Chire li yo’leb’aal ha’, xb’aan li xCrystal Suzanne

Chire li yo’leb’aal ha’, xb’aan li xCrystal Suzanne

12 febrero

Chan ru tinchaab’ilob’resi wib’ sa’ xloq’oninkil li Dios?

Jwan 2–4

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq xoonacho’ rik’in li Kolonel? K’a’ru yooko chixb’aanunkil re wank jo’ a’an?

• Rilb’aleb’ li wankeb’ sa’ rajb’al ru. Ani wan sa’ qak’a’uxl? Chan ru naq taqatenq’a?

• Xb’oqb’aleb’ chixjunil chixk’ulb’al li evangelio. Chan ru naq taqasume lix patz’omeb’ li qamiiw chirix li Iglees re naq taakawob’resiiq xpaab’aaleb’ chirix li Kolonel?

• Xjunajinkileb’ li junkab’al chi junelik. K’a’ru naru taqab’aanu re aatinak chi kok’ aj xsa’ rik’in li qajunkab’al ut li qech alal?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Maare li ixq aj Samaria sa’ Jwan 4 rajlal xwulak sa’ li yo’leb’aal ha’ re xxokb’al li ha’. A’b’an jalan li kixk’ul sa’ li jun kutan a’in. Kixnaw ru jun winq aj Judio li xpatz’ ruk’a. Ink’a’ jwal nak’ulman a’an, xb’aan naq eb’ laj Judio ink’a’ neke’raatinaheb’ laj Samaria. A’b’an, kiwan xkomon xjalanil li winq a’in. Li ixq kixk’e reetal naq a’an tana profeet, jo’kan naq kixpatz’ xna’leb’ chirix xloq’oninkil li Dios. Ma us xloq’oninkil li Dios aran Samaria? Ma ka’ajwi’ naru xloq’oninkil aran Jerusalen, jo’ ke’xye laj Judio? (chi’ilmanq Jwan 4:19–20). Li winq kixch’olob’ naq maak’a’ reek’ b’ar nokoloq’onin, aajel b’an ru chan ru nokoloq’onin; “Eb’ li tz’aqal aj loq’oninel te’xloq’oni ru li Yuwa’b’ej sa’ musiq’ej ut rik’in li yaal, xb’aan naq jo’ka’in naraj li Yuwa’b’ej naq taaloq’oniiq ru” (Jwan 4:23). Toja’ naq kixye re li ixq ani a’an—a’an li Kristo, laj Kolol re li ruchich’och’ (chi’ilmanq Jwan 4:25–26).

Ma neke’xtaw ru li saaj k’a’ru naraj naxye xloq’oninkil li qaChoxahil Yuwa’? Rochb’een li loq’onink sa’ iglees (chi’ilmanq Tzol’leb’ ut Sumwank 59:9–10), jo’q’e chik naru neke’xloq’oni a’an, jo’ ajwi’ hoonal maare ink’a’ neke’ril jo’ xhoonalil li loq’onink? Eb’ li raqal a’in naru tate’xtenq’a chixkawresinkil aawib’ re truuq taatzoleb’ chirix xchaab’ilob’resinkileb’ rib’ sa’ xloq’oninkil li Dios: Salmos 95:1–7; Mateo 4:8–10; Alma 32:4–11; Tzol’leb’ ut Sumwank 20:17–19; 93:19–20, ut li raatin li obiisp aj Dean M. Davies, “Eb’ li osob’tesink re li loq’onink” (Jolomil ch’utub’aj-ib’ re octubre 2016).

Tzolok sa’ komonil

Re aatinak chirix xchaab’ilob’resinkil li loq’onink, naru taapatz’ reheb’ li saaj naq te’ril chi ch’anch’o Jwan 4:19–26 ut te’xtz’iib’a xsumenkileb’ li patz’om jo’eb’ a’in: K’a’ut naq ninloq’oni li Dios? K’a’ru naraj naxye choq’ we xloq’oninkil li Dios? Naru ajwi’ teetz’il rix li yeeb’il sa’ “Loq’onink” sa’ li K’utul Raqal reheb’ li Loq’laj Hu. Chirix xk’eeb’al xhoonaleb’ chixtz’ilb’aleb’ rix li patz’om a’an, patz’ reheb’ naq te’xwotz xk’oxlahomeb’. Xb’aanunkileb’ li na’leb’ a’in naru tixtenq’aheb’ chixk’ulb’al xna’leb’ rik’in li Santil Musiq’ej.

