santil ochoch

Li santil ochoch re Indianapolis Indiana

27 agosto

Chan ru tink’ut naq lin junxaqalil a’an jun loq’laj maatan k’eeb’il xb’aan li Dios?

1 Korintios 1–7

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Ma wan li toje’ xqak’ul li xooxnach’ob’resi rik’in li qaChoxahil Yuwa’ ut li Jesukristo?

• Rilb’aleb’ li wankeb’ sa’ rajb’al ru. Ma wan ani toje’ x’ok sa’ li qateep malaj x’ok sa’ li Iglees? Chan ru taqak’e xsahileb’ xch’ool?

• Xb’oqb’aleb’ chixjunil chixk’ulb’al li evangelio. K’a’ruheb’ li kok’ k’anjel chalkeb’ re, b’ar wi’ naru taqab’oqeb’ li qamiiw chi tz’aqonk?

• Xjunajinkileb’ li junkab’al chi junelik. K’a’ru naru taqab’aanu re xtz’iib’ankil resil li qayu’am?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Maare us maare ink’a’, a’ut nawb’ileb’ ru laj santil paab’anel xb’aan li ink’a’ neke’xb’aanu. Lix k’ihaleb’ a’an, “ink’a’ naqab’aanu” re rilb’al chi us li qatib’el. Lix yaalalil li k’a’ru naqasik’ ru xb’aanunkil k’ojob’ab’anb’il sa’ li junelikil yaal—li k’a’ru naqanaw. Naq b’eresinb’il li naqasik’ ru xb’aanunkil xb’aan li junelikil yaal, nak’osman qach’a’ajkilal, naniman xsahil qach’ool, ut nakana xwankil li qab’aanuhom. Li junelikil yaal nokoxtenq’a ajwi’ chixch’olob’ankil li qab’aanuhom chiruheb’ li qamiiw. Rochb’een li nawe’k qu xb’aan li k’a’ru ink’a’ naqab’aanu, us wi’chik naq taanawe’q qu xb’aan li k’a’ru naqanaw.

K’oxlaheb’ li junelikil yaal nakanaw chirix li qatib’el—k’a’ut naq wankeb’, k’a’ru nareek’a li Dios chirixeb’, ut k’a’ru naraj a’an naq laa’o taqeek’a chirixeb’. Chan ru naq xnawb’al li yaal a’an nakatrosob’tesi ut nakatxb’eresi sa’ li nakasik’ ru xb’aanunkil? Chan ru naq li nawom a’in tixtenq’aheb’ li saaj sa’ laa tzoleb’aal malaj molam? Naq nakak’oxla a’in, il Genesis 1:27; 1 Korintios 6:19–20; ut li raatin li Awa’b’ej Russell M. Nelson, “El cuerpo: Un don magnífico que debemos apreciar” (Liahona, agosto 2019, 50–55).

Tzolok sa’ komonil

Naq eb’ li saaj xe’ril li loq’laj hu chiru li xamaan a’in, maare xe’k’oxlak chirix li kixk’ut laj Pablo chirix li qatib’el sa’ 1 Korintios 6. Re xb’oqb’aleb’ chixwotzb’al lix k’oxlahomeb’, naru taak’e jun ch’ina hu re li junjunq ut taapatz’ reheb’ naq te’xtz’iib’a oxib’ xsumenkil li patz’om “Chan ru naq li qatib’el chanchan li santil ochoch?” Patz’ reheb’ naq te’ril 1 Korintios 6:19–20 naq neke’xk’oxla li patz’om a’in. Chirix a’an naru te’xwotz lix sumehomeb’. Chan ru naq lix k’utum li Kolonel chirix li qatib’el nokoxb’eresi sa’ li naqasik’ ru xb’aanunkil? Arin wankeb’ wiib’ oxib’ li na’leb’ naru taab’aanu; sik’ ru junjunq reheb’, malaj k’uub’ li taawaj xb’aanunkil.

• Wi taawaj naq te’aatinaq chirix lix juntaq’eetankil li tib’elej rik’in li santil ochoch xb’aan laj Pablo, naru taak’ut xjalam-uucheb’ wiib’ oxib’ li santil ochoch. Naru xtawb’aleb’ li jalam-uuch sa’ temples.ChurchofJesusChrist.org. Eb’ li saaj naru te’xye k’a’ru li jalanil neke’ril sa’eb’ li santil ochoch, jo’ ajwi’ k’a’ru li juntaq’eet. Naru ajwi’ neke’xye k’a’ru neke’reek’a naq neke’wan sa’ li santil ochoch. K’a’ut naq nujenaq rik’in li musiq’ej ut jwal loq’ li santil ochoch? Naru taapatz’ reheb’ li saaj naq te’xjuntaq’eeta li k’a’ru xe’aatinak wi’ chirix li santil ochoch rik’in lix tib’eleb’. Chan ru naq li na’leb’ chirix li santil ochoch sa’ Tzol’leb’ ut Sumwank 97:15–16; 109:8, 12 naru ajwi’ tixch’olob’ li qatib’el?

