Pebrero 26

Kasano a Matulongannak dagiti Pannursuro ti Mangisalakan nga Agaramid kadagiti Nalinteg a Panangeddeng?

Mateo 6–7

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook,, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti topiko nga inlawlawag ti bishopric kadagiti mitingtayo iti ward youth council? Ania ti mabalintayo nga aramiden kas maysa a klase wenno korum maibatay kadagita a panaglilinnawag?

• Aywanan dagiti agkasapulan. Kasano a makatulongtayo kadagiti tao iti wagas a kas ken ni Cristo no makitatayo ti panagkasapulan ket ditayo ammo no ania ti isaotayo?

• Awisen ti amin nga umawat iti ebanghelio. Ania ti nasarakantayo iti ebanghelio ni Jesucristo a mangisangbay kadatayo iti rag-o? Kasano a maibinglaytayo ti ayatna kadagiti dadduma?

• Pagkaykaysaen dagiti pamilia para iti kinaagnanayon. Ania ti ar-aramidentayo a mangsapul iti nagnagan dagiti kapuonantayo nga agkasapulan kadagiti ordinansa ti templo? Ania ti maaramidtayo a makatulong kadagiti dadduma a mangsapul iti nagnagan dagiti kapuonanda?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Adda maysa nga ayo iti tunggal maysa kadatayo—kas bunga ti amin a managbasol a kadawyantayo—a mangkedngan iti dadduma, no dadduma saan a nainkalintegan wenno panaginlilinteg. Ngem insuro ti Mangisalakan, “Saankayo a mangukom iti saan a nalinteg, tapno saankayo a maukom; ngem mangukomkayo iti nalinteg a panangukom”(Patarus ni Joseph Smith, Mateo 7:1 [iti Mateo 7:1, footnote a]). Utobem no kasano a makabendision daytoy a balakad kenka ken kadagiti sursuruam. Impakita ti Mangisalakan babaen iti pagwadan no ania ti kayatna a sawen ti “nalinteg a panangukom.” Kas pagarigan, ibilang no kasano a trinatona ti babai a naglabsing iti pannakiabig. Saanna a kinondena isuna, ngem saanna met a kinondena ti basolna. Imbilinna kenkuana nga “inkan, ket dika agbasolen” (Juan 8:11). Ania ti nasursuroyo maipapan iti sililinteg a panangukom manipud iti Mangisalakan?

Bayat ti panangutobmo no kasano a matulongam a maawatan dagiti agtutubo ti nalinteg a panangukom, mabalinmo nga adalen ti Mateo 7:1–2 ken ti mensahe ni Elder Lynn G. Robbins “The Righteous Judge” (Liahona, Nob. 2016, 96–98).

Aggigiddan a Masursuruan

Mabalinmo nga irugi ti pananglilinnawag maipapan iti sililinteg a panangukom babaen ti panangidawat kadagiti miembro ti klase wenno korum a mangpanunot iti maysa a panawen idi nariknada a napagbiddutan nga inukom ida dagiti dadduma. Kasano a narikna ti kastoy? Ania ti masursurotayo maipapan iti panangukom manipud kadagiti pannursuro ti Mangisalakan iti Mateo 7:1–5? (Kitaen iti Joseph Smith iti footnote 1a). Ania ti mabalin a kaipapanan ti ragup ti balikas a “nalinteg a panangukom”? Mabalinmo nga ilawlawag dagitoy a bersikulo babaen ti panangawis kadagiti miembro ti klase wenno korum a mangulit a mangisao iti tunggal bersikulo iti bukodda a balikas. Dagiti aktibidad kas iti sumaganad ti makatulong pay kadagiti sursuruam a mangukom a sililinteg.

• Ania kadagiti pannursuro ti Mangisalakan iti Mateo 6–7 ti makatulong kadatayo a “mangukom iti nalinteg a panangukom.” Tapno matulongan dagiti miembro ti klase wenno korum a mangtakuat kadagitoy a pannursuro, mabalinmo nga ikkan ti tunggal maysa kadakuada iti maysa kadagiti sumaganad a binatog nga utoben: Mateo 6:14–15; 7:3–5; 7:12; 7:15–20. Ania ti isingasing dagiti balikas ti Mangisalakan kadagitoy a bersikulo maipapan iti no ania ti kaipapanan ti mangukom a sililinteg? Ania ti masursurotayo manipud iti pagwadan ti Mangisalakan iti maipapan iti Juan 8:1–11 ken Mateo 9:10–13? Ania dagiti pagdudumaan a madlawtayo iti nagbaetan ti wagas a panangukom ti Mangisalakan kadatayo ken ti wagas a masansan a panangukomtayo iti tunggal maysa?

