Li tz’aqal rahok: Li tz’aqal reetalil chixjunileb’ lix tz’aqal tzolom li Jesukristo
Lix evangelio li Jesukristo jayalinb’il sa’ xrahom li Yuwa’b’ej ut li Kolonel choq’ qe ut li qarahom choq’ reheb’ ut li qarahom chiqib’il qib’.
Naqara ut naqapatz’ li Awa’b’ej Thomas S. Monson, ut naqara ut naqaxaqab’ xwankil li Awa’b’ej Russell M. Nelson. Li Awa’b’ej Nelson wan xchaab’il na’aj sa’ li waam.
Naq saaj yuwa’b’ejin chaq, li walal, oob’ chihab’ chaq xyu’am, kisutq’i chaq sa’ kab’l chirix li tzolok sa’ jun kutan ut kixpatz’ re lix na’, “K’a’ru lix trab’aaj lin yuwa’?” Kixch’olob’ naq li rech tzolonelil ke’xyoob’ seraq’ik chirix xtrab’aajeb’ lix yuwa’eb’. Jun kixye naq lix yuwa’ a’an li jolomil aj k’aak’alenel tenamit, ut jun chik kixye chi kaw naq lix yuwa’ a’an aj jolomilel re jun nimla k’ayib’aal.
Naq kipatz’e re li walal chirix lix yuwa’, ka’ajwi’ kixye, “Lin yuwa’ nak’anjelak sa’ jun li oficina rik’in jun li ulul ch’iich’.” Ut naq kiril naq lix sumehom moko kixsacheb’ ta xch’ool li ramiiw, kixye ajwi’, “Ut, relik chi yaal, lin yuwa’ a’an aj jolominel re chixjunil li choxa ch’och’.”
Nink’oxla naq aran kiraqe’ lix seraq’ikeb’.
Kinye re li wixaqil, “Xwulak li hoonal re xk’utb’al chiru junjunqaq li na’leb’ chirix li k’uub’anb’il na’leb’ re li kolb’a-ib’, ut ani tz’aqal aj jolominel re.”
A’ut naq kiqak’ut chiru li qakok’al li k’uub’anb’il na’leb’ re li kolb’a-ib’, lix rahomeb’ choq’ re li qaChoxahil Yuwa’ ut li Kolonel kik’ihan jo’ chanru naq yookeb’ chixtawb’al ru naq a’in jun k’uub’anb’il na’leb’ re rahok. Lix evangelio li Jesukristo jayalinb’il sa’ xrahom li Yuwa’b’ej ut li Kolonel choq’ qe ut li qarahom choq’ reheb’ ut li qarahom chiqib’il qib’.
Li Elder Jeffry R. Holland kixye: “Li xb’een xnimal ru chaq’rab’ re li junelik q’e kutan, a’an naq laa’o taqara li Dios chi anchal li qach’ool, li qametz’ew, li qak’a’uxl ut li qakawilal, a’an li xb’een xnimal ru taqlahom. A’ut li xb’een xnimal ru yaal re li junelik q’e kutan a’an naq li Dios nokoxra laa’o chi anchal lix ch’ool, xmetz’ew, xk’a’uxl, ut xkawilal a’an. Li rahok a’in, a’an lix k’ojleb’aal li junelik q’e kutan, ut tento raj taawanq choq’ xk’ojleb’aal li qayu’am re wulaj wulaj.”
Jo’ lix k’ojleb’aal li qayu’am re wulaj wulaj, li tz’aqal rahok a’an tz’aqal aajel ru choq’ re chixjunileb’ lix tz’aqal tzolom li Jesukristo.
Li profeet aj Mormon kixk’ut, “Joʼkan ut, ex was wiitzʼin raarookex inbʼaan, tijonqex chiru li Yuwaʼbʼej chi anchal xmetzʼew eechʼool, re texnujaq rikʼin li rahok aʼin, li naxkʼe saʼ xbʼeenebʼ chixjunil li tzʼaqal nekeʼtaaqenk re li Jesukristo, li Ralal.”
Relik chi yaal naq li rahok a’an li tz’aqal reetalil chixjunileb’ lix tz’aqal tzolom li Jesukristo.
Eb’ li tz’aqal aj tzolom neke’xra li k’anjelak chiru ras riitz’ineb’. A’aneb’ neke’xnaw naq li k’anjelak chiru qas qiitz’in a’an reetalil li tz’aqal rahok ut jun sumwank li ke’ok wi’ naq ke’kub’e xha’. Maak’a naxye k’a’ru lix b’oqb’aleb’ sa’ li Iglees malaj k’aru xk’anjeleb’ sa’ lix teepaleb’, neke’reek’a xnimal rajom xch’ooleb’ chi rahok ut chi k’anjelak chiru li Qaawa’ ut chiruheb’ lix komon.
