Jo’ chanru laa waatin, xb’aan li xElspeth Young

Kaw lix nawom li xMaria li kixk’e chirix lix k’anjel li Kolonel (chi’ilmanq Lukas 1:46–55). Jo’ chanru laa waatin, xb’aan li xElspeth Young

8 enero

Chan ru tinwosob’tesiheb’ li was wiitz’in rik’in xnawom inch’ool chirix li Jesukristo

Mateo 1; Lukas 1

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?

• Rilb’aleb’ li wankeb’ sa’ rajb’al ru. K’a’ru naru taqaye malaj taqab’aanu re xtenq’ankileb’ li neke’reek’a naq xjunes wankeb’ malaj naq najt wan li qaChoxahil Yuwa’?

• Xb’oqb’aleb’ chixjunil chixk’ulb’al li evangelio. K’a’ru naru taqab’aanu re xtenq’ankileb’ li qas qiitz’in chireek’ankil lix rahom li Jesukristo?

• Xjunajinkileb’ li junkab’al chi junelik. Kʼaʼru chi naʼlebʼ naru taqawotz chiqibʼil qibʼ re xkawob’resinkileb’ li qajunkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Jo’ li rech aj paab’anel aj Judio sa’ xkutankil, yaal naq li xMaria yoo ajwi’ chiroyb’eninkil lix k’ulunik li Mesias. Chirix xnawb’al rik’in jun li anjel naq moko najt ta chik taaroyb’eni—ut naq a’an taawanq jo’ xna’ li yeechi’inb’il Mesias—li xMaria kixwotz xchaq’al ru xnawom chirix “li Dios laj Kolol we.” Lix nawom xch’ool tz’iib’anb’il sa’ Lukas 1:46–55, ut raab’il li aatin a’an xb’aaneb’ laj Kristiano chiru li ruchich’och’. Naq nakawileb’ li raqal a’an, k’oxlaheb’ li saaj sa’ laa tzoleb’aal malaj molam. Eb’ a’an, jo’ xMaria, yookeb’ chixkawresinkil rib’ choq’ re xk’ulunik li Jesukristo—anajwan, li xkab’ xk’ulunik. Ut jo’ xMaria, lix nawomeb’ xch’ool a’an naru tixnimob’resi lix paab’aaleb’ li ras riitz’ineb’.

K’a’ru neke’reek’a li saaj chirix li Jesukristo? Chan ru naq lix nawomeb’ xch’ool truuq tixtenq’aheb’ li ras riitz’ineb’? Naq nakakawresi li tzolok, naru ajwi’ taawil 2 Nefi 25:23–26 ut li raatin li Elder Neil L. Andersen, “Noko’aatinak chirix li Kristo” (Jolomil ch’utub’aj-ib’ re octubre 2020).

Tzolok sa’ komonil

Re xtenq’ankileb’ li saaj chixk’oxlankil xnawomeb’ xch’ool chirix li Jesukristo, naru teetz’il rix lix nawom xch’ool li xMaria sa’ Lukas 1:46–55. Maare te’raj xwotzb’al chirib’ileb’ rib’ jalan chik aatin naxch’olob’ li kixpaab’ ut kireek’a li xMaria chirix li Kolonel. B’ar wan reheb’ li aatin a’an li naqeek’a ajwi’ laa’o chirix a’an? Jo’ eetalil, k’a’ru naxk’e li qaam chi “saho’k rik’in li Dios”? (raqal 47). K’a’ruheb’ li “sachb’a-ch’oolej” xb’aanuhom choq’ qe? (raqal 49). Chan ru naq xk’utb’esihom lix wankilal sa’ li qayu’am? (chi’ilmanq li raqal 51). Naru xb’aanunkileb’ li na’leb’ a’in re xtz’ilb’al rix chan ru naq lix nawom qach’ool chirix li Kristo naru tixtenq’aheb’ li qas qiitz’in.

