“26 marzo. Chan ru naq eb’ li saaj ixq ut li saaj winq neke’k’anjelak sa’ komonil re xwaklesinkil lix awa’b’ejihom li Dios? Mateo 13; Lukas 8; 13,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“26 marzo. Chan ru naq eb’ li saaj ixq ut li saaj winq neke’k’anjelak sa’ komonil re xwaklesinkil lix awa’b’ejihom li Dios?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
26 marzo
Chan ru naq eb’ li saaj ixq ut li saaj winq neke’k’anjelak sa’ komonil re xwaklesinkil lix awa’b’ejihom li Dios?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. Chan ru naq yooko chixtawb’al xsahil qach’ool sa’ xtaaqenkil li Jesukristo?
-
Rilb’aleb’ li wankeb’ sa’ rajb’al ru. Ani sa’ li qateep malaj qatenamit naraj ru qatenq’? Chan ru taqatenq’a?
-
Xb’oqb’aleb’ chixjunil chixk’ulb’al li evangelio. Chan ru taqakawresi qib’ chiqib’il qib’ re xik sa’ mision?
-
Xjunajinkileb’ li junkab’al chi junelik. Chan ru tootenq’anq sa’ li teep re xb’aanunkil li k’anjel re li santil ochoch ut li junkab’al?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Rik’ineb’ li jaljookil ru aatin sa’ Mateo 13, li Kolonel kixk’uteb’ li ninqi yaal chirix lix awa’b’ejihom li Dios ut lix k’iijik sa’ li qakutankil. Sa’ wiib’ reheb’ li jaljookil ru aatin a’an, li k’a’aq re ru moko nimob’resinb’il ta kixk’e chi uxmank li ninqi k’anjel. Ut lix b’aanuhom jun li ralal malaj xrab’in li Dios kixk’e chi uxmank li sachb’a-ch’oolej. Jun ch’ina t’orol chi mostaas kik’i roj reetal naq eb’ li xul li neke’rupupik chiru choxa “neke’xik chi sukub’k sa’eb’ li ruq’,” chirix naq “jun li winq kixxok ut kiraw sa’ lix ch’och’ ” (Mateo 13:31–32). Ut ka’ch’in xyu li kaxlan wa kixk’e chi siipook li q’em naq “jun li ixq kichapok re ut koxk’e sa’ jun aroow chi k’aj” (Mateo 13:33). Lix awa’b’ejihom li Dios anajwan nak’i ut napukan xb’aan naq eb’ lix santil paab’anel—jo’eb’ li saaj ixq ut saaj winq—neke’k’anjelak rochb’een li Dios re xwaklesinkil.
Rochb’een rilb’al Mateo 13 ut Lukas 8; 13 chiru li xamaan a’in, naru taawil li raatin li Awa’b’ej M. Russell Ballard, “Hombres y Mujeres en la Obra del Señor” (Liahona, abril 2014, 46–49) ut li raatin li Awa’b’ej Jean B. Bingham, “Xk’eeb’al chi uxmank lix k’anjel li Dios sa’ komonil” (Jolomil ch’utub’aj-ib’ re abril 2020).
Tzolok sa’ komonil
Re xtenq’ankileb’ li saaj chixtawb’aleb’ ru li jaljookil ru aatin sa Mateo 13, naru taak’uteb’ xjalam-uuch li t’orol chi mostaas, xyu li kaxlan wa, jun li q’ol, ut jun li yooy. Eb’ li saaj naru te’ril Mateo 13:31–33, 45–48, ut te’xye k’a’ru neke’xk’ut li jaljookil ru aatin a’in chirix li awa’b’ejihom re choxa. Chan ru taqayu’ami li na’leb’ k’utb’il sa’eb’ li jaljookil ru aatin? K’a’ru yooko chixb’aanunkil re xtenq’ankil li Qaawa’ chixwaklesinkil lix awa’b’ejihom? Xb’aanunkileb’ li na’leb’ a’in naru texxtenq’a chi aatinak chirix a’in.
-
Rub’elaj li ch’utam, patz’ reheb’ li saaj naq te’xtaw xna’leb’ chirixeb’ li ixq ut li winq li yalb’ileb’ xq’e malaj ak xe’xyal xq’e sa’ xwaklesinkil lix awa’b’ejihom li Dios. Naru te’xtaweb’ li kristiaan sa’ li loq’laj hu (chi’ilmanq “Xkomon chik li tenq’ ”), sa’ li resilal li Iglees, malaj sa’ lix yu’ameb’ a’an. Patz’ reheb’ li saaj naq te’xye k’a’ru xe’xtzol. Chan ru naq li kristiaan a’an xe’xtenq’a li Qaawa’ chixwaklesinkil lix awa’b’ejihom? Chan ru naru taqataaqe li ke’xb’aanu a’an?
