agtutubo a lallaki nga agbasbasa iti nasantuan a kasuratan

Panangusar iti Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women

Ania dagiti Panggep dagiti Miting ti Korum ken Klasetayo?

Inikkannakayo ti Apo ti sagrado a panagtalek: Inawagannakayo nga agserbi iti panguluen iti klase ti Young Women ken panguluen iti korum ti Aaronic Priesthood. Paset ti pagrebbenganyo ti mangidaulo ken mangiturong kadagiti miting ti klase wenno korumyo iti Domingo. Tapno maaramid daytoy, makatulong no maawatanyo no apay nga addaantayo kadagitoy a miting.

Dagiti miting ti klase ti Young Women ken korum ti Aaronic Priesthood ket maiduma kadagiti klase iti Simbaan kas iti Sunday School wenno seminary. Kadagiti miting iti klase wenno korum, masursurotayo maipanggep iti aramid nga inted ti Dios kadatayo, ken buklentayo dagiti miembro ti klase wenno korumtayo a mangaramid iti dayta a trabaho kadagiti pagtaengantayo, iti Simbaan, ken iti komunidadtayo. Kadagitoy a miting, saantayo laeng nga agsarita maipapan iti aramid—agaramidtayo kadagiti plano a mangipatungpal kadagiti akemtayo kas paset ti youth battalion ti Apo, agraman iti panangtulong a mangummong iti Israel.

balasitang iti klase

Kadagiti miting ti klase wenno korum, agaramidtayo kadagiti plano a mangipatungpal kadagiti akemtayo kas paset ti youth battalion ti Apo.

Daytoy a panangyunay-unay iti aramid saanna a kayat a sawen nga iti Sunday School laeng ti paglilinnawagantayo maipapan iti doktrina. Kinapudnona, napateg ti panagsursuro iti doktrina kadagiti miting iti klase ti Young Women ken korum ti Aaronic Priesthood—daytoy ti mangtulong kadatayo a mangpapigsa iti relasiontayo ken ni Jesucristo, makaawat iti plano ti Nailangitan nga Ama, ken makiraman iti aramidda. Bayat ti aggigiddan a panagadaltayo iti ebanghelio, dagiti kinapudno a masursurotayo a makapagbalbaliw iti puspusotayo ken makatulong kadatayo a mangammo no kasano ti agtignay kadagiti wagas nga ad-adda a kas ken ni Cristo. Makaawattayo kadagiti parikna maipapan kadagiti wagas a mapadur-as “iti kinasirib ken kinatayag, ken ti gundaway iti Dios ken iti tao” (Lucas 2:52). Bayat ti panagbalintayo nga ad-adda pay a napasurot wenno converted ken ni Jesucristo ken ti ebangheliona, masarakantayto ti rag-o ket makariknatayo iti tarigagay a mangtulong kadagiti dadduma iti dana ti katulagan.

Asino ti Mangidaulo Kadagitoy a Miting?

Inawagannakayo ti Dios kas panguluen ti korum ken klase ket inikkannakayo ti turay a mangidaulo. Dayta ti gapu no apay a tunggal miting ti klase wenno korumyo ket nasken nga iturong ti maysa a miembro ti panguluen ti klase wenno korumyo. Nasken a mangidiaya dagiti nataengan a lider iti pannarabay ken suporta, ngem nasken a saanda nga aramiden para kadakayo. Kitaen iti benneg a napauluan iti “Agiinnuman” iti rugi ti tunggal balabala iti daytoy a resource para kadagiti kapanunotan a mangtulong kadakayo a mangammo no kasano ti mangidaulo iti maysa a miting ken mangipatungpal kadagiti pudno a panggepna. Usarenyo dagiti miting ti panguluen nga agplano no kasano nga iturongyonto dagitoy a miting iti Domingo.

Asino ti Nasken a Mangisuro iti Adalen?

