li Jesus naxk’ut rib’ chiru li xMaria aj Magdala

9 abril

Chan ru tinkawob’resi xnawom inch’ool chirix lix waklijik li Jesukristo chi yo’yo?

Li Paswa

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Rochb’een li aatinak chirix li na’ajman sa’ lee tzoleb’aal malaj molam, naru tex’aatinaq chirix li xeril ut xerab’i sa’ li jolomil ch’utub’aj-ib’. Naru roksinkileb’ li patz’om a’in.

• Ma wankeb’ li na’leb’ malaj esil li xe’xtoch’ qach’ool? K’a’ru xnimob’resi li qapaab’aal chirix li Jesukristo?

• K’a’ru xnimob’resi lix nawom qach’ool chirixeb’ li yo’yookil profeet? K’a’ru nokomusiq’aak chixb’aanunkil xb’aan li k’a’ru xqatzol malaj xqeek’a?

• Ma wan k’a’ruhaq tento taqab’aanu sa’ komonil re xjultikankil ut xb’aanunkil li xqab’i sa’ li jolomil ch’utub’aj-ib?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Eb’ li apostol re najter kutan ut re ajwi’ li kutan a’in neke’xch’olob’ xyaalal naq yo’yo li Kristo. Kirahob’tesiik ut kikam chiru li krus, kik’ehe’ sa’ muqleb’aal, ut sa’ rox li kutan kiwakli wi’chik. Sa’ xk’ab’a’ li xq’axb’al ru li kamk, laa’o toowakliiq chi yo’yo. Lix waklijik li Kolonel chi yo’yo naxyeechi’i xsachik li kamk ut royb’enihom li junelik yu’am. Li yeechi’ihom a’in, a’an xch’oolil li Paswa.

Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, wan xyaalalil naq naqapaab’ naq kiwakli chi yo’yo li Jesukristo. Rochb’een lix ch’olob’ahomeb’ li wankeb’ sa’ li Ak’ Chaq’rab’, wan ajwi’ xch’olob’ahomeb’ li kristiaan sa’ lix Hu laj Mormon, li profeet aj Jose Smith, ut eb’ li yo’yookil profeet ut apostol. Laa’o ajwi’ naru taqak’ul qanawom naq yaal li wakliik chi yo’yo rik’in li Santil Musiq’ej. Chan ru taatenq’aheb’ li saaj chixkawresinkil lix nawomeb’ xch’ool naq kiwakli li Jesukristo chi yo’yo? Naq nakakawresi li tzolok, naru taawil li raatin li Hermana Reyna I. Aburto, “Li muqleb’aal kamenaq maak’a’ xq’axom ru” (Jolomil ch’utub’aj-ib’ re abril 2021), ut li raatin li Elder S. Mark Palmer, “Li qarahilal taawulaq choq’ sahil ch’oolejil” (Jolomil ch’utub’aj-ib’ re abril 2021).

Tzolok sa’ komonil

Re aatinak chirix lix waklijik li Jesukristo chi yo’yo, naru taapatz’ reheb’ li saaj naq te’xye k’a’ru xe’xb’aanu chiru li xamaan a’in re xninq’ehinkil li Paswa. Naru taapatz’ k’a’ru xe’xtzol malaj xe’xb’aanu sa’ junesal malaj sa’ junkab’al re xkawob’resinkil xnawom xch’ooleb’ chirix lix waklijik li Kolonel chi yo’yo. Naru xb’aanunkileb’ li na’leb’ a’in re xtenq’ankileb’ li saaj chixkawob’resinkil lix nawomeb’ xch’ool.

• Tz’ilomaq rix k’a’ut naq aajeleb’ ru aj yehol nawom sa’ li qayu’am. Chirix a’an, tz’iib’ahomaq xk’ab’a’eb’ laj yehol nawom chirix lix waklijik chi yo’yo li Jesus li neke’jultiko’ eere. Chixjunileb’ li saaj naru te’xsik’ ru jun raqal re li loq’laj hu sa’ “Xkomon chik li tenq’ ” re te’tzoloq chirixeb’ laj yehol nawom a’an. Patz’ reheb’ li saaj naq te’xwotz k’a’ru xe’xtzol. Waklesi xch’ooleb’ chixwotzb’al ajwi’ chan ru naq eb’ laj yehol nawom a’in neke’xkawob’resi xnawomeb’ li saaj chirix lix waklijik li Jesukristo chi yo’yo.

