Te Akoaki ae Bati iroun te Uea
Taai ni karawaawata ao n aki kukurei a aki bita ana tararua te Uea ngkai E taraira ma te akoi, ni kakabwaiaira.
Te bong teuana, Ngai ma toau ti ingainga ngke ti ataia bwa Beretitenti Spencer W. Kimball e kawara Atia ao membwa ni kabane ao mitinare i Tiaban a kaoaki nako Tokyo bwa a na ongora iroun te burabeti n te maungatabu n te aono. Ma kaain te mwaanga, ngai ma toau ti moana ara katauraoi ma te ingainga n nano ibukin te maungatabu, te mwananga n te booti 12 te aoa n rinanon Marawan Tiaina Mainuku nako kautun te aba i Tiaban, n rimwiaki ma te mwananga n te turein ae 15 te aoa nako Tokyo. N ae kananokawaki, e ngae n anne, tiaki aron taraana anne. Ti karekea te rongorongo mairoun ara beretitenti bwa ibukin te raroa ao te tai, ngai ma toau ti a aki kona ni kaea te maungatabu i Tokyo.
Ngkai a borau kaain ara mwaanga ae uarereke nako Tokyo, ti a tiku imwiia. Boong ake imwina e a taraa ni bung te aariki ao ni kamaroaa. Ti karaoa ara bootaki n toa n te tabo n taromauri ae uarereke, ngkai aomata Aika Itiaki ao mitinare i Tiaban a kaea te maungatabu.
Namakinan te aki kukurei irou e rikirake e ngae ngke I kimwareirei n ongora irouia kaain te mwaanga ake a oki man te maungatabu te rongorongo are e katanoataa Beretitenti Kimball bwa e na kateaki te tembora i Tokyo. A taetae ma te ingainga n aia tai n tibwaua koron bukin miia. A kabwarabwara bwa, ngke a ongo te katanoata bwa e na kateaki te tembora, membwa ao mitinare a bon aki kona n taua kimwareireia n te aro are a bon bane naba n uboubo.
Ririki aika mwaiti n nako, ma I bon teimatoa n uringa te karawawata are I namakinna ngkai I aki ira te boowi ae kakaongora anne.
N namwakaina aika tibwa nako, I a tia n iangoa rongorongou aei, ngke I noria aomata ni kaitarai karawawata aika korakora, aika a riaon are I rinanona ngke I mitinare, are a kaoti man butanakon te aoraki ae te COVID-19.
Ni moan te ririki aei, ngke e rang rikirake butanakon te aoraki, te Moan Beretitentii e motinnanoia bwa “te Ekaretia ao ana membwa a na kakaonimaki ni kaota aia motinnano n riki bwa kaain te aba aika raraoi ao n tamaroa nakoia kaain rarikiia”1 ao a na “bwaina te taratara raoi ae bati.”2 Ngaia are, ti a tia n rinanon katokan bootaki n te Ekaretia ni kabuta te aonaaba, okiia e raka iaon iteran mwaitia mitinare n te Ekaretia nakon abaia, ao kainan tembora ni kabane ni kabuta te Ekaretia. Ngaa mai iroumi kam katauraoi n rin n te tembora ibukin otenanti ibukiia aika maiu—n raonaki ma kabaebae n te tembora. Tabeman mai iroumi e moantaai ni toki ami beku bwa mitinare ke tao kam kamotirawaaki ke kam kamwaingaki ibukin te tai ae uarereke.
N taai aikai, taan kairiiri n tautaeka ao bootaki n reirei a kaini reirei—are e a bita aron te angabeeba ao e kairoroa katokan takakaro, te aro nreitaki, katei, ao waakin te reirei ma ana waaki ni kakukurei. E mwaiti mai iroumi ake a katauraoi ibukin taian kamataku ao kaboo ake a aikoa boo, ao takakaro aika a eke aika a aikoa karaoaki.
Ae rangi ni kananokawaki riki bon norakia utu ake a bua kaain aia utu n te tai aei; are angina a aikoa kona ni kaei taunimate ke bootaki n utu are a tia ni kakantaningaia.
