“23 julio. K’a’ru naraj naxye wank jo’ xtzolom li Jesukristo? Hechos 10–15,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“23 julio. K’a’ru naraj naxye wank jo’ xtzolom li Jesukristo?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
Li Jesus ut eb’ lix tzolom, © Balage Balogh/Art Resource, NY
23 julio
K’a’ru naraj naxye wank jo’ xtzolom li Jesukristo?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. B’ar ak xqil li ruq’ li Qaawa’ sa’ li qayu’am?
-
Rilb’aleb’ li wankeb’ sa’ rajb’al ru. Chan ru naq taqatenq’a qib’ chiqib’il qib’ sa’ li naqanumsi?
-
Xb’oqb’aleb’ chixjunil chixk’ulb’al li evangelio. Chan ru naq taqoksi li tecnologia re xwotzb’al li evangelio?
-
Xjunajinkileb’ li junkab’al chi junelik. K’a’ru yooko chixb’aanunkil re xtenq’ankil li qajunkab’al chi chalk rik’in li Kristo?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Sa’ li ch’ol 11 re Hechos yeeb’il resil naq “eb’ li xtzolom li Jesus ke’xtikib’ k’ab’a’iik Kristiano” (raqal 26). Li nawe’k ru jo’ xtzolom li Kristo ut li k’ab’a’iik sa’ xk’ab’a’, a’an jun santil osob’tesink ut teneb’ank. Li Awa’b’ej M. Russell Ballard kixye: “Ma naqak’e reetal jo’ nimal li osob’tesinb’ilo wi’ sa’ xk’ulb’al sa’ qab’een lix k’ab’a’ lix Raarokil Alal li Dios, li Junaj Yo’lajenaq chiru? Ma naqataw ru xnimal a’an? Lix k’ab’a’ li Kolonel a’an li junaj chi k’ab’a’ej rub’el choxa taaruuq taakole’q wi’ li winq” (“La importancia de un nombre,” Liahona, noviembre 2011, 79).
K’a’ru naraj naxye choq’ aawe wank jo’ aj Kristiano—jun xtzolom li Jesukristo? K’a’ru naraj naxye choq’ reheb’ li saaj sa’ laa tzoleb’aal malaj molam? Chan ru naq xk’ulb’al lix k’ab’a’ sa’ aab’een nakatxjal? Naru ajwi’ taak’oxlaheb’ li hoonal naq xatmusiq’aak xb’aan jun kristiaan li nak’anjelak jo’ tz’aqal xtzolom li Kristo.
Naq nakakawresi li tzolok, rochb’een Hechos 10–15, naru ajwi’ taawileb’ li esil re li jolomil ch’utub’aj-ib’ sa’ “Xkomon chik li tenq’.”
Tzolok sa’ komonil
Re xtenq’ankileb’ li saaj chixtawb’al ru chan ru wank jo’ xtzolom li Jesukristo, naru taapatz’ reheb’ naq te’xchoy li ch’ol aatin a’in: “Jun xtzolom li Jesukristo a’an …” Naru te’ril Hechos 11:19–26, ut te’xsik’ sa’eb’ li raqal 21, 23–24, 26 k’a’ru ke’xb’aanu li komon re li Iglees li naxk’ut naq tzolomeb’ a’an. Chan ru naq xtaaqenkil li Jesukristo naxjal li naqak’oxla ut naqab’aanu? Xb’aanunkileb’ li na’leb’ a’in naru texxtenq’a chi aatinak chirix a’an.
-
Naru teetz’il rix k’a’ru jun lix tzolom li Kristo (chi’ilmanq li raatin li Elder Robert D. Hales sa’ “Xkomon chik li tenq’ ”). Naru taapatz’ reheb’ li saaj naq te’xwotz k’a’ru kixk’ut li Jesukristo li naxwaklesi xch’ooleb’, ut k’a’ru xe’xtzol rik’ineb’ lix b’aanuhom. Naru te’rileb’ li raqal re li loq’laj hu sa’ “Xkomon chik li tenq’,” malaj jalaneb’ chik li ak neke’xnaw ru. Naru te’xtz’iib’a chiru li pizarron k’a’ru xe’xtzol chirix li Kolonel sa’eb’ li raqal a’in. Toja’ naq te’xtz’il rix sa’ komonil chan ru naq te’ruuq chixpaab’ankileb’ li na’leb’ ut li b’aanuhom xe’xtz’iib’a chiru li pizarron.
