jun saaj ixq natijok

11 junio

Chan ru tinnach’oq rik’in lin Choxahil Yuwa’ ut li Jesukristo?

Jwan 14–17

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru toje’ xqanumsi li xkawob’resi lix nawom qach’ool?

• Rilb’aleb’ li wankeb’ sa’ rajb’al ru. Ani taaraj ru qatenq’ ut qatij? K’a’ru naqeek’a naq tento taqab’aanu re tenq’ank?

• Xb’oqb’aleb’ chixjunil chixk’ulb’al li evangelio. Chan ru naq toowanq jo’ saqen chiruheb’ li qakomon ut li qamiiw li ink’a’ neke’xpaab’ li naqapaab’ laa’o?

• Xjunajinkileb’ li junkab’al chi junelik. K’a’ru taqab’aanu re xk’utb’al xkomon chik li rahok ut li tenq’ choq’ re li qajunkab’al ut re xb’aanunkil li us sa’ li qochoch?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Moko na’uuchin ta xjunes rib’ li ru che’ wi toqb’il li ruq’ wan wi’. Jo’kan ajwi’, ink’a’ naru took’iiq sa’ musiq’ej wi jachjooko rik’in li Dios (chi’ilmanq Jwan 15:4–6). Wankeb’ k’iila wankilal li neke’xsik’ qajachb’al rik’in li Dios—wan naq a’an li qaq’etq’etil malaj li qapaaltil, a’ut chi kok’ aj xsa’ yal ak re li qawanjik sa’ li yu’am a’in naq nak’ulman. Naq li Jesus kixch’utub’eb’ lix tzolom roso’jik sut rub’elaj naq taakamsiiq, kixnaw naq sa’ junpaat chik taajache’q rik’ineb’. Jo’kan naq kixk’ut chiruheb’ naq aajel ru li jilosink-ib’ rik’in a’an ut lix Yuwa’—li wank chi laq’lo rik’ineb’ jo’ chanru li ruq’ li che’ rik’in xtoonal. A’an li “kanaak” rik’in chan. Ut kixk’ut chiruheb’ lix tzolom chan ru xb’aanunkil. Li q’axal nim xwankil, a’an naq naxk’e chi uxmank chixjunil a’in rik’in lix mayej re xtojb’al qix.

K’oxla laa wanjik rik’in laa Choxahil Yuwa’ ut li Jesukristo naq nakawil Jwan 14–17. K’oxlaheb’ li saaj li nakatzol ut li rajomeb’ chi nach’ok rik’in li Dios. K’a’ru taab’aanu re xtenq’ankileb’? Naru taatz’il rix Tzol’leb’ ut Sumwank 88:62–68 naq nakakawresi li tzolok.

Tzolok sa’ komonil

K’oxla chan ru taawaklesi xch’ooleb’ li saaj chi aatinak chirix lix k’utum li Kolonel chirixeb’ li xtoonal uva ut li ruq’ che’ sa’ Jwan 15:1–12. Naru taawoksi jun jalam-uuch, malaj jun tz’aqal ruq’ che’ re xtenq’ankileb’ chixk’eeb’al reetal li kixk’ut li Jesus. Naru taapatz’ reheb’ naq te’xseraq’i jo’q’e nach’ xe’reek’a rib’ rik’in li qaChoxahil Yuwa’ ut li Jesukristo—malaj naq najt xe’reek’a rib’ rik’ineb’. K’a’ru neke’xk’ut li raqal a’in chirix li kanaak chi nach’ rik’ineb’? Naru xb’aanunkileb’ li na’leb’ a’in re aatinak chirix li na’leb’ a’an.

