Mwakan Iesu Kristo ni Kamaiu
Ngkai ti nakon Iesu Kristo man kamwakuran te onimaki Irouna, ao karaoakin ao kawakinan berita aika tabu, nanora aika uruaki—bwa e kanga aron rekena—e kona ni kamaiuaki.
Ni moan te ririki aei, ti a tia n tabe ma bwaai aika riki aika aki kantaningaaki. Mateia aomata n te maiu aei ao aron te kareke mwane ni kaineti ma te aoraki ae butinako n te aonaaba ike e a tia n rooti maiuia kain te komiuniti ao kaubwain te aba ni kabuta te aonaba.
Ni mwaiein te aba, urarake, ao ieka ni mwakoron te aonaaba aika kakaokoro, n raonaki ma urubekebeke man kanoan boong, are a tia ni katikuia aomata n akea buokakia, te bwarannano, ao te uruaki n nano, man raraoma bwa e na kanga aron maiuia.
N na karakina karakinau n te bwai ae I rotaki iai.
Ngke a uarereke ara ataei, a iangoia bwa ana ira te kiraati n te biano. Kainabau, Rudy, ao ngai ti tangiria bwa ana iria ara ataei, ma akea ara biano. Tiaki kona ni kaboa te biano ae boou, ngaia ae Rudy e kakaea ae e a tia ni kabonganaki.
Te ririki anne ibukin te Kiritimati, e bon rangi ni mimi ao n aki kantaningaia aron reken te biano, ao rinanon ririki, a reirei ara ataei aron katangana.
Ngke a ikawairake natira mwaane ao ni kitana te auti, te biano are e a maan e onrake n te bubu, ngaia ae ti a kaboa nako. Tabeua te ririki imwiina, ao ti a tia ni kawakin mwane teutana. E taku Rudy n te bong teuana, “I taku bwa e a roko te tai are ti nang kaboa te biano ae boou.”
I titiraki, “Bukin tera ti nang karekea ae boou, ngkai akea mai ibuakora ae kona ni katangnga?”
E taku, “O, ma ti kona ni karekea te biano are e kona n tang bon irouna! Man kabongakin te iPad, ko kona ni burokuraemia te biano bwa e na kona ni katang kuuna aika e raka iaon 4,000, n raonaki ma anene n taromauri, kunan te Tabaenako Kuaea, anenen te Moanrinan ni kabane, ao a mwaiti riki.”
Rudy e ana nanon kainabana bwa ana kaboa, te biano.
Ti kaboa te biano ae tikiraoi ae kona ni bon tangi irouna, ao tabeua te bong imwiina, iai uoman mwaane aika rii bubura, ao ni marurung a uotia nakon ara auti.
I kaotia nakoia te tabo are I tangiria bwa ana katikua iai ao ni kamwawa kawaia.
Bon te biano ae rangi ni bubura, ao karinakina inanon te mataroa, a kanakoi rangana ao a kararikia ni katoka iaon bwain tabekana are a uotia.
Ara auti e tei iaon karabeen te katabuki, ao n te bong anne e tino, are e a kamwaimwai bwaai ao ni kamaranrani. Ko kona n noria bwa e na mena ia?
Ngke a kamwainga te biano nako aon te tabo ae kuri ni karabee, e marannako, ao I ongo bwakan te bwai ae korakora. E a bwaka te biano mai iaon te kaa ao ni bwaka nako aontano n ae rang korakora are e a karika te bwangabwanga ae bubura iaon tano.
I taku, “O, akea ngaira. Ko nako RAOI?”
Ma te kakaitau mwaane ake uoman akea aia kanganga.
A karerei mataia ngke a taraia ibon irouia, ao a taraai ao a taku, “Ti rangi ni kabwarabure. Ti na kaokia nakon te titoa ao e na tareboni ngkami ara manatia.”
N te tai ae waekoa e taetae te manatia ma Rudy ni bairea nikirakin te biano ae boou. Rudy e tatangira ao ni kakabwarabure ao e tuanga te manatia bwa e raoiroi ngkana ti karaoa te uruaki ao ni uota rikaaki te biano naba anne, ma te manatia e tangiria bwa ti na karekea te biano ae boou.
Rudy e kaeka, n taku, “E na bon nakoraoi. Ti karaoia ao uotia mai.”
E taku te manatia, “E uruaki kaina, ao n te tai are e uruaki iai te kai, ao e na bon aki nakoraoi tangina. Ko na karekea te biano ae boou.”
Aine ao mwaane, tiaki ti tebo ngaira ma te biano aei, kabotaua te kairua ao te ikoaki are ti kaitarai n te maiu aei nakon te uruaki n te biano, ti namakinna ae kanga ti na aki kona ni manga okira arora? E ngae n anne, ngkai ti a roko nakon Iesu Kristo man kamwakuran te onimaki Irouna, rairannano, ao karaoakin ao kawakinan berita aika tabu, nanora aika uruaki—bwa tera bukina—e kona ni kamaiuaki. Te mwakuri ae kaoakin mwakan te Tia Kamaiu ni Kamaiu nakon maiura, e aki ti kaokiira nakon arora are rimoa ma e kanakoraoira riki nakon are imwaina. I ataia bwa rinanon ara Tia Kamaiu, Iesu Kristo, ti bane ni kona ni buokaki, ni karaoaki, ao ni kakoroa nanon ara kantanina, kanga aron te biano ae boou man tikiraoi tangina.
