Chaab’il aj Samaria, xb’aan li xAnnie Henrie Nader

Chaab’il aj Samaria, xb’aan li xAnnie Henrie Nader

23 abril

Chan ru tink’ut xkomon xnimal inrahom choq’ reheb’ li was wiitz’in?

Mateo 18; Lukas 10

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Ma wan li toje’ xqak’ul li xooxnach’ob’resi rik’in li qaChoxahil Yuwa’ ut li Jesukristo?

• Rilb’aleb’ li wankeb’ sa’ rajb’al ru. Ma wan ani toje’ x’ok sa’ li qateep malaj x’ok sa’ li Iglees? Chan ru taqak’e xsahileb’ xch’ool?

• Xb’oqb’aleb’ chixjunil chixk’ulb’al li evangelio. K’a’ruheb’ li kok’ k’anjel chalkeb’ re, b’ar wi’ naru taqab’oqeb’ li qamiiw chi tz’aqonk?

• Xjunajinkileb’ li junkab’al chi junelik. K’a’ru naru taqab’aanu re xtz’iib’ankil resil li qayu’am?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Chirix naq li Jesus kixk’ut chiru “jun aj nawol chaq’rab’ ” naq tz’aqal aajeleb’ ru li wiib’ xninqal ru taqlahom—xraab’al li Dios ut xraab’aleb’ li qas qiitz’in—laj nawol chaq’rab’ kixpatz’, “Ani li was wiitz’in?” (chi’ilmanq Lukas 10:25–29; Mateo 22:35–40). Re xsumenkil, li Jesus kixwotz li jaljookil ru aatin chirix jun aj Samaria li kixch’olani jun winq aj Judio toch’enaq, kixk’am chaq sa’ ochochnal, ut kixtoj xtz’aq xb’anb’al. Laj Samaria ink’a’ kixk’e reetal xjalanil a’an rik’in li winq, li xik’ ilb’il xb’aan xtenamit, chi moko kixraq ta aatin chirix, chi moko kixna’leb’a chan raj ru tixq’axb’ehi. Kik’anjelak chiru li winq sa’ rajb’al ru, maak’a’ naxye k’a’ru tixk’ul malaj tixmayeja, ut chi jo’kan kixk’ut xrahom choq’ re li winq ut re ajwi’ li Dios. Naq nakak’oxla lix k’utum li Kolonel sa’ Lukas 10:25–37, k’oxla lix tz’aqal yaalalil li aatin “taara … jo’ naq nakara aawib’ laa’at” (raqal 27).

Chan ru taatenq’aheb’ li saaj chixtawb’al ru naq wi neke’k’anjelak chiruheb’ li ras riitz’in, yookeb’ chixk’utb’al xrahomeb’ choq’ re li Dios? K’a’ru tixwaklesi xch’ooleb’ chixraab’aleb’ ut chi k’anjelak chiruheb’ li ras riitz’in? Naq nakakawresi li tzolok, naru taawil li raatin li Awa’b’ej Russell M. Nelson, “Xkab’ li xnimal ru taqlahom” (Jolomil ch’utub’aj-ib’ re octubre 2019).

Tzolok sa’ komonil

Re aatinak chirix xk’utb’al xkomon xnimal li rahok choq’ reheb’ li qas qiitz’in, naru taapatz’ reheb’ li saaj naq te’xwotz k’a’ru xe’xtzol chirix xraab’aleb’ li qas qiitz’in sa’ li jaljookil ru aatin chirix li chaab’il aj Samaria, li wan sa’ Lukas 10:25–37. K’a’ru naqatzol chirix li xb’een ut xkab’ xninqal ru taqlahom sa’ Lukas 10:27 ut li raatin li Awa’b’ej Dallin H. Oaks sa’ “Xkomon chik li tenq’ ”? Naru xb’aanunkileb’ li na’leb’ a’in re aatinak chirix xk’utb’al xkomon xnimal li rahok choq’ reheb’ li qas qiitz’in.

• Li Jesukristo tz’aqal kixk’ut chiqu chan ru xraab’al li Dios naq kik’anjelak chiruheb’ li ras riitz’in, ut eb’ li saaj te’musiq’aaq naq te’xtz’il rix lix k’anjel. B’oqeb’ li saaj chixk’oxlankil lix yu’am li Jesus, ut chixsik’b’al ru jun seraq’ re xyu’am li naxk’ut xnimal lix rahom choq’ reheb’ li ras riitz’in. Patz’ re li junjunq naq tixwotz lix seraq’, ut k’a’ut naq nawulak chiru. Patz’ reheb’ li saaj naq te’xk’oxla jun na’leb’ te’xb’aanu re rahok jo’ li Kolonel. Naru ajwi’ te’xwotz li neke’xk’oxla chirix jun kristiaan li naxb’aanu jo’ kixb’aanu li Jesus.

• Wotz rik’ineb’ li saaj ut aatinanqex chirix li raatin li Awa’b’ej Russell M. Nelson sa’ “Xkomon chik li tenq’.” Naru taapatz’ reheb’ li saaj naq te’xtz’il rix jun malaj wiib’ reheb’ li esil re li jolomil ch’utub’aj-ib’ li wankeb’ sa’ li tusleb’ aatin a’in, ut naq te’xsik’ li na’leb’ li tooxtenq’a chixraab’aleb’ li qas qiitz’in. Maare te’xtz’ileb’ rix a’in: li na’leb’ chirix k’anjelak chiru li qas qiitz’in sa’ “Xkab’ li xnimal ru taqlahom” xb’aan li Awa’b’ej Nelson; eb’ li raqal I, II, ut VI re li raatin li Awa’b’ej Oaks, “Xraab’al qib’ naq jalan jalanq li qana’leb’ ”; ut li seraq’ chirixeb’ li imul ut li na’leb’ choq’ reheb’ li saaj sa’ “Kemb’il sa’ komonil li qach’ool” xb’aan li Elder Gary E. Stevenson. Naru ajwi’ teeril Mosiah 2:17 ut Moroni 7:45–48. Maare us xtz’iib’ankil li na’leb’ nekex’aatinak wi’ chiru li pizarron. Chirix a’an, eb’ li saaj naru te’xna’leb’a chan ru te’xyu’ami li na’leb’ a’an rik’ineb’ lix komon, li ramiiw, ut li rech kab’al, rik’ineb’ ajwi’ li kristiaan li ch’a’aj xraab’aleb’.

