“9 julio. Chan ru naq li Jesukristo naxjolomi lix Iglees? Hechos 1–5,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“9 julio. Chan ru naq li Jesukristo naxjolomi lix Iglees?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
Chirix lix waklijik chi yo’yo, li Kolonel kixb’eresi lix Iglees rik’ineb’ lix apostol, jo’ laj Pedro.
9 julio
Chan ru naq li Jesukristo naxjolomi lix Iglees?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. K’a’ru xe’aatinak wi’ li obispil sa’ li jolomil ch’utam choq’ reheb’ li saaj sa’ li teep? A’ yaal li xe’aatinak wi’, k’a’ru taqab’aanu?
-
Rilb’aleb’ li wankeb’ sa’ rajb’al ru. K’a’ru naru taqab’aanu re xtenq’ankileb’ li qas qiitz’in jo’ naraj li Kristo naq naqil li na’ajman ru a’b’an ink’a’ naqanaw k’a’ru xyeeb’al?
-
Xb’oqb’aleb’ chixjunil chixk’ulb’al li evangelio. K’a’ru ak xqataw sa’ lix evangelio li Jesukristo li naxsahob’resi qach’ool? Chan ru taqawotz li sahil ch’oolejil a’an rik’ineb’ li qas qiitz’in?
-
Xjunajinkileb’ li junkab’al chi junelik. K’a’ru yooko chixb’aanunkil re xtawb’al xk’ab’a’eb’ li qaxe’ qatoon li neke’raj ru xk’ojob’ankil k’anjel re li santil ochoch? K’a’ru naru taqab’aanu re xtenq’ankileb’ li qas qiitz’in chixtawb’al xk’ab’a’eb’ lix xe’toonil?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Us xnawb’al naq chaab’il li Iglees, naq naxk’ut li yaal, malaj naq naru tatxtenq’a chi chaab’ilo’k. A’b’an us wi’chik xnawb’al naq li Iglees a’an tz’aqal lix Iglees li Jesukristo, xaqab’anb’il xb’aan a’an ut jolominb’il rajlal xb’aan a’an rik’in lix yo’yookil profeet. Sa’ li hu Hechos wan k’iila reetalil naq li Kolonel tz’aqal naxb’eresi lix Iglees. Naq nakawileb’ li ch’ol 1–5, sik’eb’ li eetalil a’an, ut k’oxla chan ru naq nakanaw naq toj yoo chixb’eresinkil lix Iglees anajwan. Chan ru xat-osob’tesiik xb’aan li nawom a’an?
Ma wan xnawom xch’ooleb’ li saaj naq li Iglees wankeb’ wi’ b’eresinb’il tz’aqal xb’aan li Kolonel? Chan ru naq neke’osob’tesiik xb’aan li nawom a’an? Chan ru naru nakatenq’aheb’ chixtawb’al malaj chixkawob’resinkil li xnawom ch’oolej a’an? Rochb’een Hechos 1–5, naru ajwi’ taawil li raatin li Elder Quentin L. Cook, “Li osob’tesiik xb’aan li na’leb’ li neke’xk’ul li profeet, ut li na’leb’ li naqak’ul laa’o re xb’eresinkil qayu’am” (Jolomil ch’utub’aj-ib’ re abril 2020).
Tzolok sa’ komonil
Re xtikib’ankil li tzolok, naru taatz’iib’a Jesukristo kixb’eresi li Iglees rik’in li k’utb’esinb’il na’leb’ kixk’e reheb’ lix apostol chiru li pizarron. Eb’ li saaj naru te’xwotz k’a’ru xe’ril sa’ Hechos 1–5 li naxk’ut xyaalal li ch’ol aatin a’an. (Wi neke’raj xtenq’, naru taaye reheb’ naq te’ril Hechos 1:1–8; 2:36–39; 4:1–13, 31–33.) Ma wan reetalil naqil laa’o anajwan naq li Jesukristo naxb’eresi lix Iglees chi jo’kan ajwi’ sa’ li qakutankil? Naru xb’aanunkileb’ li na’leb’ a’in re xtenq’ankileb’ li saaj chixkawob’resinkil lix nawomeb’ xch’ool chirix li na’leb’ a’in.
