“22 enero. Chan ru naq li Jesukristo nawan jo’ jun saqen sa’ lin yu’am? Jwan 1,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“22 enero. Chan ru naq li Jesukristo nawan jo’ jun saqen sa’ lin yu’am?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
Laa’ex lix kutan li ruchich’och’, xb’aan laj Simon Dewey
22 enero
Chan ru naq li Jesukristo nawan jo’ jun saqen sa’ lin yu’am?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. K’a’ru toje’ xqanumsi li xkawob’resi lix nawom qach’ool?
-
Rilb’aleb’ li wankeb’ sa’ rajb’al ru. Ani taaraj ru qatenq’ ut qatij? K’a’ru naqeek’a naq tento taqab’aanu choq’ reheb’?
-
Xb’oqb’aleb’ chixjunil chixk’ulb’al li evangelio. Chan ru naq toowanq jo’ saqen chiruheb’ li qakomon ut li qamiiw li ink’a’ neke’xpaab’ li naqapaab’ laa’o?
-
Xjunajinkileb’ li junkab’al chi junelik. K’a’ru taqab’aanu re xk’utb’al xkomon chik li rahok ut li tenq’ choq’ re li qajunkab’al ut re xb’aanunkil li us sa’ li qochoch?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Li apostol aj Jwan kixtikib’ lix hu rik’in xjuntaq’eetankil li Jesukristo rik’in jun li saqen “nalemtz’unk sa’ li aak’ab’ ” (Jwan 1:5). Eb’ li saaj sa’ laa tzoleb’aal yookeb’ chi k’iik sa’ xq’ehil li musiq’ejil aak’ab’. A’b’an, a’an ajwi’ xq’ehil naq “li xchaq’alil ru saqenk” re li Kolonel naru tixkutanob’resi ut tixk’ameb’ xb’e (1 Pedro 2:9).
Naq nakawil Jwan 1 chiru li xamaan a’in, k’oxla k’a’ut naq jwal aajel ru li saqen ut chan ru naq li Kolonel a’an jun saqen sa’ laa yu’am (chi’ilmanq ajwi’ JJS, Jwan 1:1–34 [sa’ xraqik li roxichal li loq’laj hu]). Chan raj ru naq li saqen a’in truuq taarosob’tesiheb’ li saaj nakatzol? Chan ru taatenq’aheb’ chi b’eek sa’ xsaqen? Re taatz’ileb’ rix li patz’om a’in, naru taawil Tzol’leb’ ut Sumwank 88:5–13, 67; 93:2–9 ut li raatin li Hermana Sharon Eubank, “Li Kristo: Li saqen li nalemtz’un sa’ q’ojyin” (Jolomil ch’utub’aj-ib’ re abril 2019).
Tzolok sa’ komonil
Naq maji’ nekex’ok chi tzolok, us naq taak’e xhoonaleb’ li saaj chi aatinak chirix li yookeb’ chixtzolb’al sa’ xtz’ilb’aleb’ rix li loq’laj hu. Sa’ li tzolok a’in, naru taapatz’ reheb’ naq te’xye jun aatin malaj ch’ol aatin re Jwan 1:1–17 li naxk’ut chiruheb’ jun na’leb’ chirix li Kolonel. Kanab’eb’ chixyeeb’al k’a’ut naq xe’xsik’ ru li aatin a’an, ut k’a’ru naxk’ut chiruheb’ chirix li Jesukristo. Wotz rik’ineb’ chan ru naq li Jesukristo a’an jun saqen sa’ laa yu’am. Naru xb’aanunkileb’ li na’leb’ a’in re eetenq’ankil chi tzolok.
