Jo’ naq kixkuy eemaak li Kristo, jo’kan ajwi’ cheb’aanu laa’ex
Chiqajunilo nokoru chixk’ulb’al li tuqtuukilal ut chi wank rik’in li qaKolonel chixtzolb’al xkuyb’aleb’ xmaak li qas qiitz’in li nokoxrahob’tesi.
“Sa’ li xb’een kutan re li xamaan, toj eq’la chi us, koheb’ li ixq sa’ li muqleb’aal ut ke’xk’am li sununkil b’an li k’uub’anb’il xb’aaneb’, ut wankeb’ ajwi’ rik’ineb’ wiib’ oxib’ chi ixq.
“A’b’anan koxe’xtaw chi ak tolk’osinb’il chik li pek chire li muqleb’aal.
“Ut, naq ke’ok chisa’, ink’a’ ke’xtaw lix tz’ejwal li Qaawa’ Jesus.
“Ut kik’ulman naq, yookeb’ chixk’oxlankil a’in chi sachsookeb’ xch’ool naq xaqaamileb’ chiruheb’ wiib’ li winq, nalemtz’unk ru li raq’eb’;
“K’a’jo’ naq ki’ok xxiweb’ li ixq! Ke’xxulub’ li rilob’aal sa’ ch’och’ ut ke’yehe’k re: K’a’ut naq nekesik’ sa’ xyanqeb’ li kamenaq li yo’yo?
“Maa’ani chik arin: xwakliik chi yo’yo.”
Wulaj, a’anaq li hilob’aal kutan re li Paswa, taqajultika q’axal wi’chik li k’a’ru kixb’aanu choq’ qe li Jesukristo: “Xb’aan naq li Dios k’a’jo’ naq kixra li ruchich’och’: kixk’e chaq li Ralal jun chirib’il re naq chixjunil li taapaab’anq re, ink’a’ taasachq, wanq b’an xyu’am chi junelik.” Sa’ junaq kutan, toowaqliiq chi yo’yo jo’ chanru a’an, re naq wanq qayu’am chi junelik.
Rik’in li sachb’a-ch’oolej re li loq’laj xtojb’al rix li maak xb’aan li Jesukristo, nokoru ajwi’ chixk’ulb’al li maatan re xkuyb’al li qamaak ut li qamajelal wi naqak’ulub’a li osob’tesink ut teneb’ank re li jalb’a-k’a’uxlej. Ut rik’in xk’ulb’aleb’ li k’ojob’anb’il k’anjel li neke’ajman ru, xk’uulankileb’ li sumwank, ut xpaab’ankileb’ lix taqlahom li Dios, tooruuq chixk’ub’al li yu’am maak’a’ rosojik ut li taqenaqil loq’al.
Sa’ li kutan a’in, tinwaj raj aatinak chirix li kuyuk maak, jun maatan aajel ru ut nim xwankil li naxyeechi’i qe li qaKolonel ut aj Tojol qix, li Jesukristo.
Sa’ jun li q’ojyin re li po diciembre re li chihab’ 1982, li wixaqil, li xTerry, koo’aj xmaak naq xqak’ul jun b’oqok sa’ li qochoch aran Pocatello, Idaho. Naq kinsume li b’oqok, ka’ajwi’ kinwab’i li yaab’ak. Tojo’ naq, kiwab’i xyaab’ xkux li wiitz’in naq kixye, “Kikam laj Tommy.”
Jun aj kalajenaq li jun may chihab’ xyu’am, yoo chi xik numenaq 135 kiloom chiru jun hoor sa’ xb’eleb’aal ch’iich’ sa’ li tenamit Denver, Colorado ut kixnumsi li b’e naq wan chi kaq li kaxlan xam. Kixtop rib’ rik’in xnimal ru kawilal rik’in li b’eleb’aal ch’iich’ li yoo chixb’eresinkil li wiitz’in, laj Tommy, ut kikam a’an rochb’een li rixaqil, li xJoan. Yookeb’ chaq chi sutq’iik sa’ li rochoch wan wi’ li rab’in chirix naq ke’wulak chaq sa’ jun ninq’e re li Ralankil.