Ni kauarerekeana, e mwaiti, ao e mwaiti mai iroumi ae rinanon te rawawata, te nanokawaki, ao te bwarannano. Ngaia are ti na kanga ni kamaiuaki, n teimatoa , ao ni waaki nako ngkana a taraa n nakobuaka bwaai?
Te burabeti ae Nibwaai e a moanna ni korei bwaatua aika uarereke ngke te rorobuaka n ataei ngaia. Ngke e tanrikaki n taraa maiuna ao ana mwakuri, e anga te nonoori ae kakaawaki n te moani kibu n Ana Boki Moomon. Te kibu aei e karaoa te reirei ae moan te kakawaki ibukira ae ti na iangoia ibukin ara tai. N aron ana taeka ae ataaki, “Ngai, Nibwaai, I a tia ni bungiaki irouia kaaro aika a tamaroa,” e koreia, “ao n tia n noori rawaawata aika a mwaiti i nanon au bong, e ngae n anne, e a tia n reke akoakiu ae bati iroun te Uea n au bong ni kabane.”3
Ibukina bwa ti kamatebwaia Ana Boki Moomon, ti atai karawaawata aika a mwaiti are e kananonai Nibwaai. Ma imwin kaotan karawaawatakina aika mwaiti i nanon ana bong, Nibwaai e anga ana taratara iaon te euangkerio bwa e bati akoakina iroun te Uea i nanon ana bong ni kabanea. Taai ni karawaawata ao n aki kukurei a aki bita ana tararua te Uea ngkai E taraira ma te akoi, ni kakabwaiaira.
Ngai ma Lesa ti kaitibo ma 600 mitinare i Aotiteria, ake angiia mai buakoia a mena iaan tabeua babaire ni kainaki ke n tuukaki n irekeree ma te aoraki ae te COVID-19, angiina a mwakuri man aia auti. Ni kabane ti iangoia aomata inanon te O Tetemanti, ana Boki Moomon, ao Reirei ao Berita aika Tabu ake e kakabwaiaiia te Uea bwa a na kakoroa nanon te tamaroa n tain te kakaitara. A bane n taraaki riki ni baike a kona ni karaoi man ana ibuobuoki te Uea ao tiaki bwaai ake a aki kona ni karaoi inanon aia tai ni kainaki ao n tuukaki.
Ti wareka rongorongoia Bauro ma Tira, ngke a kabureaki ao a kabaeaki waeia n te kai ni kabaewae, a tataro, a anene, ao a kakoaua—ao riki a bwabetitoa te tia tantani.4
Ao rongorongon riki Bauro, i Rome, ngke e kabureaki n ana auti i nanon uoua te ririki, are e bon reitinako ni “kaeta aron ao ni kaotiota uean te Atua,”5 “ao e reirei taekan te Uea are Iesu Kristo.”6
Ti wareka rongorongon Nibwaai ao Riaai, ao natin Ereman aika mwaane, imwin te bwainikirinaki a otabwaniniaki n te boua ae te ai bwa kamanoaia ao bwanaan te uea “ae rau ae kororaoi … e ninia nako tamneia [taan kabureia].”7
Ti wareka rongorongon Aramwa ao Amureki i Amonia, are a kunea bwa e mwaiti “ae kakoaua ana taeka … ao a moanna n rairinanoia, man ukoukori koroboki aika tabu,”8 e ngae ngke a bwainikirinaki ao e tauaki mairouia te amwarake, te ran, ao kunnikaia, a kabaeaki ao a kainaki n te matawariki.9
Ao kabaneana ti wareka rongorongon Iotebwa Timiti, are korakai n te matawariki ae Liberty, e namakina te kakeaki ao te kitanaki, ngkanne e ongo bwanaan te Uea, “Bwa ni kabane bwaai aikai… bon ibukin kabwaiam”10 ao “te Atua e na mena iroum n aki totoki.”11
Mai buakon aikai n tatabeua nako ake iai ana atatai iai Nibwaai: bwa e ngae ngke a tia n noori rawawata inanon bongin maiuia, ma a bon akoaki iroun te Uea.
