Kristo anajwan xwakli
A’an a’in li domingo re Paswa. Rik’in oxloq’ ninkanab’ xnawom inch’ool chirix ut chi tiik ru ink’a’uxl ninch’olob’ xyaalal li yo’yookil Kristo—a’an li “kikam, kimuqe’, ut kiwakli wi’chik sa’ rox li kutan, ut kitaqe’ sa’ choxa.”
Ex was wiitz’in raarookex inb’aan, naq toj ka’ch’ineb’ li qalal qak’ajol, kinseraq’i reheb’ li seraq’ chirix li kok’ tz’i’ ut kinb’ichaheb’ li b’ich, jo’ “Kristo anajwan xwakli.” Wan naq kinjaleb’ li aatin: “Anajwan xq’ehil naq texwarq—aleluya.” Rajlal ke’war sa’ junpaat; malaj ut neke’xnaw naq wi nink’oxla naq warenaqeb’, ink’a’ chik tinb’ichanq.
Ink’a’ naru xcholob’ankil rik’in aatin—li waatin laa’in b’an—li week’ahom chalen chaq naq li Awa’b’ej Russell M. Nelson kixchap li wuq’ rik’in rahok, wan li xSusan raaro inb’aan chink’atq, ut kixk’e we li loq’laj b’oqom a’in re li Qaawa’. Jwal xsach inch’ool xb’aan ut xinyaab’ak naab’al sut chiruheb’ li kutan toje’ xnume’.
Sa’ li Paswa a’in, ninb’icha chi sa inch’ool, “Aleluya.” Li b’ich chirix lix rahom aj tojol-ix li qaKolonel waklijenaq chi yo’yo naxnima ru lix wankilaleb’ li sumwank (li nokoxlaq’ab’ rik’in li Dios ut chiqib’il qib’) ut naxnima ru lix tojb’al rix li maak kixb’aanu li Jesukristo (li nokoxtenq’a chirisinkil chiqix li ruchich’och’il winq malaj ixq ut chixkanab’ankil qib’ chi q’unb’esiik xb’aan li Santil Musiq’ej).
Sa’ xkab’ichal, eb’ li qasumwank ut lix tojb’al rix li maak xb’aan li Kolonel neke’xk’e wankilal ut neke’xk’e loq’alil. Sa’ xkab’ichal nokohe’xtenq’a chi chapok ut chi kanab’ank. Sa’ xkab’ichal nokohehe’xki’ob’resi, nokohe’xkol, nokohe’xsantob’resi, ut neke’xtoj qix, jo’ ajwi’ li komonil wanko wi’ rik’ineb’ li ani jwal naqara.
Li Profeet aj Jose Smith kixye, “Maare wankebʼ li teʼkʼoxlanq re naq qʼaxal kawil chʼoolejil li tzolʼlebʼ nokoʼaatinak wiʼ—jun li wankilal li natzʼiibʼank esil malaj nabʼakʼok saʼ ruchichʼochʼ ut nabʼakʼok saʼ choxa. Aʼbʼanan chiru li jar qʼehil wanjenaq wiʼ li ruchichʼochʼ, yalaq joʼqʼe naq li Qaawaʼ kixkʼe jun xkʼojlajik li tijonelil re junaq winq rikʼin tzʼaqal li kʼutbʼesink, malaj re jun chʼuutaqebʼ li winq, junelik nakʼeeman li wankilal aʼin.”
Chi kama’an ajwi’ anajwan. Eb’ li loq’laj suwmank ut k’ojob’anb’il k’anjel, li maab’ar chik neke’tawman, k’ulb’ileb’ sa’eb’ li 159 chi loq’laj rochoch li Qaawa’ sa’ 43 chi tenamit. Eb’ li yeechi’inb’il osob’tesink neke’chal rik’in lix laawil li tijonelil, li tzol’leb’, ut li wankilal k’ojob’anb’il wi’chik. Neke’xk’utb’esi li qapaab’aal, chan ru noko’ab’in, ut li yeechi’ihom re lix Santil Musiq’ choq’ qe sa’ li qatasal tenamit, sa’ xq’ehil li yu’am arin ut li junelik q’e kutan.
Ex was wiitz’in raarookex inb’aan sa’ li junjunq tenamit, junkab’al, ut aatinob’aal, ut li qaIglees chiru chixjunil li ruchich’och’, b’antiox eere lee yo’yookil paab’aal, yo’onihom, ut tz’aqal rahom sa’ li junjunq lee yokb’. B’antiox eere lee rokik sa’ lix ch’utub’ankil lix tz’aqalil li evangelio k’ojob’anb’il wi’chik.
Ex was wiitz’in raarookex inb’aan, qas qiitz’in qib’ chiqajunil. Naru naqajunaji qib’ sa’ jun k’a’uxl ut sa’ rahok, sa’ chixjunil li k’a’aq re ru ut sa’ chixjunil na’ajej.Jo’ naxb’oq li Qaawa’ Jesukristo, yalaq b’ar wanko, yalaq k’a’ru naqanumsi, “chexchalq ut cheril.”
Sa’ li kutan a’in ninyeechi’i wib’ sa’ tuulanil chi anchal lix metz’ew li waam, maak’a’ naxye chan ruhaq li metz’ew a’an, chiru li Kolonel, chiru xSusan ut li qajunkab’al, chiruheb’ li wech aj k’anjel, ut cheru laa’ex chejunjunqalex, ex was wiitz’in raarookex inb’aan.
Chixjunil li wan xk’ulub’il ut maak’a’ roso’jik wan xch’oolil sa’ lix yaalalil li yo’yookil Dios, li qaChoxahil Yuwa’ aj rahonel, ut li Ralal, li Jesukristo, ut li xtojb’al rix li maak kixb’aanu, li ch’olob’anb’il xyaalal xb’aan li Santil Musiq’ej. A’an a’in li domingo re Paswa. Rik’in oxloq’ ninkanab’ xnawom inch’ool chirix ut chi tiik ru ink’a’uxl ninch’olob’ xyaalal li yo’yookil Kristo—a’an li “kikam, kimuqe’, ut kiwakli wi’chik sa’ rox li kutan, ut kitaqe’ sa’ choxa.” A’an li Alfa ut li Omega—kiwan qochb’een sa’ xtiklajik, ut wanq qochb’een toj’ sa’ roso’jik.
Ninch’olob’ xyaalaleb’ li profeet reheb’ roso’jik li kutan a’in, li Profeet laj Jose Smith toj li qaraarookil Awa’b’ej Russell M. Nelson, li naqaxaqab’ xwankil chi sa qach’ool. Jo’ neke’xb’icha li qakok’al sa’ li Tzoleb’aal reheb’ li Kok’ak, “jun li profeet; naxnaw li b’e.” Ninch’olob’ xyaalal naq jo’ yeeb’il rik’in profeetil aatin sa’eb’ li loq’laj hu, jo’ ajwi’ sa’ lix Hu laj Mormon, lix awa’b’ejihom li Dios k’ojob’anb’il wi’chik sa’ ruchich’och’, re xkawresinkil li be’ choq’ re li xkab’ xk’ulunik li Mesias. Sa’ lix loq’ ut santil k’ab’a’ li Jesukristo, amen.