ngkai iai te waeremwe ngkai uotara a tara n rang ni mwaiti riki nakon are ti kona n uoti?
Ngkai ti titiraki aekakin titiraki aikai, ti kona, ngkana ti kataia, n ongo tangin temanna ae nako man te tabo ae kamariri ni kamwengabuaka, te karabuti ae roo inanon tain te kamwaitoro n te winta are e koreaki n te tai arei n te tabo arei.
“O te Atua, ko mena iaa? ti ongo mai kabin te karabuti are i Liberty. “Ao e ngaa te umwa ae rabuna te tabo ae ko karabako iai? E na maanra baim n tiku?”1 E na maanra, O te Uea, e na maanra?
Ngaia are, ti aki ngaira taan moan ke n riki bwa taian kabane n titiraki te aekaki n titiraki anne ngkana te rawawata e toka iaora ke te maraki i nanora e reitinako n te tai ae rangi ni maan. I aki taetae ngkai iaon te butinaoraki ke te karabuti ma I a taetae ibukimi, ami utu, ao kain rarikimi ake a kaitara ma angiin taian kangaanga. I taetae ibukiia aika a kai nanoia aika a mwaiti ake a tangiria ni mare ma a tuai ke naake a tia ni mareaki ao a tangiria bwa aia reitaki e a karakaaki riki teutana nakon te tiretio. I taetae ibukiia naake a na rinanon kaotin te aoraki ae kakaiaki ae aki tangiraki—ae tao akea katokana—ke temanna ae kaitara ma te kangaanga ni maiuna ae reke n te aoraki n rikina are akea bwain aorakiana. I taetae ibukin te kangaanga ae reitinako n te namakin ao kakaewenako ni marurungin te iango are e karekea te rawawata n tamneia aika a mwaiti ake a rootaki ma ngaiia, ao inanoia naake a tangiriia ao a rootaki ma ngaiia. I taetae ibukiia kainnano, are e tuangiira te Tia Kamaiu bwa ti na aki mwaninga, ao I taetae ibukimi naake a tataninga okin natiia, n aki tara aia roro, ake a tia n rinea te kawai ae kaokoro man are ko tataro bwa teuanne ke neienne e na toua.
N reitia riki, I kakoauaa bwa e ngae ngkai e abwabwaki rinanin bwaai ake tina bae n tataningaia aki kataia ni mwanewea kaubwain te aba ae bubura, te tua, ao raraomaia te botanaomata are ti kaitarai ngaira ni kabane. E mataata bwa Tamara are i Karawa e kantaningaira bwa tina kaitarai waaki aika karekea te kangaanga nakon te botanaomata ao ai aron naba ake ti bon kaitarai, ma e na iai te tai inanon maiura are ara kekeiaki ni maiura n tamnei ae moan te tamaroa, ao ara bubuti n tataro mai inanora a aki karekea te tokanikai are ti a tia ni bubuti ibukina, bwa tao bwaai ake a kaineti ma te bwai ae riki n te aonaaba ke ake a uarereke ake a onoti ibukim. Ngaia are ngkai ti ikotaki ni mwakuri ao n tataningai kaeka nakon ara tataro tabeua, I angani ngkami au berita n abotoro bwa a bane n ongoraeaki ao a bane ni kaekaaki, e ngae ngke tao e aki riki n taina ke n aron are ti tangiria. Ma n tainako a kaekaaki n te tai ao n te kawai are ara karo aika ataibwai ao n reitinako aia nanoanga a kaekai iai. Tariu ao mwaneu aika tangiraki, taiaoka kam na ataia bwa te Atua are aki kona ni matu ke ni motirawa2 e tabeaianga ibukin kukureia ao karietatakiia ae akea tokina Natina iaon bwaai ni kabane n aron are e na karaoia naake i karawa. Ngaia te tangira ae itiaki, arona ae mimitong, ao te Tama ae Nanoanga bon Arana.
“Ngkana ngaia anne,” kona bae ni kangai, “tiaki Ana tangira ao ana nanoanga e na kabebetei ara kangaanga n aron are e bwena Taari ae Uraura bwa tina kona n nakonako iai rinanon ara kangaanga iaon te tano ae mwau? Tiaki E nang riai ni karokoa te ibuobuoki man tabo nako ni waekoa ni katoki ni kabane ara kangaanga?”
Te kaeka nakon te titiraki anne bon “Eng, te Atua e kona ni karaoi kakai n te tai ae tawe, ma n te tai ae waekoa ke rimwi tina ataia bwa taai ma bongin mwanangara n te maiu n rabwata bon Ana bwai ao bon ti Ngaia ae e na kairia.” Te Atua e kairi bwaai ao taai inanon maiura aika a kakaokoro ibukiia aomata nako. Bwa n aiaron te mwaane are e aoraki ao e kamarurungaki n te tai ae waekoa ngkai e tataninga bwa e na rin n Nein Beteteta,3 iai riki temanna ae e na kabanea 40 te ririki n te rereua n tataninga rinna n te aba ni berita.4 Bwa ai aroia ake Nibwaai ao Riaai a katanaki mai karawa n otabwaniniaki n te ai ibukin aia onimaki,5 iai Abinataai are e kabuekaki iaon te kai ae urarake ibukin ana onimaki.6 Ao ti uringnga bwa Eria are e wetea te ai bwa e na ruo mai karawa bwa e na kakoaua ni kaitaraia ana burabeti Baara7 bon ngaia naba Eria are e teimatoa n te tai ae maan ngke akea te karau inanon ririki aika bati ao are, inanon te tai, e kamwarakeaki man te amwarake ae uarereke are e kona ni uotaki ni bain te reben.8 Man au katautau, anne e aki kona n riki bwa te bwai are tina atongnga bwa te “amwarake ae kakukurei.”
