Anak, Bumangonka, ni Simon Dewey

Marso 12

Kasano a Matulongannak ti Mangisalakan a Mangparmek kadagiti Butengko?

Mateo 9–10; Marcos 5; Lucas 9

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano a naimatangantayon ti ima ti Apo iti biagtayo?

• Aywanan dagiti agkasapulan. Kasano makapagtitinnulongtayo kadagiti banag a mapaspasarantayo?

• Awisen ti amin nga umawat iti ebanghelio. Kasano a nasaysayaat a mausartayo ti teknolohia kas maysa a ramit a mangibinglay iti ebanghelio?

• Pagkaykaysaen dagiti pamilia para iti kinaagnanayon. Ania dagiti ar-aramidentayo a mangtulong kadagiti pamiliatayo nga umasideg ken ni Jesucristo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Ti kapitulo 5 iti libro ni Marcos isuratna ti tallo a tao nga immasideg ken ni Jesus nga addaan iti amin a gapu tapno agbuteng. Ti lalaki nga addaan iti “espiritu a narugit” ket naipasango iti biag ti pannakaipupok, nga agbibiag “a magmagna nga agik-ikkis kadagiti bambantay ken kadagiti tantanem, ket dunorenna ti bagina kadagiti batbato” (Marcos 5:2, 5). Ni Jairo, maysa nga agturay ti sinagoga, nagbuteng a mapukawna ti anakna, “a nganngani matay” (Marcos 5:23). Ken ti maysa a babai nga “agsangapulo-ket-dua a tawenen nga agsagsagaba iti panagpabulos iti dara” saan a naagasan kalpasan ti panangbusbosna iti “amin a kukuana” iti biang ti “adu a mangngagas” (Marcos 5:25–26). Naidumduma ti tunggal tao a suruam ken sanguenna ti bukodna a panagbuteng. Ngem kas iti panangpaksiat ti Mangisalakan kadagiti narugit nga espiritu, panangpagungar iti natay, ken panangagas iti nakaam-amak a sakit, matulongannatayo no agbutengtayo. Adda dakkel a bileg ti balakadna ken ni Jairo iti biagtayo ita: “Dika agbuteng, mamatika laeng” (Marcos 5:36).

Tapno agsagana a mangisuro, ibilang ti panangadal iti mensahe ni Elder Ronald A. Rasband “Be Not Troubled” (Liahona, Nob. 2018, 18–21) ken ti mensahe ni Sister Lisa L. Harkness “Peace, Be Still” (Liahona, Nob. 2020, 80–82).

Aggigiddan a Masursuruan

Mabalinmo nga awisen ti maysa a miembro ti klase wenno korum a manggupgop iti estoria iti Marcos 5 maipapan iti panangawis ni Jesus ken ni Jairo a “saan nga agbuteng” (kitaen dagiti bersikulo 22–24, 35–43), wenno mabalinyo nga irebyu ti estoria kas grupo. Mabalinmo nga aramiden ti kasta met laeng iti dadduma pay nga estoria iti daytoy a kapitulo—ti lalaki nga addaan iti narugit nga espiritu ken ti babai nga agpabulos iti dara. Kasano a maipada dagitoy nakabutbuteng a kasasaad kadagitay mabalin a pakaipasanguantayo iti biagtayo? Ania ti masursurotayo manipud kadagitoy nga estoria maipapan iti Mangisalakan ken kasano nga agkiddaw iti tulongna? Makatulong dagiti sumaganad nga aktibidad kadagiti agtutubo a mangpadakkel iti pammatida ken ni Jesucristo ken mangsursuro a mangsurot iti balakadna: “Saanka nga agbuteng, mamatika laeng” (Marcos 5:36).

