Nangiburay ni Maria iti nabileg a pammaneknek maipapan iti mision ti Mangisalakan (kitaen iti Lucas1:46–55). Mayannurot iti Balikasmo, ni Elspeth Young

Enero 8

Kasano a Mabendisionak dagiti Dadduma iti Pammaneknekko ken ni Jesucristo?

Mateo 1; Lucas 1

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania ti napaglilinnawagantayo itay napalabas, ken ania dagiti naaramid nga awis wenno naidutok nga aramiden? Ania ti naaramidtayo tapno agtignay kadagita nga awis wenno naidutok nga aramiden?

• Aywanan dagiti agkasapulan. Ania ti maaramid wenno maisaotayo a makatulong kadagiti mabalin a makarikna iti panagmaymaysa wenno adayo manipud iti Nailangitan nga Ama?

• Awisen ti amin nga umawat iti ebanghelio. Ania dagiti sumagmamano a wagas a pakatulongantayo kadagiti dadduma a makarikna iti ayat ni Jesucristo?

• Pagkaykaysaen dagiti pamilia para iti kinaagnanayon. Ania dagiti kapanunotan a maibinglaytayo iti tunggal maysa a makatulong a mangpapigsa kadagiti pamiliatayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Kas iti kaaduan a napudno a Judio iti panawenna, awan duadua nga agtartarigagay ni Maria iti yaay ti Mesias. Kalpasan ti panangammo manipud iti maysa nga anghel a dumanin asidegen ti panaguray—ken isunto ti agbalin nga ina ti naikari a Mannubbot—imburay ni Maria ti napintas a pammaneknek maipapan iti “Dios a Mangisalakanko.” Nairekord daytoy a pammaneknek iti Lucas 1:46–55, ken ipatpateg dagiti Kristiano iti sangalubongan. Bayat ti panagbasam kadagitoy a bersikulo, panunotem maipapan dagiti tao iti klasem wenno korummo. Kas ken ni Maria, agsagsaganada para iti yaay ni Jesucristo—iti daytoy a panawen, para iti nagloriaan a Maikadua a Yaayna. Ken kasta met ken ni Maria, mabalin nga adda nabileg nga impluensia dagiti pammaneknekda iti pammati dagiti adda iti aglawlawda.

Kasano ti rikna dagiti tao a sursuruam maipapan ken ni Jesucristo? Kasano a makabendision kadagiti dadduma dagiti pammaneknekda Kenkuana? Bayat ti panagsaganam a mangisuro, mabalinmo pay nga adalen ti 2 Nephi 25:23–26 ken ti mensahe ni Elder Neil L. Andersen “We Talk of Christ” (Liahona, Nob. 2020, 88–91).

Aggigiddan a Masursuruan

Maysa a naindaklan a wagas a mangtulong kadagiti agtutubo a mangpanunot maipapan kadagiti pammaneknekda ken ni Jesucristo ket panangamiris a sangkamaysa iti pammaneknek ni Maria iti Lucas 1:46–55. Nalabit a mabalinda nga agbibinninglay kadagiti ragup ti balikas a mangiladawan iti no ania ti pinati ken narikna ni Maria maipapan iti Mangisalakan. Ania kadagitoy a ragup ti balikas ti mangiladawan pay no kasano ti riknatayo maipapan Kenkuana? Kas pagarigan, ania dagiti gapu tapno “[agrag-o] iti Dios” dagiti espiritutayo? (bersikulo 47). Ania dagiti “naindaklan a banag” nga inaramidnan para kadatayo? (bersikulo 49). Kasano nga impakitana ti pigsana iti biagtayo? (kitaen iti bersikulo 51). Dagiti kapanunotan iti aktibidad iti baba ket mabalin a mangiturong kadagiti panagsasarita maipapan no kasano a makabendision dagiti pammaneknektayo maipapan ken ni Jesucristo.