• Chaab’ileb’ xna’leb’ li saaj chirix xloq’oninkil li Dios. Naru taapatz’ reheb’ naq te’xseraq’i jo’q’e xe’reek’a naq yookeb’ chixloq’onkil li Dios. Eb’ li raqal a’in re li loq’laj hu naru tixnimob’resi xnawomeb’ ut tixk’e xna’leb’eb’ chirix xloq’oninkil li Dios chi chaab’il: Salmos 95:1–7; Mateo 4:8–10; Alma 32:4–11; Tzol’leb’ ut Sumwank 20:17–19; 93:19–20. Naru ajwi’ te’aatinaq chirix li raatin li Elder Bruce R. McConkie sa’ “Xkomon chik li tenq’.”

• Re xtenq’ankileb’ li saaj sa’ xloq’oninkil li Dios, naru taatz’iib’aheb’ li aatin a’in chiru li pizarron: Ani, K’a’ut, B’ar, ut Chan ru. Patz’ reheb’ naq te’rileb’ li raqal re li loq’laj hu wankeb’ sa’ “Loq’onink” sa’ li K’utul Raqal reheb’ li Loq’laj Hu, ut te’xsik’ li na’leb’ naxtenq’aheb’ chixtawb’al ru ani naqaloq’oni, jo’ ajwi’ b’ar, k’a’ut, ut chan ru naqab’aanu. Naq te’xtaw jun raqal, patz’ reheb’ naq te’xtz’il rix sa’ komonil, ut te’xtz’iib’a li raqal rub’eleb’ li aatin chiru li pizarron. Patz’ reheb’ naq te’xseraq’i jo’q’e nach’ xe’reek’a rik’in li Dios, b’antiox re li loq’onink.

• Sa’ li raatin li obiisp aj Dean M. Davies, “Eb’ li osob’tesink re li loq’onink,” wankeb’ seraq’ chirixeb’ li neke’xloq’oni li Dios. Maare naru teeril li raqal “K’a’ru li loq’onink?” Chirix a’an, li junjunq naru tixtz’il rix jun reheb’ li seraq’ chirixeb’ laj loq’oninel sa’ li oxib’ raqal neke’chal chirix li jun a’in. K’a’ru neke’xk’ut li seraq’ chiqu chirix xloq’oninkil li Dios? K’a’ru naxye lix raqikil raqal re li raatin chirix li noko’osob’tesiik wi’ naq naqaloq’oni a’an chi anchal qach’ool? K’a’ru eek’asinb’ilo chixb’aanunkil re xchaab’ilob’resinkil qib’ sa’ xloq’oninkil li Dios?

jun saaj winq na’ilok ru hu

Jo’ xcha’al li loq’onink wan li xtzolb’aleb’ li loq’laj hu ut xkomon chik li k’anjel li neke’xk’ut li qaloq’onihom ut li qarahom choq’ re li Dios.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• “Los elementos de la adoración,” Ensenañzas de los Presidentes de la Iglesia: David O. McKay (2003), 32–42

• Donald L. Hallstrom, “La conversión de los hijos de Dios” (ch’utam choq’ reheb’ li Seminarios e Institutos de Religión, 13 junio, 2017), broadcasts.ChurchofJesusChrist.org

• Li Elder Bruce R. McConkie kixye: “Li tz’aqal loq’onink naxpatz’ naq taqataaqe li Ralal li Dios; naq te’qapaab’ li taqlahom ut li rajom li Yuwa’b’ej re naq tooruuq chi nume’k chalen sa’ li jun usilal toj sa’ li jun chik, toj reetal naq santob’resinb’ilaqo rik’in li Kristo, jo’ naq santob’resinb’il a’an rik’in lix Yuwa’. Moko naxpatz’ ta naq yal tootijoq, toojultikanq, ut toob’ichanq. Naxpatz’ b’an naq took’anjelaq ut toopaab’anq. Naxpatz’ b’an naq taqayu’ami xyu’am laj K’amol qab’e” (“Cómo adorar,” Liahona, octubre 1972).

Li k’utuk jo’ li Kolonel

Li tzol’leb’ li natawman sa’eb’ li loq’laj hu ut sa’ li raatineb’ li profeet sa’ roso’jikeb’ li kutan wan xwankil chixjalb’al li ch’oolej ut chixnimob’resinkil li paab’aal. Naq laa’at ut eb’ li ani tzolb’ileb’ aab’aan “teeyal xchaab’ilal li raatin li Dios,” teetaw naq a’an “k’a’jo’ naq naxk’ameb’ xch’ool li tenamit chixb’aanunkil li k’a’ru tiik” (Alma 31:5).