Iti Abay ti Bubon ni Crystal Suzanne

Iti Abay ti Bubon, ni Crystal Suzanne

Pebrero 12

Kasano a Mapasayaatko ti Panagdaydayawko iti Dios?

Juan 2–4

icon ti panagiinnuman

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano nga ad-adda nga immasidegtayo iti Mangisalakan? Kasano a padpadasentayo ti agbalin nga ad-adda a kas Kenkuana?

• Aywanan dagiti agkasapulan. Asino ti adda iti panunottayo itay laeng? Kasano a matulongantayo dagitoy a tao?

• Awisen ti amin nga umawat iti ebanghelio. Kasano a masungbatantayo dagiti saludsod dagiti gagayyemtayo maipapan iti Simbaan iti wagas a mangpapigsa iti pammatida iti Mangisalakan?

• Pagkaykaysaen dagiti pamilia para iti kinaagnanayon. Ania dagiti sumagmamano a wagas a nasaysayaat a maikonektatayo kadagiti miembro a kabagyan ti pamilia, a kas kadagiti lelang ken lelong ken kasinsin?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Ti babai a taga Samaria a nailadawan iti Juan 4 nalabit a masansan a mapmapan iti bubon tapno agsakdo iti danum. Ngem maiduma daytoy a gundaway. Nasabatna ti maysa a lalaki a Judio a nagkiddaw kenkuana iti danum nga inumen. Karkarna dayta a gundaway gapu ta gagangay a saan a makilangen dagiti Judio kadagiti Samaritano. Ngem adda maysa a banag a karkarna maipapan iti daytoy a lalaki. Iti pannakariknana a nalabit a maysa Isuna a propeta, nagsaludsod Kenkuana maipapan iti panagdaydayaw iti Dios. Maaw-awat kadi ti panagrukbab iti Dios idiay Samaria? Wenno nasken kadi nga agdaydayaw dagiti tao iti Jerusalem, kas iti pinati dagiti Judio? (kitaen iti Juan 4:19–20). Inlawlawag ti lalaki a no sadino nga agdaydayawtayo saan a kas iti kapateg ti no kasano nga agdaydayawtayo: “Agdaydayawto dagiti pudno a managdaydayaw iti Ama iti espiritu ken iti kinapudno: gapu ta agsapsapul ti Ama ti kasta nga agdaydayaw kenkuana” (Juan 4:23). Kalpasanna imbaga ti lalaki kenkuana no asino Isuna—Isu ni Cristo, ti Mangisalakan ti lubong (kitaen iti Juan 4:25–26).

Maawatan kadi dagiti agtutubo no ania ti kayat a sawen ti agdaydayaw iti Nailangitan nga Ama? Kas mainayon iti panagdaydayaw iti simbaan (kitaen iti Doktrina ken Katulagan 59:9–10), ania dagiti dadduma pay a gundaway nga adda kadakuada tapno agdaydayaw Kenkuana, agraman dagiti mabalin a dida mabigbig a panagdaydayaw? Makatulong kenka dagiti sumaganad a resources nga agsagana a mangisuro kadakuada maipapan iti no kasano a mapasayaat ti panangrukbabda iti Dios: Salmo 95:1–7; Mateo 4:8–10; Alma 32:4–11; Doktrina ken Katulagan 20:17–19; 93:19–20, ken ti mensahe ni Bishop Dean M. Davies “The Blessings of Worship” (Liahona, Nob. 2016, 93–95).

Aggigiddan a Masursuruan

Tapno mangirugi iti panaglilinnawag maipapan iti panangpasayaat iti panagrukbab, mabalinmo nga awisen dagiti miembro ti klase wenno korum a saggaysa a mangrebyu iti Juan 4:19–26 ket mangisurat kadagiti sungbat kas kadagitoy: Apay nga agrubabak iti Dios? Ania ti kayat a sawen kaniak ti agrukbab iti Dios? Mabalin pay a makatulong ti aggigiddan a panangrebyu ti depinision iti babaen ti “Panagdaydayaw” iti Pangiwanwan iti Nasantuan a Kasuratan (scriptures.ChurchofJesusChrist.org). Kalpasan a naaddaanda iti gundaway a mangutob kadagitoy a saludsod, awisem ida a mangibinglay kadagiti kapanunotanda. Makatulong kadakuada dagiti sumaganad nga akttibidad nga umawat kadagiti pannignay ti Espiritu Santo.