-
Patz’ reheb’ li saaj naq te’xk’oxla k’a’ru naraj naxye li wank jo’ aj Kristiano. Naru te’xtz’iib’aheb’ li chaab’ilal te’xtaw sa’ xyu’am li ani naxtaaqe li Jesukristo (chi’ilmanq, jo’ eetalil, Jwan 13:34–35). Naru taak’eheb’ li saaj sa’ wiib’ li ch’uut, ut taapatz’ reheb’ naq te’ril jun reheb’ li esil a’in re te’xtaw xkomoneb’ chik li chaab’ilal: Elder Terence M. Vinson, “Tz’aqal xtzolomeb’ li Kolonel” (Jolomil ch’utub’aj-ib’ re octubre 2019) ut Elder Massimo De Feo, “Li tz’aqal rahok: Li tz’aqal reetalil chixjunileb’ lix tz’aqal tzolom li Jesukristo” (Jolomil ch’utub’aj-ib’ re abril 2018). Patz’ reheb’ li saaj naq te’xk’oxla li na’leb’ xe’xtz’iib’a li neke’raj xyu’aminkil.
-
Naru taapatz’ reheb’ li saaj k’a’ru xyaalalil choq’ reheb’ li k’ab’a’iik rik’in xk’ab’a’ li Jesukristo. Naru te’xseraq’i xnumsihomeb’ naq jun kristiaan kixnaw naq a’aneb’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. K’a’ru naqeek’a chirix li nawe’k-u jo’ aj taaqehom re li Jesukristo ut jo’ komon sa’ lix Iglees? Eb’ li saaj naru ajwi’ te’xtz’il rixeb’ li raqal re li loq’laj hu malaj li esil sa’ “Xkomon chik li tenq’,” ut te’xsik’ li na’leb’ naxmusiq’aheb’ chixk’amb’al sa’ tiikilal lix k’ab’a’ li Jesukristo, li ak xe’xk’ul sa’ xb’eeneb’. Chan ru naq li k’ab’a’iik rik’in lix k’ab’a’ li Jesukristo naxjal li naqasik’ ru xb’aanunkil?
Jo’ komon sa’ lix Iglees li Kristo, laa’o lix tzolom ut nokok’ab’a’iik rik’in lix k’ab’a’ a’an.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Mateo 5:38–47; 6:19–21; 7:1–5; 25:31–40; Lukas 10:25–37; Jwan 13:34–35; 14:15 (Eb’ lix k’utum li Jesukristo)
-
Mateo 4:1–11; Markos 6:35–44; Lukas 4:16–19; 22:39–42; 23:33–34; Hechos 10:38 (Eb’ lix b’aanuhom li Jesukristo)
-
Jeremias 15:16; Mosiah 5:7–15; Alma 46:12–15; 3 Nefi 27:3–8 (Xk’ulb’al sa’ qab’een lix k’ab’a’ li Kolonel)
-
Lisa L. Harkness, “Roxloq’inkil lix k’ab’a’,” Jolomil ch’utub’aj-ib’ re octubre 2019
-
Paul B. Pieper, “Chixjunileb’ tento xk’ulb’al sa’ xb’eeneb’ li k’ab’a’ej k’eeb’il xb’aan li Yuwa’b’ej,” Jolomil ch’utub’aj-ib’ re octubre 2018
-
Li Elder Robert D. Hales kixye: “K’a’ru naraj naxye li wank jo’ xtzolom li Qaawa’ Jesukristo? Jun li tzolom, a’an jun li ani ak xk’ul li kub’iha’ ut wan xch’ool chixk’ulb’al sa’ xb’een lix k’ab’a’ li Kolonel ut chixtaaqenkil. Jun li tzolom naxyal xq’e chi wulak jo’ li Jesus rik’in xpaab’ankileb’ lix taqlahom arin, jo’ chanru naxb’aanu jun li tzolonel rik’in lix k’utunel.
Wankeb’ li neke’xk’oxla naq li aatin tzolom ka’ajwi’ naraj naxye “aj taaqenel.” A’b’an tz’aqal li tzolomil, a’an jun li wanjik. A’an naraj naxye naq ink’a’ yal taab’aanumanq jun tzolok chirix junjunq li na’leb’. Eb’ li tzolom neke’xk’e xna’leb’ li Kristo sa’ xnoq’al li raameb’, jo’ sa’ jun musiq’ejil kemok” (“Li wulak jo’ xtzolom li Qaawa’ Jesukristo,” Jolomil ch’utub’aj-ib’ re abril 2017
Li k’utuk jo’ li Kolonel
Jo’ aj k’utunel, naru taab’eresi li aatinak li nawaklesin ch’oolej, chi chaab’ilob’resinb’il xb’aaneb’ lix numsihom ut lix nawomeb’ xch’ool li komon.