Ngaira naba ti kona n nori baike a katiteuanaaki ngkai iai kaain te aro n tatabemaniia ao n te Ekaretia n te kawai are ti a tia ni karekea akoakira ae bati iroun te Uea i nanon taai ni kangaanga are ti kaitarai n namwakaina aika a tia n nako. Ngkai I taekin katooto aikai, ke e kakorakora naba am koaua n te nakoa n tia mamata are iroun ara burabeti ae maiu, are e a tia ni katauraoira n taian bitaki imwain anangin te buti n aoraki, are kakorakoraira n teimatoa inanon kakaewenako ake a kaoti.
Nambwa teuana, bon te riki bwa te aro ae boto n te mwenga ao e boutokaki n te Ekaretia.
Uoua te ririki n nako, e taku Beretitenti Russell M. Nelson: “Ti a rang taneiai n iangoa te ‘ekaretia’ bwa te bwai ae riki n ara tabo n taromauri, man boutokaaki ni baike a karaoaki n te mweenga. Ti kainanoa te bitakii nakon te katei aio. … Te Ekaretia ae boboto n te mweengah, are boutokaaki ni bwaai ake a riki inanon ara … kateitei.”12 Bon te taetae ni burabeti ae mwaakaroiroi! Kamatebwaian te euangkerio ae boboto n te mweenga e a tia ni karaoaki i nanon kainakin ara tabo n taromauri n te tai ae uarereke. E ngae ngke e a moanna n okira arona bwaai n te aonaaba ao ti a manga taromauri n taian umwantabu, ti riai ni kateimatoaa reiakinan ao kamatebwaian te euangkerio ae boboto n te mweenga i nanon te buti n aoraki aei.
Te kauoua ni katooto bwa e bati akoakira iroun te Uea bon te kaotioti ni kaineti ma te mwakuri n te kawai ae rietaata riki man tabu.
I nanon 2018, Beretitenti Nelson e waakina te mwakuri n ibuobuoki bwa te bitaki “n arora n tabeakiniira i bon imarenara.”13 Te buti n aoraki aei e a tia n anga taai aika a mwaiti ibukin katamaroaan arora n ibuobuoki. Taari ao aine n ibuobuoki, ataeinaine ao ataeinimwaane, ao tabeman riki a tia n ibuobuoki man karaoan te reitaki, marooro, kaitiaki, katauraoan amwarake, rongorongo rinanon te intanete, ao te otenanti ae te toa nakoia naake a kainnano. E a tia naba te Ekaretia ni buokiia aomata i nanon te buti n aoraki man katauraoan bwaai aika kakaawaki nakon bwain te kaomiuniti ibukin kawakinan amwarake, taabo ni katantan ibukiia ake akea mweengaia, ao tienta n ibuobuoki ibukiia ake tiaki kaain te aba ao karikirake ake a karaoaki nakon te boranibaki ae korakora. Aine n te bootaki n aine ma aia utu a karaoa te kakaewenako aei man karaoan mirion nangoan te ubu ibukiia taan mwakuri ibukin kuakua.
Te kabanea ni katooto n te riki ni kakabwaiaaki n tain te kakaitara bon kunean te kimwareirei ae bati n okin taian otenanti n te tembora.
Aio e kakan kabwarabwarana n te karaki. Ngke Titita Kaitlyn Palmer e karekea weteana nakon te mition n Eberi ae nako, e bon rangi n ingainga n riki bwa te mitinare ma e namakinna bwa e kakaawaki ao e onoti te nako n tembora ni karekea ana entaumente ao ni karaoi berita aika tabu. Teutana te tai imwin baen ana tai ibukin ana entaumente, e roko te rongorongo bwa ni kabane tembora a nang kainaki moa teutana te tai ibukin te buti n aoraki n te aonaaba. Imwin karekean te rongorongo ae kauruaki nano aei, e kunea neiei bwa e na kaea te MTC rinanon te intanete man mweengana. E ngae ngke iai angabuaka, E teimatoa Kaitlyn ni kaungaa ibon irouna.