Mabalin a mangisuro kadagiti adalen dagiti nataengan a lider, maysa a miembro ti panguluen ti klase wenno korum, wenno asino man a sabali pay a miembro ti klase wenno korum. Kas panguluen ti klase wenno korum, makiuman kadagiti nataengan a lideryo maipanggep no asino ti nasken a dutokan a mangisuro kadagiti adalen. Laglagipenyo nga adu ti maidiaya dagiti nataengan a lideryo. Agkalikagum nga agsursuro manipud kadagiti padas ken pammaneknekda. Adda pay dagiti pagsayaatan no idawat kadagiti agtutubo a mangisuroda—ti panangisuro ket makatulong a mangpauneg iti kumbersionda ken mangtulong a mangbangon kadagiti natibtibker a relasion kadagiti dadduma a miembro ti klase wenno korum. Isu nga ikkanyo ida kadagiti maitutop a gundaway a mangisuro iti amin wenno paset ti adalen, ngem laglagipenyo dagiti kasapulan ken kabaelan dagiti tao iti klase wenno korumyo. Kas pagarigan, ad-adda a masansan a makaisuro dagiti nataengan a lider kadagiti korum wenno klase a kadua dagiti naub-ubing nga agtutubo wenno kadua dagiti agtutubo a nakurang pay laeng ti padasna iti panangisuro ti ebanghelio. No maawis dagiti agtutubo a mangisuro, nasken a tulongan ida nga agsagana ti maysa a nagannak wenno ti maysa a nataengan a mamalbalakad no kasapulan.

Mabalin nga usaren dagiti napusgan a mangisuro iti benneg a napauluan iti “Isuro ti Doktrina” iti tunggal balabala itoy a resource tapno mangtulong kadakuada nga agsagana. Naglaon daytoy a benneg kadagiti singasing para iti panagisuro ken panangilawlawag iti doktrina para iti dayta a lawas, ngem nasken a saan koma a marikna dagiti mannursuro a limitado dagitoy a singasing. No iturong ti Espiritu, mabalin nga ibagay dagiti mannursuro dagitoy a kapanunotan wenno usarenda ti bukodda a mangisuro iti wagas a kasayaatan a makaited kadagiti kasapulan dagiti miembro ti korum wenno klase ken tulonganda ida a makaawat ken mangyaplikar iti doktrina.

Ania dagiti Topiko a Mainaig iti Doktrina a Paglilinnawagantayonto kadagiti Mitingtayo?

Ti topiko ti balabala iti tunggal lawas ket maysa a pagbatayan a mainaig iti doktrina a napili a mainugot iti panagbasa iti Baro a Tulag a naisingasing iti dayta a lawas, a masarakan iti Umaykayo, Sumurot Kaniak—Para Kadagiti Indibidual ken Pamilia. Iti kastoy a wagas, dagiti panaglilinnawag a mainaig iti doktrina kadagiti miting ti klase wenno korum ti mangsuportanto no ania ti masursuro dagiti agtutubo iti pagtaengan.

Nupay nasken a maisuro dagiti balabala kadagiti maitudo a Domingo, mabalinyo latta ti mangisuro kadagiti sabali a topiko a mainaig iti doktrina a maibatay kadagiti kasapulan ti klase wenno korumyo.

Iraman daytoy a resource dagiti balabala para iti tunggal lawas no maangay dagiti miting iti klase ti Young Women ken ti korum ti Aaronic Priesthood. No dadduma, kasapulan a laktawanyo ti maysa nga adalen gapu iti komperensia ti stake wenno sabali pay a gapu.

Ania ti Akem dagiti Nataengan a Lidertayo?

Akmen dagiti nataengan a lideryo ti napateg a papel kadagiti klase ti Young Women ken korum ti Aaronic Priesthood. Isudanto ti mangiwanwan ken mangbalakadto kadakayo kadagiti takemyo a mangidaulo. Suportaran ken paregtaendakayonto bayat ti panangaramidyo iti trabaho iti klase wenno korumyo. Suruandakayonto iti doktrina, ken bendisionandakayonto babaen ti pagwadan, padas, ken pammaneknekda.