• Eb’ li saaj maare ak xe’ru—malaj toj te’wanq xhoonal—chixch’olob’ankil k’a’ut naq neke’xtaaqe lix na’leb’ li Kolonel chirix rilb’al chi us lix tib’eleb’. Naru taapatz’ reheb’ k’a’ raj ru te’xye wi jun kristiaan tixpatz’ raj reheb’ k’a’ut naq ink’a’ neke’xket li b’oj, li te, malaj li kape, malaj k’a’ut naq wankeb’ li t’ikr ink’a’ neke’xtiqib’ wi’ rib’. B’ar wan junjunq reheb’ li na’leb’ re lix evangelio li Jesukristo li nokohe’xb’eresi sa’ rilb’al chi us li qatib’el? Eb’ li saaj naru te’xsik’eb’ li na’leb’ a’an sa’ “Xkomon chik li tenq’.”

• Re xtenq’ankileb’ li saaj chiroxloq’inkil lix tib’eleb’, naru taak’ut li video “La más grande creación de Dios” (chi’ilmanq ajwi’ Russell M. Nelson, “El cuerpo: Un don magnífico que debemos apreciar,” 50–55). K’a’ru neke’raj li qaChoxahil Yuwa’ ut li Jesukristo naq taqeek’a chirix li qatib’el? Naru ajwi’ teetz’il rix chan ru naq laj Satanas naxyal qaq’unob’resinkil re naq ink’a’ taqoxloq’i li qatib’el malaj re naq xik’ taqil. K’a’ru naru taqab’aanu re numtaak sa’ xb’een lix tik’ti’ ut li raalehom? B’ar wan li yaal li tooxtenq’a? Wan li na’leb’ naru natenq’an sa’ “Xkomon chik li tenq’.”

eb’ li saaj yookeb’ chi alinak

Li qatib’el maataninb’il qe xb’aan li Dios, ut eb’ li na’leb’ re li evangelio nokohe’xtenq’a chirilb’al chi us.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Genesis 1:27; 1 Korintios 6:19–20; Alma 11:42–44; 40:23; Tzol’leb’ ut Sumwank 89; 130:22

• “Li Junkab’al: Jun Jek’inb’il Aatin choq’ re li Ruchich’och’,” eb’ li oxib’ raqal sa’ xtijlajik

• “Jun santil ochoch k’eeb’il we,” B’ichleb’aal choq’ reheb’ li Kok’al, 73

• Eb’ li articulo chirix li qatib’el sa’ li Liahona re agosto 2019

• Li Awa’b’ej Russell M. Nelson kixye: “Rik’in xk’eeb’al qe li maatan re li tz’ejwalej, li Dios xooxkanab’ chi b’eek chiru li b’e re wank jo’ chanru a’an. Laj Satanas naxtaw ru a’in. … Chi jo’kan, naab’aleb’, maare lix k’ihaleb’ li aaleek li naxk’e sa’ li qab’e a’an re taqamux li qatib’el, malaj xtib’eleb’ li qas qiitz’in. … Laa junxaqalil a’an jun santil ochoch, yiib’anb’il re taawanq choq’ rochochil aamusiq’ li wan chi junelik [chi’ilmanq 1 Korintios 3:16–17; 6:18–20]. Aajel ru xk’uulankil li santil ochoch a’an. Anajwan ut, ninpatz’ eere, … sa’ xtiqib’ankil ut xtusub’ankil eejunxaqalil, ma k’eek’o eech’ool chi rahe’k xb’aan li ruchich’och’, ut ink’a’ xb’aan li Dios? Li k’a’ru nekesume naxk’ut chiru li Dios k’a’ru nekereek’a chirix li chaq’al ru maatan a’in li kixk’e eere” (“Naru taqab’aanu li chaab’il wi’chik ut toowanq chi chaab’il wi’chik,” Jolomil ch’utub’aj-ib’ re abril 2019).

• Li Elder D. Todd Christofferson kixye: “Eb’ li neke’xpaab’ naq li qatib’el xk’ulman yal chi jo’kan neke’xk’oxla naq naru te’xb’aanu yalaq k’a’ru te’raj rik’in, maak’a’ naxye k’a’ru naxk’oxla li Dios malaj yalaq chik ani. Laa’o li wan qanawom chirix lix yaalalil li yu’am naq maji’ nokoyo’la, li ruchich’och’il yu’am, ut li junelikil yu’am tento taqak’e reetal naq teneb’anb’ilo chiru li Dios chixk’eeb’al reetal lix nimal ru yo’ob’tesihom a’an. … Li qatib’el a’an xk’anjeleb’aal li qamusiq’, ut aajel ru naq taqach’olani jo’ nimal naru chiqu. Tento taqaq’axtesi li wankilal wan re sa’ xk’anjelankil ut xtiikisinkil chi uub’ej lix k’anjel li Kristo” (“Reflexiones sobre una vida consagrada,” Liahona, noviembre 2010, 17).

Li k’utuk jo’ li Kolonel

Chak’oxlaheb’ chi us li saaj li wankeb’ xmajelal sa’ k’a’uxlej malaj tib’elej. Tenq’aheb’ chixtawb’al ru naq loq’ ut nim xwankil lix tib’el chixjunileb’ li kristiaan. Li rahok li nakak’ut chiruheb’ chixjunil naru taawanq xnimal xwankil choq’ reheb’ li saaj sa’ chan ru neke’ril rib’ chirib’ileb’ rib’ jo’ ajwi’ chan ru neke’ril rib’ xjuneseb’ rib’.