• Li raatin li Elder Neil L. Andersen, “Noko’aatinak chirix li Kristo” naxch’olob’ k’a’ut naq tento too’aatinaq chi k’utk’u chirix li Kolonel—ut chan ru taqab’aanu. Naru teeril wiib’ oxib’ raqal re li raatin li Elder Andersen sa’ komonil. Eb’ li saaj naru te’xtz’il rix k’a’ut naq naqawotz lix nawom qach’ool chirix li Jesukristo ut chan ru taqab’aanu, jo’ kixye li Elder Andersen. K’a’ru naru taqab’aanu re aatinak chi k’utk’u chirix li Kristo?

• Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, naqanaw xninqal ru na’leb’ chirix li Jesukristo li naru naqawotz. Chan ru taatenq’aheb’ li saaj chixk’oxlankileb’ li na’leb’ a’an? Naru taapatz’ reheb’ naq te’ril “Li Yo’yookil Kristo: Lix Ch’olob’ahomeb’ li Apostol” chi junjunqal malaj sa’ kok’ ch’uut, ut naq te’xsik xsumenkil li patz’om “K’a’ruheb’ li na’leb’ chirix li Kolonel li jwal neke’wulak chawu?” Patz’ reheb’ naq te’xwotz li na’leb’ xe’xtaw ut naq te’xye k’a’ut naq nawulak chiruheb’. Naru te’xwotz li raqal re li loq’laj hu ut xnumsihomeb’ a’an naq neke’wotzok. Chirix a’an naru te’xsik’ li na’leb’ chirix li Kolonel naru te’xwotz sa’ internet, rik’in jun ramiiw li nach’a’ajko’ rik’in xpaab’aal, malaj rik’in jun kristiaan moko komon ta sa’ li Iglees.

• Rochb’een Lukas 1:46–55, wankeb’ chik li raqal sa’ li loq’laj hu li naru toohe’xmusiq’a chixwotzb’al li qanawom chirix li Jesukristo. Naru xtawb’al wiib’ oxib’ reheb’ sa’ “Xkomon chik li tenq’.” Naru teerileb’ li raqal a’an sa’ komonil. K’a’ru neke’xk’ut chiqu chirix xwotzb’al lix nawom qach’ool chirix li Jesukristo rik’ineb’ li qas qiitz’in? K’a’ru naqatzol sa’eb’ li raqal a’an? Eb’ li saaj naru ajwi’ te’xwotz li na’leb’ neke’xtzol rik’ineb’ li kristiaan li neke’xwotz lix paab’aaleb’ chirix li Jesukristo.

eb’ li saaj ixq neke’ril li loq’laj hu

Naq naqatzol xnawb’al ut xraab’al li Kolonel, naqataw chan ru xwotzb’al lix nawom qach’ool chirix a’an.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi lix wanjikeb’ rik’in li qaChoxahil Yuwa’ ut li Jesukristo.

Xkomon chik li tenq’

• Mateo 5:14–16; 1 Pedro 3:15; 2 Nefi 25:26; Alma 5:43–50; Tzol’leb’ ut Sumwank 100:5–8

• Russell M. Nelson, “K’utb’esihomaq lee paab’aal” (Jolomil ch’utub’aj-ib’ re abril 2014)

• Cristina B. Franco, “Xtawb’al li sahil ch’oolejil sa’ xwotzb’al li evangelio” (Jolomil ch’utub’aj-ib’ re octubre 2019)

Li k’utuk jo’ li Kolonel

Roksinb’ileb’ patz’om li tixk’eheb’ laj tzolonel chixwotzb’al xnawomeb’ xch’ool naru tixb’oq chaq li Musiq’ej. Naru taapatz’ “Chan ru naq xanaw naq li Jesukristo kixtoj rix laa maak?” malaj “K’a’ut naq nakab’antioxi li kixb’aanu li Kolonel choq’ qe sa’ Getsemani?”