• Lix yalb’aleb’ xq’e li saaj sa’ li k’anjel re li kolb’a-ib’ ut li taqenaqil loq’al nimaq ut sahaq wi’chik wi eek’asinb’ileb’ xb’aan li rahok. Re xtenq’ankileb’ chixk’eeb’al reetal chan ru naq eb’ lix cha’al li k’anjel re li kolb’a-ib’ ut li taqenaqil loq’al (chi’ilmanq Jolomil K’anjenel Hu, 1.2) eek’asinb’ileb’ xb’aan li rahok, tz’iib’aheb’ li kaahib’ cha’alej chiru li pizarron. Patz’ reheb’ li saaj naq te’xtz’il rix chan ru naq jun li aamej nujenaq rik’in rahok choq’ reheb’ li qas qiitz’in tixjal chan ru tootz’aqonq sa’ li junjunq cha’alej a’an. Maare wan li ak xe’xk’ul sa’ xyu’ameb’ a’an malaj anihaq chik li te’raj xwotzb’al.

eb’ li saaj winq ut ixq neke’rutz’u’uji jun li pastel

Li Awa’b’ej Russell M. Nelson kixye, “Naq naqara li Dios chi anchal li qach’ool, li Dios naxk’e li qach’ool choq’ reheb’ jalan.”

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Dallin H. Oaks, “Xraab’al qib’ naq jalan jalanq qana’leb’,” Jolomil ch’utub’aj-ib’ re octubre 2014

• Gary E. Stevenson, “Kemb’il sa’ komonil li qach’ool,” Jolomil ch’utub’aj-ib’ re abril 2021

• “Un buen samaritano,” “El mayor mandamiento de todos” (Eb’ li video), ChurchofJesusChrist.org

• Li Awa’b’ej Dallin H. Oaks kixye: “Sa’ x’anchalil qach’ool chixpaab’ankil li xkab’ chaq’rab’, aajel ru naq ink’a’ taasachq sa’ qach’ool xpaab’ankil li xb’een, a’an naq taqara li Dios chi anchal qach’ool, li qaam, ut li qak’a’uxl. … Aajel ru choq’ qe naq taqayal qaq’e chixpaab’ankil xkab’ichaleb’ li xninqal ru taqlahom. Re xb’aanunkil, tento toob’eeq chiru jun laatz’il b’e wan wi’ li chaq’rab’ chi junpak’al ut li rahok chi junpak’al chik—tento taqapaab’eb’ li taqlahom ut toob’eeq chiru xb’ehil li sumwank, ut tento ajwi’ taqaraheb’ li qas qiitz’in naq yooko chi b’eek chiru. Re b’eek chi jo’kan, tento taqasik’ lix musiq’ahom li Dios chirix k’a’ru taqaxaqab’ xwankil ut k’a’ru taqatz’eqtaana, ut chan ru toorahoq ut too’ab’inq rik’in oxloq’ink sa’ xb’aanunkil. Tento sa’ qab’een sa’ li qab’eenik a’in naq ink’a’ toomajelo’q sa’ xpaab’ankileb’ li taqlahom, a’ut naq taqak’ut ajwi’ tz’aqal li rahok ut li uxtaan” (“Li wiib’ xninqal ru taqlahom,” Jolomil ch’utub’aj-ib’ re octubre 2019).

• Li Awa’b’ej Russell M. Nelson kixye: “Eb’ laj santil paab’anel … chi tz’aqal yaal neke’xyal xq’e chixyu’aminkil li xb’een ut xkab’ li xnimaleb’ ru taqlahom. Naq naqara li Dios chi anchal li qach’ool, li Dios naxk’e li qach’ool choq’ reheb’ jalan sa’ jun li sutq’isink jwal ch’ina-us. … Xtenq’ankileb’ jalan—xk’oxlankileb’ jo’ naqak’oxla qib’, malaj mas wi’chik chiru xk’oxlankil qib’—wan choq’ tz’aqal xsahil qach’ool. Ut mas wi’chik wi ink’a’ naxchap rib’ rik’in li qab’e laa’o, malaj nokorisi sa’ li k’a’ru k’aynaqo wi’. Xyu’aminkil xkab’ li xnimal ru taqlahom, a’an lix laawil li wulak jo’ tz’aqal xtzolom li Kristo” (“Xkab’ li xnimal ru taqlahom,” Jolomil ch’utub’aj-ib’ re octubre 2019).

Li k’utuk jo’ li Kolonel

Li k’a’ru yookat chixnumsinkil sa’ xyu’aminkil li evangelio tixk’e aawankil chixwotzb’al jun xnimal ru xnawom aach’ool chirixeb’ li na’leb’ nakak’ut. Xb’aan naq yookat chixyu’aminkil, li Santil Musiq’ej naru tixch’olob’ xyaalal naq yaal li k’a’ru nakak’ut.