-
Re xtenq’ankileb’ li saaj chixb’antioxinkil lix saqenkil li Kolonel, jun reheb’ naru tixch’olob’ chan ru li wank sa’ aak’ab’. Wan jun li seraq’ naru natenq’an sa’ xtiklajik li raatin li Elder Timothy J. Dyches, “Li saqen najilok rik’in li saqen” (Jolomil ch’utub’aj-ib’ re abril 2021). K’a’ut naq wankeb’ li neke’xuwak sa’ li aak’ab’? K’a’ut naq naqaj ru li saqen? K’a’ut naq li Jesukristo naxk’ab’a’in li Xsaqen li Ruchich’och’? Naru taapatz’ reheb’ li saaj naq te’xtz’il rix li raatin li Elder Dyches, ut naq te’xtikib’ b’ar wi’ naxye, “Maare us taqapatz’ qib’.” Naru te’xsik’ li naru naqab’aanu re xb’oqb’al xkomon chik lix saqen li Kolonel sa’ li qayu’am.
-
Eb’ li raqal re li loq’laj hu sa’ “Xkomoneb’ chik li tenq’ ” naru te’xtenq’aheb’ li saaj chixtawb’al ru li saqen naxyeechi’i li Jesukristo. Naru teeril ut teetz’il rix junjunq reheb’ li raqal a’an sa’ komonil. Chirix a’an, tz’iib’a Chan ru taqab’oq lix saqen li Kolonel sa’ li qayu’am? chiru li pizarron, ut patz’ reheb’ li saaj naq te’xtz’iib’a xsumenkil li patz’om a’an li neke’xtaw sa’eb’ li raqal maji’ xeril. Naru taapatz’ reheb’ li saaj naq sa’ ka’kab’il te’xwotz chirib’ileb’ rib’ chan ru naq li Jesukristo wanjenaq choq’ saqen sa’ xyu’ameb’.
-
Li Hermana Eubank kixye, “Jun li na’leb’ aajel ru re naq naru took’iiq, a’an xjunajinkil qib’ rik’in lix yo’leb’aal li saqen—li Jesukristo” (“Li Kristo: Li saqen li nalemtz’un sa’ q’ojyin”). Naru taak’ut li na’leb’ a’in chi jo’ka’in—k’ut jun li pook malaj celular, ut ch’olob’ k’a’ut naq jwal aajel ru lix lochleb’. Toja’ naq li saaj naru te’ril li raatin li Hermana Eubank, ut te’xtaw k’a’ru naxb’aanu laj Satanas re “xpo’b’al li qalochleb’.” Chan ru tookanaaq chi junajinb’il rik’in li Jesukristo? K’a’ru li chaab’il na’leb’ naqataw sa’ li raatin li Hermana Eubank?
-
Eb’ li b’ich “Laa’at lin saqen” ut “Chaab’il saqen” (Eb’ li B’ich, 47, 52) neke’xch’olob’ xyaalal naq li Jesukristo a’an li qasaqen. Naru teeb’ichaheb’ a’an (malaj jalan chik li b’ich) ut teek’e reetaleb’ li aatin li neke’xk’ut chiqu chan ru naq li Jesukristo chanchan li saqen. Ma wankeb’ li kristiaan xe’xk’am chaq lix saqen li Kolonel sa’ li qayu’am? Chan ru naq naru naqawotz lix saqen rik’ineb’ li qas qiitz’in?
Jun maatan re saqen, xb’aan li xEva Timothy
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Salmos 27:1; Isaias 60:19–20; Jwan 8:12; 3 Nefi 18:16, 24 (Li Kolonel a’an jun saqen)
-
Proverbios 4:18–19; 1 Jwan 2:8–11; Tzol’leb’ ut Sumwank 50:23–24; 93:26–28; 138:20–24 (Chan ru naq naqab’oq lix saqen li Kolonel sa’ li qayu’am)
-
“Modelos de luz: La luz de Cristo” (video), ChurchofJesusChrist.org
Li k’utuk jo’ li Kolonel
Naq nakak’e reetal li yoo chi uxmank sa’ xyu’ameb’ li saaj, taataweb’ li hoonal q’axal chaab’il re k’utuk. Li raatineb’ malaj xpatz’omeb’ li saaj naru neke’oksiman choq’ hoonal re k’utuk.