“14 mayo. Chan ru naq li Qaawa’ naxtenq’aheb’ li winq ut li ixq chi k’anjelak chi junajeb’ sa’ li sumlaak? Mateo 19–20; Markos 10; Lukas 18,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“14 mayo. Chan ru naq li Qaawa’ naxtenq’aheb’ li winq ut li ixq chi k’anjelak chi junajeb’ sa’ li sumlaak?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
14 mayo
Chan ru naq li Qaawa’ naxtenq’aheb’ li winq ut li ixq chi k’anjelak chi junajeb’ sa’ li sumlaak?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. Chan ru naq xsik’b’al li Qaawa’ naru tooxtenq’a rik’in li qach’a’ajkilal ut lix yalb’al qix?
-
Rilb’aleb’ li wankeb’ sa’ rajb’al ru. Ani naqanaw li naraj ru li qatij ut li qamiiwil?
-
Xb’oqb’aleb’ chixjunil chixk’ulb’al li evangelio. Ma wan li na’leb’ chirix xwotzb’al li evangelio li xe’aatinak wi’ sa’ li jolomil ch’utam reheb’ li saaj? Jo’ tzoleb’aal malaj molam, chan ru naq tootenq’anq?
-
Xjunajinkileb’ li junkab’al chi junelik. Chan ru naq xsik’b’al xk’ab’a’eb’ li qaxe’ qatoon naxkawob’resi li qakomonil rik’in li qaChoxahil Yuwa’ ut li Jesukristo?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Chalen chaq xtiklajik rik’in laj Adan ut xEva, li qaChoxahil Yuwa’ ut li Jesukristo neke’xsik’ xkawob’resinkileb’ ut xjunajinkileb’ li ixaqilb’ej ut li b’eelomej sa’ li sumlaak. Li Kolonel kixye, “Jo’kan naq li winq tixkanab’ lix na’ xyuwa’, tixlaq’ab’ rib’ rik’in li rixaqil ut junajaqeb’ aj chik chi tz’ejwalej te’kanaaq chixkab’ichaleb’ ” (Mateo 19:5). A’ut, laj Satanas naxsik’ ajwi’ chi anchal xmetz’ew chixsachb’aleb’ li sumlaak ut li junkab’al. Maare li saaj ak neke’xnaw naq numtajenaqeb’ li ch’a’ajkilal neke’rahob’tesiik wi’ li sumlaak sa’ li kutan a’in. Ut maare rilomeb’ ajwi’ li ixaqilb’ej ut li b’eelomej chi k’anjelak sa’ junajil ut chixsik’b’al xtenq’ li choxa re xjunajinkileb’. Tz’il rix k’a’ru yoo tana chixk’utb’al chixjunil a’in chiruheb’ li saaj chirix xtawb’al li junajil sa’ li sumlaak. Chan ru taak’ut chiruheb’ naq aajel ru naq te’xkawresi rib’ anajwan choq’ re li sumlaak chalel?
Chiru li xamaan xnume’, eb’ li saaj xe’ru chirilb’al lix k’utum li Kolonel chirix li sumlaak sa’ Mateo 19:4–6. Re xkawresinkil li tzolok, tz’ileb’ rix li raqal a’in, rochb’een li raatin li Awa’b’ej Dieter F. Uchtdorf, “B’antiox reheb’ li neke’kolok” (Jolomil ch’utub’aj-ib’ re abril 2016), malaj jalan chik aatin sa’ li tusleb’ aatin a’in.
Tzolok sa’ komonil
Maare moko k’iheb’ ta li saaj yookeb’ chixk’oxlankil li sumlaak. A’b’anan, tento xkawresinkil qib’ choq’ re, xb’aan naq jwal aajel ru. Naru taapatz’ reheb’ li saaj naq te’xk’oxla naq wiq’wookeb’ chiru li artal sa’ li santil ochoch re te’tz’ape’q sa’ junajil, ut laj tz’aponel naxye re naq tixtz’il rix Mateo 19:4–6. K’a’ru li na’leb’ naqataw sa’eb’ li raqal a’an li tixtenq’a raj jun sumal toje’ xe’sumla. Chan ru naq li b’eelomej ut li ixaqilb’ej “junajaqeb’ ” te’wulaq? Chan ru natenq’an li Kolonel? Naru xb’aanunkileb’ li na’leb’ a’in re xtenq’ankileb’ li saaj chixtawb’al ru chan ru xtawb’al li junajil sa’ li sumlaak.
