Nachal wi’chik chi awa’b’ejink, xb’aan li xMary R. Sauer

Nachal wi’chik re awa’b’ejink, xb’aan li xMary R. Sauer

28 mayo

K’a’ru naru tinb’aanu anajwan re xkawresinkil wib’ choq’ re li xkab’ xk’ulunik li Kolonel?

Jose Smith—Mateo 1; Mateo 24–25; Markos 12–13; Lukas 21

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?

• Rilb’aleb’ li wankeb’ sa’ rajb’al ru. K’a’ru naru taqaye malaj taqab’aanu re xtenq’ankileb’ li neke’reek’a naq xjunes wankeb’ malaj naq najt wan li qaChoxahil Yuwa’?

• Xb’oqb’aleb’ chixjunil chixk’ulb’al li evangelio. K’a’ru naru taqab’aanu re xtenq’ankileb’ li qas qiitz’in chireek’ankil lix rahom li Jesukristo?

• Xjunajinkileb’ li junkab’al chi junelik. Kʼaʼru chi naʼlebʼ naru taqawotz chiqibʼil qibʼ re xkawob’resinkileb’ li qajunkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

K’a’ru neke’reek’a li saaj chirix li wank sa’ roso’jikeb’ li kutan rub’elaj li xkab’ xk’ulunik li Jesukristo? Yaal naq xuwajel li kutan wanko wi’, nujenaq rik’in ch’a’ajkilal, maa’usilal, ut sachok. A’b’an naq li Kolonel kixch’olob’ li qakutankil chiruheb’ lix tzolom sa’ xraqik xyu’am, kixk’e qoyb’enihom. Kixk’e reetal li q’ojyin yooq chi chalk, a’ut kixyeechi’i naq lix saqen “tixnujob’resi chixjunil li ch’och’ ” naq taak’ulunq wi’chik (chi’ilmanq Jose Smith—Mateo 1:22–26; chi’ilmanq ajwi’ Tzol’leb’ ut Sumwank 45:34–38).

Chan ru taatenq’aheb’ li saaj chixk’eeb’al reetaleb’ li osob’tesink ut usilal neke’tawman sa’ roso’jikeb’ li kutan? K’a’ru taab’aanu re xwaklesinkileb’ xch’ool chixkawresinkil rib’ a’an ut li ruchich’och’ choq’ re li xkab’ xk’ulunik li Kolonel? Rochb’een rilb’aleb’ li raqal re li loq’laj hu choq’ re li xamaan a’in, naru taawil wiib’ oxib’ reheb’ li k’anjeleb’aal neke’tawman sa’ “La segunda venida de Jesucristo” sa’ Temas del Evangelio (topics.ChurchofJesusChrist.org).

Tzolok sa’ komonil

Re xtenq’ankileb’ li saaj chixjultikankil li xe’ril sa’ li loq’laj hu chiru li xamaan a’in, naru taatz’iib’aheb’ li aatin a’in chiru li pizarron: Profeetil aatin chirix lix ch’a’ajkilal ut Profeetil aatin chirix lix nimal ru (chi’ilmanq Russell M. Nelson, “Xk’ulb’al li k’a’ru chalel rik’in paab’aal,” Jolomil ch’utub’aj-ib’ re octubre 2020). Eb’ li saaj naru te’ril Jose Smith—Mateo 1:22–37, ut te’xtz’iib’a li k’a’ru “ch’a’aj” ut li k’a’ru “nim ru” li taak’ulmanq naq maji’ taasutq’iiq li Kolonel. K’a’ut naq aajel ru naq wan qanawom chirixeb’ a’an? Re xtenq’ankileb’ li saaj chixnawb’al chan ru te’xkawresi rib’ choq’ re lix k’ulunik li Kolonel, naru xb’aanunkileb’ li na’leb’ a’in malaj jalan chik xak’uub’ laa’at.

• Eb’ li raqal re li loq’laj hu sa’ “Xkomon chik li tenq’ ” naru te’xtenq’aheb’ li saaj chixtawb’al ru chan ru naq li qaChoxahil Yuwa’ yoo chixkawresinkil li b’e choq’ re li xkab’ xk’ulunik li Ralal. Naru taatz’iib’a chiru li pizarron k’a’ru naxye li loq’laj hu naq taak’ulmanq, ut taapatz’ re li junjunq saaj naq taaril jun reheb’ li raqal. Li saaj naru tixye b’ar wan li na’leb’ chiru li pizarron naxk’am rib’ rik’in li raqal xril, toja’ naq tex’aatinaq chirix li na’leb’ a’an. K’a’ru naqatzol rik’ineb’ li na’leb’ a’in chirix li qak’anjel re kawresink choq’ re li xkab’ xk’ulunik li Kolonel? K’a’ru eek’asinb’ilo chixb’aanunkil jo’ tzoleb’aal malaj molam?