• Addaanto dagiti miembro ti klasem wenno korummo kadagiti napapateg a nalawag a pannakaammo ken pannakaawat [insights] maipapan iti no ania ti kaipapannan ti agdaydayaw iti Dios. Mabalinmo nga idawat kadakuada a mangibinglay iti maysa a padas idi mariknada nga agdaydayawda iti Dios. Dagiti binatog iti nasantuan a kasuratan kas iti sumaganad ti mabalin a mangnayon iti pannakaawatda ken mangted kadakuada kadagiti kapanunotan maipapan no kasano nga aramidenda a napatpateg ti panagdaydayawda iti Dios: Salmo 95:1–7; Mateo 4:8–10; Alma 32:4–11; Doktrina ken Katulagan 20:17–19; 93:19–20. Mabalinda pay a paglilinnawagan ti binatog ni Elder Bruce R. McConkie iti “Dagiti Pangsuporta a Resources.”

• Tapno matulongan dagiti agtutubo a mangpasayaat ti panagdaydayawda iti Dios, ibilang ti panangisurat kadagitoy a paulo iti pisarra: Asino, Apay, Sadino, ken Kasano. Idawatmo kadakuada a mangrebyu kadagiti nasantuan a kasuratan a nailista iti “Panagdaydayaw” iti Pangiwanwan iti Nasantuan a Kasuratan (scriptures.ChurchofJesusChrist.org), nga agsapsapul kadagiti bersikulo a mangtulong kadakuada a makaawat iti asino, apay, sadino, ken no kasano ti nasken a panagdaydayawtayo. No masarakanda ti mainaig a bersikulo, awisem ida a mangilawlawag iti daytoy iti klase wenno korum ken mangisurat iti reperensia iti baba ti maitutop a paulo. Allukoyem ida a mangibinglay kadagiti padasda idi nariknada nga as-asidegda iti Dios babaen ti panagdaydayaw.

• Naglaon ti mensahe ni Bishop Dean M. Davies “The Blessings of Worship” kadagiti pagarigan dagiti tao nga agdaydayaw iti Dios. Nalabit a mabalin nga aggigiddan a basaenyo ti benneg a “What Is Worship?” Kalpasanna rebyuen ti tunggal tao ti maysa kadagiti pagwadan dagiti tao nga agdaydayaw a masarakan iti sumaruno a tallo a benneg ti mensahe. Ania ti isuro kadatayo ti tunggal pagwadan maipapan iti panagdaydayaw iti Dios? Ania ti isuro ti maudi a benneg ti mensahe maipapan kadagiti bendision a sumangbay manipud iti panagdaydayaw Kenkuana nga addaan iti kinapasnek? Ania ti naparegta nga aramidentayo a mangpasayaat iti panagdaydayaw iti Dios?

barito nga agbasbasa

Iraman ti panagdaydayaw ti panagadal iti nasantuan a kasuratan ken dadduma pay nga aramiden a mangipakita iti kinapasnek ken ayattayo iti Dios.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• “Elements of Worship,” Teachings of Presidents of the Church: David O. McKay (2003), 29–37

• Donald L. Hallstrom, “The Conversion of the Children of God” (Seminaries and Institutes of Religion broadcast, June 13, 2017), broadcasts.ChurchofJesusChrist.org

• Insuro ni Elder Bruce R. McConkie: “Buklen ti pudno ken naan-anay a panagdaydayaw iti panangsurot kadagiti addang ti Anak ti Dios; buklen daytoy ti panangtungpal kadagiti bilin ken panangtulnog iti pagayatan ti Ama iti dayta a tukad a maital-otayo manipud iti tunggal parabur agingga a maitan-oktayo ken ni Cristo kas pannakaitan-okna iti Amana. Ad-adayo nga amang nga ad-adda daytoy ngem iti kararag ken sermon ken kanta. Panagbiag ken panagaramid ken panagtulnog daytoy. Daytoy ti panangtulad iti biag ti naindaklan a Pagulidanan” (“How to Worship,” Ensign, Dis. 1971, 130; capitalization modernized).

Panangisuro iti Wagas ti Mangisalakan

Ti doktrina a masarakan kadagiti nasantuan a kasuratan ken kadagiti balikas dagiti propeta iti ud-udina nga aldaw ket addaan iti bileg a mangbalbaliw kadagiti puspuso ken mangpapigsa iti pammati. No sika ken dagiti sursuruam ket “padasenyo ti saguday ti balikas ti Dios,” matakuatamto nga addaan daytoy iti “dakkel a pigsa a mangiturong kadagiti tao nga agaramid iti maikanatad” (Alma 31:5).