Sika ti Silaw ti Lubong, ni Simon Dewey

Sika ti Silaw ti Lubong, ni Simon Dewey

Enero 22

Kasano a Silaw ni Jesucristo iti Biagko?

Juan 1

icon ti panagiinnuman

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti nabiit pay a padas a nangpapigsa kadagiti pammaneknektayo?

• Aywanan dagiti agkasapulan. Asino ti agkasapulan iti tulong ken karkararagtayo? Ania ti mariknatayo a nakaawisan ti riknatayo nga aramiden a makatulong kadakuada?

• Awisen ti amin nga umawat iti ebanghelio. Kasano a makapagbalintayo a silaw kadagiti miembro ti pamilia wenno gagayyem a saantayo a kapada iti pammati?

• Pagkaykaysaen dagiti pamilia para iti kinaagnanayon. Kasano a maipakitatayo ti ad-adda pay nga ayat ken suporta para kadagiti pamiliatayo ken makaaramid iti positibo a pakaidumaan kadagiti pagtaengantayo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Linuktan ni Apostol Juan ti Ebangheliona babaen ti panangidasigna ken ni Jesucristo iti maysa a silaw nga “agraniag iti kasipngetan” (Juan 1:5). Dumakdakkel dagiti miembro ti klasem wenno korummo iti panawen ti naespirituan a kinasipnget. Ngem daytoy pay ti panawen a sidadaan ti “datdatlag a silaw” ti Mangisalakan a mangtulong kadakuada a makakita a silalawag ken masarakanda ti dalanda (1 Peter 2:9).

Bayat ti panangbasam iti Juan 1 iti daytoy a lawas, utobem no apay a kasapulan unay ti silaw ken no kasano a maysa a silaw ti Mangisalakan iti biagmo (kitaen met iti Patarus ni Joseph Smith, Juan 1:1–34 [iti Pangiwanwan iti Nasantuan a Kasuratan]). Kasano a makabendision ti silawna kadagiti sursuruam? Kasano a maparegtam ida a mangparaniag iti silawna? Tapno matulongam ida a mangutob kadagitoy a saludsod, mabalinmo nga adalen ti Doktrina ken Katulagan 88:5–13, 67; 93:2–9 ken ti mensahe ni Sister Sharon Eubank “Cristo: Ti Silaw nga Agraniag iti Kasipngetan” (Liahona, Mayo 2019, 73–76).

Aggigiddan a Masursuruan

Masansan a makatulong iti panangirugim iti pananglilinnawag babaen ti panangted iti klase wenno korum iti gundaway nga agsarita maipapan iti nasursurodan manipud iti panagadalda iti nasantuan a kasuratan. Kas pagarigan, iti daytoy a lawas mabalinmo nga idawat kadakuada a mangibinglay iti maysa a balikas wenno ragup ti balikas manipud iti Juan 1:1–17 a mangisuro kadakuada iti maysa a banag maipapan iti Mangisalakan. Bay-am nga isaritada maipapan no apay a pinilida ti balikasda wenno ragup ti balikasda ken no ania ti isuro daytoy kadakuada maipapan ken ni Jesucristo. Ibinglaymo kadakuada no kasano a maysa a silaw ni Jesucristo iti biagmo. Makatulong kenka dagiti aktibidad iti baba a mangituloy iti panangilawlawagmo.

• Tapno matulongam dagiti sursuruam a mangbigbig iti pateg iti silaw ti Mangisalakan, nalabit a mabalin nga ibinglay ti maysa a miembro ti klase wenno korum no ania ti rikna ti adda iti sipnget. Adda maysa nga estoria a makatulong iti rugi ti mensahe ni Elder Timothy J. Dyche “Light Cleaveth unto Light” (Liahona, Mayo 2021, 112–15). Apay a no dadduma mabuteng dagiti tao iti sipnget? Apay a kasapulantayo ti silaw? Apay nga inawagan ni Jesucristo ti bagina kas Silaw iti Lubong? Mabalinmo a kiddawen kadagiti agtutubo a mangadal iti mensahe ni Elder Dyche mangrugi iti “Isingasingko man a nalabit daytoy ti gundaway a saludsodenyo iti bagiyo.” Mabalinda a sapulen no ania ti maaramidantayo a mangisangbay nga ad-dda pay a naan-anay iti silaw ti Mangisalakan iti biagtayo.

