“26 febrero. Chan ru naq lix k’utum li Kolonel nikinixtenq’a re naq tiikaqin chi raqok aatin? Mateo 6–7,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“26 febrero. Chan ru naq lix k’utum li Kolonel nikinixtenq’a re naq tiikaqin chi raqok aatin?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
26 febrero
Chan ru naq lix k’utum li Kolonel nikinixtenq’a re naq tiikaqin chi raqok aatin?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. K’a’ru xe’aatinak wi’ li obispil sa’ li jolomil ch’utam choq’ reheb’ li saaj sa’ li teep? A’ yaal li xe’aatinak wi’, k’a’ru taqab’aanu?
-
Rilb’aleb’ li wankeb’ sa’ rajb’al ru. K’a’ru naru taqab’aanu re xtenq’ankileb’ li qas qiitz’in jo’ naraj li Kristo naq naqil li na’ajman ru a’b’an ink’a’ naqanaw k’a’ru xyeeb’al?
-
Xb’oqb’aleb’ chixjunil chixk’ulb’al li evangelio. K’a’ru ak xqataw sa’ lix evangelio li Jesukristo li naxsahob’resi qach’ool? Chan ru taqawotz li sahil ch’oolejil a’an rik’ineb’ li qas qiitz’in?
-
Xjunajinkileb’ li junkab’al chi junelik. K’a’ru yooko chixb’aanunkil re xtawb’al xk’ab’a’eb’ li qaxe’ qatoon li neke’raj ru xk’ojob’ankil k’anjel re li santil ochoch? K’a’ru naru taqab’aanu re xtenq’ankileb’ li qas qiitz’in chixtawb’al xk’ab’a’eb’ lix xe’toonil?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
K’aynaqo—xmaak li t’ane’k wanko wi’—chixraqb’al aatin chirixeb’ li qas qiitz’in, wan naq chi moko tiik ta malaj rik’in qab’ach’b’ach’il. A’b’an li Kolonel kixye, “Mexraqok aatin chi moko tiik ta, re naq ink’a’ taaraqe’q aatin cherix; tiikaq b’an li raqb’a-aatin nekexraqok wi’ aatin” (JJS, Mateo 7:2). K’oxla chan ru naq xtaaqenkil li na’leb’ a’an naru tatrosob’tesi laa’at ut eb’ li saaj nakatzol. Li Kolonel kixk’ut rik’in xb’aanuhom k’a’ru li “tiikil raqb’a-aatin.” K’e reetal chan ru naq kiraatina li ixq li kitawe’ chi muxuk sumsu. Ink’a’ kixjit, a’ut ink’a’ ajwi’ kixk’ulub’a lix maak. Kixye re, “Ayu ut chalen anajwan matmaakob’k chik” (Jwan 8:11). K’a’ru nakatzol rik’in li Kolonel chirix li raqok aatin chi tiik?
Naq nakak’oxla chan ru naq taatenq’aheb’ li saaj chixtawb’al ru li raqok aatin chi tiik, naru taawil Mateo 7:1–2 ut li raatin li Elder Lynn G. Robbins, “B’ar nakab’eresi laa wilob’aal?” (Jolomil ch’utub’aj-ib’ re octubre 2016).
Tzolok sa’ komonil
Re aatinak chirix li tiikil raqb’a-aatin, naru taapatz’ reheb’ li saaj naq te’xk’oxla jun hoonal naq xraqman aatin chirixeb’ chi moko tiik ta. K’a’ru xe’reek’a? K’a’ru naqatzol chirix li raqok aatin rik’in lix k’utum li Kolonel sa’ Mateo 7:1–5? (chi’ilmanq ajwi’ JJS, Mateo 7:1–2). K’a’ru naraj naxye li aatin “tiikil raqb’a-aatin”? Re aatinak chirixeb’ li raqal a’an, naru taapatz’ reheb’ li saaj naq te’xwotz rik’in raatineb’ li yeeb’il sa’eb’ li raqal. Naru ajwi’ xb’aanunkileb’ li na’leb’ a’in re xtenq’ankileb’ li saaj chi raqok aatin rik’in tiikilal.
-
Li raatin li Kolonel sa’ Mateo 6–7 naru tooxtenq’a re naq “tiikaq li raqb’a-aatin nokoraqok wi’ aatin.” Re xtenq’ankileb’ li saaj chixtawb’al li aatin a’an, naru taaye reheb’ naq te’xtz’il rix jun reheb’ li raqal a’in: Mateo 6:14–15; 7:3–5; 7:12; 7:15–20. K’a’ru naxye li Kolonel chirix li raqok aatin rik’in tiikilal sa’eb’ li raqal a’in? K’a’ru naru naqatzol rik’in xb’aanuhom li Kolonel sa’ Jwan 8:1–11 ut Mateo 9:10–13? K’a’ru xjalanil malaj xjuntaq’eetil chan ru naq naxraq aatin li Kolonel chiqix rik’in chan ru naq naqaraq aatin chiqix chiqib’il qib’?
