Lix tojb’al rix li maak xb’aan li Kolonel: Lix k’ojleb’aal li tz’aqal Kristianil, xb’aan laj Kirk Richards

Lix tojb’al rix li maak xb’aan li Kolonel: Lix k’ojleb’aal li tz’aqal Kristianil, xb’aan laj Kirk Richards

25 junio

Kʼaʼru xyaalalil choq’ we lix tojb’al rix li maak xb’aan li Jesukristo?

Mateo 27; Markos 15; Lukas 23; Jwan 19

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq xoonacho’ rik’in li Kolonel? K’a’ru yooko chixb’aanunkil re wank jo’ a’an?

• Rilb’aleb’ li wankeb’ sa’ rajb’al ru. Ani wan sa’ qak’a’uxl? Chan ru naq taqatenq’a?

• Xb’oqb’aleb’ chixjunil chixk’ulb’al li evangelio. Chan ru naq taqasume lix patz’omeb’ li qamiiw chirix li Iglees re naq taakawob’resiiq xpaab’aaleb’ chirix li Kolonel?

• Xjunajinkileb’ li junkab’al chi junelik. K’a’ru naru taqab’aanu re aatinak chi kok’ aj xsa’ rik’in li qajunkab’al ut li qech alal?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li Elder Elder David A. Bednar kixk’e reetal naq wankeb’ laj santil paab’anel li “chanchan naq wankeb’ xpaab’aal chirix li Kolonel, a’b’an ink’a’ neke’xpaab’ naq naru te’xk’ul lix yeechi’inb’il osob’tesink choq’ reheb’ ” (“Wi nekenaw wu laa’in,” Jolomil ch’utub’aj-ib’ re octubre 2016). Sa’ jalan chik aatin, us ta naqapaab’ naq li Jesukristo kirahob’tesiik ut kikam sa’ xk’ab’a’eb’ xmaak li ruchich’och’, ink’a’ naqanaw ma tz’aqal kirahob’tesiik ut kikam sa’ xk’ab’a’ li qamaak laa’o. Ma aaweek’ahom laa’at a’an? Chan ru naq te’usaaq li saaj wi te’xtaw ru naq lix tojb’al rix li maak xb’aan li Kolonel nak’anjelak tz’aqal sa’ xyu’ameb’ a’an? Chan ru taatenq’aheb’?

K’oxlaheb’ li patz’om a’in naq nakawil resil lix kamik chiru krus li Kolonel chiru li xamaan a’in. Naq nakakawresi li tzolok chirix lix tojb’al rix li maak xb’aan li Kristo, naru taawil li raatin li Awa’b’ej Dallin H. Oaks, “K’a’ru xb’aanuhom li qaKolonel choq’ qe?” (Jolomil ch’utub’aj-ib’ re abril 2021).

Tzolok sa’ komonil

Patz’ reheb’ li saaj naq te’xwotz jun na’leb’ xe’xtzol chiru li xamaan a’in chirix lix kamik li Kolonel chiru krus sa’ li Ak’ Chaq’rab’, ut te’xwotz ajwi’ li neke’reek’a chirix li Kolonel. Re xtenq’ankileb’ chi wotzok, naru taapatz’ “K’a’ru naqatzol chirix li Jesukristo rik’in li kixye ut kixb’aanu sa’eb’ li roso’jikil hoor re xyu’am?” Naru teetz’il rix li hoonal naq li Kolonel, us ta yoo chixk’ulb’al xnimal li rahilal choq’ re chixjunileb’, toj kixtoq’ob’a ruheb’ li ras riitz’in (chi’ilmanq, jo’ eetalil, Lukas 23:34, 39–43; Jwan 19:25–27). Naru teetz’il rix chan ru naq lix tojb’al rix li maak xb’aan li Jesukristo wan choq’ re chixjunileb’, a’ut k’eeb’il ajwi’ chi junjunqal. Naru xb’aanunkileb’ li na’leb’ a’in re aatinak chirix lix tojb’al rix li maak xb’aan li Kolonel.

