neke’b’eek li ixq

10 septiembre

Chan ru tintaw xk’ojob’ankil inch’ool rik’in li Jesukristo naq nakam jun raarookil komon?

1 Korintios 14–16

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq xsik’b’al li Qaawa’ naru tooxtenq’a rik’in li qach’a’ajkilal ut lix yalb’al qix?

• Rilb’aleb’ li wankeb’ sa’ rajb’al ru. Ani naqanaw li naraj ru li qatij ut li qamiiwil?

• Xb’oqb’aleb’ chixjunil chixk’ulb’al li evangelio. Ma wan li na’leb’ chirix xwotzb’al li evangelio li xe’aatinak wi’ sa’ li jolomil ch’utam reheb’ li saaj? Jo’ tzoleb’aal malaj molam, chan ru naq tootenq’anq?

• Xjunajinkileb’ li junkab’al chi junelik. Chan ru naq xsik’b’al xk’ab’a’eb’ li qaxe’ qatoon naxkawob’resi li qakomonil rik’in li qaChoxahil Yuwa’ ut li Jesukristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naq nakam ani naqara, naru naq jwal ch’a’aj. Li jache’k rik’ineb’ li qaraarookil komon naxk’e chiqeek’a xnimal xrahil qach’ool. A’b’an laj Pablo kixk’ut naq sa’ roso’jik, “taasache’q xwankil li kamk chi junajwa” (1 Korintios 15:54) sa’ xk’ab’a’ lix waklijik li Jesukristo chi yo’yo. Sa’ jalan chik aatin, “lix may li kamk”—li qarahilal ut lix sachik li qayo’onihom sa’ li yu’am a’in—“sub’b’il rib’ rik’in li Kristo” (Mosiah 16:7–8; chi’ilmanq ajwi’ 1 Korintios 15:54–57).

Chixjunileb’ te’reek’a xmay lix kamik junaq raab’il xb’aan. Chan ru taatenq’aheb’ li saaj chixtawb’al xtuqlajikeb’ xch’ool sa’eb’ li ch’a’ajkilal a’an rik’in xpaab’aaleb’ chirix li Jesukristo? K’oxla li patz’om a’in naq nakakawresi li tzolok rik’in rilb’al 1 Korintios 15, Mosiah 16:7–9, ut Tzol’leb’ ut Sumwank 42:44–46.

Tzolok sa’ komonil

Naru taapatz’ reheb’ li saaj naq te’xseraq’i jo’q’e xe’reek’a xmay k’a’ruhaq. Naru taapatz’ reheb’ k’a’ut naq laj Pablo kiroksi li aatin “may” re xch’olob’ankil li kamk (chi’ilmanq 1 Korintios 15:54–56). K’e xhoonaleb’ chirilb’al 1 Korintios 15 ut chixwotzb’al li na’leb’ neke’xtaw chirix xq’axb’al ru lix may li kamk. Chirix a’an, naru xb’aanunkileb’ li na’leb’ a’in re xtenq’ankileb’ li saaj chixtawb’al ru chan ru naq li Kolonel naru tixk’ojob’ qach’ool naq nakam ani naqara.

• Naru taak’eheb’ li saaj chirilb’al sa’ ka’kab’il junjunq reheb’ li raqal re li loq’laj hu sa’ “Xkomon chik li tenq’.” Naru te’xtz’iib’a xsumenkil li patz’om “K’a’ru li na’leb’ nawaj naq taanaq sa’ inch’ool naq taakamq junaq inkomon?” Patz’ reheb’ naq te’roksi li na’leb’ reheb’ li raqal sa’ xsumenkileb’ li patz’om. Patz’ reheb’ naq te’xwotz k’a’ru li na’leb’ jwal nim choq’ reheb’ ut k’a’ut.