• Dagiti nasantuan a kasuratan a nailista iti “Dagiti Pangsuporta a Resources” ti makatulong iti klase wenno korum a makaawat a nasaysayaat iti silaw nga idiaya ni Jesucristo. Mabalinmo a basaen ken ilawlawag ti sumagmamano nga umuna a set dagiti nasantuan a kasuratan kas maysa a klase. Kalpasanna isurat ti Kasano a maisangbaytayo ti silaw ti Mangisalakan iti biagtayo? iti pisarra, ket awisem dagiti agtutubo a mangilista kadagiti sungbat a masarakanda iti maikadua a set dagiti nasantuan a kasuratan. Mabalinmo a pagparisparisen dagiti agtutubo ket pagbibinninglayem ida no kasano a nagbalin a maysa a silaw ni Jesucristo iti biagda.

• Kinuna ni Sister Sharon Eubank, “Maysa kadagiti kangrunaan a kasapulantayo tapno dumur-as ket ti panagtalinaed a konektado iti pagtaudantayo iti lawag—ni Jesucristo” (“Cristo: Ti Silaw nga Agraniag iti Kasipngetan,” 73). Mabalinmo nga iladawan daytoy babaen iti maysa nga adalen a banag [object lesson]—nalabit a babaen ti panangipakitam iti maysa a flashlight wenno selfon [mobile device] ken panangilawlawag no apay a napateg ti pagtaudan ti bileg daytoy. Kalpasanna mabalin nga irebyu dagiti miembro ti klase wenno korum ti mensahe ni Sister Eubank, a mangsapsapul kadagiti wagas a pangpadasan ni Satanas a “mangputed iti abasto[tayo] iti bileg.” Kasano a pagtalinaedentayo ti napigsa a koneksiontayo ken ni Jesucristo? Ania a balakad ti masarakantayo iti mensahe ni Sister Eubank?

• Dagiti himno kas iti “The Lord Is My Light” ken “Lead, Kindly Light” (Hymns, nos. 89, 97) ti mangipaneknek a ni Jesucristo ti silawtayo. Ibilang ti aggigiddan a panangkanta kadagitoy (wenno dadduma pay nga ammoyo) ken panangilasin kadagiti balikas ken ragup ti balikas a mangisuro kadatayo no kasano a kasla maysa a silaw ni Jesucristo. Kasano a nangisangbay dagiti dadduma iti silaw ti Mangisalakan iti biagtayo? Kasano a maibinglaytayo ti silawna kadagiti dadduma?

Maysa a Sagut ti Silaw, ni Eva Timothy

Maysa a Sagut ti Silaw, ni Eva Timothy

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ket mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Salmo 27:1; Isaias 60:19–20; Juan 8:12; 3 Nephi 18:16, 24 (Maysa a silaw ti Mangisalakan)

• Dagiti Proverbio 4:18–19; 1 Juan 2:8–11; Doktrina ken Katulagan 50:23–24; 93:26–28; 138:20–24 (No kasano nga isangbaytayo ti silaw ti Mangisalakan iti biagtayo)

• “Patterns of Light: The Light of Christ” (video), ChurchofJesusChrist.org

Panangisuro iti Wagas ti Mangisalakan

Kabayatan ti panangikasom iti no ania ti mapaspasamak iti biag dagiti miembro ti klasem wenno korummo, masarakamto dagiti nasayaat a gundaway iti panangisuro. Dagiti masao nga aramiden dagiti agad-adal wenno dagiti saludsod a damagenda ket mabalin a mangiturong kadagiti kanito iti panangisuro.