• Li Awa’b’ej Russell M. Nelson kixye: “Chan tab’i’ ru taqak’ul xkab’ichal li profeetil aatin chirix xch’a’ajkilal li qakutankil ut chirix ajwi’ lix nimal ru? Li Qaawa’ kixye re chan ru naq taqab’aanu chi jo’ka’in: “Wi kawresinb’ilex ink’a’ texxuwaq” [Tzol’leb’ ut Sumwank 38:30]” (“Xk’ulb’al li k’a’ru chalel rik’in paab’aal”). Re xtenq’ankileb’ li saaj re naq kawresinb’ilaqeb’ choq’ re lix sutq’ijik li Kolonel, naru taapatz’ reheb’ naq te’ril jun reheb’ li oxib’ na’leb’ kixye li Awa’b’ej Nelson chirix li kawresink-ib’. Patz’ reheb’ naq te’xwotz li xe’xtzol. K’a’ru musiq’anb’ilo chixb’aanunkil re xyu’aminkil lix na’leb’ li Awa’b’ej Nelson?

• Sa’ xtiklajik li esil “Xkawresinkil qib’ choq’ re lix sutq’ijik li Qaawa’,” li Elder D. Todd Christofferson kixch’olob’ chan ruhaq li ruchich’och’ chirix naq ak xk’ulun wi’chik li Jesukristo (Jolomil ch’utub’aj-ib’ re abril 2019). Patz’ reheb’ li saaj naq te’ril li raatin ut naq te’xk’e reetal k’a’ru xjalanil li kutan a’an rik’in li kutankil wanko wi’ anajwan. Naru te’xtz’il rix k’a’ru naru naqab’aanu anajwan re naq kawresinb’ilaqo chi tz’aqonk sa’ li chalel kutan ch’olob’anb’il xb’aan li Elder Christofferson. (Li kaahib’ chi raqal re li raatin li natikla rik’in “Xb’een, aajel ru choq’ re lix sutq’ijik li Kolonel naq …” naru natenq’an.) Chan ru naq lix Iglees li Kolonel nokoxtenq’a chixkawresinkil qib’ choq’ re li xkab’ xk’ulunik? Li Elder Christofferson kixye naq li Iglees wan oxib’ lix k’anjel b’ar wi’ “k’eeb’il xwankil ut taqlanb’il chixb’aanunkil li kawresink li na’ajman ru choq’ re li xkab’ xk’ulunik li Qaawa’.” Eb’ li saaj naru te’xk’e reetal k’a’ruheb’ li k’anjel a’an ut te’aatinaq chirixeb’.

jun saaj ixq yoo chi tzolok

Wi kawresinb’ilo, maak’a’ aj-e naq taqaxuwa li k’a’ru taak’ulmanq rub’elaj li xkab’ xk’ulunik li Kolonel.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Tzol’leb’ ut Sumwank 65:1–2 (Lix k’ojlajik wi’chik li evangelio)

• Tzol’leb’ ut Sumwank 20:8–12 (Lix k’utunik lix Hu laj Mormon)

• Malakias 4:5–6; Tzol’leb’ ut Sumwank 110:13–16 (Lix k’ojlajik wi’chik xlaawil li tijonelil)

• 3 Nefi 21:1, 8 (Lix ch’utub’ankil Israel)

• Jose Smith—Mateo 1:28–30 (Li pleetik, li choqink, ut li maa’usilal)

• Jose Smith—Mateo 1:31 (Li evangelio jultikanb’il chiru li ruchich’och’)

• Gary E. Stevenson, “Jun chaab’il k’ojleb’aal choq’ reheb’ li kutan chalel,” Jolomil ch’utub’aj-ib’ re abril 2020

Li k’utuk jo’ li Kolonel

K’ut chiruheb’ li komon naq wan naq li Musiq’ej tixk’ut li na’leb’ chiruheb’ li moko yeeb’il ta sa’ li tzolok.