N namwakain ake imwina, Titita Palmer e aki kabuaa te kantaninga ibukin te rin n te tembora. A aki mamatam ao a tataro ana utu bwa a na uki tembora bon imwain kibana. E momoana ana kataneiai n te MTC Kaitlyn man tataekina ae kangai, “Tao ngkai are N na karekea te kakai n ukin taian tembora?“
N Aokati 10, te Moan Beretitentii e katanoata bwa ana tembora Kaitlyn e na manga kaukaki ibukin otenanti ibukiia aika maiu n te bong raoi are e bae arana bwa e na kiba n te moaningabong. E na bon aki kona n rin n te tembora ao ni kiba n teuana te tai. Ngke e memeere aia kantaninga ibukin te tokanikai, a reitaki ana utu ma te beretitenti n te tembora ae beretitenti Michael Vellinga bwa e na reke angan reken te kakai are a kaman tataroakinna. E kaekaaki aia aki mamatam ma aia tataro!
N te aoa 2 n te ingabong, tabeua te aoa imwain kibana, Titita Palmer ao ana utu, ma rannimataia, a kamauraki i matan te tembora iroun te beretitenti n te tembora are wingare, ma ana taeka ae kangai, “Mauri n te ingabong aei, ana utu Palmer. Kaaraki nakon te tembora!” Ngke e a tia ana entaumente, a tuangaki bwa a na moantaai n otinako bwa iai te utut ake a tataninga aia tai n rin imwiia. A buti nakon te tabo ni kiba ao a roko raoi n te tai ibukin kibana nakon ana mition.
Otenanti n te tembora ake ti a tia n aki karaoi inanon tabeua namwakaina a taraa n kakukurei nakon are mai mwaina ngkai tembora n te aonaaba a moan manga ukiia.
N au kainiin, taiaoka kakauongo nakon ana taeka te Burabeti Iotebwa Timiti ae kaunganano, e kamarurung, ao e kakorakora. Akea ae kona ni iangoia bwa e tataningaia inanon te karawaawata ao te kaokoroaki ngke tukaki man kainaki i Nauvoo, ni karaba mairouia naake a ukoukora katikana ae bure iaan te tua.
“Ngkai, tera ae ti ongo n te euangkerio are ti a tia ni karekea? Bwanaan te kukurei! Bwanaan te nanoanga mai karawa; ao bwanaan te koaua mai aontano; rongorongo aika raraoi ibukiia maate; bwanaan te kukurei ibukiia ake a maiu ao ake a mate; rongorongo aika raraoi n te kimwareirei ae korakora.
“… Tiaki ti na aaki nako n te mwakuri ae rangi ni kakawaki? Waaki rake ao tiaki rikaaki. Ninikoria, … ao waaki, waaki nakon te tokanikai! E riai nanomi ni kimwareirei, ao n rangi ni kukurei. E riai te aonaaba ni waekoa n anene.”14
Tariu ao mwaaneu, I kakoaua bwa n te bong teuana, ngkami n tatabemani ngkami kam na tanrikaki n nori bwaai ake a katokaki, kananokawaki, aki raun nano, ao te maroa are riki ma te buti n aoraki bwa e na oneaki nakon kakabwaia ao karakaan te onimaki ao te koaua ae korakora riki. I kakoaua bwa n te maiu aei, ao n te maiu ae na roko, karawaawatami, ami Amonia, ami Umwa ni Kaikain ae Liberty, e na katabuaki ibukin kabwaiami.16 I tataro bwa, n raonaki ma Nibwaai, ti kona ni kinai karawawata inanon waakin maiura are inanon naba te tai anne ti ataia bwa ti akoaki iroun te Uea.
I kainna n au koaua ibukin Iesu Kristo, are e bon aki iruwaa Ngaianakon te karawawata ao bwa mwakoron Ana Mwakuri ni Kamaiu ae akea tiana are e karinanoa iaan bwaai ni kabane.16 E atai rawawatara, marakira, ao tabeaiangan nanora. Bon Ngaia ara Tia Kamaiu, ara Tia Kabooira, ara kantaninga, te Tia Kabebetei nanora,ao Te Tia Kamaiuira. I a taekin aikai n arana ae mimitong, Iesu Kristo, amen.