“12 marzo. Chan ru naq li Kolonel naru nikinxtenq’a chixq’axb’al ru lin xiw? Mateo 9–10; Markos 5; Lukas 9,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“12 marzo. Chan ru naq li Kolonel naru nikinxtenq’a chixq’axb’al ru lin xiw?” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
At inrab’in, waklin, xb’aan laj Simon Dewey
12 marzo
Chan ru naq li Kolonel naru nikinxtenq’a chixq’axb’al ru lin xiw?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. B’ar ak xqil li ruq’ li Qaawa’ sa’ li qayu’am?
-
Rilb’aleb’ li wankeb’ sa’ rajb’al ru. Chan ru naq taqatenq’a qib’ chiqib’il qib’ sa’ li naqanumsi?
-
Xb’oqb’aleb’ chixjunil chixk’ulb’al li evangelio. Chan ru naq taqoksi li tecnologia re xwotzb’al li evangelio?
-
Xjunajinkileb’ li junkab’al chi junelik. K’a’ru yooko chixb’aanunkil re xtenq’ankil li qajunkab’al chi chalk rik’in li Kristo?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Sa’ li ch’ol 5 re xhu laj Markos yeeb’il naq ke’wulak rik’in li Jesus oxib’eb’ li wankeb’ xxiw. Jun winq “li wank tz’aj aj musiq’ej rik’in” xjunes rib’ wan, “nawank chaq sa’atqeb’ li muqleb’aal kamenaq ut chiruheb’ li tzuul, naxjap chaq re ut naxtiq’ihatq rib’ chiru pek” (Markos 5:2, 5). Laj Jairo, aj b’eresinel re jun li ch’utleb’aal kab’l, li naxxuwa naq taasachq chiru lix rab’in, li “kamk re” (Markos 5:23). Ut jun li ixq “na’elk xkik’el chalen chaq kab’laju chihab’,” li ink’a’ kik’ira us ta xsachom “chixjunil li k’aru wank re” rik’ineb’ “k’iila b’anonel” (Markos 5:25–26). Jalan jalanq chixjunileb’ li saaj nakatzol, ut jalan jalanqeb’ xxiw. A’ut jo’ chanru naq li Qaawa’ naru chirisinkil li tz’aj aj musiq’ej, chixwaklesinkil li kamenaq, ut chixk’irtesinkil li xuwajel yajel, a’an naru chiqatenq’ankil naq nokoxuwak. Lix na’leb’ choq’ re laj Jairo nim ajwi’ xwankil sa’ li qakutankil: “Matxiwak, ka’ajwi’ naq wanq aapaab’aal” (Markos 5:36).
Re xkawresinkil li tzolok, naru taawil li raatin li Elder Ronald A. Rasband, “Minumta eek’a’uxl” (Jolomil ch’utub’aj-ib’ re octubre 2018), ut li raatin li Hermana Lisa L. Harkness, “Matchoqink! Ch’anaqat!” (Jolomil ch’utub’aj-ib’ re octubre 2020).
Tzolok sa’ komonil
Naru taapatz’ re jun li saaj naq tixye chi k’osb’il ru li seraq’ sa’ Markos 5 naq li Jesus kixb’oq laj Jairo naq “mixuwak” (che’ilmanq li raqal 22–24, 35–43), malaj naru teetz’il rix li seraq’ sa’ komonil. Naru taab’aanu a’in rik’in xkomoneb’ chik li seraq’ sa’ li ch’ol a’in—li winq li wan tz’aj aj musiq’ej rik’in, ut li ixq li na’el xkik’el. Chan ru naq li xiwxiw ke’xnumsi chaq chanchan ajwi’ li naqanumsi laa’o? K’a’ru naru taqatzol rik’ineb’ li seraq’ a’in chirix li Kolonel ut xsik’b’al lix tenq’? Xb’aanunkileb’ li na’leb’ a’in naru tixtenq’aheb’ li saaj chixnimob’resinkil lix paab’aaleb’ chirix li Jesukristo ut chixk’ulub’ankil lix na’leb’: “Matxiwak, ka’ajwi’ naq wanq aapaab’aal” (Markos 5:36).