-
Wi nakatzoleb’ li saaj winq, patz’ reheb’ naq te’ril li raatin li Awa’b’ej Bonnie L. Oscarson, “Eb’ li saaj ixq sa’ li k’anjel” (Jolomil ch’utub’aj-ib’ re abril 2018), ut te’xsik’ ut te’xwotz chan ru naq eb’ li saaj ixq neke’tz’aqon sa’ xk’anjel li Dios re li kolb’a-ib’ ut li taqenaqil loq’al. Eb’ li saaj ixq naru ajwi’ te’xsik’ chan ru naq neke’tz’aqon li saaj winq rik’in rilb’al li raatin li Hermano Douglas D. Holmes, “Li k’a’ru tento te’xtaw ru chixjunileb’ li neke’k’amok re li Tijonelil re Aaron” (Jolomil ch’utub’aj-ib’ re abril 2018). K’a’ru xjuntaq’eetil lix teneb’ankileb’ li saaj ixq ut li saaj winq? Chan ru naq tooruuq chi k’anjelak sa’ komonil naq naqab’aanu xk’anjel li Dios?
-
Re xtenq’ankileb’ li saaj chixtawb’al ru chan ru naq neke’k’anjelak sa’ komonil li ixq ut li winq re xwaklesinkil lix awa’b’ejihom li Dios, naru taatz’iib’aheb’ li patz’om a’in chiru li pizarron: K’a’ut naraj li Dios naq eb’ li ixq ut li winq te’k’anjelaq sa’ komonil re xwaklesinkil lix awa’b’ejihom? Chan ru naq eb’ li awa’b’ejil re tzoleb’aal ut re molam naru te’k’anjelaq chi chaab’il sa’ komonil? Eb’ li saaj naru te’ril jun xraqalil li raatin li Awa’b’ej M. Russell Ballard, “Hombres y Mujeres en la Obra del Señor” malaj li raatin li Awa’b’ej Jean B. Bingham, “Xk’eeb’al chi uxmank lix k’anjel li Dios sa’ komonil,” ut te’xtikib’ rilb’al b’ar wi’ naxye “K’a’ru naraj naxye a’an choq’ aawe ut choq’ we?” Eb’ li saaj naru te’xwotz li na’leb’ te’xtaw re xsumenkileb’ li patz’om.
-
Re xtenq’ankileb’ li saaj chixtawb’al ru chan ru neke’ru chi tenq’ank chixwaklesinkil lix awa’b’ejihom li Dios, naru taapatz’ a’in: K’a’ru yooko chixb’aanunkil sa’ li qochoch, li qateep, ut li qatenamit re tenq’ank sa’ xk’anjel li Dios? Naru taapatz’ re li awa’b’ej re tzoleb’aal malaj molam naq tixye k’a’ru xe’na’leb’an wi’ sa’ li ch’uut reheb’ li saaj re teep, wi naru xwotzb’al. Patz’ reheb’ li saaj naq te’xwotz k’a’ru naru te’xb’aanu re tenq’ank rik’in a’an.
Li Dios naraj ru naq eb’ li ixq ut li winq te’kanjelaq sa’ komonil re xwaklesinkil lix awa’b’ejihom.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Lukas 2:21–38 (laj Simeon ut xAna); Hechos 9:36–41 (xTabita, malaj xDorcas); Mosiah 18:1–17 (laj Alma); Mosiah 28:1–3 (eb’ li ralal laj Mosiah); Alma 8:18–27 (laj Amulek); Alma 19:15–17 (xAbish); Tzol’leb’ ut Sumwank 25:5–8 (xEmma Smith); Moises 5:10–12 (laj Adan ut xEva)
Li k’utuk jo’ li Kolonel
Naq nakak’e jun xb’oqb’aleb’ chixyu’aminkil jun na’leb’, tenq’aheb’ li komon chixk’eeb’al reetal li osob’tesink yeechi’inb’il xb’aan li Dios choq’ reheb’ li ani neke’xyu’ami li na’leb’ a’an.