• Maare us raj xtz’ilb’al rix li patz’om “K’a’ru nokoxnajtob’resi rik’in li qaChoxahil Yuwa’ ut li Jesukristo?” Naru taatz’iib’a li patz’om chiru li pizarron ut taapatz’ naq te’xsume. Chirix a’an naru tex’aatinaq chirix li naqab’aanu re xnawb’al ru jun li qamiiw malaj qakomon. Chan ru naq a’an juntaq’eet—ut chan ru naq jalan—rik’in xnawb’al ru li qaChoxahil Yuwa’ ut li Jesukristo? Chan ru naq li Jesukristo nokoxtenq’a chi jilok rik’in a’an ut rik’in lix Yuwa’? Waklesi xch’ooleb’ li saaj chirilb’aleb’ li raqal re li loq’laj hu sa’ “Xkomon chik li tenq’ ” li taatenq’anq reheb’ chixsumenkil li patz’om a’an. Maare us choq’ reheb’ li saaj naq te’rileb’ li raqal sa’ ka’kab’il ut te’xwotz li na’leb’ neke’xtaw.

• Maa’ani jwal nach’ wan rik’in li Dios Yuwa’b’ej jo’ wan li Jesukristo, lix Raarookil Alal. K’a’ru naqatzol rik’in li Kolonel chirix xjilosinkil qib’ rik’in li Dios? Eb’ li saaj naru te’xk’oxla li patz’om a’in naq te’ril Lukas 22:41–43; Jwan 6:38; 17:3, 20–23; 3 Nefi 11:11; Tzol’leb’ ut Sumwank 50:43. Chan ru naq junajaqo rik’in li qaChoxahil Yuwa’ ut li Jesukristo?

• Sa’ “Li qaKolonel,” li Elder Michael John U. Teh kixye naq kixk’e reetal “naq lin nawom chirix li Kolonel nim wi’chik chiru chan ru naq ninnaw ru” (Jolomil ch’utub’aj-ib’ re abril 2021). Naru taapatz’ reheb’ li saaj naq te’xye k’a’ru xjalanil li xnawb’al chirix li Jesukristo rik’in li xnawb’al ru. Naru te’aatinaq chirix li yookeb’ chixb’aanunkil re xnawb’al chirix li Jesukristo, ut re ajwi’ xnawb’al ru chi yaal. Naru te’xtz’il rix li raatin li Elder Teh re xtawb’al li na’leb’ kixye chirix xnawb’al ru li Kolonel chi yaal. Chan ru naq x’osob’tesiik li qayu’am rik’in xsik’b’al xnawb’al ru?

• Sa’ li video “La Trinidad - Él me conoce,” wiib’ li saaj aj Ghana neke’xye k’a’ru yookeb’ chixb’aanunkil re nach’ok rik’in li Dios. Eb’ li saaj naru te’ril li video, ut naq yookeb’ chirilb’al, te’xtz’iib’a li na’leb’ neke’xk’ul chirix xchaab’ilob’resinkil lix wanjikeb’ rik’in lix Yuwa’ sa’ Choxa. Patz’ reheb’ naq te’xwotz k’a’ru xe’xtz’iib’a. Wi naru, maare taawulaq chiruheb’ xb’aanunkileb’ lix video a’an b’ar wi’ te’xye chan ru naq neke’xjilosi rib’ rik’in li Dios.

eb’ li saaj ixq neke’ril li loq’laj hu

Naq taqanaw ru li Kolonel ut te’qapaab’ lix taqlahom, tookanaaq sa’ lix rahom (chi’ilmanq Jwan 15:10).

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Jwan 14:6; 1 Timoteo 2:5–6; Jakob 4:11; Mosiah 3:19; Tzol’leb’ ut Sumwank 88:63; Moises 6:52

Li k’utuk jo’ li Kolonel

Li Kolonel kixkawresi rib’ choq’ re lix ruchich’och’il k’anjel rik’in tijok ut kuyuk sa’ re naq nach’ taawanq rik’in lix Yuwa’ (chi’ilmanq Mateo 4:1–2; Lukas 4:1–2). Naq nakakawresi li tzolok, k’e aahoonal chixsik’b’al xb’eresihom laa Choxahil Yuwa’, xb’aan naq yookat chixtzolb’aleb’ li ralal xk’ajol a’an!