“13 agosto. Chan ru naq li Jesukristo naru nikinxtenq’a chi jalaak? Romanos 1–6,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“13 agosto. Chan ru naq li Jesukristo naru nikinxtenq’a chi jalaak?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
13 agosto
Chan ru naq li Jesukristo naru nikinxtenq’a chi jalaak?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. Chan ru naq yooko chixtawb’al xsahil qach’ool sa’ xtaaqenkil li Jesukristo?
-
Rilb’aleb’ li wankeb’ sa’ rajb’al ru. Ani sa’ li qateep malaj qatenamit naraj ru qatenq’? Chan ru taqatenq’a?
-
Xb’oqb’aleb’ chixjunil chixk’ulb’al li evangelio. Chan ru taqakawresi qib’ chiqib’il qib’ re xik sa’ mision?
-
Xjunajinkileb’ li junkab’al chi junelik. Chan ru tootenq’anq sa’ li teep re xb’aanunkil li k’anjel re li santil ochoch ut li junkab’al?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
“Lix evangelio li Jesukristo a’an ajwi’ jun evangelio re jalaak!” kixye li Awa’b’ej Russell M. Nelson, (“Decisiones para la eternidad,” Liahona, noviembre 2013, 108). Li apostol aj Pablo kixch’olob’ naq wi nakub’e qaha’, “laa’o nokowan sa’ ak’ yu’am” (Romanos 6:4). B’antiox re li Jesukristo, rajlal kutan—ink’a’ yal li kutan xkub’e wi’ qaha’—naru taawanq “x’ak’il li qayu’am,” a’ li qahoonal re xnajtob’resinkil qib’ rik’in li maak ut xnach’ob’resinkil qib’ rik’in li Dios. Li xyu’aminkil lix evangelio li Jesukristo naraj naxye xjalb’al qak’a’uxl ut xjilosinkil qib’ rik’in li Dios—junelik, us ta timil timil—xnawb’al naq li xyalb’al qaq’e tooxb’eresi sa’ xtz’aqalil xsahil qach’ool.
K’oxla chan ru naq li Kolonel yoo chixjalb’al aawaam laa’ut ut raameb’ li saaj nakatzol. Chan ru taak’ul chi tz’aqal lix wankilal li Kolonel re xjalb’al aawaam? K’oxlan chirix a’in naq taawil Romanos 1–6 ut naq nakakawresi li tzolok. Naru ajwi’ taawil li raatin li Awa’b’ej Russell M. Nelson, “Naru taqab’aanu li chaab’il wi’chik ut toowanq chi chaab’il wi’chik” (Jolomil ch’utub’aj-ib’ re abril 2019), malaj li raatin li Hermana Becky Craven, “Kanaaqex chi jalb’il” (Jolomil ch’utub’aj-ib’ re octubre 2020).
Tzolok sa’ komonil
Wan naq ch’a’aj xk’eeb’al reetal “x’ak’il li yu’am” li naxyeechi’i li Jesukristo (Romanos 6:4) xb’aan naq timil timil nak’ulman, us ta sa’ junpaat nak’ulman choq’ re jalaneb’ chik li kristiaan. Naru taapatz’ reheb’ li saaj naq te’xwotz k’a’ru naraj naxye choq’ reheb’ li “wank sa’ ak’il yu’am.” B’arwan reheb’ li aatin ut ch’ol aatin sa’ Romanos 6 li neke’xch’olob’ li qayu’am chi wan ut chi maak’a’ lix wankilal li Kolonel? (Wi li saaj neke’raj xtenq’, naru te’ril sa’eb’ li raqal 6, 11, 22–23.) K’a’ chik li aatin ut ch’ol aatin naru taqak’oxla laa’o? K’a’ru naxyeechi’i li Kolonel re qatenq’ankil chi jalaak? Naru xb’aanunkileb’ li na’leb’ a’in re aatinak xkomon chik chirix li na’leb’ a’in.
-
Re xtenq’ankileb’ li saaj chixk’oxlankil li jalaak naru te’xb’aanu rik’in xtenq’ li Kolonel, patz’ reheb’ naq te’ril li ch’olob’anb’il sa’ “Jalok k’a’uxl, jalb’a-k’a’uxlej” sa’ li K’utul Raqal reheb’ li Loq’laj Hu. Naru ajwi’ te’aatinaq chirix lix ch’olob’ahom li Awa’b’ej Russell M. Nelson chirix li jalb’a-k’a’uxlej sa’ li wuqub’ raqal sa’ xtiklajik li raatin, “Naru taqab’aanu li chaab’il wi’chik ut toowanq chi chaab’il wi’chik.” K’a’ruheb’ li ninqi na’leb’ naqatzol chirix li jalb’a-k’a’uxlej sa’eb’ li ch’olob’ank a’an? Naru ajwi’ taak’e xhoonaleb’ li saaj chixk’oxlankileb’ li na’leb’ kixye li Awa’b’ej Nelson naq li Jesus naxpatz’ naq taqajal (sa’ ro’ li raqal re li raatin). Patz’ reheb’ naq te’xtz’iib’a k’a’ru neke’reek’a naq te’xjal. Ch’olob’ xyaalal lix wankilal li Kolonel re qatenq’ankil chixjalb’al qak’a’uxl ut li qach’ool.