-
Lix b’oqom li Qaawa’ naq ink’a’ tooxuwaq, li k’iilasutinb’il sa’eb’ li loq’laj hu, taarosob’tesiheb’ li saaj naq wanqeb’ xxiw. Patz’ reheb’ naq te’rileb’ li raqal re li loq’laj hu sa’ “Xkomon chik li tenq’ ” ut naq te’xyiib’ jun li nimla hu naru te’xk’ut sa’ rochocheb’—malaj jun li naru te’xwotz sa’ internet—li naxk’ut li na’leb’ sa’ li raqal xe’ril. Naq te’xwotz li xe’xyiib’ chirib’ileb’ rib’, patz’ reheb’ naq te’xwotz ajwi’ k’a’ru xe’xtzol li taatenq’anq reheb’ naq wanqeb’ xxiw. Jo’q’e xooxtenq’a li Kolonel naq kiwan qaxiw?
-
Naru taak’ut xjalam-uuch li Kolonel naq kixch’anab’ li kaq-sut-iq’, maare li natawman sa’ li raatin li Hermana Lisa L. Harkness, “Matchoqink! Ch’anaqat!” (chi’ilmanq ajwi’ Hu reheb’ li Jalam-uuch re li Evangelio [2009], 40). Chirix a’an naru taapatz’ re jun li saaj naq tixyaab’asi li seraq’ naq li Kolonel kixch’anab’ li kaq-sut-iq’, li wan sa’ Markos 4:35–41 malaj sa’ li raatin li Hermana Harkness. Chan ru naq wan naq laa’o chanchano li ke’wan sa’ li jukub’? K’a’ru naqatzol sa’ li seraq’ a’an chirix li naxb’aanu li Qaawa’ re qatenq’ankil naq yooko chi xuwak? Patz’ reheb’ li saaj naq te’ril li raatin li Hermana Harkness, ut te’xsik’ li na’leb’ li natenq’an reheb’ chixpaab’ankil li Jesukristo. Naru te’xtz’iib’aheb’ a’an chiru li pizarron. Chan ru naq li qapaab’aal chirix li Kolonel nokoxtenq’a naq moko naraj ta a’an xch’anab’ankileb’ li kaq-sut-iq’ re li qayu’am?
-
Wankeb’ li b’ich li neke’xnima ru li Kolonel xb’aan lix tenq’ ut lix metz’ew sa’ ch’a’ajkil hoonal; wiib’ reheb’ a’an “Rajlal nawaj aawu” ut “Chatwanq wikʼin” (Eb’ li B’ich, 53, 99). Naru teeb’icha malaj teeril ruheb’ li b’ich a’in, ut teek’e reetal chan ru naq li Kolonel naru nokoxtenq’a.
-
Chiqajunilo nokoxuwak ut naka’ch’ino’ qach’ool rik’in li ch’a’ajkilal sa’ li qayu’am. A’ut, wankeb’ li k’a’jo’ neke’luktesiik xb’aaneb’ li eek’ahom a’an. Maare us naq teetz’il rix chan ru naq li Kolonel naru tixtenq’a yalaq ani nalukta, chi b’ayaq malaj chi naab’al. Eb’ li saaj naru te’ril li raatin li Elder Ronald A. Rasband, “Minumta eek’a’uxl,” malaj li raatin li Elder Erich W. Kopischke, “Aatinak chirix xkawilal li ulul” (Jolomil ch’utub’aj-ib’ re octubre 2021), ut te’xsik’ ut te’xwotz li na’leb’ li nim xwankil choq’ reheb’. Waklesi xch’ooleb’ li saaj naq te’aatinaq rik’in xna’ xyuwa’ malaj jun aj jolominel, malaj naq te’xik sa’ MentalHealth.ChurchofJesusChrist.org wi neke’raj xtenq’.
Li Kolonel naxyeechi’i qatenq’ankil wi taqasik’ a’an naq yoo qaxiw ut qak’a’uxl.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Josue 1:9; Salmos 56:3–4; Isaias 41:10; Jwan 14:27; 2 Timoteo 1:7; Tzol’leb’ ut Sumwank 50:41–44; 68:6
Li k’utuk jo’ li Kolonel
Naq nakatk’utuk, ruuchil yal xk’utb’al li na’leb’ chiruheb’, tenq’aheb’ li saaj chixtawb’al ru xjuneseb’ rib’ li na’leb’ re li evangelio sa’ li loq’laj hu ut li raatineb’ li profeet.