Eb’ li tz’aqal aj tzolom neke’xra xkuyb’al li maak. A’aneb’ neke’xnaw naq li xtojb’al rix li maak li kixb’aanu li Kolonel wan xwankil sa’ xb’een chixjunil li qamaak ut li qapaaltil. Neke’xnaw naq li tz’aq kixtoj a’an, a’an “naxtoj chixjunil.” Li jaar paay chi musiq’ejil tojleb’ li wankeb’ rilom rik’in li maakob’k, li palto’k, malaj li q’etok aatin, wankeb’ rub’el xwankil. Eb’ li tz’aqal aj tzolom junelik wankeb’ chi kuyuk maak ut junelik neke’xpatz’ xkuyb’al xmaak.
Ex was witz’in raarookex inb’aan, wi yookeb’ chi ch’a’ajko’k sa’ xtawb’al eemetz’ew re kuyuk maak, meek’oxla li b’arwan ke’xb’aanu chaq eere lee komon, chek’oxla b’an li kixb’aanu li Qaawa’ choq’ eere, ut chi jo’kan teetaw tuqtuukilal rik’ineb’ li osob’tesink aj tojol-ix re lix tojb’al rix li maak li kixb’aanu.
Eb’ li tz’aqal aj tzolom neke’xra xkanab’ankil rib’ chiru Qaawa’ rik’in tuqtuukilal sa’ raameb’. Tuulaneb’ ut kub’enaqeb’ ratawom xb’aan naq neke’xra. Wan tz’aqal xpaab’aaleb’ re xk’ulb’al chi tz’aqal li naraj a’an, ink’a’ ka’ajwi’ sa’ li naxb’aanu a’an, a’b’an sa’ chan ru ut jo’q’e naxb’aanu. Eb’ li tz’aqal aj tzolom neke’xnaw naq eb’ li tz’aqal osob’tesink moko junelik ta jo’ li neke’raj a’an, a’b’an b’i’ jo’ naraj li Qaawa’ choq’ reheb’ a’an.
Eb’ li tz’aqal aj tzolom neke’xra li Qaawa’ numtajenaq wi’chik chiru xraab’al li ruchich’och’ ut xaqxookeb’ ut ink’a’ neke’eek’an sa’ lix paab’aaleb’. Junelik kaweb’ ut tiikeb’ rib’ sa’ jun ruchich’och’ jwal najala ut nasachok ch’oolej. Eb’ li tz’aqal aj tzolom neke’xra rab’inkil lix yaab’ xkux li Musiq’ej ut xyaab’eb’ xkux li profeet, ut ink’a’ neke’sache’ xch’ool xb’aaneb’ li xyaab’ kuxej re li ruchich’och’. Eb’ li tz’aqal aj tzolom neke’xra “xaqliik sa’eb’ li na’ajej sant” ut neke’xra xsantob’resinkil ru li na’ajej xaqxookeb’ wi’. Yalaq ta b’ar neke’xik, neke’xk’am xrahom li Qaawa’ ut li tuqtuukilal re xch’ooleb’ li ras riitz’in. Eb’ li tz’aqal aj tzolom neke’xra xpaab’ankil lix chaq’rab’ li Qaawa’, ut neke’xpaab’ xb’aan naq neke’xra li Qaawa’. Naq neke’xra ut neke’xk’uula lix sumwank, li raameb’ neke’ak’ob’resiik ut jalb’ileb’ tz’aqal chan ru wankeb’.
Li tz’aqal rahok a’an li tz’aqal reetalil chixjunileb’ lix tz’aqal tzolom li Jesukristo.
Rik’in lin na’ kintzolok chaq chirix li tz’aqal rahok. A’an moko komon ta sa’ li Iglees sa’ li kutan a’an.
Sa’ jun kutan naab’al chihab’ chaq, kinwulak rula’aninkil lin na’, li jwal yaj. Laa’in kinnaw naq taakamq, a’b’an jwal yoo ink’a’uxl chirix naq yoo chi rahob’tesiik. Maak’a’ kinye, a’b’an a’an naxnaw wu chi us, ut kixye, “Nawil naq yoo aak’a’uxl chi us.”
Chirix a’an, choq’ xsachik inch’ool, kixpatz’ we rik’in xlub’ik lix yaab’ xkux, “Ma naru taak’ut chiwu chan ru li tijok? Tinwaj tijok choq’ aawe. Ninnaw naq natikla chi kama’in, “At inChoxahil Yuwa’,” a’b’an k’a chik ru tinye chirix a’an?”
Naq kinwiq’la chire lix ch’aat ut naq a’an kitijok chiwix, kiweek’a jun rahok li maajun wa week’ahom chaq. A’an jun tuulan rahok, tz’aqal, ut saq ru. Us ta maak’a’ naxnaw chirix li k’uub’anb’il na’leb’ re li kolb’a-ib’, a’an wan sa’ xch’ool jun xk’uub’anbil na’leb’ re rahok, li k’uub’anbil na’leb’ re xrahom jun na’b’ej choq’re li ralal. Wan xrahilal, ut jwal nach’a’ajko’ chaq chiru risinkil xmetz’ew re tijok. Ka’ch’in ajwi’ nawab’i xyaab’ xkux, a’b’an chi yaal kiweek’a lix rahom.