E reirei Beretitenti Russell M. Nelson: “Ngkana a roko katakira aika kangaanga, aio te tai ae ti na karikirakei ao ni kakorakorai iai ara onimaki iroun te Atua, ni mwakuri korakora, ao ni beku ibukiia tabeman. Ngkanne E na kamaiura man nanora aika uruaki. E na anganira te rau ao te mwengaraoi. Bwaintituaraoi aikanne a na aki kamaunanakoaki, riki man te mate.”1
E taku Iesu:
“Bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou, ba I nimamanei ao i nanorinano, ao e na reke i roumi iai motikan rawaia tamneimi.
“Ba e aoraoi amou ao e bebete uotau” (Mataio 11:28–30).
N uruakin te nano tina Nakoina, ti kainnanoia ae e na iai ara onimaki iroun Iesu Kristo. “Karekean te onimaki iroun Iesu Kristo nanona katukan bwaai ni kabane Irouna—onimakinan Mwaakana ae aki totoki … ao n tangira. E raonaki ma onimakinan Ana reirei. Nanona bwa kakoauaan ae e ngae ngkai tiaki mataata ni bwaai ni kabane, Ngaia E mataata iai. Bukina bwa e a tia n taneiai ma aron marakira, ao aorakira, E ata aron buokara iaon ara kangaanga ni katoabong.”2
Ngkana ti Nakoina, “ti kona n namakina te kimwareirei, te rau, ao te boutoka. Bwaai ni kabane aika a [kangaanga ao ni kakaewenako] ibukin te maiu a kona ni kaetaki rinanon Ana Mwakuri ni Kamaiu Iesu Kristo.”3 E a tia n reireiniira, “Tanimai nakoiu n ami iango n taai nako; tai nanououa, tai maaku” (Reirei ao Berita aika Tabu 6:36).
N ana Boki Moomon ngke Aramwa ao ana aomata a kani bane n rootaki man te karawawataaki ae e katokaaki iaoia, aomata a bubuti ibukin kamaiuaia. Te Uea e aki kanakoi rawawataia; ma E berita nakoia:
“Ao N na kabebetei naba taian uota ake a katokaki iaon angami, bwa kam na aki kona n namakin iaon nukami, n ami tai n tautoronaki; ao N na karaoa aio bwa kam aonga n riki bwa taan kakoaua ibukiu imwiin aio, bwa kam aonga n ataa te koaua bwa Ngai te Uea ae te Atua, I bon kaakawariia au botanaomata inanon aia tai n rawawata.
“Ao ngkai e koro bukina bwa taian rawawata ake a katokaki iaon Aramwa ma tarina a kabeebeteaki; eng, ao e kakorakoraia te Uea bwa a na kona n uota uotaia ma te beebete, ao a karaoi nanon te Uea ma te kukurei ao te taotaonakinnano nakon are tangiria te Uea” (Motiaea 24:14–15).
E a tia te Tari Tad R. Callister n reirei ana konabwai te Tia Kamaiu ni kamaiu ao ni kabebetei rawawata:
“Teuana mai ibuakon kakabwaia n te Mwakuri ni Kamaiu bwa ti kona ni karekea mwakan te Tia Kamaiu n ibuobuoki. Itaia e kaokiokia n taekina aron ana kairoro te Uea ni kamaiu, ao ni karaunano. E kakoaua bwa te Tia Kamaiu bon ‘te tabo ni kakorakora nakoia ake akea aia bwai, te tabo ni kamanomano man te ang ae baibati, ao te nu man te riringa’ (Itaia 25:4). E katanoata Itaia ibukiia naake a nanokawaki bwa iai iroun te Tia Kamaiu te mwaka ni ‘kabebetei nanoia akana tang n kabaneia’ (Itaia 61:2), ao ‘e na kaoi rannimata man maata ni bane’ (Itaia 25:8; taraa naba Te Kaotioti 7:17); ‘raraoma tamneina ma n nanorinano’ (Itaia 57:15); ao ‘ni bautia akana a uruaki nanoia’ (Itaia 61:1; taraa naba Ruka 4:18; Taian Areru 147:3). Kukureina n taetae nakoia aomata bon mwakana ni kamaiu ni bita ‘te tamaroa n onea mwiin te mannang, te bwa ni kukurei n onea mwin te kunnikai n tang, te anene ni kamoamoa n onea mwin te nanorawawata’ (Itaia 61:3).
“O, ti kona ni karekea te kantaninga ae tamaroa bukin berita aikai! … Tamneina e kamaiu; e kanakoraoira; e kamwengaraoira; Tamneina e anga te kantaninga ae boou nakoia naake a tia ni bua aia kantaninga. Iai mwakana ni biti bwaai ni kabane ake a buakaka ao ni kakamaku ao n akea bonganaia n te maiu aei nakon te bwai ae kakawaki ao ni kakukurei arona. Iai mwakana ni biti mannangin te rabwata nakon te tikiraoi ae akea tokina.”4
I kakoaua ae Iesu Kristo bon ara Tia Kamaiu ae tangiraki, ara Tia Kaboi maiura, Te Tia Katoki Aoraki, ao raora ae kakaonimaki. Ngkana ti onimakina te Uea, E na katoki aorakira ao ni manga kamaiura. I kakoaua bwa aio Ana Ekaretia ao E katauraoia ni manga oki riki ni uea ma te mwaka ao te mimitong n te aonaaba aei. N aran Iesu Kristo, amen.