eb’ li saaj winq neke’ril li loq’laj hu

Chan ru roksinkil Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq

K’a’ru aj-e li ch’utlaak sa’ tzoleb’aal malaj sa’ molam?

Kanab’anb’il eere jun loq’laj k’anjel xb’aan li Qaawa’: A’an xk’e lee b’oqb’al chi k’anjelak sa’ jun awa’b’ejil re xtzoleb’aaleb’ li Saaj Ixq malaj jun awa’b’ejil re jun molam sa’ li Tijonelil re Aaron. Jun xraqal lee k’anjel, a’an xjolominkil li ch’utam sa’ lee tzoleb’aal malaj lee molam. Re xb’aanunkil a’in, aajel ru xtawb’al ru k’a’ru aj-e li ch’utam.

Moko juntaq’eet ta li ch’utam a’in rik’in jalaneb’ li ch’utam sa’ li Iglees, jo’ li Dominkil Tzoleb’aal malaj li seminario. Sa’ li qatzoleb’aal malaj li qamolam, noko’aatinak b’an chirix li k’anjel k’eeb’il qe xb’aan li Dios, ut naqak’uub’eb’ li komon re taqab’aanu li k’anjel a’an sa’ li qochoch, li Iglees, malaj li qatenamit. Sa’eb’ li ch’utam a’in ink’a’ yal noko’aatinak chirix li k’anjel—naqak’uub’ b’an qana’leb’ chixb’aanunkil li qak’anjel sa’ li teep chi saaj re li Qaawa’, jo’ xch’utub’ankil Israel.

eb’ li saaj ixq sa’ li tzoleb’aal

Sa’eb’ li ch’utam a’in naqak’uub’ qana’leb’ chixb’aanunkil li qak’anjel sa’ li teep chi saaj re li Qaawa’.

A’b’an ink’a’ naqakanab’ li tzolok ka’ajwi’ choq’ re li Dominkil Tzoleb’aal. Relik chi yaal, jwal aajel ru xtzolb’al li evangelio sa’ li ch’utam a’in, xb’aan naq nokoxtenq’a chixkawob’resinkil li qakomonil rik’in li Jesukristo, chixtawb’al ru lix k’uub’anb’il na’leb’ li qaChoxahil Yuwa’, ut chi tz’aqonk sa’ lix k’anjeleb’. Naq naqatzol li evangelio sa’ komonil, li na’leb’ naqatzol naru tixjal qach’ool ut tooxtenq’a chi wank jo’ li Kristo sa’ chixjunil li naqab’aanu. Naru taqanaw sa’ musiq’ej chan ru took’iiq “rik’in qana’leb’ ut rik’in qateram, sa’ chaab’ilal chiru Dios ut chiruheb’ li winq” (Lukas 2:52). Naq najala li qach’ool choq’ re li Jesukristo ut lix evangelio, taasaho’q qach’ool ut taqaj xtenq’ankileb’ li qas qiitz’in sa’ xb’ehil li sumwank.

Ani najolomink reheb’ li ch’utam a’in?

Li Dios xexxb’oq jo’ awa’b’ejil ut xk’e lee wankilal chi jolomink. Jo’kan naq chixjunileb’ li ch’utam tento te’jolomiiq xb’aan jun xkomon li awa’b’ejil. Eb’ li ninq te’xk’e lee tenq’ankil, a’b’an ink’a’ raj te’xb’aanu eeruuchil. Sa’ xtiklajik chixjunileb’ li tzolok sa’ li hu a’in, wan jun aatin choq’ re “K’uub’ank na’leb’ sa’ komonil.” Teeril li aatin a’an re teenaw k’a’ru aj-e junaq li ch’utam ut chan ru xb’eresinkil. Teek’uub’ li ch’utam a’an naq wankex sa’ xch’utam li awa’b’ejil.

Ani taak’utuq?

Jun jolominel li saaj malaj ninq, malaj yalaq saaj komon re li tzoleb’aal naru taak’utuq. Jo’ jun li saaj awa’b’ejil, aatinanqex rik’ineb’ li ninq aj jolominel chirix li ani taab’oqe’q chi k’utuk. Chijultiko’q eere naq li ninq aj jolominel wankeb’ naab’al xseeb’al. Sik’omaq eetzolb’al rik’ineb’. Chaab’il ajwi’ naq eb’ li saaj neke’xb’aanu li k’utuk—li k’utuk naru tixjal xch’ooleb’ ut tixtenq’a xkomonileb’ chirib’ileb’ rib’. Chekanab’eb’ chi k’utuk, a’ut tz’ilomaq rix b’ar wan lix seeb’aleb’ ut k’a’ru na’ajman choq’ reheb’ li ani te’tz’aqonq. Wi ta jwal saajeb’ li saaj malaj jwal ak’eb’ sa’ xk’utb’al li evangelio, maare li ninq aj jolominel te’xb’aanu raj xk’ihal li k’utuk. Naq nab’oqe’ jun li saaj chi k’utuk, lix na’ xyuwa’ malaj jun li ninq aj komon tixtenq’a raj chixkawresinkil rib’.

Laj k’utunel naru tixkawresi rib’ rik’in rilb’al li aatin “Xk’utb’al li tzol’leb’ ” sa’ xtiklajik li junjunq tzolok. Aran wan li na’leb’ choq’ re xb’aanunkil li k’utuk, a’b’an ink’a’ tento naq laj k’utunel taaroksi junes li na’leb’ a’an. Jo’ b’eresinb’il xb’aan li Musiq’ej, laj k’utunel naru tixch’olob’ li tzol’leb’ a’ yaal jo’ chanru taatawmanq ru ut taayu’amimanq sa’ xyu’ameb’ li komon.

K’a’ru na’leb’ too’aatinaq wi’ sa’ li qach’utam?

Li na’leb’ sa’ xtiklajik li tusleb’ aatin naxk’am rib’ rik’in li aatin natzolman chiru li xamaan sa’ li Ak’ Chaq’rab’, li wan resil sa’ Kim, Taaqehin—Choq’ reheb’ li komon ut li junkab’al. Jo’kan naq li aatinak sa’ ch’utam tixtenq’a li tzolok sa’ li ochoch.

Us ta yeeb’il xkutankil li junjunq na’leb’, toj naru tex’aatinaq chirix jalan chik li na’leb’ jo’ na’ajman choq’ reheb’ li saaj.

Li hu a’in naxk’e li na’leb’ choq’ re chixjunileb’ li domingo naq te’ch’utlaaq li saaj. Wan naq taasachq jun li tzolok xb’aan naq taawanq li ch’utub’aj-ib’ re oqech, malaj k’a’aq chik re ru.

K’a’ru xk’anjeleb’ li ninq aj jolominel?

Aajel ru xk’anjeleb’ li ninq aj jolominel sa’ xtzoleb’aaleb’ li Saaj Ixq ut sa’ xmolameb’ li Tijonelil re Aaron. Te’xk’e eeb’eresinkil ut eena’leb’ chirix lee b’oqb’al jo’ jolominel. Te’xk’e eetenq’ ut te’xwaklesi eech’ool naq nekeb’aanu li k’anjel sa’ lee tzoleb’aal malaj molam. Te’xk’ut li tzol’leb’ cheru, ut tex’osob’tesiiq xb’aan rilb’aleb’ lix b’aanuhom, lix yu’am, ut xnawom lix ch’ool.