• Dagiti awis ti Apo a saan nga agbuteng, naulit iti intero a nasantuan a kasuratan, mangparaburto kadagiti agtutubo no saanda nga agbuteng. Awisem ida a mangbasa kadagiti nasantuan a kasuratan iti “Dagiti Pangsuporta a Resources” ket mangaramid iti poster a maidisplayda iti pagtaengan—wenno digital poster a maibinglayda iti online—batay iti nasantuan a kasuratan a nabasada. Bayat ti panangibinglayda iti inaramidda iti tunggal maysa, awisem ida a mangibinglay pay iti nasursuroda a makatulong kadakuada no agbutengda. Kaano a tulongannatayo ti Mangisalakan kabayatan ti oras ti panagbuteng?

• Ibilang ti panangipakita iti maysa a ladawan ti Mangisalakan a mangpatpatalna iti bagyo, kas iti maysa iti digital a bersion ti mensahe ni Sister Lisa L. Harkness a “Peace, Be Still” (kitaen met iti Libro ti Arte ti Ebanghelio [2009], no. 40). Kalpasanna mabalinmo wenno ti maysa a tao nga ibinglay ti pakaammuan ti Mangisalakan a mangpatpatalna iti bagyo manipud iti Marcos 4:35–41 wenno iti mensahe ni Sister Harkness. Kasano a maipadatayo no dadduma kadagiti adda iti daong? Ania ti masursurotayo manipud itoy nga estoria maipanggep iti no kasano a matulongannatayo ti Mangisalakan no agbutengtayo? Awisem dagiti agtutubo a mangrebyu iti mensahe ni Sister Harkness, a mangsapsapul kadagiti ragup ti balikas ken binatog a mangtulong kadakuada a maaddaan iti dakdakkel a pammati ken ni Jesucristo. Mabalinda nga ilista dagitoy iti pisarra. Kasano a makatulong ti pammatitayo iti Mangisalakan no saanna a pagayatan ti mangpatalna kadagiti bagyo iti biagtayo?

• Sumagmamano a himno ti mangdaydayaw iti Mangisalakan para iti panangliwliwa ken pigsana iti panawen ti karit ken panagduadua, kas iti “I Need Thee Every Hour” wenno “Abide with Me!” (Hymns, nos. 98, 166). Nalabit a mabalinyo a kantaen wenno basaen ti sumagmamano kadagitoy nga aggigiddan, a mangsapsapul iti no kasano a matulongannatayo ti Mangisalakan.

• Gagangay ti panagbuteng wenno panagdanag no maipasangotayo kadagiti karit ti biag. Para iti dadduma, mabalin a makapakapuy dagitoy a rikna. Mabalin a mairanud ti klasem wenno korummo manipud iti panaglilinnawag maipapan iti no kasano a makatulong ti Mangisalakan kadagiti agkarkarigatan iti agduduma a lebel ti panagdanag. Mabalin nga aggigiddan nga irebyu dagiti miembro ti klase wenno korum ti mensahe ni Elder Ronald A. Rasband a “Be Not Troubled” wenno ti mensahe ni Elder Erich W. Kopischke a “Addressing Mental Health” (Liahona, Nob. 2021, 36–38), a mangsapsapul kadagiti kinapudno a napateg kadakuada ken panangibinglay no ania ti masarakanda. Allukoyem dagiti agtutubo a makisarita iti maysa a mapagtalkan a nagannak wenno lider wenno bisitaen ti MentalHealth.ChurchofJesusChrist.org no kasapulanda ti tulong.

Inkari ti Mangisalakan a tulongannatayo no umasidegtayo kenkuana iti oras ti panagbuteng ken panagduadua.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Josue 1:9; Salmo 56:3–4; Isaias 41:10; Juan 14:27; 2 Timoteo 1:7; Doktrina ken Katulagan 50:41–44; 68:6

Panangisuro iti Wagas ti Mangisalakan

No mangisuroka, imbes a mangiburay laeng iti impormasion, tulongam dagiti agtutubo a mangtakuat kadagiti kinapudno ti ebanghelio para iti bagbagida kadagiti nasantuan a kasuratan ken balikas dagiti propeta.