-
Laj Adan ut xEva a’aneb’ chaab’il reetalil jun b’eelomej ut ixaqilb’ej li neke’k’anjelak sa’ junajil. Naru taak’ut xjalam-uucheb’ (chi’ilmanq Hu reheb’ li Jalam-uuch re li Evangelio [2009], 5) ut taapatz’ reheb’ li saaj naq te’ril Moises 5:1–12, ut te’xsik’ chan ru naq ke’k’anjelak sa’ junajil laj Adan ut li xEva. K’a’ru ke’xb’aanu re naq li Dios kiru chirosob’tesinkil lix sumlajikeb’? Re te’xtaw xkomon lix na’leb’eb’ chirix li junajil sa’ li sumlaak, li saaj naru te’rileb’ li raqal re li loq’laj hu sa’ “Xkomon chik li tenq’.”
-
Li Awa’b’ej Dieter F. Uchtdorf kixye naq sa’ naab’al li tenamit anajwan, “chanchan naq chixjunil naru natz’eqman.” Miqak’oxla a’in chirixeb’ li qasumlajik ut li qajunkab’al; tento b’an “taqak’e qach’ool chixkolb’al ut chixchaab’ilob’resinkileb’ ” (“B’antiox reheb’ li neke’kolok”). Re xka’sutinkil li na’leb’ a’in, naru taapatz’ reheb’ li saaj naq te’xk’oxla jun k’a’aq re ru toje’ xe’xjal li po’jenaq malaj q’eel. K’a’ut naq jalan li sumlaak rik’in li k’a’aq re ru naru xtawb’al reeqaj? Chirix a’an, li awa’b’ej re li tzoleb’aal malaj molam naru taaril li raqal re li raatin li Awa’b’ej Uchtdorf li k’ab’a’inb’il “Xkolb’aleb’ li qasumlajik” ut tixwotz chan ru naq li b’eelomej ut li ixaqilb’ej naru te’k’anjelaq sa’ komonil ut rik’in li Kolonel re xkawob’resinkil lix sumlajikeb’. K’a’ru naru taqab’aanu re xkawresinkil qib’ choq’ re jun li kawil sumlaak re junajil?
-
Naru taatz’iib’a Junajil sa’ li Sumlaak chiru li pizarron ut taapatz’ reheb’ li saaj naq te’xtz’iib’a k’a’ru naru te’xb’aanu li ixaqilb’ej ut li b’eelomej re naq junajaqeb’. Taapatz’ ajwi’ reheb’ naq te’ril “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org) re te’xtaw xna’leb’. K’a’ruheb’ li chaab’ilal neke’rileb’ li saaj rik’ineb’ li rech aj saaj malaj rik’ineb’ li sumsuukeb’ neke’xnaw ru li aajeleb’ ru choq’ re li junajil sa’ li sumlaak? K’a’ut naq aajel ru xkawresinkileb’ ut xyu’aminkileb’ li na’leb’ a’an rik’ineb’ li qakomon ut li qamiiw anajwan? Eb’ li video sa’ “Xkomon chik li tenq’ ” neke’xk’ut chan ru xyu’aminkileb’ junjunq reheb’ li na’leb’ a’in.
-
Wi wankeb’ xpatz’om malaj xk’a’uxl li saaj chirix li jachok-ib’ sa’ li sumlaak, naru teeril b’ayaq re li raatin li Awa’b’ej Dallin H. Oaks, “El divorcio” (Liahona, mayo 2007, 70–73).
Chalen chaq xtiklajik rik’in laj Adan ut xEva, li qaChoxahil Yuwa’ ut li Jesukristo neke’xsik’ xkawob’resinkileb’ ut xjunajinkileb’ li ixaqilb’ej ut li b’eelomej sa’ li sumlaak.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
1 Korintios 11:11; Tzol’leb’ ut Sumwank 42:22; 49:15–17; Moises 3:18, 21–24 (K’a’ut naq aajel ru li junajil sa’ li sumlaak)
-
“Renacimiento del matrimonio,” “Seamos hombres,” “Expresiones de amor” (eb’ li video), ChurchofJesusChrist.org
Li k’utuk jo’ li Kolonel
Li rahok rik’in x’anchalil qach’ool jo’ narahok li Kristo tixk’e xnimal qawankil re xq’unob’resinkil xch’ooleb’ li komon li yookeb’ chi nume’k sa’ ch’a’ajkilal. Re naq eb’ li saaj te’reeka naq ajb’ileb’ ut raab’ileb’, naru taapatz’ reheb’ naq te’tz’aqonq sa’ jun tzolok chal re rik’in xwotzb’al xk’ulumeb’ malaj reek’ahomeb’ chirix jun raqal sa’ li loq’laj hu.