Sa’ junpaat li wixaqil ut laa’in xkoho Denver sa’ so’sol ch’iich’ ut koowulak b’ar neke’xkawresi wi’ li kamenaq choq’ re xmuqlajikeb’. Kiqach’utub’ qib’ rik’ineb’ li qayuwa’ ut eb’ li qas qiitz’in ut k’a’jo’ naq kiraho’ qach’ool xb’aan xkamik li qaraarookil aj Tommy ut xJoan. Ke’kamsiik xb’aan jun li b’aanuhom q’axal yib’ ru. K’a’jo’ li rahilal yooko chixnumsinkil ut kin’ok chireek’ankil naq nim injosq’il chirix li saaj winq aj kamsinel.
Laj Tommy kik’anjelak jo’ aj ch’olob’anel chaq’rab’ sa’ li Departamento de Justicia re li Estados Unidos ut yoo chaq chixkawresinkil rib’ re k’anjelak choq’ jun aj kolol re lix ch’och’ li ral ch’och’ ut chixjunil li wan reheb’ chiruheb’ li chihab’ chalel.
Chirix xnumik junjunq li kutan, kichal li kutan naq taaraqe’q aatin chirix li saaj winq li kikamsink rik’in b’eleb’aal ch’iich’. Us ta ra neke’reek’a ut nayot’e’ xch’ooleb’, eb’ lin yuwa’ ut li wanab’, li xKaty, ke’wulak sa’ li ch’utam a’an. Eb’ lix yuwa’ laj b’eresinel kalajenaq wankeb’ ajwi’ aran, ut naq kiraqe’ li ch’utam, ke’chunla sa’ jun li chunleb’aal ut ke’yab’aak. Eb’ lin yuwa’ ut li wanab’ chunchuukeb’ ajwi’ aran, nach’ rik’ineb’ a’an ut yookeb’ chixyalb’al xtuqub’ankil li k’a’ru neke’reek’a. Chirix jun k’amok, eb’ lin yuwa’ ut li wanab’ ke’xaqli ut xkoheb’ wankeb’ wi’ lix yuwa’ aj b’eresinel li b’eleb’aal ch’iich’ ut ke’xwotz rik’ineb’ aatin re k’ojob’ank ch’oolej ut kuyuk maak. Ke’xchap rib’ li ruq’; ke’yot’e’ ch’oolej ut ke’el xya’aleb’ ru chixjunileb’ ut ke’xtaw ru naq sa’ xkab’ichal li junkab’al k’a’jo’ li rahil ch’oolejil ke’xnumsi. Lin na’, lin yuwa’, ut li xKaty ke’xk’ut chiru li qajunkab’al chan ru xnumsinkil li rahilal rik’in xkawilal xch’ooleb’ ut k’a’ru a’an li kuyuk maak.
Li yeechi’ink kuyuk maak sa’ li hoonal a’an kixk’e chi q’uno’k li waam ut kixte xb’ehil li k’irtesink. Rik’in xnumikeb’ li kutan, xintzol chan ru taawanq rajom inch’ool chi kuyuk maak. Ka’ajwi’ rik’in lix tenq’ li Awa’b’ej re Tuqtuukilal ki’isiman li wiiq k’a’jo’ xrahilal. Li waam junelik tixpatz’ laj Tommy ut li xJoan, a’b’an li kuyuk maak nikinixtenq’a chixk’oxlankileb’ rik’in sahil ch’oolejil moko ramb’il ta. Ut ninnaw naq toowanq wi’chik sa’ junajil jo’ junkab’al.
Moko yookin ta chixyeeb’al naq taqak’ulub’a li q’etok chaq’rab’. Naqataw ru tz’aqal naq li junjunq chi kristiaan tento tixsume rix lix yib’eetalil b’aanuhom. A’b’anan, naqanaw ajwi’ naq, jo’ ralal xk’ajol li Dios, naqataaqe lix k’utum li Jesukristo. Tento taqakuyeb’ xmaak li qas qiitz’in us ta chanchan naq moko xk’ulub’eb’ ta naq te’kuye’q xmaak qab’aan.
Li Kolonel kixk’ut:
“Wi laa’ex nekekuyeb’ xmaak lee ras eeriitz’in, lee choxahil Yuwa’ tixkuy tixsach ajwi’ eemaak.
“Wi ut ink’a’ nekekuyeb’ xmaak lee ras eeriitz’in, chi moko lee Yuwa’ tixkuy tixsach eemaak.”
Chiqajunilo nokoru chixk’ulb’al li tuqtuukilal ut chi wank rik’in li qaKolonel chixtzolb’al xkuyb’aleb’ xmaak li qas qiitz’in li nokoxrahob’tesi. Li junajink a’in naxb’oq lix wankil li Kolonel sa’ li qayu’am chi saqen ru ut chi maajo’q’e taasachq sa’ qach’ool.