-
Li Hermana Becky Craven kixye naq wan naq eb’ li ramiiw neke’xye, “Ink’a’ nakatjala!” Naru taawotz li naxye li Hermana Craven chirix a’in (chi’ilmanq “Kanaaqex chi jalb’il”). Patz’ reheb’ li saaj naq te’xk’oxla naq sa’ oob’ malaj lajeeb’ chihab’ te’xk’ul jun li ramiiw re xch’ajomileb’. K’a’ru xjala raj qik’in li taak’ehe’q reetal xb’aan li qamiiw? K’a’ru li jalaak naqoyb’eni qik’in? Chan ru naq li paab’aal chirix li Jesukristo nokoxtenq’a chi jalaak? (chi’ilmanq Mosiah 5:2–5, 7; Alma 5:11–13; Eter 12:27, malaj “chan ru toojalaaq” jo’ ch’olob’anb’il xb’aan li Hermana Craven sa’eb’ li kaahib’ raqal re li raatin li natikla rik’in “Naq saajin chaq”). Naru taapatz’ reheb’ li saaj naq te’xwotz junaq xnumsihomeb’ b’ar wi’ xe’tenq’aak xb’aan li Jesukristo chi jalaak.
-
Wan naq naqak’oxla naq yal qajunes qib’ tento toojalaaq ut toochaab’ilo’q. Chan ru naq jalan li na’leb’ a’an rik’in li jalb’a-k’a’uxlej? Re xtenq’ankileb’ li saaj chixtz’ilb’al rix li patz’om a’in, naru teerileb’ li aatin sa’ “Xkomon chik li tenq’.” K’a’ru naru naqab’aanu anajwan re xsik’b’al lix tenq’ ut lix wankil li Kolonel re naq taakanaaq li toojalaaq wi’ ut re naq tixk’e xsahil qach’ool? A’in jun chaab’il hoonal choq’ reheb’ li saaj re te’xk’oxlaheb’ lix meta re xchaab’ilob’resinkileb’ rib’. Chan ru taqak’e chi okenk li Kolonel sa’eb’ li qameta?
Li paab’aal chirix li Jesukristo nokoxtenq’a chixjalb’al qak’a’uxl ut chi wulak jo’ a’an wulaj wulaj.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Li Awa’b’ej Russell M. Nelson kixkye: “Naru taqajal li k’aynaqo chixb’aanunkil. Tz’aqal li rajom qach’ool naru taajalaaq. Chan ru? Junaj ajwi’ li b’e. Li tz’aqal jalaak—li jalaak li ink’a’ taaraqe’q—ka’ajwi’ naru taachalq sa’ xk’ab’a’ li wankilal aj k’irtesinel, aj saqob’resinel, ut aj k’ehonel li wan re lix tojb’al rix li maak xb’aan li Jesukristo. A’an nekexxra—chejunjunqalex! Nekexxkanab’ chiroksinkil lix wankilal wi nekepaab’ lix taqlahom chi anchal eech’ool ut chi tiik ru” (“Decisiones para la eternidad,” 108).
-
Li Elder Dale G. Renlund kixye: “Li wankilal naru wi’ li jalb’a-k’a’uxlej a’an lix tojb’al rix li maak xb’aan laj Kolol qe. Sa’ tz’aqal li jalb’a-k’a’uxlej, tento xpaab’ankil li Qaawa’ Jesukristo, ut naq a’an naru tooxjal, naq a’an naru tixkuy qamaak, ut naq tooxtenq’a chixramb’al xkomon chik li qamaak. Li paab’aal a’in naxk’e xwankilal lix tojb’al rix li maak sa’ qayu’am. Naq … “naqab’alq’usi qib’ ” [naqajal qak’a’uxl] chi tenq’anb’ilo, taawanq qayo’onihom sa’ xyeechi’hom li Kolonel ut sa’ li kuyuk maak. Wi ta maak’a’ laj Tojol-ix, li sahil ch’oolej arin na’oso’, ut li jalb’a-k’a’uxlej na’ok jo’ yal ch’a’ajkil jalok na’leb’. A’b’an rik’in xpaab’ankil li Kolonel, naqak’ulub’a lix wankilal ut li rajom chixkuyb’al li maak” (Dale G. Renlund, “Li jalb’a-k’a’uxlej: jun sahil ch’oolejil,” Jolomil ch’utub’aj-ib’ re octubre 2016).
Li k’utuk jo’ li Kolonel
Eb’ li na’leb’ sa’ li tusleb’ aatin a’in neke’xye chan ru taatenq’aheb’ li saaj chi tzolok chirix li Kolonel ut lix wankilal re qatenq’ankil chi jalaak. A’ut maare wankeb’ chik li na’leb’ li chaab’ilaqeb’ wi’chik ru choq’ reheb’ li saaj li nakatzol. Rik’in tijok, sik’ lix b’eresihom li Musiq’ej naq nakakawresi chan ru taanimob’resi xpaab’aaleb’ chirix li Jesukristo.