Rilb’aleb’ li komon rik’in li wankil ut li wankilal k’eeb’il xb’aan li Dios
Took’anjelaq sa’ lix k’ab’a’, rik’in lix wankil ut wankilal k’eeb’il qe, ut rik’in li chaab’ilal ch’oolej aj rahonel re a’an.
Ex was wiitz’in raarookex inb’aan, b’antiox eere naq k’eek’o eech’ool chiru li Qaawa’ ut sa’ lix santil k’anjel. Relik chi yaal nasaho’ inch’ool chi wank sa’ eeyanq. Jo’ jun ak’ Xb’eenil Awa’b’ejil, naqab’antioxi eere lee tij ut lix xaqab’ankil qawankil eeb’aan. Naqab’antioxi eere lee yu’am ut lee k’anjel chiru li Qaawa’. Juntaq’eet lix aajelil ru naq k’eek’o eech’ool sa’ lee teneb’ahom ut sa’ li k’anjelak chiru eeras eeriitz’in sa’ lee b’oqb’al, rik’in lix aajelil ru li qak’anjel sa’ li qab’oqb’al laa’o. Rik’in k’anjelak sa’ li Iglees chiru chixjunil inyu’am, intzolom naq maak’a’ naxye b’ar nokok’anjelak. Li k’a’ru naril li Qaawa’, a’an chan ru naq nokok’anjelak.
Ninb’antioxi chi anchal inch’ool re li Awa’b’ej Thomas S. Monson, li kixk’ut li b’e chiwu chiru numenaq 50 chihab’. Jo’kan ajwi’ ninb’antioxi reheb’ lix tenq’ aj k’ehol na’leb’, li Awa’b’ej Henry B. Eyring ut li Awa’b’ej Dieter F. Uchtdorf. Ninnimaheb’ ru xb’aan lix k’anjeleb’ chiru li Qaawa’ ut eb’ lix profeet a’an. Xkab’ichaleb’ li winq a’in li k’eek’ookeb’ xch’ool xe’xk’ul lix ak’ boq’b’al. Toj yookeb’ chi k’anjelak chi anchaleb’ xmetz’ew ut chi anchaleb’ xch’ool. Nawoxloq’iheb’ ut ninraheb’.
Q’axal chaq’al ru li qosob’tesinkil chi k’anjelak sa’ li tz’aqal yo’yookil Iglees re li Qaawa’ rik’in wankil ut wankilal k’eeb’il xb’aan a’an. Rik’in lix k’ojob’ankil wi’chik lix tijonelil li Dios, jo’eb’ ajwi’ lix laawil li tijonelil, eb’ laj santil paab’anel li k’ulub’ejeb’ taaruuq te’xk’uleb’ li musiq’ejil osob’tesink q’axal wi’chik xninqaleb’ ru. Naqil naq eb’ li osob’tesink a’in yookeb’ chi chalk rik’ineb’ li ixq, li winq, ut li kok’al chiru li ruchich’och’.
Naqileb’ li ixq tiikeb’ xch’ool li neke’xtaw ru li wankil ak wan re lix b’oqb’aleb’ ut re li tiqib’aak ut xkomoneb’ chik li k’ojob’anb’il k’anjel re li santil ochoch. Eb’ li ixq a’in neke’xnaw chan ru xb’oqb’al lix wankilal li choxa re xkolb’al rix ut xkawob’resinkileb’ lix b’eelom, lix kok’al, ut yalaq ani chik li neke’xra. A’aneb’ a’in li ixq li kaweb’ rib’ sa’ musiq’ej li neke’b’eresink, neke’k’utuk, ut neke’rileb’ li komon chi maak’a’eb’ xxiw sa’ xb’oqb’aleb’ rik’in li wankil ut wankilal k’eeb’il reheb’ xb’aan li Dios! Jwal ninb’antioxi reheb’ a’an!
Jo’kan ajwi’, naqileb’ li winq li neke’wan chi tiik xch’ooleb’ sa’ xyu’ameb’ jo’ aj k’amol reheb’ li tijonelil. Neke’b’eresink ut neke’k’anjelak rik’in mayejak jo’ tixb’aanu raj li Kolonel rik’in rahok, chaab’il ch’oolej, ut kuyum. Neke’rosob’tesi, neke’xb’eresi, neke’xkol rix, ut neke’xkawob’resi lix komoneb’ rik’in lix wankil li tijonelil neke’k’amok re. Neke’xk’e chi uxmank li sachb’a-ch’oolej sa’ xyu’ameb’ li ani neke’k’anjelak chiru ut neke’xkol ajwi’ rix lix suumlajik ut lix junkab’al. Neke’xtz’eqtaana li ink’a’ us ut neke’ok choq’ xb’eenil aj Israel ninqeb’ xmetz’ew. Jwal ninb’antioxi reheb’ a’an!