• Naru teetz’il rix jun esil re li jolomil ch’utub’aj-ib’ chirix jun kristiaan li xtaw xyo’onihom rik’in li Kristo naq kikam ani raaro xb’aan. Wankeb’ li seraq’ chirix a’an sa’ li raatin li Hermana Reyna I. Aburto, “Li muqleb’aal kamenaq maak’a’ xq’axom ru” (Jolomil ch’utub’aj-ib’ re abril 2021) malaj li raatin li Elder S. Mark Palmer, “Li qarahilal taawulaq choq’ sahil ch’oolejil” (Jolomil ch’utub’aj-ib’ re abril 2021). Maare taawaj xwotzb’al laa numsihom laa’at malaj xb’oqb’aleb’ li saaj chixwotzb’al chan ru naq xe’xtaw tuqtuukilal ut xyo’onihom rik’in li Jesukristo chirix naq xkam jun xkomon.

• Chirix xk’oxlankil li neke’raj ru li saaj, k’ut jun reheb’ li video sa’ “Xkomon chik li tenq’.” Patz’ reheb’ li saaj naq te’xwotz li xe’reek’a. Chan ru naq xnawb’al naq kiyo’la li Jesukristo chi yo’yo nokoxtenq’a chixtawb’al ru li kamk? Patz’ reheb’ li saaj naq te’xwotz xnawom xch’ooleb’ chirix li Kolonel ut lix waklijik chi yo’yo, ut chan ru naq li nawom a’an naxk’e xyo’onihomeb’.

• Sa’ Jwan 11 tz’iib’anb’il resil li kixk’ul li Kolonel naq kikam jun lix raarookil amiiw—laj Lazaro. Eb’ li saaj naru te’rileb’ li raqal 1–45, ut naq yookeb’ chirilb’al, naru te’xwotz k’a’ru neke’xtzol rik’in xb’aanuhom li Kolonel. K’a’ru naqatzol sa’ li seraq’ a’in li naru tixk’ojob’ qach’ool naq nakam ani naqara? Chan ru taqataaqe xb’aanuhom li Kolonel sa’ “yaab’ak rik’ineb’ li neke’yaab’ak … ut xk’ojob’ankileb’ xch’ool li neke’ajok k’ojob’aak xch’ool”? (Mosiah 18:9). K’a’ru naqatzol sa’ Tzol’leb’ ut Sumwank 42:45–46 li naru nokoxtenq’a chixb’aanunkil a’an? Naru taak’ut li video “Uno a uno (Ministrar con amor)” (ChurchofJesusChrist.org).

jun saaj winq nak’oxlak

Lix nawom qach’ool chirix lix waklijik li Jesukristo chi yo’yo naxk’e qayo’onihom naq nakam ani naqara.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Isaias 25:8; 1 Korintios 15:20–22; Mosiah 16:7–9; Alma 7:11–12; 11:42–44; 22:14; 28:12–14; 40:11–12

• Dallin H. Oaks, “K’a’ru xb’aanuhom li qaKolonel choq’ qe?,” Jolomil ch’utub’aj-ib’ re abril 2021

• Moisés Villanueva, “Usilanb’ilin xb’aan li Qaawa’ chiru chixjunil lin kutan,” Jolomil ch’utub’aj-ib’ re octubre 2021

• Eb’ li video: “Cómo lidiar con la muerte: El domingo llegará,” “Cómo hallar esperanza por medio de la resurrección de Cristo,” “Él te brindará ayuda,” “Hasta que nos volvamos a ver” (ChurchofJesusChrist.org)

Li k’utuk jo’ li Kolonel

Li k’utuk naraj ajwi’ k’anjelak rik’in rahok ut xtenq’ankil jalaneb’ chixk’ulb’al li rosob’tesihom li evangelio, ut chi kok’ aj xsa’ li tenq’ a’in, a’an tz’aqal li ajb’il xb’aan li ani ink’a’ mas nawulak sa’ li tzoleb’aal. Chiqajunil tento took’anjelaq sa’ komonil re xch’olaninkileb’ li ani wankeb’ sa’ ch’a’ajkilal, ut jo’ jun aj k’utunel maare ka’ajat wi’ laa’at taawanq aawankil xtenq’ankil.