Li apostol aj Pablo kixye:
“Tiqib’omaq b’i’ eerib’ rik’in xnimal uxtaanal, rik’in li usilal, li tuulanil, kub’enaqaq eewankil ut nimaq eekuyum;
“Chekuyaq eerib’ cherib’il eerib’ ut, wi junaq wank k’a’ru tixjit wi’ li jun chik … : jo’ naq kixkuy eemaak li Kristo, jo’kan ajwi’ cheb’aanu laa’ex.”
Li Qaawa’ ajwi’ kixye:
“Joʼkan ut, ninye eere, naq tento raj teekuy eemaak cheribʼil eeribʼ; xbʼaan naq ani inkʼaʼ naxkuy xmaak lix komon wan chi jitbʼil chiru li Qaawaʼ; xbʼaan naq nakana rikʼin aʼan li maak qʼaxal nim wiʼchik.
“Laaʼin, li Qaawaʼ, tinkuy xmaak li ani nawaj xkuybʼal xmaak, aʼbʼan saʼ eebʼeen laaʼex tenebʼanbʼil xkuybʼalebʼ xmaak chixjunil li winq.”
Saqen ru lix k’utum li qaKolonel ut aj Tojol qix, li Jesukristo; tento naq laj maak wank xch’ool chixkuyb’aleb’ xmaak li jun ch’ol chik wi a’an naroyb’eni xtawb’al lix kuyb’al lix maak a’an.
Ex was wiitz’in, ma wankeb’ anihaq sa’ li qayu’am li kooxrahob’tesi? Ma toj naqak’uula sa’ li qaam junaq reek’ahom re ch’i’ch’i’ ut josq’il naqak’oxla naq tiikob’resinb’il ru? Ma naqak’e xna’aj naq li q’etq’etil nokoxram chi kuyuk maak ut chi xik chi uub’ej? Nintz’aama qe chiqajunilo naq tookuyuq maak chi tz’aqal ut taqakanab’ naq li k’irtesink taawanq sa’ li qaam. Ut wi li kuyuk maak ink’a’ taawulaq anajwan, chenawaq naq wi naqaj ut nokok’anjelak re xk’ulb’al, taak’ulunq—jo’ chanru kik’ulun choq’ we chirix lix kamik li wiitz’in.
Chijultiko’q ajwi’ eere naq jun na’leb’ q’axal aajel ru re li kuyuk maak, a’an naq laa’o taqakuy li qamaak qajunes qib’.
“Ani xjal lix kʼaʼuxl chirixebʼ lix maak,” kixye li Qaawa’, “kuybʼilebʼ lix maak, ut laaʼin, li Qaawaʼ, inkʼaʼ chik nekeʼjultikoʼ we.”
Nintz’aama naq chiqajunilo sa’ li kutan a’in taajultiko’q qe ut taqataaqe lix b’aanuhom li Jesukristo. Naq wan chaq chiru krus aran Golgota, naq yoo chi yot’e’k, kixye li aatin a’in: “At inYuwa’, chakuyeb’ xmaak xb’aan naq ink’a’ neke’xnaw k’a’ru yookeb’ chixb’aanunkil.”
Naq wank qach’ool re xkuyb’al li maak ut taqab’aanu, jo’ chanruheb’ lin yuwa’ ut lin wanab’, tooruuq chixk’ulb’al lix yeechi’ihom li Kolonel: “Li tuqtuukil usilal ninkanab’ eerik’in, lin tuqtuukil usilal nink’e eere; ink’a’ nink’e eere kama’ naxk’e li ruchich’och’. Misachk eech’ool chi k’oxlak, chi moko chexxiwaq.”
Ninch’olob’ xyaalal naq li tuqtuukilal taawulaq sa’ li qayu’am a’ yaal jo’ chanru yooqo chixpaab’ankil lix k’utum li Jesukristo ut chixtaaqenkil naq taqakuyeb’ xmaak li qas qiitz’in. Naq nokokuyuk maak, ninyeechi’i eere naq li Kolonel tooxkawob’resi, ut lix wankil ut sahil xch’ool taa’ok sa’ li qayu’am.
Yamyo li muqleb’aal. Yo’yo li Kristo. Ninnaw ru. Ninra. Ninb’antioxi li rusilal, a’an li wankilal aj kawob’resinel li tz’aqal re xk’irtesinkil chixjunil. Sa’ lix loq’laj k’ab’a’ li Jesukristo, amen.