Anajwan ut, ma naru tinye jun na’leb’ na’ok wi’ ink’a’uxl? A’an a’in: Wankeb’ naab’al reheb’ li qakomon winq ut li qakomon ixq li ink’a’ neke’xtaw chi tz’aqal k’a’ru li wankil ut wankilal re li tijonelil. Eb’ a’an neke’k’anjelak jo’ chanchan naq te’raj xsahob’resinkil li rajomeb’ xch’ool ut ratawomeb’ a’an xjunes rib’ ruuchil roksinkil lix wankil li Dios re rosob’tesinkileb’ li ralal xk’ajol a’an.
Ninxuwak naq naab’al reheb’ li qakomon winq ut qakomon ixq ink’a’ neke’xchapeb’ li osob’tesink li taaruuq raj taawanq reheb’. Qayehaq, wankeb’ li qakomon winq li neke’k’anjelak jo’ chanchan naq ink’a’ neke’xtaw ru k’a’ru li tijonelil ut li neke’ru chixb’aanunkil rik’in. Inyehaq eere junjunq reetalil a’in.
Moko junxil ta, wankin sa’ jun ch’utam re li loq’laj wa’ak naq jun ch’ina k’uula’al xk’ehe’ lix k’ab’a’ ut jun li rosob’tesinkil xb’aan lix yuwa’. Li saajil yuwa’b’ej xq’alu lix chaq’al ru rab’in sa’ ruq’, xk’e re jun xk’ab’a’, ut xq’axtesi jun tij chaq’al ru. A’b’anan, ink’a’ xk’e jun osob’tesink re li k’uula’al. Li ch’ina-usil xqa’al a’an xk’ul jun xk’ab’a’ a’b’an maajun rosob’tesinkil xk’ul! Li chaab’il winq a’in ink’a’ xnaw k’a’ru xjalanil jun tij ut jun li osob’tesink rik’in li tijonelil. Rik’in lix wankil ut wankilal li tijonelil k’eeb’il re, naru raj naq xrosob’tesi lix k’uula’al, a’ut ink’a’ xb’aanu. Xink’oxla, “Jwal nim xsachb’al a’an!”
Inyehaq junjunq chik. Naqanaweb’ ru li winq li neke’xk’ojob’ li komon ixq choq’ aj jolominel ut aj k’utunel sa’ li Tzoleb’aal reheb’ li Kok’al, li Saaj Ixq, malaj li Komonil re Tenq’ank. A’b’anan neke’sach rik’in naq ink’a’ neke’rosob’tesiheb’—rosob’tesinkileb’ rik’in wankil re xtz’aqob’resinkileb’ ru xb’oqb’aleb’. Ka’ajwi’ neke’xk’e li tijom ut li na’leb’ reheb’. Naqil jun yuwa’b’ej tiik xch’ool a’b’an li ink’a’ naxk’e jun osob’tesink rik’in li tijonelil re li rixaqil chi moko lix kok’al us ta a’an li tz’aqal neke’raj ru. Ak k’ojob’anb’il wi’chik lix wankil li tijonelil sa’ ruchich’och’, a’b’an toj wankeb’ naab’al li qakomon winq ut ixq li neke’xnumsiheb’ li xuwajel ch’a’ajkilal re li yu’am a’in chi maajun sut neke’xk’ul jun tz’aqal osob’tesink rik’in li tijonelil. K’a’jo’ xrahilal a’in! A’an jun rahilal li naru taqisi.
Ex inkomon winq, laa’o aj k’amol re lix santil tijonelil li Dios! K’eeb’il qe lix wankilal re rosob’tesinkileb’ lix tenamit. K’oxlahomaq li chaq’al ru xk’ojob’ankil qach’ool kixk’e li Qaawa’ qe naq kixye, “Yalaq ani nakawosob’tesi, laa’in tinwosob’tesi.” A’an li qosob’tesinkil chi k’anjelak sa’ xk’ab’a’ li Jesukristo re rosob’tesinkileb’ li ralal xk’ajol li Dios a’ yaal jo’ chanru rajom xch’ool choq’ reheb’. Ex awa’b’ej re oqech ut obiisp, b’aanuhomaq usilal ut cheril naq li junjunq komon reheb’ li molam li wankeb’ rub’el eeteneb’ankil neke’xtaw ru chan ru xk’eeb’al jun osob’tesink rik’in li tijonelil—jo’ ajwi’ li wank chi k’ulub’ej ut chi kawresinb’il sa’ musiq’ej re xpatz’b’al chi tz’aqal lix wankil li Dios.