-
Wan xtaql li qach’ool, jo’kan naq rajlal tento taqasik’ ru li k’a’ru taqab’aanu ut li ink’a’ taqab’aanu. A’ut jo’ xtzolom li Kolonel, naqayal qaq’e chi ink’a’ xraqb’al aatin chi moko xwech’b’aleb’ rix li qas qiitz’in. Re xtenq’ankileb’ li saaj chixtawb’al ru li na’leb’ a’in, wotz rik’ineb’ li raatin li Awa’b’ej Dallin H. Oaks sa’ “Xkomon chik li tenq’.” Sa’ komonil, k’oxlahomaq chan raj ru teeraq aatin chirix jun hoonal—jun ch’ina k’anjel, ninq’e, malaj aatinak—sa’ xna’aj xraqb’al aatin chirix jun kristiaan natz’aqon aran. K’a’ut naq jwal us wi’chik xraqb’al aatin chirix li hoonal sa’ xna’aj li kristiaan? Maare wanqeb’ chik xpatz’omeb’ li saaj chirix li raqok aatin rik’in tiikilal (chi’ilmanq li na’leb’ sa’ “Xkomon chik li tenq’ ”). Tz’ilomaqeb’ rix lix patz’omeb’ rik’in li na’leb’ wan sa’ “Xkomon chik li tenq’ ” re teesumeheb’. Patz’ reheb’ li saaj naq te’xwotz li neke’musiq’aak chixb’aanunkil xb’aan li k’a’ru xe’xtzol.
-
Sa’ “Cultivar el buen discernimiento y no juzgar a los demás” (Liahona, mayo 2010, 103–105), li Elder Gregory A. Schwitzer kixwotz wiib’ li seraq’—chirix xMarta, li ramiiw li Jesus, ut chirix jun winq kitenq’aak xb’aan li Elder Schwitzer. K’a’ru neke’xk’ut li seraq’ a’an chirix rilb’aleb’ ut raatinankileb’ li qas qiitz’in? K’a’ru naqatzol li naru tooxtenq’a chi wank jo’ li Kristo ut chi raqok aatin rik’in tiikilal? Li video “Mirando por las ventanas” “Meeb’aanu chik!” (ChurchofJesusChrist.org) naru tixk’e xkomon eena’leb’.
Naq naqatzol wank jo’ li Kristo, tiikaq chik li raqb’a-aatin nokoraqok wi’ aatin.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Eb’ li patz’om chirix xraqb’al aatin chirixeb’ li qas qiitz’in: “Nayehe’ we naq tintz’ileb’ rix chi us li te’wanq choq’ wamiiw. A’b’an, chan ru tinb’aanu a’an chi ink’a’ tinraq aatin chirixeb’?” “Naq ninyal xyu’aminkil li evangelio, wankeb’ li neke’xye naq laa’in yookin chi raqok aatin. Chan ru tintaaqe li ninpaab’ a’ut tink’ut ajwi’ inrahom choq’ reheb’ li ink’a’ neke’xpaab’?”
-
Temas del Evangelio, “Juzgar a los demás,” topics.ChurchofJesusChrist.org
-
Li Awa’b’ej Dallin H. Oaks kixye: “Wi naru, naqayal ink’a’ raqok aatin chirixeb’ li kristiaan, ka’ajwi’ chirixeb’ li hoonal. Aajel ru xb’aanunkil a’in naq naqaj xyu’aminkil li na’leb’ jalan wi’ rik’in xna’leb’eb’ li qas qiitz’in—sa’ li ochoch, li trab’aaj, malaj sa’ li tenamit. Naru naqaxaqab’ ut naqayu’ami li taqenaqil na’leb’ choq’ qe malaj re li qajunkab’al, chi ink’a’ naqaraq aatin chirixeb’ li ani jalaneb’ xna’leb’ ” (“‘Judge Not’ and Judging,” Ensign, agosto 1999, 11).
Li k’utuk jo’ li Kolonel
Tento naq li nakab’aanu laa’at tixtenq’a li neke’xb’aanu li na’b’ej yuwa’b’ej. Wotz rik’ineb’ lix na’ xyuwa’eb’ li saaj li k’a’ru yookat chixk’utb’al. Aatinan rik’ineb’ re xnawb’al li neke’raj ru li saaj komon sa’ laa tzoleb’aal ut chan ru naru taatenq’aheb’.