• Gapu ta addaantayo amin iti kinawaya nga agpili, nasken a kanayon nga agaramidtayo kadagiti pangngeddeng maipapan iti no anianto ti aramiden ken saantayo nga aramiden. Ngem kas pasurot ti Mangisalakan, ikarigatantayo a saan a mangukom wenno mangdillaw iti dadduma a tao. Tapno matulongan a maawatan dagiti agtutubo ti pagdumaan, ibinglay kadakuada ti palawag ni Presidente Dallin H. Oaks iti “Dagiti Pangsuporta a Resources.” Kas maysa a klase wenno korum, agtitinnulong a mangpanunot kadagiti pagarigan ti pananghusga iti maysa a situasion—kas iti maysa nga aktibidad, maysa a pasamak, wenno maysa a panagsasarita— imbes pananghusga iti maysa a tao a nairaman. Apay a nasaysayaat ti manghusga iti maysa a situasion imbes a ti maysa a tao? Mabalin nga addaan dagiti agtutubo iti dadduma pay a saludsod maipapan iti panangukom a sililinteg (kitaen dagiti pagarigan iti “Dagiti Pangsuporta a Resources”). Paglilinnawagan a sangkamaysa dagiti saludsodda nga us-usaren ti impormasion iti babaen ti “Dagiti Pangsuporta a Resources” a mangsarak kadagiti sungbat. Awisem dagiti agtutubo a mangibinglay no ania ti mariknada a nakaparegtaanda nga aramiden gapu iti no ania ti masursuroda.

• Iti mensahena iti sapasap a komperensia “Developing Good Judgment and Not Judging Others” (Liahona, Mayo 2010, 103–5), insarita ni Elder Gregory A. Schwitzer iti dua nga estoria—maipapan iti gayyem ni Jesus a ni Marta ken ti maysa a lalaki a tinulongan ni Elder Schwitzer. Ania ti isuro dagitoy nga estoria maipapan iti no kasano ti nasken a panangkita ken panangtrato iti dadduma? Ania dagiti pagbatayan a makatulong kadatayo nga agbalin nga ad-adda a kas ken Cristo ken mangukom a sililinteg? Dagiti video a “Looking through Windows” ken “Judging Others? Stop It!” (ChurchofJesusChrist.org) ket makaited kadagiti nayon a pannakaammo ken pannakaawat.

No masursurotayo ti agbalin nga ad-adda a kas ken Cristo, mabalintayo ti mangukom nga ad-adda a sililinteg.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Dagiti pagarigan dagiti saludsod maipapan iti panangukom iti dadduma: “Nasuruannak a pumili a nasayaat kadagiti gagayyemko. Ngem kasano a maaramidko dayta a saan a manguk-ukom kadagiti tao?” “No padasek nga agbiag iti ebanghelio, mapabasolak iti panagbalin a managhusga. Kasano a makapagbalinak a pudno iti no ania ti patiek ken maipakitak ti ayat kadagiti sumupiat?”

• 1 Samuel 16:7; Moroni 7:12–19; Doktrina ken Katulagan 11:12

• Gospel Topics, “Judging Others,” topics.ChurchofJesusChrist.org

• Insuro ni Presidente Dallin H. Oaks: “No mabalin isardengtayo ti manghusga kadagiti tao ken manghusga laeng kadagiti situasion. Napateg daytoy no gandatentayo ti agtignay iti nadumaduma a pagrukodan ngem iti dadduma a nasken a pakikaduaantayo—iti pagtaengan, iti trabaho, wenno iti komunidad. Makaituding ken makapagtignaytayo kadagiti nangato a pagrukodan para iti bagbagitayo wenno iti pagtaengantayo a saan a pabpabasolen dagiti manghushusga iti sabali a wagas” (“‘Judge Not’ and Judging,” Ensign, Ago. 1999, 11).

Panangisuro iti Wagas ti Mangisalakan

Dagiti panagkagumaam ti mangsuporta kadagiti panagkagumaan dagiti nagannak. Ibinglay kadagiti nagannak dagiti agtutubo no ania ti isursurom. Makiinnuman kadakuada tapno masursuruan maipapan dagiti kasapulan dagiti agtutubo iti klasem ken dagiti kasayaatan a wagas tapno makatulong a maipaay dagita a kasapulan.