Choq’ eere chixjunil li nekexk’amok re li tijonelil, nekexinb’oq chixwaklesinkileb’ xch’ool li komon chixk’uulankileb’ lix sumwank, chi kuyuk sa’ ut tijok, chixtzolb’aleb’ li loq’laj hu, chi loq’onink sa’ li santil ochoch, ut chi k’anjelak rik’in paab’aal jo’ winq ut ixq re li Dios. Naru taqatenq’a chixjunileb’ re te’ril rik’in rilob’aal li paab’aal naq li paab’ank ut li wank chi tiikeb’ xch’ool tixjilosiheb’ rik’in li Jesukristo, tixk’eheb’ xwankil chixyalb’al xsahil li rochb’eenihom li Santil Musiq’ej, ut chixk’ulb’al li sahil ch’oolejil sa’ li yu’am a’in!
Jun reetalil lix yo’yookil ut yaalil Iglees li Qaawa’ li ink’a’ taajalmanq, a’an li tustuukil k’anjel re rilb’aleb’ chixjunjunqaleb’ li ralal xk’ajol li Dios ut lix junkab’aleb’. Rik’in naq a’an a’in lix Iglees, laa’o jo’ lix moos taqil li junjunq komon, jo’ chanru kixb’aanu a’an. Took’anjelaq sa’ lix k’ab’a’, rik’in lix wankil ut wankilal k’eeb’il qe, ut rik’in li chaab’ilal ch’oolej aj rahonel re a’an.
Li kink’ul numenaq 60 chihab’ anajwan sa’ li tenamit Boston, kixk’ut chiqu naq k’a’jo’ xwankil li osob’tesink re rilb’aleb’ li junjunq. Sa’ li kutan a’an, laa’in chaq jun aj cho’onel sa’ li nimla b’anleb’aal aran Massachusetts—yookin chi k’anjelak rajlal kutan, naab’aleb’ li q’ojyin, ut naab’aleb’ kutan re xraqik li xamaan. B’ab’ay ajwi’ li hoonal kinru chixnumsinkil rik’in li wixaqil, li kaahib’eb’ li qakok’al, ut lin k’anjel sa’ Iglees. Us ta jo’kan a’an, li awa’b’ej re li uq’ej kixk’e ink’anjel re naq tinwula’ani li rochoch laj Wilbur ut li xLeonora Cox. Kiraj naq taasutq’iiq sa’ Iglees li Qawa’ Cox. A’an ut li xLeonara ak ke’tz’ape’ sa’ junajil sa’ li santil ochoch. A’b’anan, k’iila chihab’ naq ink’a’ nawulak chik laj Wilbur.
Li wochb’een ut laa’in koowulak sa’ rochoch. Naq ok qe, li Hermana Cox kixk’e xsahil qak’ulunik, a’b’an li Hermano Cox xko’o sa’ junpaat sa’ jalan chik na’ajej sa’ li kab’l ut kixtz’ap li okeb’aal.
Laa’in kinnach’ok wan wi’ li okeb’aal ut kintoch’. Chirix jun k’amok, kiwab’i chixyeeb’al chi q’un xyaab’ xkux “Okan.” Kinte li okeb’aal ut kintaw li Hermano Cox chunchu chixk’atqeb’ li k’anjeleb’aal re radio. Sa’ li ch’ina na’ajej a’an, a’an ki’ok chi mayib’k. Chi yaal, ink’a’ tana’ raj kiraj naq wankin aran.
Yookin chirilb’al li k’a’ru wan chi sa’ li na’ajej a’an chi sachso inch’ool ut kinye, “Hermano Cox, laa’in nawaj xtzolb’al xkomon chik chirix xk’anjelankil li radio. Ma taak’ut raj chiwu? Chakuy inmaak naq maak’a’ chik inhoonal anajwan, a’b’an ma naru tinsutq’iiq sa’ jalan chik kutan?”
Maak’a’ kixye chiru jun k’amok, toja’ ut naq kixye naq naru a’an. A’an lix tiklajik li qakomonil choq’ amiiw. Kinsutq’i chaq ut a’an kinixtzol. Kin’ok chixraab’al ut chiroxloq’onkil. Rik’in naq mas nokowulak chaq aran, kin’ok chixk’eeb’al reetal lix chaab’ilal li winq a’an. Koo’ok choq’ chaab’il amiiw, jo’ ke’xb’aanu ajwi’ li qaraarookil ixaqil. Chirix xnumikeb’ li kutan, kooq’axon lin junkab’al ut laa’in sa’ jalan chik na’ajej. Eb’ laj jolominel sa’ li Iglees aran toj ke’xyal xq’e chixch’olaninkil li junkab’al Cox.
Waqxaqib’ chihab’ chaq chirix li xb’een sut naq koowulak sa’ rochocheb’, kik’ojob’aak jun oqech aran Boston. Ma naru teeq’ehi ani kib’oqe’ choq’ li xb’een awa’b’ej re li oqech a’an? A’an a’an ajwi’! Li Hermano Cox! Chirix a’an, a’an kik’anjelak ajwi’ jo’ jun awa’b’ej re mision ut jun awa’b’ej re li santil ochoch.