• Makatulong ti mensahe ni Elder Neil L. Andersen “We Talk of Christ” a mangilawlawag no apay a nasken nga ad-adda a sibabatad nga isaotayo maipapan iti Mangisalakan—ken no kasano a maaramidtayo daytoy. Mabalinyo nga aggigiddan a basaen dagiti benneg ti mensahe ni Elder Anderson. Mabalin dagiti miembro ti klase wenno korum a paglilinnawaganda dagiti gapu nga intedna iti panangiburay kadagiti pammaneknektayo maipapan ken ni Jesucristo ken ti balakadna iti no kasano nga aramiden dayta. Ania dagiti masinunuo a banag a maaramidtayo itan a mangisao nga ad-adda a sibabatad maipapan ken ni Cristo?

• Kas miembro ti Ti Simbaan ni Jesucristo dagiti Santo iti Ud-udina nga Aldaw, ammotayo dagiti napapateg a kinapudno maipapan ken ni Jesucristo a mabalintayo nga ibinglay. Kasano a matulongam dagiti agtutubo a mangpanunot maipapan kadagitoy a kinapudno? Mabalinmo nga idawat kadakuada a mangadal iti “Ti Sibibiag a Cristo: Ti Pammaneknek dagiti Apostol” saggaysa wenno kada grupo, a mangsapsapul kadagiti sungbat iti saludsod nga “Ania dagiti kinapudno maipapan iti Mangisalakan nga adda naisangsangayan a kaipapananda kenka?” Awisem ida a mangibinglay kadagiti kinapudno a nasarakanda ken mangilawlawag no apay a napateg dagitoy a kinapudno kadakuada. Mabalinda nga ibinglay dagiti nasantuan a kasuratan ken dagiti bukodda a padas bayat ti panangaramidda. Kalpasanna mabalinda a paglilinnawagan no ania dagiti kinapudno maipapan iti Mangisalakan a maibinglayda iti social media, iti maysa a gayyem a mangikarkarigatan a maaddaan iti pammaneknek, wenno iti maysa a tao a saan a miembro ti Simbaantayo.

• Kas nayon iti Lucas 1:46–55, addaan dagiti nasantuan a kasuratan iti adu a dadduma pay a binatog a mabalin a mangparegta kadatayo a mangiburay no ania ti ammotayo maipapan ken ni Jesucristo. Naisingasing ti sumagmamano a pagarigan iti “Dagiti Pangsuporta a Resources.” Ibilang ti panangbasa kadagitoy a nasantuan a kasuratan. Ania ti isuroda kadatayo maipapan no kasano nga iburaytayo dagiti pammaneknektayo kadagiti dadduma maipapan ken ni Jesucristo. Ania pay ti masursurotayo manipud kadagitoy a bersikulo? Mabalin pay nga iburay dagiti miembro ti klase wenno korum dagiti banag a nasursurodan manipud kadagiti tao nga am-ammoda a siwawaya a mangiburay iti pammatida ken ni Jesucisto.

No masursurotayo nga ammuen ken ayaten ti Mangisalakan, makitatayo dagiti wagas a pangiburayantayo kadagiti pammaneknektayo maipapan Kenkuana.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ket mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mateo 5:14–16; 1 Pedro 3:15; 2 Nephi 25:26; Alma 5:43–50; Doktrina ken Katulagan 100:5–8

• Russell M. Nelson, “Let Your Faith Show” (Liahona, Mayo 2014, 29–31)

• Cristina B. Franco, “Finding Joy in Sharing the Gospel” (Liahona, Nob. 2019, 83–86)

Panangisuro iti Wagas ti Mangisalakan

Ti panagdamag kadagiti saludsod a mangallukoy kadagiti agad-adal a mangibinglay kadagiti pammaneknekda ket mabalin a nabileg a wagas a pangawisan iti Espiritu. Mabalinmo a saludsoden kas iti “Kasano a naammuanyo a sinubbot ni Jesucristo dagiti basolyo?” wenno “Kasano a nabigbigyo ti pateg ti inaramid ti Mangisalakan para kadatayo iti Getsemani?”