• Jo’q’e ut b’ar naru taqawotz xnawom qach’ool chirix lix waklijik li Kolonel chi yo’yo? Wi wan jun li saaj li ak x’aatinak rik’in jun kristiaan chirix lix waklijik chi yo’yo li Kolonel, naru taapatz’ re naq tixwotz k’a’ru xk’ulman. Waklesi xch’ooleb’ li saaj chixk’oxlankil chan raj ru te’xtenq’a jun kristiaan chixtawb’al ru lix waklijik li Jesukristo chi yo’yo, ut chixk’ulb’al xnawom xch’ool naq b’antiox re a’an chiqajunilo naru toowakliiq chi yo’yo. Ma wankeb’ li ninqi na’leb’ chirix lix waklijik chi yo’yo chixjunil li kristiaan li aajel ru xk’utb’al chiruheb’ li qas qiitz’in? Eb’ li saaj naru te’xtaweb’ li na’leb’ a’an sa’eb’ li raqal re li loq’laj hu sa’ “Xkomon chik li tenq’.”

• Naq eb’ li apostol ke’xye re laj Tomas naq xe’ril li Kolonel waklijenaq chi yo’yo, laj Tomas kixye naq ink’a’ tixpaab’ toj reetal naq taaril. Moqon li Jesus kixye re laj Tomas, “Us xaq reheb’ li maak’a’ xe’ril, ut xe’xpaab’.” Tz’ilomaq rix li kixk’ul laj Tomas sa’ Jwan 20:24–29. Ma xoo’osob’tesiik laa’o rik’in xpaab’ankil li Kolonel us ta ink’a’ naqil? Chan ru taqakawob’resi li qapaab’aal chirix li Jesukristo? Patz’ reheb’ li saaj naq te’ril li raatineb’ laj jolominel re li Iglees sa’ “Xkomon chik li tenq’,” ut naq te’xwotz k’a’ut naq neke’xb’antioxi lix waklijik li Kolonel chi yo’yo. Chan ru naq li qanawom naq toowakliiq chi yo’yo naxjal li naqak’oxla chirix li qajunxaqalil ut li qab’aanuhom?

Re taaruuq teenaw, xb’aan laj Gary L. Kapp

Re taaruuq teenaw, xb’aan laj Gary L. Kapp

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Mateo 28:1–10; Lukas 24:13–35; Lukas 24:36–48; Jwan 20:11–29; 1 Korintios 15:3–8; 3 Nefi 11:1–15; Eter 12:38–39; Tzol’leb’ ut Sumwank 76:19–24 (Eb’ laj yehol nawom chirix li wakliik chi yo’yo)

• 2 Nefi 9:10–15; Mosiah 16:8–11; Alma 11:42–45; Alma 40:23–25; Tzol’leb’ ut Sumwank 93:33–34 (Eb’ li loq’laj hu neke’k’utuk chirix lix waklijik chi yo’yo chixjunil li kristiaan)

• D. Todd Christofferson, “Lix waklijik li Jesukristo chi yo’yo,” Jolomil ch’utub’aj-ib’ re abril 2014

• Gerrit W. Gong, “Hosanna ut aleluya—Li yo’yookil Kristo: Tz’aqal xch’oolil li Paswa ut li k’ojob’ank wi’chik,” Jolomil ch’utub’aj-ib’ re abril 2020

• Reyna I. Aburto, “Li muqleb’aal kamenaq maak’a’ xq’axom ru,” Jolomil ch’utub’aj-ib’ re abril 2021

• S. Mark Palmer, “Li qarahilal taawulaq choq’ sahil ch’oolejil,” Jolomil ch’utub’aj-ib’ re abril 2021

• Naru xtawb’aleb’ li video chirix li Paswa sa’ ChurchofJesusChrist.org/study/video/easter-videos.

Li k’utuk jo’ li Kolonel

Junaq li naxnaw xtawb’al xna’leb’ sa’eb’ li loq’laj hu ut naroksiheb’ wulaj wulaj taaruuq tixk’ul li choxahil b’eresink re tixq’ax ru yalaq ch’a’ajkilal. Naq nakatk’utuk, oksiheb’ li patz’om li te’xteneb’eb’ li komon sa’ li tzoleb’aal chixtawb’aleb’ xsumenkil sa’eb’ li loq’laj hu.