Te bwai ae I kataia ni kabwarabwara? Te bwai ae I kataia ni kabwarabwara bwa te onimaki nanona onimakinan te Atua n tai aika raraoi ao aika a bubuaka, riki ngkana e raonaki ma teutana te korakai ni karokoa ti noora Baina ni kaoti ibukira.9 Anne e kona ni kangaanga n te aonaaba n taai aikai ngkana a mwaiti ake a kakoaua bwa te maiu ae tamaroa ae rietaata bon totokoi korakai ni kabane, bwa akea temanna ae e na korakai iaon te bwai teuana.10 Ma te koaua anne e na bon aki kairiira “bwa aomata aika ikawai ao tiara bwa onraken Kristo.”11
Ma te kabwarabure nakon Unimwaane Neal A. Maxwell ibukin reitan te bwai are e taekinna n te taina, I taekinna naba bwa “maiun temanna … e aki kona n uaia ni kaonaki n te onimaki ao ni kainaomataaki man te rawawata.” E na bon aki mwakuri “ngkana temanna e maiuakina maiuna n aki atai kangaangan te maiu” n taekinna bwa ti riai ni wene n rau ao ni kukurei ni bwaai aika tau. “Te Uea, anganai ni kabane tamaroan aroaro aika riai, ma kakoaua bwa kona tai anganai te nanokawaki, ke te rawawata, ke te maraki, ke te kakaitaraki. Taiaoka tai kariaia temanna bwa e na aki tatangirai ke ni bwainikirinai, ao iaon riki aikai ni kabane, tai anganai te namakin ae I katinanikuaki mai iroum ke naake I tangiriia. Ni koauana, te Uea, taratara raoi ni kawakinai man taneiai ni kabane ake a na karikiko bwa ko na mimitong. Ma ngkana e a toki aia kangaanga tabeman are a kaitara, taiaoka kariaia bwa N na roko ni maeka ma Ngkoe, bwa N na kona ni kamoamoa aron korakorara ao arora ngkai e bebete ao ni karako te bwai ae kantaningaaki n te maiu n te aro ni Kiritian.”12
Tariu ao mwaneu aika kam tangiraki, maiuakinan te aro ni Kiritian e aki uotiira n tainako nakon te mwengaraoi. Te kawai nakon te mimitong ao te kakukurei ikai ao imwiin aei e abwabwaki ao n tabetai e kairiira nakon te kawai ae kangaanga. E tangira te tai ao te nanomatoa ni mwananga iai. Ma, e koaua, te kaniwanga ibukin karaoan aei e bubura man kakaawaki. Te koaua aei e kamatata ao e anainano n te ka 32 ni mwakoro n ana Boki Aramwa n ana Boki Moomon. Ikekei te ibonga ae rietaata e reirei bwa ngkana ana taeka te Atua e unikaki inanora n ai aron te kora, ao tii ngkana e tau ara tararua n tebokia, kouteuteia, kamwarakea, ao ni kaunga, n taai aika a na roko e na anga uaana “ are bon moan te kakawaki, … are e karewerewe riki nakon bwaai aika a karewerewe,” kanakina are e na karekea te aki manga taka ao te aki baki.13
A mwaiti reirei ake a reiakinaki n te mwakoro ae kakateke aei, ma ae kakaawaki man aikai ni kabane bon te koraa are e na riai ni kamwarakeaki ao ti riai n tataninga ikawaina: ti “[taratara] n ingainga ma te mata n onimaki nakon uaana.”14 Ara tai, e taku Aramwa, e roko “n te tai ae aki maan.”15 Te bwai teuana e aki kakubanako bwa e kaina ana maroro ae tamaroa man ni kaokiokia teniua te tai te wewete ibukin te taningamarau ao te taotaonakinnano n tabeakinan ana taeka te Atua inanora, “n tataninga” ngkai e taekinna, “taonan nanomi n te tai ae maan … te kai bwa e na kariki uaa nakoimi.”16
COVID ao te kaentia, nanokokoraki ao nanokawaki, kangaanga n te mwane ao kangaanga n te utu. Nningai ae a na kabebeteaki iai rawawata aikai? Te kaeka “n te tai ae aki maan.”17 Ao ngkana anne bwa n te tai ae aki maan ke n reianako bon tiaki ngaira ae tina taekinna, ma man ana nanoanga te Atua, te kakabwaia e na roko irouia naake a taua ni kamatoa ana euangkerio Iesu Kristo. Te rongorongo anne e karaoaki nanona n te onaroka ae onoti iaon te maunga ae kinaaki i Ierutarem n te tai ae e a maan n nako.
Ngkai ti nang ongora iroun ara burabeti ae tangiraki ni kainakin te maungatabu aei, ti bia uringnga, ngkai e a tia Russell Nelson ni kaotia ni kabane inanon maiuna, bwa naake a “tataninga te Uea a riai ni manga kaboua korakoraia [ao] a na mwemwerake ni baia ni kiba kaanga ai aroia ikare; ao a na biri ao n aki kua, … ao a na nakonako ao n aki mamaara.”18 I tataro bwa “te tai ae aki maan”—ngkai ke rimwi—kakabwaia akanne a na roko nakoia n tatabemaniia naake a ukoukora te kabebeteaki man rawawatami ao te inaomata man nanokawakimi. I kakoaua n ana tangira te Atua ao ni Kaokan bwai n Ana euangkerio ae mimitong, are n te aro teuana ke teuana bon te kaeka nakon kangaanga ake ti kaitarai inanon te maiu. N aran te Uea ae kabooira Iesu Kristo ae tabu, amen.