Junjunq chihab’ chirix a’an, laa’in, naq ak komonin sa’ lix Molameb’ li Kab’laju chi Apostol, kintaqlaak re xk’ojob’ankil jun ak’ oqech sa’ xweent li Condado Sanpete, Utah. Naq yookin chiraatinankileb’ li komon aran, kisaho’ inch’ool naq kintaw wi’chik lin raarookil amiiw laj Hermano Cox! Kiweek’a naq tinb’oq a’an choq’ li ak’ yuwa’b’ejil aj k’anjel sa’ li oqech. Chirix naq kink’ojob’, kiqaq’alu qib’ ut koo’ok chi yaab’ak. Li ani wankeb’ sa’ li na’ajej a’an ink’a’ neke’xnaw k’a’ut naq wan wiib’eb’ li tiixil winq aran li yookeb’ chi yaab’ak. A’b’anan laa’o naqanaw. Ut li Hermana Cox ajwi’ naxnaw. Lix ya’al qu, a’an xya’aleb’ uhej xb’aan xsahileb’ qach’ool! Sa’ qak’a’uxl kijultiko’ qe li chaab’il b’eenik re rahok ut jalb’a-k’a’uxlej li kitikla numenaq 30 chihab’ chaq sa’ jun q’ojyin sa’ rochocheb’.
Li seraq’ moko naraqe’ ta aran. Kiniman lix junkab’al li Hermano ut li Hermana Cox rik’in oxib’eb’ li ralal xk’ajol, 20 li rimam, ut 54 lix xikin imam. K’oxlahomaq ajwi’ k’a’ru ke’xb’aanu choq’ reheb’ k’iila cien misioneer, ut k’illa mil chik li komon sa’ li santil ochoch, ut k’iila cien chik li ke’xk’ul lix yuwa’b’ejil osob’tesihom chi ruq’ laj Wilbur Cox. Lix k’anjel a’an ut li xLeonora toj taawanq xwankil chiru k’iila tasal tenamit chiru chixjunil li ruchich’och’.
Li kik’ulman rik’in laj Wilbur ut li xLeonora Cox nak’ulman rajlal xamaan—ut nawoyb’eni naq rajlal kutan—sa’ li Iglees a’in. Eb’ lix moos li Qaawa’ Jesukristo neke’xb’aanu lix k’anjel chi k’eek’ookeb’ xch’ool, rik’in lix wankil ut wankilal k’eeb’il xb’aan a’an.
Ex inkomon winq, wankeb’ li okeb’aal naru taqate, li osob’tesink rik’in li tijonelil naru taqak’e, li aamej li naru taqak’irtesi, li iiq li naru taqataqsi, li yu’amej li naru taqakol rix, ut li sahil ch’oolejil naru taqak’am chaq sa’ rochocheb’ laj Santil Paab’anel sa’ Roso’jikeb’ li Kutan—ut naru chixjunil a’in xb’aan naq laa’o aj k’amol re lix tijonelil li Dios. Laa’o li winq li “b’oqb’ileb’ ut kawresinb’ileb’ chalen chaq sa’ xk’ojlajik li ruchich’och’ jo’ chanru lix nawom li Dios chi junxilaj, sa’ xk’ab’a’ xnumtajenaqil li [qapaa’b’aal],” re xb’aanunkil li k’anjel a’in.
Sa’ li ewu a’in nekexinb’oq chi xaqliik wochb’een sa’ li xnimal ru ut junelikil komonil jo’ winq. Naq tinyaab’asi li opiis re li tijonelil wankat wi’, chatxaqliiq ut chatkanaaq chi xaqxo. Eb’ laj tenq’anel, chexwakliiq! Eb’ laj tzolonel, waklinqex! Eb’ laj tij! Eb’ li obiisp! Eb’ li xb’eenil! Eb’ li taqenaqil aj tij!, Eb’ li yuwa’b’ejil aj k’anjel! Eb’ li apostol!
Anajwan, ex inkomon winq, ma texkanaaq chi xaqxookex ut teejunaji xyaab’ eekux rik’in li qach’uut aj b’ichanel sa’ xb’ichankil li oxib’ raqal re “Waklinqex, ex winq re Dios.” Naq yooqex chi b’ichank, k’oxlahomaq li teneb’anb’ilex wi’ jo’ lix nimal ru teep aj pleet li Dios re tenq’ank chixkawresinkil li ruchich’och’ choq’ re xkab’ xk’ulunik li Qaawa’. A’an a’in li qateneb’ahom. A’an a’in li qosob’tesinkil. Chi jo’kan ninch’olob’ xyaalal sa’ xk’ab’a’ li Jesukristo, amen.