• Sa’ li xb’een raqal re “K’a’ru xb’aanuhom li qaKolonel choq’ qe?,” li Awa’b’ej Dallin H. Oaks kixye resil jun li ixq li naxk’oxla naq maak’a’ xb’aanuhom li Jesukristo choq’ re. Eb’ li saaj naru te’ril li raqal a’an, ut te’xk’oxla naq xe’wan raj aran ruuchil li Awa’b’ej Oaks. K’a’ raj ru taqaye re li ixq a’an? Naru taak’e re li junjunq saaj jun reheb’ li raqal wan rajlil sa’ li raatin li Awa’b’ej Oaks. Rik’in li na’leb’ neke’xtzol, ut lix k’ulumeb’ a’an sa’ xyu’am, naru te’xwotz chan ru neke’xsume li patz’om “K’a’ru xb’aanuhom li Jesukristo choq’ we?”

• Re teetz’il rix chan ru naq lix tojb’al rix li maak xb’aan li Kolonel nak’anjelak sa’ qayu’am chiqajunilo, naru taatz’iib’a chiru li pizarron li ch’ol aatin Rik’in naq li Jesukristo kirahob’tesiik ut kikam sa’ xk’ab’a’ chixjunil li kristiaan … . Eb’ li saaj naru te’xye chan ru te’xchoy li ch’ol aatin. Toja’ naq taajal li ch’ol aatin, re tixye Rik’in naq li Jesukristo kirahob’tesiik ut kikam sa’ ink’ab’a’ … ut taapatz’ naq te’xyal xchoyb’al wi’chik. Naq li saaj yookeb’ chi aatinak chirixeb’ li aatin a’in, patz’ reheb’ naq te’rileb’ li raqal re li loq’laj hu sa’ “Xkomon chik li tenq’.” K’a’ru neke’xk’ut li raqal a’in chiqu chirix lix wankilal lix tojb’al rix li maak xb’aan li Kolonel sa’ qayu’am chiqajunilo?

• Malaj re xtzolb’aleb’ li raqal re li loq’laj hu sa’ “Xkomon chik li tenq’,” naru taaye reheb’ li saaj naq te’xjal li raatinuleb’ li raqal re naq yookeb’ chi aatinak tz’aqal rik’ineb’ li saaj. Chan ru naq xb’aanunkil a’in naxjal li naqeek’a chirix li na’leb’ sa’eb’ li raqal a’in? Chan ru naru naqak’ut qab’antioxihom chirix lix mayej li Kolonel choq’ qe?

• Li loq’laj b’ich naru tixch’olob’ xyaalal li Jesukristo rik’in wankilal. Naru taapatz’ reheb’ li saaj naq te’chalq chi kawresinb’ileb’ re te’xwotzeb’ li b’ich li neke’xtenq’aheb’ chireek’ankil xwankil lix tojb’al rix li maak xb’aan li Kolonel sa’ xyu’ameb’. (Naru te’ril sa’eb’ li b’ich re li loq’laj wa’ak, malaj sa’ “Jesukristo—Kolonel” sa’ li tusleb’aal na’leb’ re Eb’ li B’ich.) Patz’ reheb’ li saaj naq te’xk’e reetaleb’ li ch’ol aatin reheb’ li b’ich li naxtenq’aheb’ chireek’ankil lix rahom li Kolonel choq’ reheb’. Naru ajwi’ teetz’il rix chan ru naq lix mayej li Kolonel naxtoch’ li qayu’am wulaj wulaj. Chan ru naq wan xwankil sa’ li naqasik’ ru xb’aanunkil?

Li Kristo sa’ Getsemani

Li Kristo sa’ Getsemani, xb’aan laj Dan Burr

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• 1 Korintios 15:20–22; 2 Korintios 12:7–9; Alma 7:11–12; 3 Nefi 11:10–11

• Tad R. Callister, “Lix tojb’al rix li maak xb’aan li Jesukristo,” Jolomil ch’utub’aj-ib’ re abril 2019

Li k’utuk jo’ li Kolonel

Li rahok rik’in x’anchalil qach’ool jo’ narahok li Kristo tixk’e xnimal qawankil re xq’unob’resinkil xch’ooleb’ li komon li yookeb’ chi ch’a’ajko’k rik’in li evangelio. Chi kok’ aj xsa’ eb’ li komon a’in yal neke’raj xnawb’al naq ajb’ileb’ ru ut raab’ileb’.