Jultik we naq kink’oxla, “Chan ru naq junaq jwal nim xrahilal taaruuq chi tijok chirix anihaq chik? A’an tab’i’ li taaraj ru tenq’aak.”
Lix sumenkil a’an kiwulak sa’ ink’a’uxl chi saqen ru: li tz’aqal rahok. A’an jwal nikinixra jo’kan naq kixkanab’ xk’oxlankil rib’. Sa’ xhoonal q’axal rahob’tesinb’il wi’, lix rahom chiwix jwal nim wi’chik chiru xraab’al rib’ a’an.
Anajwan, ex was wiitz’in, ma maawa’ tab’i’ a’in li kixb’aanu li Kolonel? Jo’kan b’i’, sa’ jun rilob’aal maak’a roso’jik ut jwal nim wi’chik ru. A’b’an, sa’xyi xnimal ru xrahilal, sa’ li awimq chiru li q’ojyin a’an, a’an li kiraj ru tenq’aak, naq kirahob’tesiik chi naab’al ut chi ink’a’ naru xtawb’al ru. A’b’an sa’ xraqik, a’an kisach xch’ool xk’oxlankil rib’ ut kitijok chiqix ut kixtoj xtz’aq toj reetal naq kitz’aqlok ru. Chan ru naq kiru chixb’aanunkil? B’antiox re naq kixra chi tz’aqal li Yuwa’b’ej li kitaqlank chaq re, jo’ ajwi’ tz’aqal kooxra. A’an kixra li Yuwa’b’ej ut kooxra laa’o sa’ xb’een xraab’al rib’ a’an.
Kixtoj xtz’aq li moko xb’aanuhom ta a’an. Kixtoj rix li maak moko re ta a’an. K’a’ut? Li tz’aqal rahok. Naq kixtoj xtz’aq chi tz’aqal, a’an kiruhan chixyeechi’inkileb’ qe li osob’tesink li kixtoj chaq ru, wi laa’o taqajal raj qak’a’uxl. K’a’ut naq kixyeechi’i a’in? Wi’chik, ut junelik, li tz’aqal rahok.
Li tz’aqal rahok a’an li tz’aqal reetalil chixjunileb’ lix tz’aqal tzolom li Jesukristo.
Li Awa’b’ej Thomas S.Monson kixye, “Nintz’aama naq taqatikib’ anajwan, sa’ ajwi’ li kutan a’in, xk’utb’al li qarahom chiruheb’ li ralal xk’ajol li Dios, maare qajunkab’al, qaamiiw, maare yal ka’ajwi’ naqanaweb’ ru malaj ink’a’ naqanaweb’ ru. Naq nokowakli eq’la, wanqo chi anchal qach’ool chi sumenk rik’in rahok ut chaab’ilal rik’in a’ yaal k’a’ru nanume’ sa’ li qab’e.”
Ex was wiitz’in, lix evangelio li Jesukrito a’an jun evangelio re rahok. Li xnimal ru taqlahom na’aatinak chirix li rahok. Choq’ we, chixjunil wan sa’ li rahok. Li xrahom li Yuwab’ej, li kixmayeja chaq li Ralal sa’ qa k’ab’a’. Lix rahom li Kolonel, li kixmayeja chixjunil sa’ qak’ab’a’. Lix rahom junaq na’b’ej malaq yuwa’b’ej li te’xk’e raj yalaq k’a’ru choq’ reheb’ li ralal xk’ajol. Lix rahomeb’ li ani neke’tenq’ank chi ink’a’ k’utk’u ut ink’a’ mas nawb’ileb’ ru qab’aan, a’b’an nawb’ileb’ ru chi us xb’aan li Qaawa’. Lix rahomeb’ li ani junelik neke’xkuy xmaakeb’ chixjunil. Lix rahomeb’ li ani neke’wotzok us ta moko k’i ta li neke’xk’ul.
Ninra lin Choxahil Yuwa’. Ninra lin Kolonel. Ninra li evangelio. Ninra li Iglees a’in. Ninra lin junkab’al. Ninra li chaq’al ru yu’am a’in. Choq’we, chixjunil wan sa’ li rahok.
Chiwanq taxaq li kutan a’in re xjultikankil lix waklijik chi yo’yo li Kolonel choq’ jun kutan re x’ak’ob’resinkil qamusiq’ chiqajunjunqal. Chiwanq taxaq li kutan a’in choq’ xtiklajik jun yu’am nujenaqaq rik’in rahok, a’anaq “xk’ojleb’aal li qayu’am re wulaj wulaj.”
Chinujaq taxaq li qaam rik’in xtz’aqal rahom li Kristo, a’an tz’aqal li reetalil chixjunileb’ lix tz’aqal tzolom li Jesukristo. A’an lin tij, sa’ xk’ab’a’ li Jesukristo, amen.