-
Naru taakawresi wiib’ oxib’ li patz’om chanchaneb’ a’in: Chan ru naq li Jesukristo naxb’eresi lix Iglees? Chan ru taqanimob’resi li qapaab’aal naq li Jesukristo yoo chixb’eresinkil li Iglees? K’a’ut naq nakak’ulub’aheb’ lix profeet ut lix apostol li Qaawa’? K’e jun li patz’om re li junjunq chi saaj, ut patz’ reheb’ naq te’xtz’il rix li patz’om ut te’xk’oxlaheb’ li raqal re li loq’laj hu li naru chixsumenkil (wi neke’raj xtenq’, naru xtawb’al li na’leb’ sa’ “Xkomon chik li tenq’ ”). K’e xhoonaleb’ chixwotzb’al ut chi aatinak chirix li xe’xtzol.
-
Re xtenq’ankileb’ li saaj chixk’eeb’al reetal chan ru naq li Qaawa’ naxb’eresi lix Iglees, naru taapatz’ reheb’ naq te’ril li xb’eenil raqal re li raatin li Elder Quentin L. Cook sa’ “Li osob’tesiik xb’aan li na’leb’ li neke’xk’ul li profeet, ut li na’leb’ li naqak’ul laa’o re xb’eresinkil qayu’am.” Eb’ li saaj naru te’xwotz jun na’leb’ re li raatin li natenq’an reheb’ chixnawb’al naq li Jesukristo tz’aqal yoo chixb’eresinkil lix Iglees. K’a’ chik li na’leb’ naqataw sa’eb’ li raqal re li loq’laj hu sa’ “Xkomon chik li tenq’ ”?
-
Us raj ajwi’ naq li saaj te’xtzol chan ru naq li Kolonel yoo chixb’eresinkil lee teep malaj uq’ej. Naru taapatz’ reheb’ li saaj naq te’xwotz reetalil naq li Qaawa’ yoo chixb’eresinkileb’ laj jolominel sa’ li teep, jo’ ajwi’ li awa’b’ej re tzoleb’aal malaj molam. Chiru li xamaan rub’elaj li tzolok, naru taapatz’ re junjunq laj b’eresinel naq te’xwotz—sa’ li tzoleb’aal malaj sa’ internet—chan ru naq neke’b’eresiik xb’aan li Qaawa’. Eb’ li saaj naru te’xtaw xkomon chik li na’leb’ sa’ li raatin li Awa’b’ej Henry B. Eyring, “Li Qaawa’ najolomin re lix Iglees” (Jolomil ch’utub’aj-ib’ re octubre 2017). K’a’ut naq aajel ru xpaab’ankil naq li Qaawa’ naxmusiq’aheb’ laj jolominel sa’ li qateep?
-
Wankeb’ li neke’xk’oxla naq wi chaab’ilo ut naqab’aanu li us, ink’a’ naqaj ru jun iglees. Naru taapatz’ reheb’ li saaj k’a’ raj ru te’xye chirix li na’leb’ a’an. Sa’ “Na’ajman ru jun li Iglees” (Jolomil ch’utub’aj-ib’ re octubre 2021), li Awa’b’ej Dallin H. Oaks kixch’olob’ k’a’ut naq aajeleb’ ru chixjunileb’ li iglees, jo’ ajwi’ lix Iglees li Qaawa’ li k’ojob’anb’il wi’chik. Eb’ li saaj naru te’ril li esil a’an sa’ ka’kab’il, sa’ kok’ ch’uut, malaj sa’ komonil, ut te’xwotz li na’leb’ neke’xtaw.
Li Qaawa’ naxb’eresi lix Iglees rik’in k’utb’esinb’il na’leb’, ut naxk’e ajwi’ reheb’ li awa’b’ejil re tzoleb’aal ut molam.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
Li k’utuk jo’ li Kolonel
Re xb’oqb’al li Musiq’ej sa’ li nakak’ut, waklesi xch’ooleb’ li saaj chixwotzb’al lix nawomeb’ xch’ool chirix li yaal li yookex chixtzolb’al.